Matthaisioi Phrinzangpo 18

1Dya thoeka lzadrulbakhanun Yeshui shitia yongse jus : rshnamuni rgyastridpeang tsaq basang su chhô in ? 2Yang, Yeshus chaqtse buthsek shitia yong zere khyongse do khonguni rshkilla ltsangse jaqs. 3Yang mols : Chhadkhika ngas khyentanga zered : khyentes gyodluks base loqse chaqtse phrun natsoḵẖs songse mene rshnamuni rgyastridpeang khyentang mana mihlep. 4Dephya gasus de chaqtse phru na tsoḵẖs rgophabs base duksna do rshnamuni rgyastridpeang saq basang chhô chhok. 5Yang gasus ngi mingtaḵẖspoe phya ḏinḏa chaqtse phruchiga gronpa basna khos nga gronpa ba (natsoḵẖs) in. 6Amma, ngika chhesluks bakhan de chaqtseuniangna suga kaṯo gredchukkhanpoa rantaḵẖi manabu-rdoek jingmawa chingse thsoe thilla ner chukchao mabyormo in. 7Ḵẖate rgyabchukchi lasuni phya miyulla domba! Chiazerbana ḵẖate rgyabchukchi lasun laqkhas bingkhan miwa domba. 8Ni, taqdir khyeri laqpaos hana khyeri kangmaos khyerang ḵẖate rgyabchuksna do khyerangna chade phong; laqpa nyiska hana kangma nyiska dukse rshtane dukchi meang phangcha chhachao basang thyangmo nang laqmun base sonluksiang jukshao khyeranga (thep) rgyala in. 9Yang taqdir khyeri mikpos khyerang ḵẖate rgyabchuksna do khyeriangna phude phong; mik nyiskoa dukse mebaren yodkhan rostraqsiang khyerang phangcha chhao basang migya chikchikpo bese sonluksiang jukcha khyeranga (thep) rgyala in. 10Snanga bashik, di chaqtseuniangna suang rtsismed mabashik, chiazerbana ngas khyentanga zered : rshnamuniang douni kaletabgskhanunla rshnamuniang yodkhan ngi Ati rdongpo thon en yod. 11Chiazerbana Mi-wi Buthsao lamstore yodkhanpo khomchukpa yongsuk.

12Khyentanga chi samed ? Taqdir michikchiga lugu rgya yoden na yang douniangna chikchik storna (khos) de rgubchu nang rgu phangse riunika songse de storskhanpo mitsala ? 13Chhadkhika ngas khyentanga zered, taqdir khoa do thob narek e mastorkhan rgubchu nang rgu barang deka kho mangmo thaded. 14Dya natsoḵẖspo di chaqtseuniangna chikchik storchao rshnamuniang yodkhan khyenti Ati ranluks men.

15Yang taqdir khyeri phonos khyerang na bariang rshnongschan songse khyentang nyiska tsa yodtseka khoa khrathsik bos taqdir khos khyeri tampoa rshna basna khyeranga khyeri phono loqse thop. 16Amma, taqdir khos rshna mabasna rshpangpo nyis hana sumi kheka tamun jung rshtanpo chha yang mingga chikchik hana nyis khyerang nanyambo khyer. 17Amma, taqdir khos khonguni tampoa rshna mabasna ni grikskhorpaunla gochuk; yang taqdir grikskhorpauni tampoâng rshna mabasna ni kho khyeri shitia janmi mithsirpa nang rshmul zdamkhan na ḏanḏa shes. 18Chhadkhika, ngas khyentanga zered: khyentes seka gachithongchik chingsna do rshnamuniang chingcha chhok; yang khyentes seka gachithongchik krolsna do rshnamuniang krolcha chhok. 19Ngas yang khyentanga zered : taqdir seka (yodkhan) khyentiangna mingga nyisis khontanga rgasha yodkhan ga graqpo base jusna, rshnamuniang yodkhan ngi Ataos khonga do gangrgya chhachuktuk. 20Chiazerbana mingga nyis hana sum ngi mingtaḵẖspoeka damse yodseka khongi rshkilla nga dukse yod.

21Dekana Petrosis khoe shitia yongso jus : Kasa Ashipa, ngi phono nga nabariang rshnongschan chhen duksna ngas rin tsam khoa skyonzod bacha in ? Respa rdun thsqapa (skyonzod ba rgoseda)? 22Yeshus khoa mols : Respa rdun thsaqpa zere ngas khyeranga zerbamed dobasang rdun rdun-rchu thsaqpa zered. 23Dephya rshnamuni rgyastridpo michikchik rangi tsonum rtsirtsis bok zere samskhan rgyalpo natsoḵẖs in. 24Ni, khos rtsia ryaḵẖspana/ yangbu/ stong rchu bulon yodkhan chikchik khoo shitia khyongs. 25Amma khoa bulon rcharchashik medpana khoo ashipaos kho, nang khuri aneo, nang phrûn, nang yodchasun saq tsongse bulonpo goqchuk zore mols. 26Dekana de tsonpos rdongpo seka hlane khoa stodkha base jus: Kasa ashipa, yeres ngika thyaqluks bana ngas saq yeranga thsangchuktuk. 27Ni, de tsonpo ashipawa kho zdikpa thsore kho phude tangse bulonpo khoa sals. 28Dekana de tsonpo phyistâ bingsena rangi ashipa chikpa tsonuniangna khoranga jahujaphed rgya bulon tangkhan yodkhan chik nathsuks yang kho zu e ngi bulonpo tong zere khos demi tutu zdams. 29Zdamana rangi de ashipa chikchik yodkhan tsonpos kangmeka nyala rchore jus : Ngika thyaqluks bana ngas khyeranga (saq) thsangchuktuk, 30Amma, khos doa maran dobasang, songse, bulonpo goqgoq thsaqpa kho khyere kaqkhangeang kaqs. 31Ni, de songskhan lasun kho na ashipa chikchik yodkhan o tsonunla thongmana mangmo qolṯo song, yang khong songse de songskhanun saq rangi ashipawa gochuks. 32Dekana de ashipaos rangi shitia khoa yong zere khyongsena zos : Wa nganpa tson, khyeres nga juspi phya khyerika yodkhan bulonun saq ngas khyeranga phude tangs. 33Dephya nga khyorang zdikpa thsorbana tsoḵẖspo khyerang na ashipa chikchik yodkhan tsonpo zdikna thsorchao khyerikang tsatsa menmina ? 34Yang khoe ashipawa ḵẖa yongse khoeka yodkhan bulonpo saq goqgoq thsaqpa naḵẖs stankhani laqa tangs. 35Dyanatsoḵẖspo taqdir khyentes khyenti phonoe rshnongsunla snyingi skyonzod base mene rshnamiang yodkhan ngi Ataos dya tarpo bok.

Currently Selected:

Matthaisioi Phrinzangpo 18: SOMA

Highlight

Copy