SEEMTIRNAK 26

Gerar Le Beer-sheba Ah Isaak A Um

1Abraham sanih paam voikhat a rak tlun hlei ah hi ram ah paam a tlung sal. Curuangah Gerar ih a ummi Filistin siangpahrang Abimelek hnenah Isaak cu a feh. 2Cutikah Bawipa cu Isaak hnenah a lang ih a hnenah, “Izipt ramah cun na feh lo pei; na um ding ka lo tinak ram ah um aw. 3Hitawk ah tikcu tawite sung um awla, na hnenah ka um ding ih ka lo thlawsuah ding; ziangahtile nangmah le na tesinfa pawl hnenah hi ram hmuahhmuah cu ka lo pe ding a si. Na pa Abraham hnenih ka rak tuahmi thukam cu ka kimter ding. 4Van ih arsi zat in tesinfa ka lo pe ding ih an hnenah hi ram hmuahhmuah cu ka pe ding. Na tesinfa pawl ka thlawsuah bangin leilung tlunih miphun hmuahhmuah in thlawsuah in dil ding. 5Abraham in ka thukham a thlun ih ka thu a ngai ruangah nangmah cu ka lo thlawsuah ding,” ti ah a ti.

6Cutiin Isaak cu Gerar ah a um. 7Cuih khuami pawl in a nupi thu an suh tikah, “Ka nupi a si,” ti ngam loin, “Ka farnu a si,” a ti. Ziangah a ngam lo tile Rebekah cu a mawi ngaingai ih Rebekah co duh ah in that pang ding ti a phan ruangah a si. 8Cun Isaak cu tikcu rei nawn hi ramih a um hnuah voikhat cu Filistin siangpahrang Abimelek cu a tukvirh in khua a cuan ih Isaak in Rebekah a pom lai kha a hmu. 9Hmakhatte-ah Abimelek in Isaak cu a ko ih, “Rebekah hi na nupi a si, a si ko lo maw? Ziangah so ka farnu a si, na ti?” ti ah a sut. Cutikah Isaak in, “Ka nupi a si, ka ti ahcun in that ding, ti ka ruah ruangah a si,” ti ah a ti. 10Cule Abimelek in, “Ziangah so kan parah hiti in thil na tuah? Ka milai pakhatkhat na nupi parah a sual ih mawhphurh kan si le nangmah ih ruangah a si ding,” ti ah a ti. 11Cun Abimelek in, “Hi te nupa, Isaak a si lole Rebekah hi zohman in nan tisia lo pei; a tisiatu nan um ahcun thah nan tong ding,” ti ah a milai pawl hnenah thu a pek.

12Cun Isaak in cutawk ramah thlaici a tuh ih acuih kum cu a tuhmi ih let zakhat a khawm; ziangahtile Pathian in a thluasuah ruangah a si. 13A ṭhangso vivo ih milianzet ah a cang. 14Cutiin caw le tuu a ruunruun in a nei ih sal khal tampi a neih hrangah Filistin mi pawl in an iksiik zet. 15Curuangah a pa Abraham nun laiih a hnenum pawl ih laih mi tikhur hmuahhmuah cu leilung an silhsak thluh.

16Cule Abimelek in Isaak hnenah, “Kannih hnakin na cah tuk zo ruangah hmun dangah feh aw,” ti ah a ti. 17Curuangah Isaak cu a suak ih Gerar phairawn ah buk a sak ih a um. 18Cutawkah tikhur pawl, a pa Abraham sanih laihmi, a thih hnu ih Filistin pawl in an silhmi pawl cu a lai sal thluh ih a pa ih hmin sakmi vekin Isaak in hmin a pek sal thluh a si.

19Cun voikhatah Isaak ih hnenum pawl in acuih phairawn ah tikhur an lai ih tipuut ṭhazet pakhat an tong. 20Cutikah Gerar khua ih tuukhal pawl in, “Hi tidai cu kanmah ih ta a si,” ti ah Isaak ih tuukhal pawl hnenah an ti ih an to-aw. Cutiih an tawh-awk ruangah Isaak in acuih tikhur cu, “Esek,”#26.20Esek ti cu tawh awknak tican a si. ti ah hmin a sak. 21Cuih hnuah Isaak ih hnenum pawl in tikhur dang an lai ih el awknak a um thotho ruangah Isaak in acuih tikhur cu, “Sitnah,”#26.21Sitnah ti cu ral awknak tican a si. ti ah a ko. 22Cun Isaak cu acuih hmun in a ceer ih tikhur dang a lai lala. El awknak a um nawn lo ruangah acuih tikhur cu, “Rehoboth,”#26.22 Rehoboth ti cu luatnak a si lole ram kaupi tican a si. ti ah a ko. Cule Isaak in, “Atu cu Bawipa in hi ramah luatnak i pe zo ih kan ṭhangso thlang ding,” a ti.

23Cun Isaak cu Beer-sheba ah a hung ceer ih, 24acuih zanah Bawipa cu a hnenah a lang ih, “Keimah cu na pa Abraham ih Pathian ka si. Zianghman ṭih hlah, na hnenah ka um. Ka salpa Abraham ih vaangah ka lo thlawsuah ding ih tefa tampi ka lo pe ding,” ti ah a ti. 25Cutawkah Isaak in biakṭheng a don ih Bawipa a biak. Cun umhmun a khuar ih a hnenum pawl in tikhur an lai.

Isaak Le Abimelek Ih Thutiam Awknak

26Cule Abimelek cu Gerar ihsin a ralkap uktu Fikol le ruahnak petu Ahuzzath thawn Isaak tong dingin an ra. 27Cutikah Isaak in, “Zianghrangah ka hnenah nan ra? In ngaih lo ruangah nan khua le nan ram in in dawi a si lo maw?” ti ah a ti. 28Cule annih in, “Pathian cu na hnenah a um hrimhrim a si, ti ah atu cun kan thei zo ih kan karlakah siatcam in thutiam awknak um sehla tiin kan ruat. Na parih siatsuahnak kan thlenter lo bangtuk in, 29nang khal in kan parah siatsuahnak na thlenter lonak dingah thu in kam-aw, ti kan duh. Na hnenih zaangfahnak kan rak neih ruangah daitein kan lo fehter. Atu-ah cun Bawipa ih thlawsuah tampi na dong a si,” ti ah an ti. 30Cumi a theih tikah Isaak in rawl thawzetin a suang ih acuih zan cu puar zetin an ei. 31A thaizing zingpitte in siatcam thutiam awknak an tuah ih Isaak thawn rualpi ṭhazet cang in an ṭhen-aw.

32Cuih ni-ah Isaak ih hnenum pawl an ra ih tikhur an laihnak thu a hnenah an ra sim. “Tidai kan tong zo,” ti ah an ti. 33Curuangah cuih tikhur cu Shibah#26.33Shibah ti cu thutiam awknak ti can a si. ti ah a ko. Atu tiangin acuih khawpi cu Beer-sheba #26.33Beer-sheba ti cu Thutiam awknak Tikhur tican a si. ti ah an run kota.

Esau Ih Ramdang Nupi Pawl

34Esau cu kum sawmli a ti tikah Hit mi Beeri ih fanu Judith a ṭhit. Cuih hnuah Hit mi thotho Elon ih fanu Basemath a ṭhi lala. 35Cuticun Isaak le Rebekah thinlung hartertu-ah an cang.

Currently Selected:

SEEMTIRNAK 26: FCL

Highlight

Copy