Marc 14

Apofãsirea a Preftsilor

1Dupã doauã dzãli eara Pashtili shi Adzãmili, shi ma mãrilji a preftsilor shi scriblji cãfta cum s-lu acãtsa Isus cu ilei, shi s-lu vãtãma. 2Ma dzãtsea: “Nu tu chirolu a sãrbãtoarãljei, tsi s-nu aibã mintiturã tu populu.”

Isus la Betania

3Tora elu eara tu Betania, tu casa al Simon tsi eara lepros, shi cãndu eara la measã intrã unã muljiearã cu un vasã di alabastru cu untulem njiurizmos cu nard curat, multã scump shi ea lu frãmsi vaslu di alabastru shi lj-lu-vãrsã untulemlu pri cap. 4Niscãnts s-nãrãirã shi dzãsirã: “Cãtse tutã aestã hãrgiuiri a untulemlui?” 5Cã aestu untulem putea s-vindea ma mult di trei suti di denari shi aesti si s-da a niavutsilor. Shi eara nevrisits cu nãsu. 6Ma Isus dzãsi: “Alãsats-lu! Cãtse u munduits? Ea featsi un lucru bunã trã mini. 7Cã niavutsilji va li avets totãna cu voi, shi cãndu s-vrets, putets s-lã fãtsets ghini. Ma mini nu va mi-avets totãna. 8Ea featsi atsea tsi putu, aumsi di ma nãinti truplu a meu trã ngrupari. 9Dealihea ma vã dzãcã cã tu tutã dunjeaua iutsido tsi va s-hibã predicat aestu evanghelu, va sã spunea shi atsea tsi ea featsi, trã adutsearea aminti a ljei.”

Pretsul di Pridari

10Atumtsea Iuda Iscariotul, un di doisprãdzatsilji, s-dusi la mãrilji a preftsilor tsi s-prida Isusul. 11Shi elji cãndu lu avdzãrã, s-hãrãsirã shi lji tãxirã cã va lji da pãradzi. Ashã elu cãfta oara tsi prindi tsi s-lu prida.

Etimãsirea a Pashtiljei

12Tora tu prota dzuã a Adzãmilor, cãndu s-featsi curbanlu a Pashtiljei ucenitsilji a lui dzãsirã: “Iu vrei s-nidzem s-adrãm di mãcari Pashtili?” 13Shi elu pitricu doi di ucenjitsili a lui dzãcãnda: “Imnats-vã tu cãsãbã shi aclo va s-adunats un om tsi tsãni un stamnã plinã cu apã, urmats-lu atselu. 14Shi aclo iu elu va s-intrã, dzãtsets-lji a domnului ali casi: ‘Nvitsãtorlu ntreabi: Iu easti udãlu tsi putem s-mãcãm Pashtili cu ucenitsilji a melji?’ 15Shi elu va vã spunã nsus unã udã marã uidisitã shi gata. Aclo adãrats-lu ti noi.” 16Ucenitsilji a lui s-dusirã, agiumsirã tu cãsãbã shi aflarã ashã cum dzãsi elu, shi etimãsirã Pashtili.

Tsina a Pashtiljei

17Cãndu s-featsi seara, Isusul vini cu di doisprãdzatsilji. 18Cãndu ma shidea la measã shi ma mãca, Isusul dzãsi: “Dealihea vã dzãcã cã un di voi tsi ma mãcã cu mini, va mi vindã.” 19Atumtsea elji ahurhirã sã nvirineadzã shi dzãtsea un cu alantu: “S-nu hiu mini?” [Shi un altã dzãsi: “S-nu hiu mini?”]#14:19 Tu alti manuscrisi aestã nu s-aflã. 20Shi elu, apãndisinda lã dzãsi a lor: “Easti un di doisprãdzatsilji tsi moalji cu mini tu cãtsãn. 21Ma Hiljilu a omlui ma s-dutsi cum easti scriatã trã nãsu, ma cavai di atselu om tsi vindi Hiljilu a omlui. Va eara ma ghini trã nãsu, tsi atselu om s-nu eara amintat pute!”

Pisti-ligãturea Noauã

22Shi candu elji ma mãca, Isusul lo pãnea, ghinicuvãntã, u pãrtsã, sh-lu deadi a lor dzãcãnda: “Loats shi mãcats. Aestu easti truplu a meu.” 23Deapoea lo cupa, lu hãrãstãsi, lã deadi a lor shi tuts biurã di nãsã. 24Atumtsea lã dzãsi: “Aestu easti sãndzilu a meu, a pistãligarãljei, tsi s-vearsi trã multsã. 25Dealihea vã dzãcã cã nu va beau ma dit carpolu a yinjãlei pãnã tu atsea dzuã cãndu va s-lu beau di nou tu amirãriljea al Dumnidzãu.” 26Shi dupã tsi cãntarã un himn#14:26 Eara un adet a Iudeilor tsi s-cãnta un psalm tu vahtea a Pashtiljei. Nãinti di mãcari elji cãntau Ps. 113-114 shi Ps. 115-118 dupã vahti di mãcari. , inshirã shi s-dusirã cãtrã Muntsili a Masnjilor.

Isus shi Petrul

27Shi Isusul lã dzãsi a lor: “Voi tuts va s-vã scandalizats cu mini aestã searã, cã easti scriatã:

‘Va lu agudescã picurarlu

shi oili va s-arãspãndeascã.’

28Ma dupã tsi va mi-injedzã, mini va mi ducã nãinti di voi tu Galilei.” 29Shi Petrul lji-dzãsi: “Ca s-hibã cã tuts alantsilji s-scandalizeascu cu tini, mini nu va mi scandalizescu.” 30Shi Isusul lji-dzãsi: “Mini ma ts-dzãcã dealihea cã azã, tu aeastã noapti, nãinti tsi cucotlu s-cãntã doauã ori, tini va mi aleapideshti trei ori.” 31Ma elu insistãnda, dzãtsea: “Shi ca s-hibã tsi prindi s-mor cu tini, nu va ti aleapidescu pute.” Un soi dzãsirã shi tuts alantsilji.

Isus tu Ghetsemani

32Deapoea agiumsirã la un loc tsi s-acljima Ghetsemani, shi elu lã dzãsi a ucenitsilor a lui: “Apunats-vã aoa, pãn cãndu mini s-hiu pãrãcãlsitã.” 33Shi lo cu nãsu Petrul, Iacovul shi Ioanul, shi ahurhi s-aibã frica shi agoniã. 34Sh-lã dãsi a lor: “Suflitlu a meu easti multu nvirinat, pãnã tu moarti, armãnets aoa shi s-hits dishtiptat.” 35Shi, cum s-dusi nihiam nãinti, cãdzu pi dintsi shi s-pãrãcãlsea, tsi ma s-putea, s-fudzea di la nãsu aestã oarã. 36Shi dzãsi: “Abba, Tati, itsido trã tini easti putut, dipãrteadz-lu di la mini aestã cupã. Ma nu si s-fac atsea tsi voiu mini, ma atsea tsi vrei tini!” 37Shi s-turnã nãpoi, li aflã durnjinda shi lji dzãsi a Petrului: “Simon ma dornji? Nu putush sã stai dishtiptat nits unã oarã? 38Armãnets dishtiptat shi pãrãcãlsit-vã tsi s-nu intrats tu provã. Duhlu easti etimu, ma truplu easti niputut.” 39S-dipãrtã nãpoi shi s-pãrãcãlsi dzãcãnda idhiili zboari. 40Shi cãndu s-turnã, lã aflã nãpoi tu somn, cã ocljilji a lor eara greli shi elji nu shtia tsi s-apãndisea. 41S-toarnã di a treia oarã shi lã dzãtsi a lor: “Ninga ma durnjits sh-vã discurmats. Nãmalu, vini oara! Ia, Hiljilu a omlui ma s-prida tu mãnjili a amãrtioshilor. 42Sculats-vã, s-ni dutsem. Ia, atselu tsi ma mi prida easti aproapi!”

Acãtsarea al Isus

43Shi tu atsea oarã, cãndu elu ninga ma grea, vini Iuda, un di doispridzatsilji, shi cu nãsu unã multsãmi marã cu spãts shi cu pãlenji, pitricut di mãrlji a preftsilor, di scriblji shi di aushlji. 44Sh-elu tsi ma lu pridea lji avea datã atsilor un semn: “Cai va s-bashã, elu easti. Acãtsats-lu shi adutsets-lu cu mult cãshtigã.” 45Shi cum agiumsi s-apruchiã trãoarã la nãsu shi lji dzãsi: “Rabbi, Rabbi!” Shi lu bãshã. 46Atumtsea elji bãgarã mãna pi nãs shi u-acãtsarã. 47Un di atselji tsi s-alfa aclo, scoasi spata, agudi sclavlu a arhipreftului shi lji tãljiã ureacljea. 48Shi Isusul apãndisinda, lã dzãsi: “Avets vinit cu spãts shi cu pãlenji tsi s-mi acãtsats? 49Cathi dzuã earam namisa di voi tu templu nvitsãnda shi voi nu mi acãtsat. Ma aeastã s-fatsi s-implineascã Scriturili.” 50Atumtsea ucenitsilji lu alãsarã sh-fudzirã tuts. 51Shi un tinir, tsi era anvãrtit cu un pãndzã pi truplu dispuljat ma lu urma, shi elji lu acãtsarã. 52Elu u alãsã pãndza shi fudzi dispuljat.

Isus Nãinti al Sinedrul

53Atumtsea elji lu adusirã Isusul la arhipreftlu iu s-adunarã mãrilji a preftsilor, aushlji shi scriblji. 54Shi Petrul lu urmã di diparti pãn nãuntru tu pãlatlu a arhipreftului shi s-apunã aclo deadun cu vigljitorlji shi s-ncãldza ningã foc. 55Shi mãrlji a preftsilor shi tutã sinedrul cãfta mãrtirii contra al Isus s-lu vãtãma, ma nu ma afla. 56Mults oaminj fãtsea mãrtirii arãdioasã contra a lui, ma mãrtiriili a lor nu undzea. 57Atumtsea niscãnts si scularã shi mãrtirsirã cu ilei contra a lui dzãcãnda: 58“Noi lu avem avdzãtã cã tsi ari dzãsã: ‘Mini va lu aspargã aestu templu adãratã cu mãnjili, shi di trei dzãli va s-adarã unã altã tsi nu easti faptã di oamnjilji.’” 59Ma nits ashã mãrtiria a lor nu s-uidisea. 60Atumtsea si sculã arhipreftulu namisa di cunvend shi lu ntribã Isusul dzãcãnda: “Nu apãndiseshti dip? Tsi ma mãrtirsescu aeshtã contra a tsãia?” 61Ma elu pãpsi shi nu apãndisi dip. Arhipreftul nãpoi lu ntribã shi lj-dzãsi: “Tini eshti Hristolu, Hiljilu a Ghinicuvãntatlui?” 62Shi Isusul dzãsi: “Mini escu. Shi voi va lu videts Hiljilu a omlui apunat tu nandreapta a Puteariljei shi vininda cu norilji a tserlui.” 63Atumtsea arhipreftulu, arupãnda stranjili dzãsi: “Tsi ananghi avem ti mãrtirioshilji? 64Voi lu avdzãt blãstemlu, cum lu videts?” Shi tuts lu giudicarã cu moarti. 65Shi niscãnts ahurhirã s-lu scuchea, s-lu anvãlea fatsa, shi s-lu agudea cu shupleacã shi s-lji dzãtsea: “Prufitipsea!” Shi vigljãtorlji lu agudea.

Petrul Arniseashti Isusul

66Cãndu Petrul eara nghios tu pãlat, vini unã sclavã a arhipreftului. 67Shi cãndu vidzu Petrul tsi ma s-ncãldza, bãgã oarã shi lj-dzãsi: “Shi tini earai cu Isus Nazareas.” 68Petru lu arnisi dzãcãnda: “Nu lu cunosc, nu achicãsescu tsi dzãts.” Deapoea ishi nafoarã tu ubor shi cucotlu cãntã. 69Shi sclava vidzãnda nãpoi ahurhi s-lu greascã atsilor tsi eara aclo: “Aestu easti unlu di nãshi.” 70Ma elu nãpoi lu arnisi. Shi nihiamã ma nãpoi oaminjli lji dzãsirã nãpoia a lui Petru: “Dealihina tini eshti un di atselji, cã tini eshti Galilean.” 71Ma elu ahurhi s-blastimã shi si spigiurã: “Mini nu lu cunoscu atselu om ti cai ma grits.” 72Shi cucotlu cãntã di a doaua oarã. Atumtsea a Petrului lj-vini tu minti zborlu tsi Isusul lji avea dzãsã: “Ma nãinti tsi cucotlu s-cãntã di doauã oarã, tini va mi arniseshti trei ori.” Shi cum mindui aestu, plãmsi.

Currently Selected:

Marc 14: BLRR

Highlight

Copy