लूका 14
14
येशूकी सन्चारी छोमुराङ मिज्यीकला ठाक्पा खाबाते
1ङीमाई सन्चारी छोमु फरिसी पाटी छ्येते मिज्यीगी येशूला थे खोरोङ खाम्बादु साप साप्ला काताङा ओतेकी येशू थे खाँपा गाल्सुङ। था दिकी च्यि च्यि खित्च्या ईन्दाका सिन थेरू ओताते मिओन थेला तेइन देता ओतान। 2च्यिला सासीन बोकीन तुङगुल मुङगुल गाल्गीन नाबा ओताते मिज्यीगोङ थेरू येशू खादु ओतान। 3थे खोरोङला थोक खाईन ताकीनराङ देता ओताते धर्मे गुरूओनताङ फरिसी पाटी मिओनला येशूकी “थरिङ सुइँदा मिला ठाक्पा खाला तेरा परमेश्वर नियमताङ डिगीताना मिडिक्ते?” सिन सिदुक। 4तर थेबाबरी बातज्यीगोङ मिक्किता खाईन खाराक्पा देत्सुङ। येशूकीचेन थे मिला लाक्पेकी दोकीन बोबाते गाङे स्युर च्युत्सुङ। थेमे खाँपा ग्युक सिन थेरूई ताङसुङ। 5दोक खानामेई थेरू ओतातेबा गाङेला येशूकी “ख्योकोनते गधा कि लाङ लाङा मुथुप्च्या खाईन डालुम नाङ रिल्सुङ सासीन सन्चारी ईन्सीनोङ ख्योकोनगी तुरून्त थे गधा कि लाङला थेरूकी लोङगो मेन?” सिन सिदुक। 6थेकी थोक सिरजीन च्यि सिरापना चुक सिराप गाल्गीन थेबेकी छ्याःङ सिरा माथुप्सुङ।
येशूकी दाक्पोनगीराङ मान छोला मेङगो सिन साबाते
7थेमे थेरू साप साप्ला काताङा ओताते डोम्बोओन छ्ये छ्ये मि देत्च्येते ठाउँ रोज्ये खाईन देता थोङनामेई येशूकी दोक सिन बात खिताला स्यूसुङ। 8थेकी थेबाला “मिवे, सुइँदेकी खेराङला फाङमे भोजला निम्तो खासीन थेबे खाम्बादु गाल्ला दोक खाला छ्ये छ्ये मि देत्च्येते ठाउँ रोज्ये खाला मादेत। च्यिला सासीन थेरू ख्योकोन भन्दाङ छ्येते ज्येन डोम्बो ओङा थुप्क्यो। 9थेमे होथे मिलाङ खोल्लाङ निम्तो खित्कान्ते थे खाम्बे धनीकी वाकीन च्याकीन ‘दुरू दि छ्येते मिला देत ज्युत्कीना,’ साकीन खेराङ देत्सादुई लाङनामेई ज्येननापा गाल्ला देता फाप्जीन मि ङोन्दु थोई ङोचा ओङगीते। 10थोगी खेराङला खइँसाला निम्तो खित्जीन गाल्ला छ्ये छ्ये मि देत्च्येते ठाउँदु मेदेता खाला ज्येन खइँसापाराङ देत। थेमे थे खाम्बे धनीकी वाला ‘ओहो, हजूर देने स्योकना, देने स्योक,’ सिन काताङला ज्येननापा खेरला ज्य्वाक्यो। थोक ओङसीनका ज्येन ज्येन डोम्बोकी ख्योकोन छ्ये मि दुका सिन छ्या स्येक्यो। 11बात च्यि ईन्दे सासीन ङा ङाराङ ईन सिरकानला परमेश्वरगी छ्ये ईन सिन मिसिरो। छ्ये मिक्किकान्ते मिलाचेन परमेश्वरगी छ्ये जोइओ,” सिन सिदुक।
12थोक साकीन सिन्नामेकी थेकी थे खोरोङला साप साप्ला कातोङकान्ते मिलाङ “भोज लै खित्जीन खुई खोरोङ र्वाओन, आज्यो न्वाबा, दाक्पोन मि फाप्च्येतेबा थेमे छ्युक्पु छ्युक्पुते युल्बाला निम्तो माकेत। च्यिला सासीन तिरी थेबेकीङ खोल्ला निम्तो खाला थेबा खोपरोङला काताङगीन लै खाबाते भोजकी किम्बा दाक ज्येल्ग्यो। 13भोज लै खित्जीन बरू खुई चुक खिसे सासीन छ्याःङ मेतातेबा, कुज्येतेबा, ख्याम्बा मुथुप्कान्तेबा थेमे अन्धतेबाला काताङला साप बिन। 14थोक खासीनराङ खुई आशी ङेत्क्यो। होथेबेकी खुई लै खाबाते भोज सेइओ। तर खोल्ला काताङला भोज तेरा मुथुबो। ईन्सीनोङ परमेश्वरगी थे खोरोङगी खि साबा साबा च्योकराङ खित्कान्ते मिओनला स्यिसादुई सोम्बो लोक्नामेई खुई थोक लेमु खाबे लाईदु खोल्ला मान तेरग्यो,” सिन सिदुक।
छ्येज्यीक भोजकी कथा
(मत्ती २२:१-१४)
15येशूकी थोक सिरा थोनामेई थेरू साप सेइन ओताते मिज्यीगी “था तिरी परमेश्वर राज्यदु भोज सा ङेत्कान्ते मि आउदी भाग्यमानी ईन,” सिन सिदुक। 16थेमे येशूकी थेला “दि बात ङेन। च्यि सासीन बाजिई मिज्यीगी आउदी छ्येज्यीक भोज लै खादुक्लो। भोज साप्ला थेकी मि काल्बेईला निम्तो खाबा ओताक्वालो। 17साप थुङा गाङे ठीक ओङगीन सिन्नामेकी थेकी ‘लो था जेसुकै ठीक ओङसुङ। थोगी गाङेराङ स्योक्लो,’ सिन निम्तो खाबाते मिओनला कातोङ ग्युक सिन खाम्बादु काम खित्कान्ते मिज्यीकला ताङदुक्लो। 18तर च्यि ओङकालो सासीन थेबा गाङेकी ‘ओङा माङेत्सुङलो, स्येदाङ माकेत्लो सिन सि,’ सादुक्लो। थोक सिरकान्तेबे नाङ दोक्पोईकी ‘स्यीङज्यीक ङ्योबाप्लो। थे स्यीङ लेमु मेलेबा चुक दुका तार ड्वा फाप्सुङलो। थोगी ङा ओङा माखोम्सुङलो, स्येदाङ माकेत्लो सिन सि,’ सादुक्लो। 19थेमे ज्येनज्यीगीचेन ‘लाङ हल ङा ङ्योबाप्लो। थेबा मोला ता फाप्च्या ओत्लो। थोगी ङा ओङा माखोम्सुङलो, स्येदाङ माकेत्लो सिन सि,’ सादुक्लो। 20याङराङ ज्येनज्यीगीचेन ‘भर्खरकामा फाङमा खाबाप्लो। थोगी ओङा माङेत्सुङलो सिन सि,’ सादुक्लो।
21थेरूई थे कातोङ डोकान्ते मिकी खाँपा गाल्गीन गाङे बात खाम्बे धनीला लाःप्तुक्लो। दि बात थोजीन थेला आउदी खाईन स्येदाङ लादुक्लो। थेमे थेकी गोमा कातोङ डोकान्ते मिलाराङ ‘लो ग्युक, खो सारगी नाङपा गाङेपा गाल्ला छ्याःङ मेतातेबा, कुज्येतेबा, अन्धतेबा थेमे ख्याम्बा मुथुप्कान्तेबा गाङेला काताङला खोरच्योक,’ सिन ताङदुक्लो। 22थेमे थेकीङ कोता च्योकराङ खाईन मिओन काताङगीन खुलानामेई खाम्बे धनी ओत्सादु ख्योल्गीन ‘ङे हजूरगी साबा च्योकराङ खाबाप। ईन्सीनोङ थोरूमोङ खाम्बा खाङा मिन्दुक,’ सिन सिरजीन 23धनीतेकी थेला ‘लो याङराङ ग्युक। दि खाम्बा माखाङ थुपथुप युल युलला थेमे फार छुर जहाँसुकैपा गाल्ला मिओनला काताङला द्वामाराङ टीला खोरच्योक। 24तर ङे थोङलाका निम्तो खाबाते मिओनगीचेन दि भोज खाङगीङ साराङ मेङेदो,’ सिन सादुक्लो,” सिन सिदुक।
येशू चेला ओङाला चुक खिता फाप्कीते
25येशूताङराङ ज्येन मिङ आउदी काल्बेई तिरी तिरी ख्याम्बा ओतान। थेमे थेकी ल्हाकनापा ग्युरगीन थेबाला 26“ङात्ताङ ख्याम्बा सेम खित्कान्ते मिकीचेन तोङा फाप्सीन दाक्पोन आबा आमालाङ तोङा फाप्क्यो। दाक्पोन फेम्मेताङ फुज्युङ फुमु थेमे आज्यो न्वा आज्यी नुमुला तोङा फाप्सीन थोगोङ खिता फाप्क्यो। दोस्यिककामा मेन, थोक्ते मिकीनी दाक्पोन ज्यानगी मायाङ मारे खिता फाप्क्यो। दोक माक्यासुङ सासीन सुङ ङे चेला ओङाराङ मुथुबो। 27ङे चेला ओङा छोल्कान्ते मिकीचेन जस्तो दुक्पा ओङसीनोङ ओङस्यीत सिन दाक्पोन टाँए खाला स्या फाप्च्येते स्यिङगी थाम खुरला ङे तिरी तिरी ख्याम्बा फाप्क्यो।
28दोक सिइना, ख्योकोन नाङ सुइँदाला खाम्बाज्यीक ज्वा फाप्च्या ओत। खाम्बा ज्वा भन्दा गोमाराङ च्यि थेकी पैसा थोई लै खाओङा थेमे जोला सिन सिनसाकला पैसेकी दाङगीताकाना मादाङताका सिन विचार मिक्किओतरो? 29विचार मिक्किता खाईन खाम्बा ज्वाप्ला स्यूकीन खाम्बे जग तेक्नामेई पैसा मादाङगीन खाम्बा ज्वा माथुप्सीन थोङकान्ते मिओनगी च्यि सिते? 30च्यि थेबा गाङेकी ‘थे मिकी खाम्बा ज्वाप्ला स्यूबा ओतान। गारो ङिकामा चिकीन थोकराङ ताङदुक, तोना,’ सिनकामा खिस्यी मिक्किओतरो?
31थोकराङ खाला हजार च्युताम्बाकामा मिल्टेरी ओताते गेल्बोकी हजार खालज्यीक मिल्टेरी ओताते गेल्बोताङ लडाइँ खिता फाप्सीन च्यि थेकी ज्येनते गेल्बोला ग्याला थुबोङाना माथुबोङा सिन गोमाका विचार मिक्किओतरो? 32थे खोरोङगी ग्याला माथुबोङ सिराच्योक लासीन थेकी ज्येनते गेल्बो लामला थारीलाराङ ओते बेलाला लडाइँराङ शुरू मायाङाला लडाइँ मिक्किकी, डिगी सिन मिओनला थे ओत्सादु तोङगो। 33थाल्ला ङे साबाते मिओनगी गोमा विचार खिता फापा च्योकराङ ख्योकोन सुइँदेते ङात्ताङ ख्याम्च्ये सेम ओत्सीन ख्योकोनगीङ लेमु खाला विचार खि। च्यिला सासीन ख्योकोनगी खेराङते ओताते जति माया मारे खासीनकामा ङे चेला ओङा थुप्क्यो, मेन सासीन ङे चेला ओङा मुथुबो।
34याङराङ बातज्यीक च्यि सासीन छा छाप्टो ओत्सीन लेमुराङ ईन। छेते छाप्टो तोरसीन थे छेते च्यि काम? याङराङ च्यिकी थे छा छाप्टो जोच्ये? 35थोक्ते छा छ्या ओङस्यीत सिन स्यीङला मुलुओ, रूल्ला छ्या डोरस्यीत सिन जुटेनलाङ मुलुओ। बरू थोक गालाते छानी छ्याःङ काम लै मिक्किओ सिन थाराङ थोरला क्युरग्यो। ङेन्दा सेम ओत्कान्ते मिकी दि बातओन लेमु खाला ङेन,” सिन सिदुक।
Currently Selected:
लूका 14: JUL
Highlight
Share
Copy
Want to have your highlights saved across all your devices? Sign up or sign in
© 1992 Wycliffe Bible Translators Inc. All rights reserved.
