लूका 16
16
च्याङबो खित्कान्ते मि कथा
1थेमे येशूकी चेलातेबालाङ दोक सिन बात खासुङ। थेकी “दि कथा ङेन। बाजिई ठाउँज्यीक्तु आउदी छ्युक्पुज्यीक मि ओताक्वालो। थेकी थे खोरोङ सम्पत्ति ताप्ला मिज्यीकला ज्याक्पा ओताक्वालो। तर थे मिकीचेन धनीते सम्पत्ति मनपरी खाला चले खित्च्याक्वालो। थे बात ङीमाई मिज्यीक खालेई धनीतेकी थोदुक्लो। 2थोगी थेला काताङगीन च्याकीन ‘खो ङे सम्पत्ति आउदी मनपरी खाला चले खित्च्याक्वा। था खो दुरू देता माफाबो। थरिङसाक हर हिसाब गाङे नाङ,’ सिन सादुक्लो। 3धनीतेकी थोक सानामेकी थेकी सेमगी नाङ गुने खिन था ङाला कामदुकी देन्च्याराङ ओङसुङ। चुक खाला जीउ पाला खित्च्या ईन्ताका? लाङ मोला तोक्ची कोला सेइ सासीनोङ ङेते लाक्पा काम्बा थोक रोम्बो मेत। नाङ खाला साबोङ ङोचा ईन। 4था ङा चुक खिता ईन्ताका सिन न्वासाम ताङगीन ए, लो था ङा दोक खिता फाप्सुङ। दोक खासीन ङाला कामदुकी देन्दासात्तु मिओनगी दाक तेइओ याङ सिन सादुक्लो।
5थेमे थेकी थे खोरोङ मालिकतेते सु सुकी थोई थोई च्यि च्यि ज्येला फाप्च्या ओता ईन्दाका सिन रेरे रेरे खाला ठाप्ला थेबाला काताङदुक्लो। गोमेतेला ‘खुई थोई ज्येला फाप्च्या ओते?’ सिन ठिजीन 6थेकी ‘ङे लिटर हजार सुम मोर्गु ज्येला फाप्च्या ओत,’ सिन सादुक्लो। थेमे थेकी थेला ‘लो खुई खोरोङ स्यिउ लाला खालि लिटर सय च्याङाकामा ज्येला फाप्च्येते ईन सिन टि,’ साकीन थोस्यिकराङ टिक च्युत्तुक्लो। 7थेमे थे तिरी मिला ठिजीन थेकीचेन ‘ङे क्विन्टल सय सुमताङ खाल ङिताङ च्युताम्बा ठा ज्येला फाप्च्या ओत,’ सिन सादुक्लो। थेमे थेलाङ ‘लो खुई खोरोङ स्यिउ लाला खालि क्विन्टल सय सुमकामा ज्येला फाप्च्येते ईन सिन टि,’ सिन थोस्यिकराङ टिक च्युत्तुक्लो। 8थेकी चुक चुक खाका सिरच्येते दि बात गाङे थाहा छ्येत्नामेकी धनीतेकी थेला ‘बिई, खुई चुक च्याङबो खाका। ङा ओत्सादुई थेन्नामेई खोल्ला था थे मिओनगीराङ सोइओ,’ सिन सादुक्लो। दि जुनी विचारकामा खित्कान्ते मिओनगी खोपरोङ काम आउदी च्याङबो खाला खिओ। बरू परमेश्वर बात ङेन्कान्ते मिओनगीङ दोक च्याङबो खाला काम खिता मेस्येओ। 9ङा ख्योकोनलाचेन चुक खि सिते सासीन खेराङ सम्पत्ति दुक्पा ङेताते मिओनला गोला बिन। थेमे थेबा ख्योकोन र्वा ओङगो। सम्पत्ति सिरे जानी ङीमाई दाक सिन्ला डुइओ। थोगी ख्योकोनगी ङे खि साबा च्योकराङ खि। थोक खासीनराङ ख्योकोनगी स्वर्गने देत्च्येते ठाउँ ङेत्क्यो।
सम्पत्ति चुक खाला चले खिता फाप्कीते
10बात चुक सासीन दाक्पोन जिम्माला बिन्दाते सम्पत्ति टिक्पीस्यिकराङ ईन्सीनोङ जसकी लेमु खाला तेइदुक थेकीचेन काल्बेई सम्पत्ति जिम्मा बिन्सीनोङ लेमुराङ खाला तेइओ। तर जिम्मा लै खाबाते टिक्पीस्यिक सम्पत्ति लेमु खाला माताबा खाला मनपरी खित्कानला सम्पत्ति काल्बेई जिम्मा बिन्सीन झन मनपरी खिओ। 11बात दोक ईन्देकी ङीमाई सिन्ला डोच्येते सम्पत्तिनी ठीक खाला चले खिता मेस्येदुक सासीन परमेश्वरगी ख्योकोनला चुक खाला स्वर्गे सम्पत्ति चले खित्च्येते जिम्मा तेरगीते? 12ज्येनगी सम्पत्तिला मनपरी खासीन ख्योकोनगीनी तिरी ङेत्च्येते खेराङ सम्पत्ति ङेतराङ मेङेदो।
13योक्पोकी जुन खाम्बादु देत्ला दुक थे खाम्बे धनीकी कोताते बातकामा ङेन्दा फाप्क्यो। ज्येन मालिककी कोताते थेकी ङेन्दा मुथुबो। मालिक ङि ओङसीन थेला खाङ मालिकते मन परे खिका थेकी कोताते ङेन्ला थेलाराङ खुशी जोइओ। ज्येनतेकी कोतातेलाचेन थेकी नामज्योकराङ मेसेदो। योक्पोज्यीगी मालिक ङिला लेमु खिता माथुपा च्योकराङ खाला ख्योकोनगीङ परमेश्वरलाङ सम्पत्तिलाङ माया खिता मुथुबो। परमेश्वरला माने खासीन सम्पत्ति माया मारे खिता फाप्क्यो, सम्पत्ति माया खासीन परमेश्वरला माने खिता मुथुबो,” सिन सिदुक।
14फरिसी पाटी मिओन सम्पत्ति लोभ खिन ओतान। थोगी येशूकी चेलातेबाला साबाते सम्पत्ति बात थोकीन थेबेकी दिकी चुक मेङच्याई बात खासुङा सिन सिराला स्यूसुङ। 15थेबे बात थोकीन येशूकी थेबाला “ख्योकोननी परमेश्वरला छ्ये ज्वाप्ला मेन्देकी मि मिकला छारो देक्पालाका काम खित्च्येते खिदुक। ख्योकोनगी खिन ओताते काम ताला मिओनगी ख्योकोनला लेमु मि ईन सिन मान खिदुक। तर ख्योकोनगी च्यि सेमगी काम खाबाते ईन्दे सिन परमेश्वरला गाङे छ्या ओत। मिओनगी लेमु सासीनोङ ख्योकोनगी खाबाते कामनी परमेश्वरला बान्दा मन परे मिक्किओ।
16ज्येन बात च्यि सासीन गोमाचेन मोशेकी टिबाते परमेश्वर नियम थेमे परमेश्वर बात खित्कान्तेबेकी साबाते बातकामा ओतान। बप्तिस्मा तेरकान्ते यूहन्ने पालोसाकराङ दि बातओनकामा मिओनला लोप्कीन ओतान। यूहन्ने पालोमेईचेन परमेश्वर राज्य गा लाङच्येते बात मिओनला लोपाला स्यूबाते ईन। थेमे थे राज्यदु लेमु ओङगो सिन गाङेराङ जबरजस्ती थेने स्यूक्पा छोल्गीदुक। 17परमेश्वर नियम बात खित्जीन ङा ख्योकोनला च्यि सिते सासीन बरू साताङ नाम नाश गाल्ला तोरला गालोङ, परमेश्वर नियमचेन टेक्टेस्यिकराङ ईन्सीनोङ नोमुङ खुदुक मोन्डोओ। 18च्यि सासीन सुइँदेकी दाक्पोन फेम्मे ताङगीन ज्येन खुला लिच्युङ सासीन थेकी रन्डीबाजी खाबाते ईन। थेमे सुइँदेकी थोक खाईन ताङाते फेम्मे मिला खुला लिच्युङ सासीन थेकीङ रन्डीबाजीराङ खाबाते ईन,” सिन सिदुक।
लाजरसताङ छ्युक्पुते मि कथा
19सम्पत्ति बात बातलाराङ येशूकी “बाजिई ठाउँज्यीक्तु आउदी छ्युक्पुज्यीक मि ओताक्वालो। थेचेन जहिलेङ आउदी दामीते लेमु लेमु खोलाक खोन्ला स्या सामे लाकराङ बाक चेकीन देता ओतानलो। 20थेमे थे ठाउँदुराङ लाजरस सिराई नाङ खित्कान्ते मिज्यीगोङ ओतानलो। थेते जीउ खाङ माराङ मा छोबा ओतानलो। थेमे ज्येनगी थेला थे छ्युक्पुते मि खाम्बे स्याङके खादु क्याल्ला ज्य्वाकीन ओतानलो। 21थेचेन थे मि खाम्बादु सोकीन लूबाते खइँदा साप सा ङेत्कीता सिन गुला देत्कीन ओतानलो। थोक खाला देत्जीन किओनगीङ वाला मा गाङे दाइन ओतानलो।
22थोक खिन खिन तिरी लाजरस स्यिदुक्लो। थेमे परमेश्वर दूतओनगी स्वर्गने खेरगीन थेला अब्राहाम खादु ज्याक्तुक्लो। थे तिरी थे छ्युक्पुते मिङ स्यिदुक्लो। थेमे खोपरोङ मिकी थेला सासगास खादुक्लो। 23थेमे थेचेन नरककुण्डमा फाप्तुक्लो। थेरू खपे खिता मुथुप्च्ये दुक्पा ङेत्कीन स्वर्गनेला ताजीन थेकी अब्राहामताङ लाजरसला थोङदुक्लो। लाजरसचेन अब्राहाम खादुराङ देता ओता थोङदुक्लो। 24थेमे थेकी मिताराङ खाच्या खाईन ‘गोप्पो अब्राहामोउ,’ सिन काताङदुक्लो। थेमे ‘ङे दुक्पा थोङला नाङ। ङे दि मे ज्वाला खपे खिता माथुप्सुङ। ङाला टिक्पीई शीतल ओङस्यीत सिन लाक्पे जुकी ङे खानामा छ्यु तिक्ला तेराला लाजरसला देमा ताङला नाङ,’ सिन अब्राहामला बिन्ती खादुक्लो। 25थेकी थोक सिरजीन अब्राहामगी ‘फुज्यो, खुई गोमे बात ठेम्बा खि। थोङला खुई स्यीम्बु स्यीम्बु सोकीन थुकीन जुनी क्याङा ओतान। थेजीन लाजरसकी चुकस्यिक दुक्पा ङेता ओताने सिन खुई टोक ज्येता मेतासीन। था दि दुरू आनन्द खाईन देत्ला दुक। थेमे खोचेन दुक्पा भोगे खिन दुक। 26दोस्यिककामा मेन, यार मार खिइ सासीनोङ ङुरूङ किल्दु लामराङ मेत। थोगी सुङ दुरूकी थेमा फापा मुथुबो, थेमेकी देने जेक्पाङ मुथुबो,’ सिन सादुक्लो।
27अब्राहामगी थोक सानामेई थेकी याङराङ ‘गोप्पो ठाकुर, लाजरसला देमा तोङा मुथुप्च्या ईन्सीनोङ आबे खाम्बासाकचेन थोङ। 28ङेते न्वा ङाटीक ओत। थेकी गाल्ला थेबाला ङे खाबाच्योक मेलेबा काम खिता ताङला लेमु काम खि सिन लाःप्स्यीत। थोक खासीन थेबेकी ङे च्योकराङ देमा स्यूला दि दुक्पा भोगे खिता माफाबो,’ सिन सादुक्लो। 29थोक सिरजीन अब्राहामगी ‘लाजरसला च्यिला तोङच्येरो? मोशा थेमे परमेश्वर बात खित्कान्ते मिओनगी टिबाते बातओन खुई न्वाओनला छ्याराङ ओत। थे बातओन ङेन्सीन थेबाला खोल्ला च्योक मेङगो,’ सिन सादुक्लो। 30थोक सिरजीनोङ थेकी ‘मेनना गोप्पो, थेबाला थे बात छ्या ओत्सीनोङ थेबेकी थे बात मेङेनो। बरू सुइँदा स्याप्ते मि सोम्बो लोगीन गाल्गीन बात खासीन थे बात ङेन्ला खोपरोङ पापी दुका सिन छ्या स्येला परमेश्वर छ्य्वापा लै खिओ,’ सिन सादुक्लो। 31थेमे अब्राहामगी थेला ‘थेबेकी मोशा थेमे परमेश्वर बात खित्कान्ते मिओनगी साबाते बात माङेन्सीन सुइँदा स्याप्ते मि सोम्बो लोगीन गाल्गीन साबाते बातओनोङ मेङेनो,’ सिन सादुक्लो,” सिन सिदुक।
Currently Selected:
लूका 16: JUL
Highlight
Share
Copy
Want to have your highlights saved across all your devices? Sign up or sign in
© 1992 Wycliffe Bible Translators Inc. All rights reserved.
