शक्ति काम 9
9
शावलगी येशूला विश्वास खिताला स्यूबाते
1थेमे शावलगीचेन प्रभु येशू चेलाओनला थोरूमोङ खेदा खिता ताङा मेतान। थेकी थेबाला झन झन दुक्पा बिन्ला सेता छोल्गीन ओतान। 2थेकी दमस्कस सारनापा गाल्ला थेपा येशू बात ङेन्गीन थे छ्य्वापा लै खाबाते मि गाङेला चाल्ला ख्योओ मि, फेम्मे मि गाङेला जुम्ला यरूशलेमपा खुलाङच्ये विचार खासुङ। थोगी थेकी गाङे भन्दा छ्येते पूजारी ओत्सादु गाल्गीन दमस्कसदु ओताते यहूदीओनते मिटिङ खित्च्येते खाम्बा खाम्बे छ्येते मिला थेला थोक खिताला मद्धत बिन सि सिन चिट्ठी टिकीन नाङ खासुङ।
3थेमे थे चिट्ठी खुरगीन शावल दमस्कसपा गाल्सुङ। थे सारगी खादु लेपा लेपा खाला च्यि ओङसुङा सासीन स्वर्गनेकी नाम्दाक फोगीन थे फेरोला नाम्दाक छ्याङे गाल्सुङ। 4थोक ओङनामेकी शावलचेन साला रिल्सुङ। थेमे थेकी “ए शावल, खो च्यिला ङाला खेदापानी खिते?” सिन सिरा थोसुङ। 5थोक सिरा थोकीन शावलगी “खो सु ईन्दे प्रभु?” सिन ठिजीन लोईन थेकी “ङा येशू ईन। खुई खेदा खाबाते ङालाराङ ईन। 6लो था खो लाला सारनापा ग्युक। खुई च्यि च्यि खिता फाप्कीते सिन था ङा खोल्ला थेपाराङ लाप्ला तेर ज्युत्क्यो,” सिनोङ सिरा थोसुङ। 7थेरू थोक खाईन बात खाबाते ङोरो थोकीन तर सुङलाङ माथोङगीन थेत्ताङ ङ्योम्बु गालाते मिओन लेम्बा दोगे दोगे गाल्गीन देत्सुङ। 8थेमे शावलगी रिल्सादुकी लाकीन च्याकीन मिक पेत्कीन ता चाल्सुङ। तर थे मिक मोथोङच्या गाल्गीन सिन्दा ओतान। थोगी र्वातेबेकी थेला लाक्पाला जुम्गीन डोरे खाईन दमस्कसपा टीकीन खेरसुङ। 9थेमे ङीमा सुमसाक थेकी मिगीङ माथोङसुङ, साप थुङाङ छ्याःङ मासोसुङ।
10दमस्कसदुराङ हननिया सिराज्यीक येशू चेला ओतान। प्रभु येशूकी थेला मिलाम खित ज्युताच्योक खाईन “ए हननिया,” सिन काताङसुङ। थेमे हननियेकी “च्यि साबे प्रभु?” सिन सिरजीन 11प्रभु येशूकी “लो खो दुरूकी सीधा सिराते लामनापा ग्युक। थेमे थेरू यहूदे खाम्बादु गाल्ला टार्ससपे शावल सिराते मिला ठेता खिता नाङ सि। शावलचेन थेरू देत्ला परमेश्वरला प्रार्थना खिन दुक। 12थेला ङे हननिया सिराते मि वाला खुई लाक्तु लाक्पा ज्याक्ला खुई मिक लोक्ला थोङा थुप्च्या जोला तेरग्यो सिन मिलाम खित ज्युताच्योक खाईन तेन्गीन बिन्दा ओत,” सिन सिदुक। 13थोक सिरजीन हननियेकी “प्रभु, थेकी यरूशलेमदु ओताते खुई मिओनला खेदा खाईन खाईन दुक्पा बिन्दाते बात गाङे ङे थोबा ओत। 14खोल्ला प्रभु सिन प्रार्थना खित्कान गाङेला जुम्ला खेराला छ्ये छ्ये पूजारी अधिकार ङेत्कीन थे दुरू वाला दुक्लो,” सिन सिदुक। 15थोक सिरजीन प्रभु येशूकी “खो ज्यीबा मिक्किता खाला थेपा ग्युक। च्यिला सासीन ङे थेला ङा सु ईन्दे सिन लोपाला छाने खाबा ओत। था थेकी गाल्ला ज्येन ज्येन जातकी मि, थेबे गेल्बोओन थेमे इस्राएलीओनलाङ ङे बाततेबा लोप्क्यो। 16ङा सु ईन्दे सिन लोप्जीन थेकी आउदी दुक्पा खपे खिता फाप्क्यो सिरच्येते बादोङ ङा थेला सिओ,” सिन सिदुक।
17थेमे हननिया थे खोरोङला ग्युक साबाते मि खाम्बापा गाल्गीन शावलला ठेता खासुङ। थेमे थेकी थे लाक्तु लाक्पा ज्यागीन थेला “भाइ शावल, देपा ओङजीन खोरोङगी लामनापा ठेताते प्रभु येशूकीराङ था खुई मिगी थोङा थुप्स्यीत थेमे परमेश्वर आत्मा ङेत्ला खो परमेश्वर आत्मेकी खाङाते मि ओङस्यीत सिन ङाला दुरू ताङाते ईन,” सिन सासुङ। 18थोक सिरासात्तु शावल मिकदुकी मिकेक च्योक खइँदा ङील्गीन गाल्सुङ। थेमे थेकी लोईन थोङा थुप्सुङ। दोक ओङनामेई थे लासुङ। थेमे हननियेकी थेला छ्युला लुगीन बप्तिस्मा बिन्सुङ। 19थेमे शावलगी याङराङ साप थुङा सोसुङ। थेमे थे तङरेङ खासुङ।
शावलगी दमस्कसदु येशू बात लापाते
थेरूकी टिक्पी दिन शावल दमस्कसदु येशू चेलाओनताङराङ देत्सुङ। 20येशूला विश्वास खिताला स्यूक्पाईताङ शावल थेरू ओताते यहूदीओनते मिटिङ खित्च्येते खाम्बे नाङपा गाल्गीन थेरू जम्मा ओङाते मिओनला येशू परमेश्वर फुज्युङराङ ईन सिन लोपाला स्यूसुङ। 21थेकी थोक खाला येशू बात खित्जीन थेङले मि गाङेराङ छक्क परे खासुङ। थेमे थेबाबरीकी खोपरोङ नाङ “आबिई, यरूशलेमदु येशूला प्रभु सिन प्रार्थना खित्कान्ते मिओनला सेत्कान्ते मि च्यि दिराङ मेन? थेमे च्यि होथोक्ते मिओनला जुम्ला छ्ये छ्ये पूजारी दोन्दु खेराप सिनराङ दि दुरू वाबाते मेनरो?” सिन बात खिताला स्यूसुङ। 22शावलगीचेन येशू बात झन झन लेमु खाईन लोपाला स्यूसुङ। थोक खित्जीन थेकी “परमेश्वरगी तोङगो साबाते ख्रीष्टला चुक चुक ओङगीते सिन परमेश्वर बात खित्कान्ते मिओनगी गोमाका साबा ओताते बातओन येशूकी पूरो खासुङ। थोगी ख्रीष्टचेन येशूराङ ईन,” सिन ठोके खाईन बात खासुङ। थोक सिरजीन दमस्कसदु ओताते यहूदीओन अलमल्ल परे खासुङ।
23थोक खाईन शावलगी येशूराङ ख्रीष्ट ईन सिन थे बात लोप्कीन ख्याम्बाते आदोराङ गाल्नामेकी यहूदीओनगी थेला सेत्च्ये ठो खासुङ। 24दि बात शावलगी थाहा छ्येत्सुङ। यहूदीओनचेन शावल फ्रोला छ्योङगीता सिन थे सारगी फेरोला चिबा ओताते गारोला ओताते गो गाङेपा ङीन नुप गुकीन देताला स्यूसुङ। 25थेबा थोक खाईन गो गोला गुकीन देताते बादोङ थाहा ङेत्कीन शावल बात ङेन्ला थे छ्य्वापा लै खित्कान्ते मिओनगी डोकोला थाक्पा ताप्कीन च्याकीन शावलला थे नाङ लुगीन ग्वाकाराङ गारो लाकनामेई पाप्कीन सारदुकी तेन्गीन ताङसुङ।
शावल यरूशलेमपा ग्युरगीन लेपाते
26थेरूकी दोक खाईन ताङनामेई शावल यरूशलेमपा लेप्सुङ। थेपा ख्योल्नामेकी थेकी थेरू ओताते येशू चेलाओनताङ ङ्योम्बुराङ देता चाल्सुङ। तर शावल पक्काराङ येशू चेला ओङाते ईन्दा मेन्दा सिन थेबा थेत्ताङ ङ्योम्बु रूला देता आउदी ज्यीबा खासुङ। 27ईन्सीनोङ बारनाबासचेन शंका मिक्किता खाईन थेत्ताङ ख्याम्बाला स्यूसुङ। थेमे थेकी थेला येशू ख्रीष्टकी खटे खाबाते मिओन ओत्सादु खेरगीन शावलला ओङाते बात गाङे थेबाला लाःप्सुङ। थेकी थेबाला शावलगी दमस्कसपा डोजीन लामला प्रभु येशूला ठेताते, येशूकी थेत्ताङ बात खाबाते थेमे थोक ओङनामेई थेकी छ्याःङ ज्यीबा मिक्किता खाईन दमस्कस मिओनला येशू सु ईन्दे सिन लापाते बाततेबा गाङे लाःप्सुङ। 28दि बाततेबा थोनामेकीचेन थेबा गाङेराङ शावलताङ साङ खिताला स्यूसुङ। थेमे थेबाताङ ङ्योम्बुराङ देत्कीन शावलगी यरूशलेमदुङ ज्यीबाराङ मिक्किता खाईन प्रभु येशू सु ईन्दे सिन मिओनला लोपाला स्यूसुङ। 29थोक खित्जीन थेकी काल्बा च्योक्ते ग्रीक बात खित्कान्ते यहूदीओनताङ छलफल खिन परमेश्वरगी तोङगो साबाते ख्रीष्टचेन येशूराङ ईन सिन बात खिन ओतान। थेकी येशूराङ ख्रीष्ट ईन साबेकी खित्सादु थेबेकी थेला सेता चाल्सुङ। 30थेबेकी थोक खिता चालाते बात येशूला विश्वास खित्कान्ते ज्येन आज्यो न्वाओनगी थाहा छ्येत्कीन था थेला सेत्कीता सिन यरूशलेमदुकी सिजरियापा खेरसुङ। थेमे थेरूकी थेला थे खोरोङ सार टार्ससपा ताङसुङ।
31थे तिरी यहूदिया, गालील थेमे सामरिये अञ्चल नाङला ठाउँ ठाउँला जम्मा ओङकान्ते येशू ख्रीष्ट मि गाङेला लेमु ओङसुङ। था थेबाला सुङगीङ दुक्पा तेरगीन मेतान। प्रभु येशूला मन परे मिक्किच्येते छ्याःङ खिता मेङगो सिन ज्यीबा खिन थेबेकी झन झन लेमु खाईन थेला विश्वास खिताला स्यूसुङ। परमेश्वर आत्मेकी थेबाला आँट बिन्सुङ। दोक खाईन थेबा झन झन फेल्गीन ड्वाप्ला स्यूसुङ।
पत्रुसकी लिड्डाताङ योप्पादु खाबाते अचम्बते काम
32थेजीन पत्रुसचेन यरूशलेमदुकी ठाउँ ठाउँला गाल्ला परमेश्वर सन्तानओनला ठेता खिन ओतान। थोक खिन खिन थे लिड्डापाङ ख्योल्सुङ। 33थेरू एनियास सिराज्यीक कुज्येज्यीक ओतान। थे ख्याम्बा माथुपाते लो गेत गाल्गीन सिन्दा ओतान। 34थेमे पत्रुसकी थेला ठेत्कीन “एनियास, खोल्ला येशू ख्रीष्टकी ठाक्पा खिओ। लो ल्वा थेमे खोरोङ मालज्याम मिले खि,” सिन सिदुक। थोक सिराईताङ थे दाक लाकीन ख्याम्सुङ। 35थे ख्याम्बा थुप्च्या गाला थोङगीन लिड्डाताङ शारोन नाङला देत्कान्ते मि गाङेराङ प्रभु येशू छ्य्वापा लै खासुङ।
36योप्पादु तबीता सिराज्यीक फेम्मे मि ओतान। थेङ येशू चेला ओतान। तबीता साबाते खास्याक साबाते ईन। थेकी मि काल्बेईला लेमु खिन ओतान। थेमे दुक्पा ङेताते मिओनलाङ दुक्पाला आउदी खाला तेइन ओतान। 37पत्रुस लिड्डादु ओते बेलाला थे नाकीन स्यिसुङ। थेमे मिओनगी थे रोला टुकीन च्याकीन दिक्पाला खेर खेरसाक खाम्बादु ताले लाकने खेरगीन ज्याक्सुङ। 38थेरू येशू चेलातेबेकी पत्रुस लिड्डापा दुक्लो सिरा थोकीन थेला होत्ता देपा स्योक सि सिन लिन्दाला मेन्दा ङि मि ताङसुङ। लिड्डाचेन योप्पादुकी काल्बा थारी मेतान।
39थेमे पत्रुस थे मिओनताङ योप्पापा लिच्युङ। थेरू लेपासात्तु मिओनगी थेला तबीते रो ज्याक्पाते खाम्बे ताले लाकने खेरसुङ। थे कोठादु ख्योबो स्याप्ते फेम्मे मितेबा काल्बेई ओतान। तबीतेकी खोपरोङला बिन्दाते खोलाकओन पत्रुसला तेन्गीनकामा “दि खोलाकओन दिकीराङ चेम्गीन बिन्दाते ईन,” सिन थेबाबरी पत्रुस फेरो खाङ लाकीन देत्कीन ङ्वाप्ला स्यूसुङ। 40पत्रुसकी थेरू ओताते मि गाङेला फिनामा तेन्गीन ताङगीन खोबुकला देत्कीन च्याकीन परमेश्वरला प्रार्थना खासुङ। थोक खाईन थेकी थे स्याप्ते रो ज्याक्सापा ग्युरगीन “तबीता, लो ल्वा,” सिन सिदुक। थेकी थोक सिरजीन तबीतेकी मिक पेत्सुङ। थेमे थेला थोङगीन थेरू लाकीन देत्सुङ। 41थेमे पत्रुसकी लाक्पाला जुम्गीन थेला थेरूकी लाङसुङ। थोक ओङनामेकी थेकी थेरू ओताते ख्योबो स्याप्ते फेम्मे मिओन थेमे परमेश्वर सन्तान ज्येन गाङेला नाङने काताङगीन च्याकीन तबीताला ठेता खाईन बिन्सुङ। 42थोक खाईन तबीता सोम्बो लोक्पाते बात योप्पा खाङराङ फैले खासुङ। थेमे मि काल्बेईकी प्रभु येशूला विश्वास खिताला स्यूसुङ। 43दि तिरीङ पत्रुसचेन काल्बासाक योप्पादुराङ देत्सुङ। थे थेरू शिमोन सिराते सर्की खाम्बादु देता ओतान।
Currently Selected:
शक्ति काम 9: JUL
Highlight
Share
Copy
Want to have your highlights saved across all your devices? Sign up or sign in
© 1992 Wycliffe Bible Translators Inc. All rights reserved.
