यूहन्ना 17
17
येशूकी थे खोरोङ लाईदु प्रार्थना खाबाते
1दि बाततेबा साकीन सिन्नामेकी येशूकी नामने ताकीन “आबा, था खुई फुज्युङ चुक छ्ये ईन्दे सिन मिओनगी छ्या स्येच्येते बेला लेप्कीन सिन्सुङ। थोगी खुई थे चुक छ्ये ईन्दे सिन मिओनला छ्या स्ये छ्युत। थेमे खुई फुज्युङगी आबा खो चुक छ्ये ईन्दे सिन तेन्ला तेरग्यो। 2थोक खिताला खुई खोरोङ फुज्युङला मि गाङेला राज्य खित्च्येते अधिकार बिन्दा ओत। दोक खाईन खुई थे लाःक्तु जिम्मा बिन्दाते मि गाङेला थेकी नोमुङ मिसिन्च्येते जुनी तेरग्यो। 3आबा खोकामा सत्यते परमेश्वर ईन थेमे खुई दुरू ताङाते येशू ख्रीष्टला सु ईन्दे, चुक्ते ईन्दे सिन छ्या स्येच्येतेराङ नोमुङ मिसिन्च्येते जुनी ङेत्च्येते ईन। 4आबा खुई खि साबाते काम जति ङे खाईन सिन्दा खाबा ओत। थे कामतेबा खित्जीन आबा खोत्ताङ चुक छ्येज्यीक शक्ति ओते सिन दि सा लुङबे मिओनला ङे तेन्गीन बिन्दा ओत। 5दि सा लुङबा ज्वा भन्दा गोमा ङा आबा खोत्ताङराङ छ्येज्यीक मान ङेत्कीन देता ओतान। आबा खोरोङ दोन्दु ङा होथोक छ्येज्यीक मान ङेत्कीन देताते बात था मिओनला खुई छ्या स्ये छ्युत।
येशूकी चेलातेबे लाईदु प्रार्थना खाबाते
6दि सा लुङबे मिओन नाङदुई खुई ङाराङ लाःक्तु जिम्मा बिन्दाते मिओनला आबा खो सु ईन्दे, चुक्ते ईन्दे सिन ङे छ्या स्ये च्युत्कीन बिन्दाप। ईन्दानी थेबा गोमामेईराङ खुई मिराङ ओतान। थेबाला खुई ङे लाःक्तु जिम्मा बिन्सुङ। थेमे थेबेकी खुई बात ङेन्सुङ। 7खुई ङाला बिन्दाते जे कुरोङ खुई छ्य्वापेईराङ ओङच्येते ईन सिन थानी थेबेकी लेमु खाईन छ्या स्येसुङ। 8खुई ङाला लापाते बातओन ङे गाङे थेबाला लापाप। थेमे थेबेकी थे बातओन ङेन्सुङ। ङा आबा खो ओत्सादुईराङ वाबाते दुका सिन थेबेकी लेमु खाईन छ्या स्येसुङ। ङाला खुईराङ ताङाते ईन्दा मेन्दा सिन थेबेकी छ्याःङ शंका माक्यासुङ। 9थाल्लाचेन ङा दि सा लुङबे मि गाङे लाईदु मेन तर आबा खुई ङे लाःक्तु जिम्मा बिन्दाते मिओन लाईदु प्रार्थना खिओ। दिबाबरीचेन खुईतेराङ ईन। 10ङात्ताङ ओताते जति गाङे खुईतेराङ ईन थेमे खोत्ताङ ओताते ङेतेङ ईन। ङा चुक छ्ये ईन्दे सिन ज्येनला तेन्ला तेरकान्ते दिबाराङ ईन। 11था ङा काल्बासाक दुरू मेदेदो। ङा खो ओत्साने ओङगीन ओत। दोक ईन्सीनोङ दिबाबरीनी दुरूराङ देत्क्यो। थोगी आबा खुई ङाला बिन्दाते खोरोङ शक्तिकीराङ दिबाला मेलेबा ओङसादुई जोए खाला स्योक। सेमला पाप सिराते छ्याःङ मेताते खोकामा ईन। खुई दिबाला जोए खाईन ज्याक्नामेई आबा खोत्ताङ ङा दोक्पोईराङ ईन्दा च्योकराङ खाला दिबाबरीङ सेमज्यीकराङ खाला डिक्ला देता थुप्क्यो। 12ङा दुरू दिबाताङ देत देतसाक ङे दिबाला खुई ङाला बिन्दाते शक्ति छ्य्वापेई जोए खाईन ज्याक्पाप। नरककुण्डमा स्यूइओ सिन साबाते मिज्यीक बाई ङे सुङलाङ ङाराङ छ्य्वापेई ठाल माच्युत। ङे दोक खानामेई परमेश्वर बातला गोमाका साबाते बात साबा च्योकराङ ओङसुङ।
13ङाचेन था खो ओत्साने ओङगीन ओत। ङे खित्सादु दिबाबरी ङा च्योकराङ छ्याःङ पीर मिक्किता खाला गा खिन देता थुप्स्यीत सिन ङा दुरू ओत्जीनराङ दि बात खिओ। 14ङे दिबाला खुई साबाते बातओन लापाप। दि सा लुङबे मिओनगी दिबाला किला च्योकराङ खासुङ। दिबाङ ङा च्योकराङ दि सा लुङबे मि मेन्देकीराङ ज्येनतेबेकी दिबाला थोक खासुङ। 15ङे दिबाबरीला दुरूकी तेन्ला खेरा फाप्क्यो सिन साबाते मेन। बरू मिला मेलेबा खित्कान्ते शैतान लाःक्तुकी दिबाला जोए खाला स्योक सिन ङा बिन्ती खिओ। 16दिबाङ ङा च्योकराङ दि सा लुङबे मि मेन। 17सत्यते बात ङेन च्युत्ला दिबे सेम खुदुक जोला खुई दिबाला खोल्ला मन परे खित्च्येते कामताङ बातकामा खित छ्युत। सत्यते बातचेन खुई बातराङ ईन। 18खुई ङाला दुरू ताङा च्योकराङ खाईन ङेङ दिबाला दि सा लुङबे मि नाङराङ ताङा ओत। 19दिबेकीङ पूरो खाला ङे खाबाच्योक खिता थुप्स्यीत सिनराङ ङा खोल्ला मन परे खित्च्येते कामताङ बातकामा खिओ।
येशूकी थे खोरोङला विश्वास खित्कान गाङे लाईदु प्रार्थना खाबाते
20दिबे लाईदुकामा मेन, दिबेकी लापाते बात ङेन्ला ङाला विश्वास खित्कान्ते मिओन लाईदुङ ङा प्रार्थना खिओ। 21थेबे लाईदु ङा च्यिला प्रार्थना खिते सासीन दिबा गाङे सेमज्यीकराङ खाला डिक्ला देत्स्यीत। थेमे आबा खोत्ताङ ङा दोक्पोईराङ ईन्देकी दिबाबरीङ ङुरूङताङ जीउज्यीकराङ ओङस्यीत। थोक ओङनामेकी ङाला आबा खुईराङ ताङाते दुका सिन दि सा लुङबे मिओनगी पत्ते खिओ। 22आबा खोत्ताङ ङा दोक्पोईराङ ईन्दा च्योकराङ खाला दिबाङ सेमज्यीकराङ खाला डिक्ला देत्स्यीत सिन आबा खुई ङाला छ्येज्यीक मान बिन्दा च्योकराङ खाईन ङेङ दिबाला मान बिन्दा ओत। 23ङा दिबे सेमगी नाङ देत्च्येते ईन्देकी थेमे खोत्ताङ ङा दोक्पोईराङ ईन्देकी दिबा गाङेराङ जहिलेङ सेमज्यीकराङ खाला डिक्ला देत्स्यीत। दोक ओङनामेई ङाला खुईराङ ताङाते ईन थेमे खुई ङाला ङिङज्ये खाबा च्योकराङ खाईन दिबालाङ ङिङज्ये खित्च्याक्वा सिन दि सा लुङबे मिओनगी छ्या स्येक्यो। 24आबा, खुई ङाला ङिङज्ये खित्च्येते ईन्देकी दि सा नाम ज्वा भन्दा गोमामेईराङ खुई ङाला छ्येज्यीक मान बिन्दा ओतान। था खुई ङे लाःक्तु जिम्मा बिन्दाते मि जतिङ ङा जहाँ देत्कीदुक, थेरूराङ देता ङेत्ला दिबाबरीकी ङा होथोक खाईन मान ङेत्कीन देताते थोङा ङेत्स्यीत सिरच्येते ङे सेम ओत। 25आबा, खो खालि लेमुते कामताङ बातकामा खित्कान्ते ईन। दि सा लुङबे मिओनगी खोल्ला छ्या मास्येसीनोङ ङा खोल्ला छ्या स्येक्यो। ङाला विश्वास खित्कान्ते मिओनगी खुईराङ ङाला ताङाते ईन सिन छ्या स्येसुङ। 26खो सु ईन्दे, चुक्ते ईन्दे सिन ङे दिबाला छ्या स्ये च्युत्कीन बिन्दा ओत। ङा थोरूमोङ दोक खिनराङ देत्क्यो। खुई ङाला ङिङज्ये खाबा च्योकराङ दिबेकीङ खोपरोङ नाङ ङिङज्ये खितरीङ खित्स्यीत सिन ङा दिबे सेमगी नाङराङ देत्क्यो,” सिन आबातेला प्रार्थना खासुङ।
Currently Selected:
यूहन्ना 17: JUL
Highlight
Share
Copy
Want to have your highlights saved across all your devices? Sign up or sign in
© 1992 Wycliffe Bible Translators Inc. All rights reserved.
