SEEMTIRNAK 28

Isaak In Laban Hnenah Jakob A Thlah

1Cun Isaak in Jakob cu a ko ih a thluasuah hnuah, “Kanaan nunau cu na ṭhi lo pei. 2Na tim tuah awla Mesopotamia ram, na nuih pa Bethuel ih inn ah va feh aw. Cutawkih nunau, na pu Laban ih fanu pakhatkhat va ṭhi aw. 3Ziangkimtithei Pathian in nan ṭhit awknak cu lo thlawsuah hramsehla faate tampi nei in miphun tampiih pa ah lo canter hram seh. 4Pathian in Abraham a thlawsuah zo vekin nangmah le na tesinfa pawl cu lo thlawsuah hram seh; Pathian in Abraham hnenih a pekmi na umnak ram hi co hram aw,” ti ah a ti. 5Cule Isaak in Jakob cu Mesopotamia ram Aram mi Bethuel ih fapa Laban hnenah a thlah. Laban cu Jakob le Esau ih nu Rebekah ih ṭapa a si.

Esau In Nupi Dang A ṭhi

6Cule Isaak in Jakob cu a thluasuah ih nupi va ṭhi dingah Mesopotamia ramah a thlah ti kha Esau in a thei. Cuih tlunah a pa in Jakob a thluasuah tikah Kanaan mi nunau cu ṭhi lo dingin a kham ih, 7Jakob in a nu le a pa ih thu a ngai ruangah Mesopotamia ramah a feh a si ti khal a thei fawn. 8Cutikah a pa Isaak in Kanaan nunau cu a duh lo ti cu Esau in fiangtein a thei ngah. 9Curuangah Abraham ih fapa Ishmael hnenah Esau cu a feh ih, a neih ciami a nupi pawl ih tlunah, a dang pakhat Ishmael ih fanu, Nebaiothih farnu, Mahalath a ṭhit.

Bethel Ah Jakob Ih Mang

10Cun Jakob cu Beer-sheba in a suak ih Haran lamah a feh. 11Hmun pakhat ah a thleng ih ni a tlak zo ruangah cutawkah a riak. Lungto pakhat lukhamah a hmang ih a it. 12Cule a mangah leilung in van a banmi kailawn saupi a hmu. Pathian ih vancungmi pawl tla cu cuih kailawn parah an ṭum an kai. 13Cun Bawipa cu a kiangah a ding. Cutikah Bawipa in, “Keimah cu Abraham le Isaak ih Pathian Bawipa ka si. Na ihnak hmun le ram hi nangmah le na tesinfa pawl ka lo pe ding. 14Na tesinfa pawl cu leilung parih leivut zat an si ding. An ram cu nisuah nitlak, saklam le thlanglam ah an kauh vivo ding. Nangmah le na tesinfa pawl ka lo thlawsuah bangtuk in leilung tlunih miphun hmuahhmuah in thlawsuah in dil ding.#28.14Nangmah le na tesinfa … leilung tlunih miphun hmuahhmuah in thlawsuah in dil ding timi hi, Nangmah le na tesinfa ruangah leitlun mi hmuahhmuah ka thlawsuah hai ding ti khal a si thei. Seem 12.3 ah zoh aw. 15Na hnenah ka um ding; na fehnak kipah ka lo humhim ding ih hi ramah ka lo kirter sal ding. Ka lo tiammi hmuahhmuah hi ka kimter thluh hlan lo ka lo tanta hrimhrim lo ding, ti cu ciing ringring aw,” ti ah a ti. 16Cutikah Jakob cu a ṭhang ih, “Bawipa cu hi hmun ah a um nan homaw thei loih ka rak um,” ti ah a ti. 17Cun Jakob cu a thin a phang ih, “Ziangtluk rapthlakza hmun so a si. Vancung kotka le Bawipa ih inn ngaingai a rak sihi!” ti ah a ti.

18A thaizing zingpitte in Jakob cu a tho ih lukhamih a hmanmi lungto cu a lak hnuah hngilhlonak lungphunah a phun. Cule hriak a toih ih Pathian hnenah a ap. 19Jakob in a cuih hmun cu Bethel#28.19 Bethel timi Hebru ṭong sullam cu Pathian ih inn tican a si. ti ah hmin a sak. A hlanah cun a cuih khua cu Luz ti ah an ko. 20Cuih hnuah Jakob in Bawipa Pathian hnenah, “Ka hnenah na um ih ka fehnak lamzinah i humhim ih ei ding rawl le hruk ding hnipuan i pek ih tlunah, 21ka pa ih inn ah himdamte in ka thlen sal thei a si ahcun Bawipa nangmah cu ka Pathian ngaingai na si ding. 22Hi ka phunmi hngilhlonak lungphun hi Pathian nangmah ih inn a si ding ih i pekmi hmuahhmuah sung ihsin ṭhenhra-ih ṭhenkhat ka lo pe tengteng ding,” ti ah thukam-awhnak a tuah.

Currently Selected:

SEEMTIRNAK 28: FCL

Highlight

Copy