SEEMTIRNAK 27

Isaak in Jakob Thlawsuah A Pek

1Isaak cu a tarzet zo ih a mit khal a mal thlang. Curuangah a fapa upa bik Esau cu a ko ih, “Ka fapa,” ti ah a ti. Esau in, “Hinah ka um,” ti ah a ti. 2Isaak in, “Ka tar zo ih ka thi cing men ding. 3Na hriamnam, na li le thal la awla, ka hrangah hramlakah sa va hawl aw. 4Cuih sa cu ka duhzawng in thawte in suang awla i rak pe aw. Ka ei pei ih ka thih hlanah ka thlawsuah ka lo peta ding,” ti ah a ti.

5Cutiih Isaak in a fapa Esau hnenih a ṭong cu Rebekah in a rak ngai ringring. Cun Esau in a pa hrangah hramlakih sa a hawl sungah, 6Rebekah in Jakob hnenah, “Na pa in Esau hnenah, 7‘Sa i sum awla rawl thawte in i son aw. Ka ei pei ih ka thih hlanah Bawipa ih hmaiah thlawsuah ka lo peta ding,’ ti ah tubaite ah a ti ka thei. 8Curuangah ka fapa, ka thu ngai awla ka lo simmi tuah aw. 9Kan ṭilva ruun lakah va feh awla, me note pahnih va hruai awla ka hnenah rak keng aw. Ka suang pei ih na pa ih duhzawng in ka tuah pei. 10Cuticun na pa hnenah a ei dingah na hei keng pei; a thih hlanah a thlawsuah a lo pe ding,” ti ah a ti.

11Asinain Jakob in a nu hnenah, “Ka nu, ka u Esau cu hmul tampi a nei ih kei cu taksa naalmi ka si, ti na thei ko. 12Ka pa in i tham men ding sikhawh, ka bum ti i thei thotho lo ding maw? Cuticun thlawsuah si sawn loin camsiatnak riangri ka parah ka thlenter pang ding,” ti ah a ti. 13Cutikah a nu in, “Ka fapa, camsiatnak a thleng asile keimah ih parah siseh; ka lo simmi cu tuah sawn aw; va fehzaang awla me note cu ka hrangah va la aw,” a ti. 14Jakob cu a va feh ih a nu hnenah me note cu a rak keng; cule a nu in a pa ih duhzawng in rawl cu a suang. 15Cun Esau ih hnipuan ṭha bik, a nu ih ret sakmi cu Rebekah in a lak ih Jakob a hrukter. 16A nu in Jakob ih baan tluan le hmul um lonak a hngawng cu mephaw in a tuam thluh. 17Cun rawl a thawmi le sang a tuahmi cu a nu in Jakob a hei kenter.

18Cutiin Jakob cu a pa hnenah a feh ih, “Ka pa,” ti ah a va ti. A pa in, “Awi, ka fa, zo deuh so na si?” ti ah a rak ti. 19Jakob in, “Na fa upa Esau ka si, na sim vekin ka tuah zo. Zaangfahte in ra to awla ka lo summi sa hi ra ei in thlawsuah i pe aw,” ti ah a ti. 20Isaak in, “Cuti zamrangin ziangtinso na va ngah, ka fapa,” a ti. Cutikah Jakob in, “Bawipa na Pathian in i bawm ih ka ngah a si,” ti ah a ti. 21Cule Isaak in Jakob hnenah, “Khuihnik, ka lo tham theinak dingah i rak naih deuh aw. Ka fapa Esau na si ngaingai maw, si lo so?” ti ah a ti. 22Jakob in a pa cu a hei naih tikah a pa in a rak tham ih, “Na aw cu Jakob ih aw a bang naón na baan cu Esau ih baan a bang fawn,” ti ah a ti. 23Isaak in Jakob cu a rak theih thiam lo, ziangahtile Esau ih baan bangin hmul a nei thluh ve. Thlawsuah pek a hun tum tikah a pa cun, 24“Ka fapa Esau na si ngaingai maw?” ti ah a sut sal. Jakob in “Ka si ko,” ti ah a ti. 25Cutikah Isaak in, “Na suanmi sa cu i pe aw; ka eita pei ih thlawsuah ka lo pe ding,” ti ah a ti. Jakob in sa cu a pek ih in dingah sabitti khal a pek. 26Cun a pa in, “Ka fa, i rak naih awla i hnam aw,” ti ah a ti. 27Cutiin Jakob cun a pa cu a hei naih ih a hnam tikah a pa in a hnipuan rim a hnim ih cuih hnuah thlawsuah a pek.

“Hi ka fapa ih rim cu,

Bawipa ih a thlawsuahmi

hramlak rim a bang;

28Pathian in vanih daifiim lo thlak in,

Na leiram cu leiṭha si hram seh;

Fang le sabitti tampi lo pe seh.

29Miphun tampi in

na hna ṭuan hai sehla,

Mi tampi na hmaiah kun hai seh.

Na sungkhat pawl ih tlunah

lal na si pei ih,

Na unau ih tesinfa pawl cu

na hmaiah kun hai seh.

A lo camsiattu cu

camsiat si ve hai sehla,

A lo thluasuahtu cu

thlawsuah si ve hai seh,” ti ah a ti.

Esau In Isaak Ih Thlawsuah A Dil

30Cutiih a pa Isaak in thlawsuah a pek ṭheh hnuah Jakob cu a suak. Cu ṭheh vete in a ramtawihnak in Esau cu a ra tlung. 31Anih khal in rawl thawthaw a suang ih a pa ih hnenah a hei keng. “Ka pa, zaangfahte in to awla, na fapa ih ka rak kenmi sa cu ei in thlawsuah i pe hram aw,” ti ah a ti. 32Isaak cun, “Zoso na si?” ti ah a sut. Anih in, “Na fa upa Esau ka si,” ti ah a ti. 33Cutikah Isaak cu a pumpuluk hnin koin a thir thlohthlo ih, “Cuti asile sa a kap ih ka hnenih a rak kengtu cu zoso a si? Na rat hlante-ah ka rak ei zo. A neta bik ka thlawsuahnak cu amah ka pe zo ih amah ih ta kumkhua in a si zo,” ti ah a ti. 34Esau in cumi a theih tikah, ninghangin napi in a ṭap ruangro; “Ka pa, na thlawsuahnak i pe ve aw,” ti ah a ṭap phah in a dil. 35Asinain Isaak in, “Na naupa a ra ih i bum a si. Na thlawsuahnak a co thluh zo,” ti ah a ti. 36Cule Esau in, “Atu hi a voihnih i bumnak a si. Jakob#27.36 Jakob ti le Bum ti cu Hebru ṭong in a aw suah a bang aw. tiih an kawh hi a dik a si. A hmaisaah fatir ka sinak i long zo; atu-ah ka thlawsuahnak i long fawn. Ka hrangah thlawsuahnak ziangtetal na nei nawn lo maw?” ti ah a ti. 37Cutikah Isaak in, “Amah cu na tlunah lal ah ka tuah zo ih a sungkhat pawl tiangin a hnaṭuantu dingah ka tuah thluh zo. Rawl le sabitti khal ka pe thluh zo. Ziang so na hrangah a taang nawn pei? ka fa,” ti ah Esau cu a ti. 38Asinain Esau in a dil hrih thotho. “Maw ka pa, thlawsuahnak pakhat lawng maw si na neih? Kei khal i thlawsuah ve hram ko aw,” ti ah a ti ih Esau cu napi in a ṭap.

39Cutikah Isaak in,

“Na hrangah lei le

ram ṭha a um nawn lo,

Na leiram hrangah

vanih daifiim khal a um lo.

40Na hriamnam rinsan in

na nung pei ih,

Na naupa ih siahhlawh na si pei.

Sikhalsehla ral na tho asile,

A lo uknak sungin na suak ding,” ti ah a ti.

41A pa in Esau co dingmi thluasuahnak cu Jakob a pek thluh ruangah Esau in Jakob cu a hua ih, “Ka pa hi rei a nung nawn lo ding; a thih hnuah Jakob cu ka that tengteng pam ding,” ti ah a thinlungte in a ruat. 42Asinain Esau ih tummi cu Rebekah in a thei ih Jakob cu a ko. “Ngaihnik, na u Esau in lehrul a tum ih nangmah lo thah a tum a si. 43Cu a si ruangah, ka fapa, ka lo sim vekin tuah aw. Zamrang in na tim tuah awla Haran khua ih ka ṭapa Laban hnenah tlan aw. 44Na upa ih thinhengnak a reh ih, 45a hnenih na thil tuahmi pawl a hngilh thluh hlantiang na pu hnenah va um aw. Cuih hnuah mi pakhatkhat ka thlah pei ih ka lo kirter leh ding. Ziangah so ni khat sungah ka fapa pahnih hloral ding cu ka sian ding?” ti ah a ti.

46Cule Rebekah in Isaak hnenah, “Esau ih ṭhitmi hnamdang nupi pawl hi ka ning tuk ih ka khop tuk zo. Hi vek Hit phun nunau Jakob in a ṭhi ve tla a si ahcun kei cu ka thih ah a ṭha sawn ding,” ti ah a ti.

Currently Selected:

SEEMTIRNAK 27: FCL

Highlight

Copy