यूहन्ना 16
16
1जस्तो दुक्पा ओङजीनोङ ख्योकोन ङे छ्य्वापेकी ठाल्ला मोन्डोस्यीत सिनराङ ङे ख्योकोनला दि गाङे बात साबाते ईन। 2था खेराङ छ्ये छ्ये मिकी ख्योकोनला मिटिङ खित्च्येते खाम्बादु ओङा मेङेत्च्या खाला तेन्ला तोङगो। सिइ सासीन दोक्ते बेलाङ ओङगो। चुक सासीन ख्योकोनला सेत्कान्ते मिकीनी परमेश्वरला मन परे खित्च्येते कामका खिन ओत सिन विचार खिओ। 3थेबेकी आबालाङ ङालाङ छ्या मास्येबेकीराङ थोक खिओ। 4तिरी ख्योकोनला थोक ओङजीन ङे दोक दोक ओङगो सिन साबा ओतान सिन ख्योकोनगी ठेम्बा खित्स्यीत सिनराङ ङे दि बाततेबा साबाते ईन। ङा थोङला ख्योकोनताङ ङ्योम्बुराङ ओतेकी थेजीन ङे दि बाततेबा साबा मेतान।
परमेश्वर आत्मेकी खित्च्येते काम
5थाचेन ङा ङाला दुरू तोङकान्ते ओत्साने ग्युरला डुइन ओत। ईन्सीनोङ ख्योकोन सुङगीङ ‘प्रभु खो खापा डोच्ये?’ सिन ठिबा मेत। 6ङे दि बाततेबा साबेकी ख्योकोन सेम स्यिइन सिन्दा ओत। 7दोक ईन्सीनोङ ङा ख्योकोनला दि बात लेमु खाला सिरामीन। ङा दोक खाला डोच्येते ख्योकोनला लेमु ओङालाराङ ईन। ङा दुरूकी मागालथुप ख्योकोनला सल्लाह तेरकान्ते ख्योकोन ओत्सादु मेङगो। ङा गाल्नामेईचेन ङा थेला दुरू तोङगो। 8थेमे थेकी वाला दि सा लुङबे मिओनला थेबेकी पाप खाबेकी खित्सादु थेबा दोषीराङ ईन सिरच्येते, परमेश्वरगी चुक्ते मिला दोषी मेन सिते सिरच्येते थेमे ङीमाई परमेश्वरगी गाङेते न्याय खिओ सिरच्येते बात छ्या स्ये ज्युत्क्यो। 9च्यि सासीन थेकी मिओनला थेबेकी ङाला विश्वास माक्याबातेराङ पाप खाबाते ईन सिन छ्या स्ये ज्युत्क्यो। 10थेकी थेबाला परमेश्वरगी चुक्ते मिला दोषी मेन सिते सिनोङ छ्या स्ये ज्युत्क्यो। च्यिला सासीन था ङा दुरूकी आबा ओत्साने डुइओ। थेमे ख्योकोनगी ङाला मोथोङो। 11थोकराङ खाला थेकी परमेश्वरगी ङीमाई गाङेते न्याय खिओ सिनोङ छ्या स्ये ज्युत्क्यो। च्यिला सासीन दि सा लुङबे गेल्बो शैतानला सजाय तेराला फैसला ओङगीन सिन्दा ओत।
12ङे ख्योकोनला सिरा फाप्च्येते बात थोरूमोङ काल्बेई ओत। ईन्सीनोङ थाल्ला दि भन्दा ल्हाक्पा ख्योकोनगी ङेन्दाराङ मुथुबो। 13दोक ईन्सीनोङ ख्योकोनला सल्लाह तेरकान्ते परमेश्वर आत्मा दुरू वानामेकी थेकीराङ ख्योकोनला सत्यते बात गाङे खो ज्युत्क्यो। थेकी खित्च्येते बात थे खोरोङगी जोला खित्च्येते मेन। थेकीनी थे खोरोङगी थोबाते बातकामा खिओ। थेमे था थोरूमोङ च्यि च्यि ओङगीते सिन लाप्ला तेरग्यो। 14ङे लोप साबाते बातकामा ख्योकोनला लोप्च्येते ईन्देकी परमेश्वर आत्मेकी ङाला मान खिओ। 15आबाताङ ओताते जति गाङे ङेतेङ ईन। थोगीराङ ङे ‘परमेश्वर आत्मेकी ङे लोप साबाते बातकामा ख्योकोनला लोप्क्यो,’ सिन साबाते ईन।
दुक्पा ओङच्येतेताङ गा लाङच्येते बात
16था टिक्पी दिन तिरी ख्योकोनगी ङाला थोङराङ मोथोङो। टिक्पी तिरीमेकीचेन ख्योकोनगी ङाला याङराङ थोङा ङेत्क्यो,” सिन सिदुक। 17थेकी दि बात सानामेई चेलातेबा कोई कोईकी “ ‘टिक्पी दिन तिरी ख्योकोनगी ङाला थोङराङ मोथोङो। टिक्पी तिरीमेकीचेन ख्योकोनगी ङाला याङराङ थोङा ङेत्क्यो,’ साबाते थेमे ‘च्यिला सासीन ङा आबा ओत्साने डुइओ,’ साबाते च्यि साबाते ईन्ताका?” सिन खोपरोङ नाङ बात खासुङ। 18“दि ‘टिक्पी तिरी’ साबाते च्यि ईन्ताका? दि बातनी ङुरूङगी छ्याःङ माखोसुङ,” सिन थेबा बात खिनराङ देत्सुङ। 19थेकी च्यि साबाते ईन्ताका सिन चेलातेबेकी खोबा चाल्ला दुक सिन येशूकी छ्या स्येसुङ। थोगी थेकी “च्यि ख्योकोनगी ङे ‘था टिक्पी दिन तिरी ख्योकोनगी ङाला थोङराङ मोथोङो। टिक्पी तिरीमेकीचेन ख्योकोनगी ङाला याङराङ थोङा ङेत्क्यो,’ सिन साबाते च्यि साबाते ईन्ताका सिन बात खाबाप? 20दि बात ङेन। च्यि सासीन था पीरगी खित्सादु ख्योकोन आउदी खाला ङुइओ। थे बेलाला दि सा लुङबे मिओनचेन आउदी खाला गा खिओ। ख्योकोनगी सेम सेत्कीन पीर खिता फाप्सीनोङ दिनी था तिरी आउदी गा लाङच्येते बातका ओङगो। 21फिजे सुक ग्याप्नामेई फेम्मे मिला आउदी दुक्पा ओङगो। ईन्सीनोङ फिजा केकीन सिन्नामेकी थेकी गोमे सुक टोक ज्येत्ला फिजाज्यीक केसुङ सिन गाका खिओ। 22ख्योकोनलाङ होदोकराङ ओङगो। चुक सासीन था ख्योकोनला आउदी पीर लाङगो। ईन्सीनोङ याङराङ ङा ख्योकोनला ठेता खिओ। थेमे थेजीन ख्योकोनला आउदी गा लाङगो। सुइँदेकी ख्योकोनला दोक खाला गा माकेत सासीनोङ ख्योकोन खाराक्पा देताराङ मुथुबो। 23थे छोमु ख्योकोनगी ङाला छ्याःङ नाङ मिसिरो। दि बात ङेन। ख्योकोनगी ङे मिन लाकीन आबाला जे नाङ सासीनोङ थेकी ख्योकोनला दाक तेरग्यो। 24थातासाक ख्योकोनगी ङे मिन लाकीन आबाताङ छ्याःङ नाङ खाबा मेत। था ख्योकोनगी आबाला नाङ खि। ख्योकोनगी नाङ खाबाते ङेत्नामेकी छ्याःङ पीर मिक्किता खाला ख्योकोन आउदी खाला गा खिओ।
25थरिङसाक ङे ख्योकोनला दि गाङे बात सजिलो खाला खोबा मुथुप्च्या खाईन लापा ओत। दोक ईन्सीनोङ था समयज्यीक ओङगो। थेजीन ङा ख्योकोनला दोक खाला मेन्देकी आबे बात ङा ख्योकोनगी सजिलो खाला खोबा थुप्च्या खाला लाःप्क्यो। 26थेजीनचेन ख्योकोन खेराङगीराङ ङे मिन लाला आबाताङ नाङ सिरा थुप्क्यो। ख्योकोनगी नाङ साबातेबा बिन सिन आबाताङ ङेराङ प्रार्थना खिन देता माफाबो। 27ख्योकोनगी ङाला ङिङज्ये खाबेकी थेमे ङा आबा ओत्सानेई वाबाते ईन सिन पत्ते खाबेकी आबा थे खोरोङगीराङ ख्योकोनला ङिङज्ये खिओ। 28ङा आबा ओत्सानेकी दि सा लुङबादु वाबाते ईन। थेमे याङराङ थे ओत्सानेराङ ग्युरला डुइन ओत,” सिन सिदुक।
29दोक सानामेई चेलातेबेकी “था ईन्सीन गुरू खुई गोमा च्योक खाला मेन्देकी सजिलो खाला खोबा थुप्च्या खाला बात खिताला स्यूसुङ। 30खोल्ला जे बादोङ छ्या ओताक्वा थेमे खोत्ताङ ठा चालाते बादोङ खुई गोमाका छ्या स्येच्याक्वा सिन ङ्योकोनगी लेमु खाईन छ्या स्येसुङ। थोगीराङ खो परमेश्वर ओत्सानेईराङ वाबाते ईन सिन ङ्योकोन पत्ते खिओ,” सिन सिदुक। 31थेबेकी थोक सानामेई थेकी “था ईन्सीन ख्योकोनगी ङाला विश्वास खासुङ। 32तर दि बात ङेन। चुक सासीन था समयज्यीक ओङगो, सिइराङ सासीन थे समय लेप्कीन सिन्दा ओत। थेजीन ख्योकोन ङाला च्यिकराङ ताङला खेराङ खेराङ खाम्बाला फ्रोला डुइओ। थोक ओङसीनोङ आबा ङात्ताङ ङ्योम्बु ओतेकी ङा ङाराङकामा देता माफाबो। 33ङे खित्सादु ख्योकोन सेम ढुक्क खाला देता थुप्स्यीत सिनराङ ङे दि बाततेबा साबाते ईन। दि सा लुङबे मिओनगी ख्योकोनला तेरासम्म दुक्पा तेरग्यो। थोक ईन्सीनोङ ख्योकोन हरेस मासा। दि सा लुङबादु ओताते जे ईन्सीनोङ, जो ईन्सीनोङ गाङेला ङे ग्याल्गीन सिन्दा ओत,” सिन सिदुक।
Currently Selected:
यूहन्ना 16: JUL
Highlight
Share
Copy
Want to have your highlights saved across all your devices? Sign up or sign in
© 1992 Wycliffe Bible Translators Inc. All rights reserved.
