लूका 24

येशू सोम्‍बो लोक्‍पाते बात

(मत्ती २८:१-१०; मर्कूस १६:१-८; यूहन्‍ना २०:१-१०)

1थेमे आदेरी छोमु ङोमु ठोलाराङ थे फेम्‍मे मिओन येशू रोला कुताला सिन गोमे छोमु ठीक खाबाते मोर्गुताङ स्‍येबाते पाउडर खुरगीन येशू रो ज्‍याक्‍पाते फुकनापा गाल्‍सुङ। 2थेरू लेप्‍नामेकी थेबेकी थे फुगी गोदु ज्‍याक्‍पाते दो थेन्‍दा ओता थोङसुङ। 3थेमे थेबाबरी फुगी नाङदुराङ स्‍यूला ताजीन थेरू प्रभु येशू रोङ मेतान। 4थोक थोङगीन थेरू च्‍यि ओङा ईन्‍ताका सिन थेबा अलमल्‍ल परे खासुङ। थेमे थेजीनराङ मिगी तापराङ मुथुप्‍च्‍या खाला टल्‍के खित्‍च्‍याज्‍यीक खोलाक खोन्‍दातेन्‍दे मेन्‍दा ङि मि थेबे दोन्‍दु लेप्‍सुङ। 5थेबाला थोङगीन ज्‍यीबेकी थे फेम्‍मे मिओन खोपरोङ छ्येत उप्‍कीन खुङ खुगीन देत्‍सुङ। थेमे थेबा ङिबोकी थेबाला “सोम्‍बो लोगीन सिन्‍दे येशूला ख्‍योकोन च्‍यिला दि स्‍याप्‍ते मि ज्‍य्‌वासादु छोल्‍गीते? 6थेनी सोम्‍बो लोक्‍पा ओत। थोगी थे दुरू मेत। थेकी गालीलदु ओत्‍जीन ख्‍योकोनला साबाते बात ठेम्‍बा खि। 7थेकी थेजीन ‘परमेश्‍वर ओत्‍सादुई वाबाते मि ङाला पापीओन लाःक्‍तु सोम्‍पे खिओ। थेमे थेबेकी ङाला स्‍यिङगी थामला टाँए खाला सेत्‍क्‍यो। तर स्‍याप्‍ते ङीमा सुमगी छोमु ङा सोम्‍बो लोइओ,’ सिन साबा ओतान, मेन?” सिन सिदुक। 8थेबा ङिबोकी थोक सानामेई येशूकी गोमाका साबाते दि बात थे फेम्‍मे मिओनला ठेम्‍बा लासुङ।

9थेमे थेबाबरी फुकदुकी थेन्‍गीन गाल्‍सुङ। थेमे येशू चेला च्‍युच्‍यीकताङ थेरू ओताते ज्‍येन मि गाङेला येशू सोम्‍बो लोक्‍तुक सिन थेबा खोपरोङगी च्‍यि थोङसुङा, चुक ओङसुङा सिन गाङे बात लाःप्‍सुङ। 10दि बातओनचेन मरियम मग्‍दलिनी, योअन्‍ना, याकूब आमा मरियम थेमे थेबाताङ ओताते ज्‍येन फेम्‍मे मि गाङेकी येशू ख्रीष्‍टकी खटे खाबाते चेलाओनला लाःपा ओतान। 11तर थे फेम्‍मे मिओनगी लाःपाते बात थेबाला ईन सिराच्‍योक मालासुङ। येशू सोम्‍बो लोक्‍पातेराङ ईन सिन थेबेकी पत्तेराङ माक्‍यासुङ। 12ईन्‍सीनोङ थेबे नाङ पत्रुसचेन पालोई तारराङ ड्वा फाप्‍सुङ सिन येशू रो ज्‍याक्‍सापा ताप्‍ला छ्य्‌वासुङ। थेरू लेप्‍ला ज्‍यीला ताजीन थेकी खालि येशू रो ठीलाते खोलाककामा थोङसुङ। थे खोलाककामा थोङगीन थेरू च्‍यि ओङा ईन्‍ताका सिन छक्‍क परे खिन थे खाम्‍बापा ग्‍युरगीन लिच्‍युङ।

येशूकी मेन्‍दा ङि मिला ठेता खाबाते

13थेमे येशूताङ ख्‍याम्‍कान्‍ते मिओन नाङ मेन्‍दा ङि थे छोमुराङ यरूशलेमदुकी इम्‍माउस सिराते युलनापा डुइन ओतान। यरूशलेमदुकी थे युल किलोमीटर च्‍युच्‍यीकजोला फाप्‍कीन ओतान। 14थेबा ङिबो येशूला चुक खासुङा, च्‍यि ओङसुङा सिन बात खिन डुइन ओतान। 15थेबा थोक खाला बात खिन डुइन ओत्‍जीनराङ येशूङ थेबा ओत्‍सादु लेप्‍सुङ। थेमे थेङ थेबाताङ ङ्योम्‍बुराङ ख्‍याम्‍सुङ। 16तर थेबेकी थे येशू ईन सिन छ्या मास्‍येसुङ। च्‍यिला सासीन थेजीन परमेश्‍वरगीराङ थेबाला छ्या स्‍ये माच्‍युत्‍सुङ। 17थेमे थेकी थेबाला “ख्‍योकोन दोक आउदी खाला च्‍यि बात खिन ओते?” सिन ठिसुङ। थेकी थोक सिरजीन थेबा ङिबो रकस्‍यिक ठाङे ठाङे देत्‍सुङ। पीरगी खित्‍सादु थेबा छ्येत सेतातेन्‍दे गाला ओतान। 18थेमे थेबे नाङ क्‍लेओपास सिरातेकी “यरूशलेमदु दाङ खार्नुप ओङाते बात खोल्‍ला छ्या मेत? थोक ईन्‍सीन यरूशलेमदु वाबाते मि नाङ दि बात छ्या मेस्‍येकान्‍ते खोकामा ईन्‍दासीन,” सिन सिरजीन 19थेकी “च्‍यि बात साबे?” सिन ठिसुङ। थेमे थेबेकी “नासरतपे येशू बात च्‍यिन्‍दे। थेचेन परमेश्‍वर बात खित्‍कान्‍ते मि ओतान। परमेश्‍वर थेत्ताङ ङ्योम्‍बु ओतेकी थेकी मि गाङे दोन्‍दु आउदी अचम्‍बतेन्‍दे कामताङ बात खाबा ओतान। 20तर छ्ये छ्ये पूजारीताङ ज्‍येनोङ छ्ये छ्ये मिकीचेन थेला सेता फाप्‍क्‍यो सिन स्‍यिङगी थामला टाँए खाईन सेत च्‍युत्‍सुङ। 21ङ्योकोनगीचेन ङुरूङ इस्राएलीओनला दुक्‍पादुकी डेल्‍कान्‍ते मि थेराङ दुका सिन आश खाबा ओतान। थरिङगीनी थेला सेतातेङ ङीमा सुम गाल्‍सुङ। 22थेमे ज्‍येन बातज्‍यीक च्‍यि सासीन ङ्योकोन च्‍योकराङ थेत्ताङ ङ्योम्‍बु ख्‍याम्‍कान्‍ते कोई कोई फेम्‍मे मिकी आनाङ ङोमु ङ्योकोनला आउदी अचम्‍बज्‍यीक बात लाःप्‍सुङ। थेबा थरिङ ङोमुका थे रो ज्‍याक्‍पाते फुकनापा गाला ओतानलो। 23तर ज्‍याक्‍सादुनी थे रोराङ मिन्‍दुक्‍लो। थेबेकी थेरू परमेश्‍वर दूतओनला थोङसुङलो। थेमे थे दूतओनगी थे सोम्‍बो लोक्‍पा ओत सिन बात खासुङलो। 24थे फेम्‍मे मिओनगी दि लोन खुलानामेई दि बात ईन्‍दाकाना मेन्‍दाका सिन ङ्योकोन नाङ कोई कोई थे फुकनापा तार गाला ओतान। थेबेकी सिरजीन थे फेम्‍मे मिओनगी साबा च्‍योकराङ दुकालो। थेबेकीङ थेला माथोङदुक,” सिन सासुङ।

25क्‍लेओपासकी थोक सानामेई थेकी “ख्‍योकोन चुक छ्याःङ मोखोकान्‍तेन्‍दे ईन्‍दाका। परमेश्‍वर बात खित्‍कान्‍ते मिओनगी ख्रीष्‍टकी विषयला साबा ओताते बात गाङे था ख्‍योकोन नाम पत्ते खिते? 26थेबेकीचेन परमेश्‍वरगी तोङगो साबाते ख्रीष्‍टकी दुरू वाला आउदी दुक्‍पा भोगे खाला स्‍या फाप्‍क्‍यो। थेमेकामा सोम्‍बो लोक्‍ला स्‍वर्गने परमेश्‍वर दोन्‍दु देता ङेत्‍क्‍यो सिन साबा ओत मेन?” सिन सिदुक। 27थेमे थे खोरोङला चुक चुक ओङगीते सिन थे खोरोङ विषयला परमेश्‍वर बातला ठाउँ ठाउँला टिबा ओताते बातओन येशूकी थेबा ङिबोला लेमु खाईन खोच्‍या खाईन लाप्‍कीन बिन्‍सुङ। दोक खित्‍जीन थेकी गोमा मोशेकी टिबाते बातदुकी शुरू खाईन परमेश्‍वर बात खित्‍कान्‍ते मि गाङेकी थे खोरोङ विषयला टिबाते बात लाप्‍कीन बिन्‍सुङ।

28थोक खाला बात खिन खिन डोजीन थेबा इम्‍माउसपा लेपा लेपा खाबा ओतान। येशू थेरूकीङ फार डोच्‍याच्‍योक खाबा थोङनामेई था थे थेरू मेदेत्‍च्‍याक्‍वा सिन थेबा ङिबोकी थेला 29“मेन हजूर, ङीमा काल्‍बेई मिन्‍दुक, नाम स्‍योबा खासुङ। थोगी थरिङ ङ्योकोनताङराङ देत्‍की,” सिन थेरूकी तोङाराङ माचाल्‍सुङ। थोगी थे थेबाताङराङ देत्‍सुङ। 30थेमे साप सा बेलाला स्‍योबेनज्‍यीक लाःक्‍तु लाकीन थेकी परमेश्‍वरला सापकी लाईदु धन्‍यवाद बिन्‍सुङ। थेमे थे स्‍योबेन च्‍यागीन थेबाला गोकीन बिन्‍सुङ। 31थेजीनसाक थेबेकी थे येशू ईन सिन छ्या मास्‍येसीनोङ थेकी थोक खाईन स्‍योबेन च्‍याक्‍ला गोला तेरजीन थे येशू दुका सिन ङो स्‍येकीन थेला तासुङ। थेबेकी लेमु खाईन ता मातालाराङ थे थेरूराङ तोरसुङ। 32थोक ओङनामेई थेबा ङिबोकी “आनाङ ओङजीन परमेश्‍वर बातला टिबाते बात लोप्‍कान्‍तेनी प्रभु येशू थे खोरोङराङका ईन्‍दा दुका। थोगीराङ ङुरूङला आउदी आनन्‍द लाबा ओतान,” सिन सासुङ।

33थेमे थेबा ङिबो जराक जुरूक लाकीन नुपलाराङ थेरूकी यरूशलेमपा ग्‍युरगीन गाल्‍सुङ। थेरू लेप्‍जीन येशू चेला च्‍युच्‍यीक थेमे थेबाताङ ख्‍याम्‍कान्‍ते मि गाङेराङ खाम्‍बाज्‍यीक्‍तु जम्‍मा ओङगीन देता ओतान। 34थेबा ङिबो थेरू लेपासात्तुराङ थेबाबरीकी “प्रभु येशू सोम्‍बो लोक्‍पाते बात पक्‍काराङ दुका। शिमोन खोरोङताङराङ थेकी ठेता खादुक,” सिन सासुङ। 35थेमे थेबा ङिबोकीङ खोपरोङ लामला डोजीन च्‍यि ओङसुङा थेमे साप सा बेलाला स्‍योबेन च्‍याक्‍ला तेरजीनका चुक खाईन खोपरोङगी येशूला थेराङ दुका सिन ङो स्‍येसुङा सिन गाङे बात थेबाला लाःप्‍सुङ।

येशूकी चेलातेबाताङ ठेत्‍कीन बात खाबाते

(मत्ती २८:१६-२०; मर्कूस १६:१४-१८; यूहन्‍ना २०:१९-२३; शक्ति काम १:३-८)

36थेबा थोक खाला बात खिन खिनलाराङ येशू थेबा ओत्‍सादु ख्‍योल्‍सुङ। थेमे थेरू ओताते गाङेला “ख्‍योकोनला लेमु ओङस्‍यीत,” सिन सासुङ। 37थे थोक खाईन खोपरोङ दोन्‍दु वाबा थोङजीन गाङेराङ ख्‍यारगीन “आबिई, ल्‍हन्‍डीक वादुक,” सिनकामा ज्‍यीबा खासुङ। 38तर थेकी “ख्‍योकोन च्‍यिला दोक खाला ज्‍यीबा खिते? ङाला थोङजीन ङाराङ ईन्‍दा मेन्‍दा सिन ख्‍योकोन च्‍यिला शंका खिते? 39ङेते लाक्‍पा काम्‍बाला लेमु खाला तोते। ङा येशूराङ ईन। पत्ते मिक्‍किसीन ङाला दोला तो। ङे जीउला ख्‍योकोनते च्‍योकराङ स्‍याताङ रूबा ओत। ल्‍हन्‍डीकते ईन्‍सीन थोक मेङगो,” सिनकामा 40काँटी ग्‍याप्‍कीन लाक्‍पा काम्‍बाला थोताते मा तेन्‍सुङ। 41थे लाक्‍पा काम्‍बा ताकीन थे पक्‍काराङ येशूराङ दुका सिन थेबाला आउदी गा लासुङ। थे थोक खाईन थेरू वाबाते थेबालानी मिलाम खाबा च्‍योककामा लासुङ, पत्तेराङ खिता माथुप्‍सुङ। थेबेकी थोरूमोङ पत्ते खाबा माथोङगीन थेकी “ख्‍योकोनताङ खइँदा साच्‍येते ओत?” सिन ठिसुङ। 42थेमे थेबेकी ओत सिन चोबाते ङ्ये चोक्‍टाज्‍यीक थेला बिन्‍सुङ। 43थेमे थेकी थेबे ङोन्‍दुराङ थे ङ्या सोसुङ।

44थेमे थेकी थेबाला “मोशेकी टिबाते नियमला थेमे परमेश्‍वर बात खित्‍कान्‍ते मिओनगी टिबाते किताबला ङे विषयला टिबा ओत। थोकराङ खाईन भजन किताबलाङ ङे विषयला टिबा ओत। ङाला चुक चुक ओङगीते सिन टिबाते बात गाङे साबा च्‍योकराङ ओङा फाप्‍क्‍यो सिन ङे गोमा ख्‍योकोनताङ ङ्योम्‍बु ओत्‍जीनराङ साबा ओतान,” सिन सिदुक। 45थेमे थेकी थेबाला थे खोरोङ विषयला परमेश्‍वर बातला टिबा ओताते बातओन लेमु खाईन खोच्‍या खाईन लाप्‍कीन बिन्‍सुङ। 46दोक खाला लाप्‍ला तेरजीन थेकी थेबाला “परमेश्‍वर बातला परमेश्‍वरगी तोङगो साबाते ख्रीष्‍टकी आउदी दुक्‍पा भोगे खाला स्‍या फाप्‍क्‍यो। तर स्‍याप्‍ते ङीमा सुमगी छोमु सोम्‍बो लोइओ सिन टिबा ओत। 47थेमे ख्रीष्‍टकी खाबाते कामगी खित्‍सादु मि गाङेकी खोपरोङ पापी दुका सिन छ्या स्‍येला परमेश्‍वर छ्य्‌वापा लै खित्‍च्‍येते मौका ङेत्‍क्‍यो। थेमे थेबेकी खाबाते पाप गाङे परमेश्‍वरगी माफ तेरग्‍यो सिन होदि बात यरूशलेमदुकी शुरू खाला लुङबा लुङबे मिला लोपा फाप्‍क्‍यो सिनोङ टिबा ओत। 48ङा स्‍याप्‍तेताङ सोम्‍बो लोक्‍पाते गाङे ख्‍योकोनगी थोङा ओत। थोगी ख्‍योकोनगीराङ गाल्‍ला दि बातओन ज्‍येनला लोप। 49थेमे था ङा ख्‍योकोनला ङे आबेकी तेरग्‍यो सिन साबाते परमेश्‍वर आत्‍मा तेरग्‍यो। स्‍वर्गनेकी परमेश्‍वर आत्‍मे शक्ति माङेतथुप ख्‍योकोन यरूशलेमदुकी खापाङ मोन्‍डोबा खाला दुरूराङ गुला देत,” सिन सिदुक।

येशू स्‍वर्गने ग्‍युरगीन गालाते

(मर्कूस १६:१९-२०; शक्ति काम १:९-११)

50थेमे येशूकी थेबाला यरूशलेमदुकी बेथानीसाक टीकीन खेरसुङ। थेमे थेरू थेबा ओत्‍सापाला लाक्‍पा ङिकाराङ क्‍याङगीन गाङेला आशी बिन्‍सुङ। 51थोक खाला आशी तेरजीनराङ थे थेबाताङ ठाल्‍गीन नामने ड्वाप्‍ला स्‍यूसुङ। थोक खाईन परमेश्‍वरगी थेला स्‍वर्गने खेरसुङ। 52थे थोक खाला स्‍वर्गने डोजीन थेबेकी थेते जय जय खासुङ। थे तिरी थेबा आउदी खाला गा खिन यरूशलेमपाराङ ग्‍युरगीन गाल्‍सुङ। 53थेरू थेबाबरी परमेश्‍वर मन्‍दिरदु गाल्‍ला परमेश्‍वरते जय जय खिन देत्‍कीन ओतान।

Currently Selected:

लूका 24: JUL

Highlight

Copy