SEEMTIRNAK 25

Abraham Ih Tesinfa Dang

(1 San. 1.32-33)

1Abraham in nupi dang a ṭhi ih a hmin cu Keturah a si. 2Keturah thawn an hrinmi fapa pawl cu Zimran, Jokshan, Medan, Midian, Ishbak le Shuah an si. 3Cun Jokshan ih fapa pawl cu Sheba le Dedan an si ih Dedan ih hrinmi fapa pawl cu Asshurim, Letushim le Leummim an si. 4Midian ih fapa pawl cu Efah, Efer, Hanok, Abida le Eldaah an si. An zatein Keturah ih tefa pawl an si.

5Abraham in a neihmi hmuahhmuah cu Isaak a rohta. 6Asinain a thih hlanah a nupi dangih fapa pawl hnenah laksawng a zem ve hai ih Isaak thawn umtlang lo dingin hmundang nisuahnak ramah a fehter hai.

Abraham Thihnak Le Vuinak

7Abraham cu kum za le sawmsarih le kum nga tiang a nung; 8Tarkuun khuuksuang in a nun hnuah a thi ih a miphunpi hnenah finkhawm in a um. 9Hit mi Zohar ih fapa Efron hnen ihsin ram a leimi, Mamre ih nisuahnak lam Makpelah lungpuk ah a fapa Isaak le Ishmael in an phum. 10Hit miphun hnen ihsin amah Abraham ih rak lei ciami ram a si. A nupi Sarah thawn an pahnih in cutawkah phum an si. 11Abraham thih hnuah a fapa Isaak cu Pathian in a thluasuah ih, “Beer-lahai-roi” timi tikhur kiangah a um.

Ismael Ih Tesinfa Pawl

(1 San. 1.28-31)

12Sarah ih salnu, Izipt mi Hagar thawn an hrinmi Abraham ih fapa Ishmael ih tesinfa pawl cu a hnuailam bangtuk an si. 13Ishmael ih fapa pawl hmin cu a sangsangin, upa bikah Nebaioth, cun Kedar, Adbeel, Mibsam, 14Mishma, Dumah, Massa, 15Hadad, Tema, Jetur, Nafish le Kedemah an si. 16Himi pawl hi Ishmael ih fapa pawl an si ih an khua le an umnak ram hmin cu anmah ih hmin ciar suang ih sakmi an si. Anmah tla cu miphun hnam hleihnih ih cithlahtu an si. 17Ishmael cu kum za le sawmthum le kum sarih a nung. A thi ih a miphunpi hnenah finkhawm in a um. 18Ishmael ih tesinfa pawl cu Izipt ram in nisuahnak, Assiria ram fehnak lam, Havilah le Shur karlak ramah an um. Abraham tesinfa hnenih um loin a dangte in an um.

Esau Le Jakob Suahnak Thu

19Abraham fapa Isaak ih thuanthu cu hiti in a si. 20Mesopotamia ram Aram mi Bethuel ih fanu, Laban ih farnu, Rebekah a ṭhit tikah Isaak cu kum sawmli a si. 21Rebekah in fa a neih lo ruangah Isaak in Bawipa ih hnenah thla a camsak. Bawipa in a thlacam cu a thei ih Rebekah cu fa a vun. 22A pum sungah faphir an seem ih an eng-awk rero kha a theih tikah a don a har ih, “Hiti a si ahcun ziangso ka nun man a um?” ti ah a ti. Cule Bawipa hnenah thla a cam ih,

23 Bawipa in,

“Na pum sungah

miphun pahnih an um.

A ral-aw phun hrimhrim in

an suak ding;

Pakhat cu a dang pa hnakin

a cak deuh ding ih,

A upa sawn in

a naupa a rian ding,” ti ah a ti.

24Rebekah cu a nithla a kim tikah faphir a hring. 25A suak hmaisa pa cu misen a si ih a pumpuluk in hmul a nei. Curuangah Esau#25.25Esau timi cu Hebru ṭong in a umnak ram Seir timi a sawh duhmi a si ih, Seir ti le hmulnei t ti cu a aw suah a bang aw. ti ah a hmin an sak. 26A nauta pa a rung suah tikah a upa Esau ih kedil kaihnget tahratin a suak. Curuangah a hminah Jakob#25.26Jakob timi cu Hebru ṭong in kedil ti a si lole bum ti thawn a aw suah a bang aw. an sak. Fapa a neih tikah Isaak cu kum sawmruk a ti.

Esau In A Fatir Covo A Zuar

27Cun an unau an ṭhang vivo ih Esau cu sakapzet a si ih hramlakih ramtawi duh zettu-ah a cang. Jakob cu midai a si ih inn lawnglawng ah a um. 28A sakahmi a ei ṭheu ruangah Isaak in Esau cu a duh deuh; asinain a nu Rebekah cun Jakob a duh sawn.

29Nikhat cu Jakob in pehang a suan laifangah a ramtawihnak in Esau cu a ra tlung. 30A ril a rawn tuk ruangah a naupa Jakob hnenah, “Ka ril a rawng tuk lawmmam, na tihang sente kha kaa khatte talin i pe aw,” ti ah a dil. (Curuangah Edom#25.30Edom timi cu Hebru ṭong in a sen ti thawn a aw suah a bang aw. tiih an kawhnak a si.) 31Asinain Jakob in, “Na fatir covo i pe awla ka lo pe ding,” ti ah a ti. 32Cutikah Esau in, “Ka lo pe ding; rilrawng in ka thi zik thlang ih ka covo cu ka hrangah ziangso ṭhathnemnak a neih?” ti ah a ti. 33Cule Jakob in, “Ka covo ka lo pe tengteng ding, tiin thu i kam hmaisa aw,” ti ah a ti. Cutiin Esau cun thu a kam ih fatir a sinak covo cu Jakob hnenah a zuar. 34Cule Jakob in sang le pehang a suanmi cu a pek. Esau in a in a ei hnuah a tho ih a feh. Fatir a sinak covo cu zianghman ah a siar lo.

Currently Selected:

SEEMTIRNAK 25: FCL

Highlight

Copy