SEEMTIRNAK 35

Pathian In Bethel Ah Jakob A Thlawsuah

1Pathian in Jakob hnenah, “Na tim tuah in Bethel ah feh awla va um aw. Na u Esau hnen ihsin na tlan laiih na hnenih a langmi Pathian hrangah biakṭheng don aw,” ti ah a ti. 2Cutikah Jakob in a sungkhat le a hnenih a ummi hmuahhmuah hnenah, “Ram dang khawzing lem nan neihmi hmuahhmuah cu hlon ṭheh thlang uh; thianghlimter-aw uhla hnipuan thiang hruk uh. 3Hi hmun hin kan suak pei ih Bethel ah kan feh pei. Cutawkah ka thlaphan laiih ka thla i rak ngamtertu le ka vahvaihnak kipih i umpitu Pathian hrangah biakṭheng ka don ding a si,” ti ah a ti. 4Curuangah ram dang khawzing lem an neihmi le an khaih laimi hnakhai pawl an lak ih Jakob hnenah an pek. Jakob in Shekhem khuakiangih a ummi sasua kung hnuai ah cu pawl cu a phumta.

5Jakob le a fapa pawl cutawk ihsin an suah tikah a kiangkapih khuasungmi pawl cun an khua siksem suakin an ṭih hai ruangah Jakob le a fapa pawl cu zohman in an dungin an dawi ngam lo. 6An feh vivo ih an milai pawl thawn Kanaan ram Luz khua (Bethel timi khua) an thleng. 7Cutawkah biakṭheng a don ih a u hnen ihsin a tlan laiih Pathian a hnenih a langnak a si ruangah cu hmun cu Pathian hrangah tiin El-Bethel#35.7 El-Bethel: ti cu Bethel Pathian tican a si. ti ah hmin a sak. 8Cun Rebekah umtu Deborah a thi ih Bethel ihsin thlanglam ih a ummi sasua kung hnuai ah an phum. Curuangah acuih thingkung cu, “Allon Bacuth”#35.8 Allon Bacuth: timi cu ṭahnak sasua kung tinak a si. ti ah an ti.

9Jakob cu Mesopotamia ram ihsin a kir tikah Pathian cu a hnenah a lang sal ih thluasuah vanluh a pek. 10A hnenah, “Na hmin cu Jakob a si, sikhalsehla atu thokin Israel na si thlang ding,” ti ah a ti. Curuangah amah cu Israel ti ah kawh a si. 11Cule Pathian in a hnenah, “Keimah cu Ziangkimtithei Pathian ka si. Faate tampi nei in ci tampi na thlah ding ih a hrekkhat cu siangpahrang tla an si ding. Na tesinfa pawl cu an tamzet ding ih miphun tampi-ah an cang ding. 12Abraham le Isaak hnenih ka pekmi ram cu nangmah hnenah ka lo pe ding; cule na hnu ih na tesinfa pawl hnen khalah ka pe ding,” ti ah a ti. 13Cutiih an biak awknak hmunah cun Jakob cu Pathian in a taanta. 14Cutawkah Jakob in hngilhlonak lungphun a phun ih in thawinak hrangah sabitti a burh hnuah hriak a toih. 15Cutawk hmun cu Bethel ti ah hmin a sak.

Rachel A Thi

16Bethel ihsin an ṭhawn ih Efrath#35.16 Efrath: khua cu Bethlehem khua thawn a bang aw. khua an thlen hlan deuhte-ah Rachel cu a nithla a kim ih a nauneih pumnat cu a besia zet. 17Culaifang ah nau dongtu in, “Phang hlah aw, mipa a si,” ti ah a ti. 18Asinain Rachel cu a thi; a thihzik a hnuk a cah zawng ah a fapa cu Ben-oni#35.18Ben-oni: ti cu ka riahsiatnak fapa tican a si. ti ah hmin a sakta. Asinain a pa in Benjamin #35.18 Benjamin ti cu vorhlam kut fapa culole thlanglam fapa tican a si. ti ah a ko.

19Rachel cu a thi ih atuih Bethlehem timi Efrath lamzinah an phum. 20Cule Jakob in a thlaan ah hngilhlonak lung a phun ih, “Rachel lungphun,” ti a si ih cumi cu atu tiangin a um lai. 21Cun Jakob cu a feh vivo ih Eder lungdawlih ralah riahbuk a sak.

Jakob Ih Fapa Pawl

(1 San. 2.1-2)

22Jakob cutawkih a um laiah, a pa ih nupisun Bilhah cu Reuben in a sualpi. Cumi cu a pa Jakob in a theih tikah a thin a heng ngaingai.#35.22 a thin a heng ngaingai timi hi Grik Baibal (LXX) sungih ummi a si.

Jakob cu fapa hleihnih a nei. 23A nupi Leah thawn an hrinmi fapa cu upa bikah Reuben, cun Simeon, Levi, Judah, Issakhar le Zebulun an si. 24Rachel thawn an hrinmi fapa cu Josef le Benjamin an si. 25Rachel ih salnu Bilhah thawn an hrinmi fapa cu Dan le Naftali an si. 26Cun Leah ih salnu Zilpah thawn an hrinmi fapa cu Gad le Asher an si. Hi fapa pawl cu Jakob in Mesopotamia ih a hrinmi an si.

Isaak Thihnak

27Abraham le Isaak an umnak Mamre khua ah a pa Isaak hnenah Jakob cu a thleng. (Mamre cu Kiriath Arba a si lole Hebron ti tla in an ko.) 28Isaak cu tarkuun in a nung ih kum za le sawmriat a ti ah a thi. 29Cule a fapa Esau le Jakob in an phum.

Currently Selected:

SEEMTIRNAK 35: FCL

Highlight

Copy