लूका 17
17
पाप खिता लेमु मेन
(मत्ती १८:६-७; मर्कूस ९:४२)
1थेमे येशूकी चेलातेबाला “मिला पापताङ लोभ खिता सेम मालाङच्येते मेन। थोक ईन्सीनोङ ज्येनला पाप खित च्युत्ला ङे छ्य्वापेई ठाल ज्युत्कान्तेकी आउदी छ्येज्यीक सजाय ङेत्क्यो। 2ङाला विश्वास खित्कान्तेबे नाङ दिङ सु ईन्देरो सिराच्योक खाईन ज्येनगी हेपे खाबाते मिज्यीकलाकामा ङे छ्य्वापेई टाल्सुङ सासीन थोक खित्कान्तेकी आउदी ज्यीबा लाङच्या मेलेबा काम खाबाते ईन। सुइँदाला ङे छ्य्वापेई डेला भन्दा गोमाराङ थोक खित्कान्ते मिलानी सुइँदेकी ज्यीङबामा लाकोर दो काल्गीन नुप्ला स्यिरस्यीत सिन समुन्द्रे नाङमा युकीन क्युरा ईन्सीन लेमु ओङच्या ओतान। 3थोगी ख्योकोनगीचेन जुन काम खित्जीनोङ लेमु मेलेबा चुक ओङच्या दुका विचार खालाकामा खि।
ज्येनला माफ तेरच्येते बात
थेमे खेराङ आज्यो न्वाकी खइँदा मेलेबा काम खासीन थोक खाबाते लेमु मेन सिन थेला सम्झे खाला बिन। थेकी थे खोरोङ गल्ती सम्झे खाईन ‘ङे गल्ती खाबाप, स्येदाङ माकेत,’ सिन सासीन थेला माफ बिन। 4थेकी ङीमाला पालो दुईन गल्ती खाईन पालो दुईनराङ ‘ङे गल्ती खाबाप, स्येदाङ माकेत,’ सिन सासीन ख्योकोनगी थेला माफ बिन। ‘था माफ मेतेरो,’ सिन नोमुङ मासेर,” सिन सिदुक।
5थेमे येशू ख्रीष्टकी खटे खाबाते चेलाओनगी “प्रभु, ङ्योकोनला खुई शक्ति छ्य्वापेई जस्तो कामोङ ओङा थुप्क्यो सिन झन लेमु खाला परमेश्वरला विश्वास खित्कान्ते मि जो,” सिन सासुङ। 6थोक सिरजीन थेकी “ख्योकोनगी परमेश्वरला खित्च्येते विश्वास ताप्कीन केनामेकी दोङबो छेतराङ डोच्येते तोरी गेडा च्योकस्यिककामा ओत्सीनोङ उदि सोलास्यिङ दोङबोला ‘चाप्रेनताङराङ खोर लोक्ला समुन्द्रमा गाल्ला चाप्रेन क्याङला देत,’ सिन सासीन थोकराङ ओङगो।
चेलातेबाला इनाम छोला मेङगो साबाते
7थेमे ज्येन बात च्यि सासीन ख्योकोन नाङ मेराज्यीक्ते खाम्बादु काम खित्कान्ते मि ओत सिइ। ङीन खाङ लाङ मोकीन कि लुक चोकीन ग्वासेला खाम्बादु वानामेकी च्यि ख्योकोनगी थेला ‘खोल्ला त्वाबा लाबासीन। लो छिटो छिटो लाक्पा टुलानी सेन सार स्योक,’ सिन सिओतरो? 8बरू ख्योकोनगी थेला ‘छिटो छिटो ङाला साप थुङा जोला नाङ। ङे सोकीन सिन्नामेईकामा खो सो,’ सिनका सिओ, मेन? 9थेकी गाङे कोता च्योकराङ खानामेई ख्योकोनगी थेला ‘ओहो, खुई चुक दुक्पा खासुङा,’ सिन नोमुङ मिसिरो। च्यिला सासीन थेकीनी थे खोरोङगी खिता फाप्च्येते कामकामा खाबाते ईन। 10थोगी ख्योकोनगीङ परमेश्वरगी कोताते काम जति खाईन सिन्नामेई था ङ्योकोनगी इनाम ङेता फाप्क्यो सिराच्योक माकेत। बरू ङ्योकोनगी खालि ङेराङगी खिता फाप्च्येते कामकामा खाबाते ईन सिन सि,” सिन सिदुक।
येशूकी जेबो मेन्दा च्युताम्बाला ठाक्पा खाबाते
11येशू यरूशलेमपा डुइनराङ ओतान। थे सामरियाताङ गालील अञ्चल डेल्च्येते साँधकी नाङपा खाला डुइन ओतान। 12थे युलज्यीक्तु लेपा लेपा खाबा ओतान। थे बेलालाराङ जेबो मेरा च्युताम्बेकी थेला थोङगीन टिक्पी थारीलाराङ देत्कीन 13“ए गुरू येशू, ङ्योकोन दुक्पा थोङला ङ्योकोनला ठाक्पा खाला नाङ,” सिन छेरा खासुङ। 14थेबेकी थोक खानामेकी थेकी “लो ख्योकोन दुरूकी गाल्ला पूजारीओनला खेराङ ठाक्काना माठाक्का सिन तो सि,” सिन सिदुक। थेमे थेबाबरी पूजारीला तेन ख्याम्सुङ। लामला डुइन डुइनलाराङ जे तोरगीन थेबा ठाक्सुङ।
15थे खोरोङ थोक खाईन ठाक्पा थोङगीन थेबे नाङ मेराज्यीकचेन परमेश्वरगी थे खोरोङला चुक लेमु खाईन ठाक्पा खासुङा सिन कस्स्ये खाला परमेश्वरते जय जय खिन येशू ओत्सापाराङ ग्युरगीन लेप्सुङ। 16थेमे धन्यवाद सिनकामा येशू काम्बाला से खासुङ। थे मिचेन सामरी ओतान। 17थेमे येशूकी थे खोरोङताङ ङ्योम्बु ओताते मिओनला “ङे मेरा च्युताम्बे जे ठाक्पा खाबा ओतान। मेरा गु खापा गाल्ताका? 18थेबे नाङ दि दोक्पोईकामा परमेश्वरते जय जय खिन ग्युरगीन वाबा थोङजीन ङाला अचम्ब लासुङ। थोरूम दिनी यहूदीङ मेन, सामरीका ईन,” सिन सिदुक। 19थेमे थेकी थे मिला “लो लाला था खोले खोले ग्युक। ङे खोल्ला ठाक्पा खिता थुप्क्यो सिन खुई ङाला विश्वास खाबेकी खो ठाक्पाते ईन,” सिन सासुङ।
परमेश्वर राज्य ओङजीन चुक ओङगीते
(मत्ती २४:२३-२८,३७-४१)
20ङीमाई फरिसी पाटी मिओनगी येशूला “चुक ओङनामेई परमेश्वर राज्य वादुक सिन छ्या स्येबा थुप्कीते?” सिन ठिजीन थेकी “खइँदा अचम्बज्यीक काम ओङा थोङला थानी परमेश्वर राज्य वाबा दुका सिन सिरा मुथुबो। 21सुङगीङ दुरू दोकस्यिक अचम्बई काम ओङसुङ, थेपा थोकस्यिक अचम्बई काम ओङसुङलो, था परमेश्वर राज्य वाबाक्वा सिन सिरा मुथुबो। परमेश्वर राज्यनी ख्योकोन दोन्दुराङ ओत्कीन ओत,” सिन सिदुक।
22थेमे थेकी चेलातेबाला “था समयज्यीक ओङगो। थेजीन ख्योकोनला परमेश्वर ओत्सादुई वाबाते मि थानी देमा ग्युरगीन वाकीन राज्य खिताला स्यूसीन थेमे ङीमाईकामा थे राज्यदु देता ङेत्सीनोङ चुक लेमु ओङच्या ओताने सिराच्योक लाङगो। तर थेजीन ख्योकोनगी साबाच्योक मेङगो। 23थेजीन ज्येनगी ख्योकोनला ‘थे ग्युरगीन वाकीन उ फिपा देत्ला दुक्लो, थे देपा वाकीन देत्ला दुक,’ सिन सिओ। ख्योकोनगी थेबे बातला नामज्योक मासेत, ङा वाकाना सिन थेबे तिङ ङ्याला तार मान्डो। 24चिलाम नाम्दाककी खित्सादु चिलाम खासुङ सिन छ्या स्येबा च्योकराङ परमेश्वर ओत्सादुई वाबाते मि ङा गाङेकी थोङा खाला देमा ग्युरला ओङगो। ङा वाबाते ईन्दा ना मेन्दा सिन सुङगीङ छ्याःङ शंकाराङ खिता माफाबो। 25तर दि भन्दा गोमाचेन ङे आउदी दुक्पा भोगे खिता फाप्क्यो। था मिओनगी दिला परमेश्वरगी ताङाते ईनराङ मेन साला ङाला आउदी मेलेबा खिओ।
26थेमे था तिरी परमेश्वर ओत्सादुई वाबाते मि ङा देमा ग्युरला ओङे बेलाला काल्बा च्योक मि नूहे पालो मि च्योकराङ खिन देता ओङगो। 27नूह थे खोरोङगी जोबाते पानीजहाज नाङ स्यूक्पे छोमुसाकराङ थे पालो मिचेन गाङेराङ तिरी चुक ओङगीता सिन छ्याःङ वास्ता मिक्किता खाईन सधैँ च्योकराङ सेइन थुङगीन थेमे फाङमा खिन देता ओतान। नूहताङ थे खाम्बे मिओन पानीजहाज नाङ स्यूनामेई छ्यार्बा ग्याप्कीन भल ग्याकीन मि गाङे नुप्कीन स्या ओतान। 28थेमे तिरी लोतकी पालोला सदोम सारगी मिओनोङ नूहे पालो मि च्योकराङ खिन ओतान। तिरीते छ्याःङ विचारराङ मिक्किता खाला थेबाङ सेइन थुङगीन, छोङच्या ङ्योच्या खिन, बालीनाली लै खिन थेमे खाम्बा जोइन देता ओतान। 29थेमे लोत थे सारदुकी थेन्दे छोमुचेन छ्यार्बा देक्लु खाईन नामनेकी मेताङ गन्धक ङील्गीन थे सारगी मि गाङे छिगीन स्या ओतान।
30परमेश्वर ओत्सादुई वाबाते मि ङा देमा ग्युरला ओङे छोमुङ काल्बा च्योक मि नूहताङ लोतकी पालो मि च्योकराङ खिन देता ओङगो। 31ङा ओङे छोमु खाम्बे लाकने कौसीदु देता ओताते मिओन सम्पत्ति थेन्दाप सिन नाङने मुस्यूक्स्यीत। थोकराङ खाला स्यीङदु काम खिन ओताते मिओनोङ खाम्बादु ग्युरला ओङा मोछोल्स्यीत। 32थोक खिता चाल्सीन च्यि ओङगीते सिन ख्योकोनगी लोतकी फेम्मे बात सम्झे खि। 33तिरी बो माताबा खाला सुइँदेकी दाक्पोन ज्यानगी माया खिदुक सासीन थेकी नोमुङ मिसिन्च्येते जुनी मेङेदो। दाक्पोन फाइदा माताबा खाला ङे लाईदु दाक्पोन ज्यानगी मायाङ मारे खित्कान्ते मिकीचेन नोमुङ मिसिन्च्येते जुनी ङेत्क्यो।
34थेमे था दि बादोङ ङेन। ङा दुरू ग्युरला ओङे छोमु ख्वासाज्यीक्तु ङ्योम्बुराङ ङ्याला ओताते मेन्दा ङि मि नाङ ङा ओङगो सिन गुकीन देता ओतातेला परमेश्वर राज्यने खेरग्यो। 35थोक खाईन देता मेताते ज्येनतेलाचेन थेरूराङ क्युरला ज्य्वाक्यो। ङ्योम्बुराङ फे थागीन ओताते फेम्मे मि ङि नाङदुङ दोक्पोईला क्युरला ज्याक्ला दोक्पोईला परमेश्वर राज्यने खेरग्यो। 36थोकराङ खाला स्यीङदु ङ्योम्बुराङ काम खिन ओताते मेन्दा ङि नाङ दोक्पोईला परमेश्वर राज्यने खेरला दोक्पोईला क्युरला ज्य्वाक्यो,” सिन सिदुक।
37थेकी दोक दोक सानामेकी चेलातेबेकी “थाल्ला खुई साबाच्योक खापा खापा ओङगीते प्रभु?” सिन ठिसुङ। थेमे थेकी थेबाला “जहाँ स्यिनु दुक थेरू गिद्ध खिरग्यो,” सिन सिदुक।
Currently Selected:
लूका 17: JUL
Highlight
Share
Copy
Want to have your highlights saved across all your devices? Sign up or sign in
© 1992 Wycliffe Bible Translators Inc. All rights reserved.
