शक्ति काम 7
7
छ्ये छ्ये मि दोन्दु स्तिफनसकी खाबाते बात
1थेमे गाङे भन्दा छ्येते पूजारीकी स्तिफनसला “दिबेकी साबाते बात चुक ईन्दे ओना? च्यि खुई थोक थोक साबातेराङ ईन?” सिन ठिसुङ। 2थेमे स्तिफनसकी दोक सिन थेबाताङ बात खिताला स्यूसुङ। चुक सासीन “छ्येवे थेमे आज्यो न्वावे, लो लेमु खाला ङेन। ङा ख्योकोनला गाङे बात सिरामीन। च्यि सासीन छ्येज्यीक शक्ति ओताते परमेश्वरगी ङुरूङ पुर्खा अब्राहामला थाङबोका ठेता ओतान। थेजीन अब्राहाम मेसोपोटामियादु देता ओतान। थे लुङबादुकी हारानपा ड्वा भन्दा गोमाराङ परमेश्वरगी ठेत्कीन थेला 3‘अब्राहाम, खो दि लुङबा थेमे दाक्पोन मि गाङेला ताङला ङे खाङ लुङबाला ग्युक सिका थेरूराङ ग्युक,’ सिन साबा ओतान।
4परमेश्वरगी थोक सानामेकी अब्राहाम थे खोरोङ लुङबा ताङगीन हारानपा गाल्गीन देत्सुङ। अब्राहामगी ताङगीन गालाते लुङबादुचेन कल्दीओन देत्कीन ओतान। तिरी आबाते स्यिनामेकी परमेश्वरगी थेला हारानदुकी थरिङोला ख्योकोन देताते दि लुङबादु खुलाबा ओतान। 5दि लुङबादु खुलाबा ईन्सीनोङ परमेश्वरगी थेजीन थेला दि लुङबेते स्यीङगी टालोज्यीगोङ बिन्दा मेतान। थेजीन खालि परमेश्वरगी ‘ङा खोत्ताङ खुई सन्तानओनला दि लुङबा तेरग्यो,’ सिन अब्राहामताङ जमानकामा खाबा ओतान। परमेश्वरगी थोक साबा ईन्सीनोङ सन्तान मिनला अब्राहामते थे बेलाला फिजाज्यीगोङ मेतान। 6थेमे परमेश्वरगी थेला ‘खुई सखा सन्तान तिरी मि लुङबाला गाल्ला देता फाप्क्यो। थेमे थे लुङबे मिओनगी थेबाला योक्पो योङमु जोला आउदी दुक्पा तेरग्यो। योक्पो योङमुराङ ओङला थेबा लो सय स्यीसाक थे लुङबादुराङ देत्क्यो। 7थे तिरीचेन ङा लो सय स्यीसाक थेबाला योक्पो योङमु जोला दुक्पा तेरकान्ते मिओनला सजाय बिन्ला खुई सन्तानओनला थे लुङबादुई देन्ग्यो। थेरूई तेन्नामेई थेबाबरी दि लुङबादु ग्युरला वाला दुरूराङ ङाला माने खिओ,’ सिनोङ साबा ओतान। 8अब्राहामताङ थे सन्तानओनला खाबाते जमान पक्काराङ ईन सिन छ्या स्येस्यीत सिन परमेश्वरगी अब्राहामला जीउला खतकी चिनु जोर च्युत्सुङ। तिरी अब्राहामते फुज्युङज्यीक केसुङ। केबाते ङीमा गेतकी छोमु थेकी थे खोरोङ फुज्युङ इसहाकलाङ खतकी चिनु जोकीन बिन्सुङ। तिरी इसहाककीङ थे खोरोङ फुज्युङ याकूबला खतकी चिनु जोकीन बिन्सुङ। थोकराङ खाईन याकूबकीङ थे खोरोङ फुज्युङ च्युन्ङीला थे चिनु जोकीन बिन्दा ओतान। याकूब फुज्युङ च्युन्ङी छ्य्वापेकीराङ ङुरूङ थर च्युन्ङी ज्युज्यु पुर्खा ओङाते ईन सिन ख्योकोनलाङ छ्याराङ ओत।
9याकूब फुज्युङबेकी खोपरोङ न्वा यूसुफला आउदी खाला डार खिन ओतान। थोगी गाङेराङ डिगीन ङीमाई थेबेकी यूसुफला मिश्रे लुङबामा डोकान्ते मिओनला च्वाकीन ताङसुङ। मिश्रमा लेप्नामेकी यूसुफ योक्पो ओङगीन देता फाप्सुङ। ईन्सीनोङ परमेश्वर थेत्ताङराङ ओतान। 10थेकी आउदी दुक्पा ङेत्सीनोङ परमेश्वरगी थेला लेमु खाईन ताकीन याङ याङ थे दुक्पादुकी टाल्गीन बिन्दा ओतान। परमेश्वरगी थेला आउदी बुद्धि बिन्दा ओतान। थोगी तिरी मिश्रे गेल्बो फारो दोन्दु क्याल्नामेकी थेकी थेला आउदी बुद्धि ओताज्यीक थोङगीन थे खोरोङ लुङबे छ्येते मि जोकीन लुङबा खाङ गाङेपा ताच्येते अधिकार बिन्दा ओतान। थेमे थे खोरोङ दरवारदु जेसुकै ताच्येते जिम्माङ थेलाराङ बिन्दा ओतान।
11गेल्बोकी थेला दोक मान बिन्नामेई टिक्पी तिरी मिश्रताङ कनान लुङबा खाङ छ्येज्यीक अनिकाल लाकीन काल्बेई दुक्पा ओङसुङ। थोक ओङनामेई कनानदु देत्कान्ते ङुरूङ ज्युज्यु पुर्खेकी साच्येते छ्याःङ माङेत्कीन आउदी दुक्पा ङेत्सुङ। 12थोगी यूसुफ आबा याकूबकी मिश्रमा छोङच्येते अन्न दुक्लो सिरा थोकीन ङुरूङ पुर्खाओनला गोमे बाजिला अन्न ङ्य्वाप्ला थेमा ताङसुङ। याकूब फुज्युङबाराङ ङुरूङ ज्युज्यु पुर्खा ईन सिन ङे याङराङ सिरा माफाप्तासीन। 13गोमे बाजिला ठेत्जीन आज्योतेबाला यूसुफकी थे खोरोङ सु ईन्दे सिन छ्याःङ मासासुङ। तिरी बाजिला अन्न ङ्योर ओङजीनचेन थेकी आज्योतेबाला ङा ख्योकोन न्वा ईन सिन लाःप्सुङ। थेमे गेल्बो फारोकीङ यूसुफ आबाताङ आज्योतेबे बात थोसुङ। 14थोक ओङनामेई यूसुफकी आबातेला जहान गाङे टीला थेमाराङ देताला स्योक सि सिन आज्योतेबाला ग्युरगीन ताङसुङ। थे बेलाला याकूब जहानतेबा जम्मा मेन्दा खाल सुमताङ च्याङा ओतान। 15थोक खाईन थे खोरोङ जहानतेबा गाङे टीकीन याकूब मिश्रमा गाल्गीन देत्सुङ। तिरी याकूब थे लुङबादुराङ स्यिसुङ। ङुरूङ पुर्खाओनोङ गाङेराङ थेरूराङ स्या ओतान। 16थेमे थेबे रोचेन तिरी खोपरोङ सन्तानओनगी शकेमदु खेरगीन अब्राहाम दिसे थुर्से फेरोलाराङ दिसुङ। अब्राहाम दिबाते थुर्से स्यीङचेन अब्राहामगी थोङला हमोर फुज्युङबाताङ चाँदीला ङ्योबा ओतान।
17परमेश्वरगी अब्राहाम सन्तानओनला मिश्रदुकी तेन्ला कनानपा खेरग्यो सिन गोमाका अब्राहामताङ खाबाते जमान पूरो खित्च्येते बेला लेपा लेपा खाबा ओतान। मिश्रदु देताते ङुरूङ ज्युज्यु पुर्खे सन्तानओन झन आउदी खाला फेल्गीन डुइन ओतान। 18थे बेलालाराङ मिश्रदु ज्येनज्यीक गेल्बो ओङसुङ। थेला थोङला यूसुफकी थे लुङबादु खाबाते लेमुते कामतेबा छ्याःङ छ्या मेतान। 19थेकी ङुरूङ जातकी मि फेल ज्युता मेङगो सिन आउदी खाईन दुक्पा तेराला स्यूसुङ। च्यि सासीन थेकी ङुरूङ पुर्खाओनला फिजाओन क्यासात्तु क्युरा सिन हुकुम बिन्सुङ।
20गेल्बोकी थोक खित च्युते बेलालाराङ मोशा केसुङ। थे आउदी लेमुई ओतान। थेमे आमातेकी थेला दावा सुमसाक खाम्बे नाङराङ ब्वाकीन ज्याक्सुङ। 21खाम्बादु बोङा माथुप्नामेकीचेन आमातेकी थेला फिला खेरगीन ब्वाकीन ज्याक्सुङ। थोक खाईन ज्याक्पे बेलाला मिश्रे गेल्बो फुमुकी थोङगीन थेला खेरगीन थे मोरोङ फुज्युङ सिन सोसुङ। 22थेमे मोशाला गेल्बो दरवारदुराङ देत्कीन काल्बेई पढे खित च्युत्सुङ। थोक खाईन थे मिश्रे छ्ये छ्ये मिकी छ्या स्येबा फाप्च्येते कामताङ बात गाङे लेमु खाला खिता थुप्कान छ्येज्यीक मि गाल्सुङ।
23मोशा लो खाल ङि छाङनामेकी थे खोरोङ इस्राएलीओनला चुक दुका सिन छ्या स्येबा फाप्सुङ सिन थेबाला ठेत गाल्सुङ। 24थोक खाला ठेत डोजीन थेकी मिश्रीज्यीगी इस्राएलीज्यीकला आउदी खाईन दुङगीन ओता थोङसुङ। थे खोरोङ आज्यो न्वाला थोक खाईन दुबा थोङजीन थेला आउदी स्येदाङ लासुङ। थोगी थेकी थोक अन्याय खित्कान्ते थे मिश्रीला दुकीन सेत्सुङ। 25इस्राएलीओन खोपरोङला योक्पो योङमु खित्सादुकी डेलाला परमेश्वरगी थे खोरोङला छाने खाबाते ईन सिन थे खोरोङ मिओनगी छ्या स्येबा ओतासीन सिन मोशेकी विचार खाबा ओतान। तर दि बात थेबा सुङगीङ खोबा मेतान। 26थेमे ङारो च्योक्ते याङराङ थेबा ओत्सादु डोजीन थेकी इस्राएली मेन्दा ङि जीङगीन ओता थोङसुङ। थेमे थेबाला टाल्ला डिक्पा खिताप सिन ‘ए ख्योकोननी दाक्पोन आज्यो न्वाराङ ईन। च्यिला दोक खाला जीङगीते? दोक माकेत,’ सिन सिरजीन 27थे अन्याय खित्कान्तेकी थेला ‘दुरू ङ्योकोनला दोक सिरच्या खो सु ईन्दे? खोल्ला दुरू सुई ङ्योकोन निसाफ खित्कान्ते मि जोकीन ताङसुङा? 28च्यि खो दाङ थे मिश्रीला च्योक खाला ङालाङ सेताप सिओ? खो दुरूई ग्युक,’ सिन ङारगीनकामा पुल्गीन ताङसुङ। 29थेकी थोक सानामेई था थे मिश्री सेताते बात गाङेकी छ्या स्येबाक्वा सिन मोशा मिश्रदुकी फ्रोकीन मिद्यान लुङबापा गाल्गीन देत्सुङ। थेमे थेरू मि लुङबादुराङ फाङमा खाईन थेते फुज्युङ ङि केसुङ।
30थेमे लो खाल ङि तिरी ठाःकताङ बालुवा बाई छ्याःङ मेत्सादु ओत्जीन मोशेकी बुटाज्यीकला मे बारा ओता थोङसुङ। थेकी थोक थोङाते सीनै बोमगी खादु ओतान। थेकी थे मे बाराते बुटे नाङ परमेश्वर दूतज्यीगोङ थोङसुङ। 31थे बुटाला मे बारा थोङगीन थेरू च्यि ओङताका सिन लेमु खाला ताप सिन मोशा थे दोन्नापाराङ गाल्सुङ। 32थे थेपा डुइन डुइनला थेकी ‘ए मोशा, ङा खुई ज्युज्यु पुर्खा अब्राहाम, इसहाक थेमे याकूबकी माने खाबाते परमेश्वर ईन,’ सिन प्रभु परमेश्वरगी बात खाबा थोसुङ। प्रभु परमेश्वरगी बात खाबा थोकीन ज्यीबेकी दारगीन मोशेकी थेपा ताराङ मातासुङ। 33थेमे याङराङ प्रभु परमेश्वरगी थेला ‘थाल्ला ङुरूङ बात खिन ओताते ठाउँ ङा देता ओतेकी चङगेते ठाउँ ईन। थोगी दुरू काचाप खोन्ला मादेत। खुईते काचाप ठोल। 34थेमे ङे बात ङेन। च्यि सासीन मिश्रदु देत्कान्ते ङे ङाराङ मि सिन छाने खाबाते मिओनगी दुक्पा ङेताते ङे थोङा ओत। थेबेकी खोपरोङला दुक्पादुकी टाल्ला नाङ सिन ङाला प्रार्थना खाबातेङ ङे थोबा ओत। थेबाला थे दुक्पा ङेत्कीन देताते लुङबादुकी तेन्ला खुलाङाला ङा देमा वाबाते ईन। थोगी थेबाला थे दुक्पादुकी डेलाला था खो मिश्रमा ग्युरला ग्युक,’ सिन थेला थेमा ताङसुङ।
35इस्राएलीओनगी ‘खोल्ला दुरू सुई ङ्योकोन निसाफ खित्कान्ते मि जोकीन ताङसुङा?’ सिन गोमा मोशाला सुङ च्योक गने खाबा मेतान। तिरी थे मोशालाराङ परमेश्वरगी थेबेते छ्येते मि जोकीन थेबाला थे दुक्पा ङेत्कीन देताते लुङबादुकी तेन्ला खुलाङाला छाने खाईन ताङा ओतान। थेकी थेला बाराते बुटे नाङदु वाबाते थे खोरोङ दूतकी छ्य्वापेई थोक खित्च्येते कामगी जिम्मा बिन्दा ओतान। 36थेमे थेबाला मिश्रदुकी तेन्ला खुलाङजीन मोशेकी गोमा थे लुङबादु, थेरूई लाल समुन्द्रदु थेमे लो खाल ङिसाक ठाःकताङ बालुवा बाई छ्याःङ मेत्से नाङला देते बेलाला आउदी छ्ये छ्येताङ अचम्बतेन्दे काम काल्बेई खाबा ओतान। 37थेमे थेकीराङ इस्राएलीओनला ‘था तिरी प्रभु परमेश्वरगी ङा च्योकराङ परमेश्वर बात खित्कान्ते मिज्यीक तोङगो। थेलाचेन ख्योकोन नाङदुईराङ छाने खिओ,’ सिन साबा ओतान। 38थेमे ङुरूङ पुर्खाओन थोक खाला ठाःकताङ बालुवा बाई छ्याःङ मेत्सादु सीनै बोमगी चावादु जम्मा ओङला देते बेलाला मोशाङ थेरू ओतान। थेमे मोशा सीनै बोमने गाल्नामेकी परमेश्वर दूतज्यीगी थेत्ताङ ठेत्कीन बात खाबा ओतान। थेजीनराङ परमेश्वर दूतकी थेला नोमुङ फरक परे मिक्किच्येते बात ओताते नियम बिन्दा ओतान। थे नियम ङुरूङ पुर्खाओन लाईदुकामा मेन्देकी ङुरूङ लाईदुङ बिन्दा ओतान।
39तर ङुरूङ पुर्खाओनगी मोशेकी साबाते बातला नामज्योकराङ मासेत्सुङ। थे बात ङेन्दा साटोला थेबेकी बरू लोक्ला मिश्रमाराङ ग्युरगीन ड्वा चाला ओतान। 40मोशा सीनै बोमने परमेश्वरताङ बात खिताला गाल्गीन होत्ता मेङजीन थेबेकी मोशे आज्यो हारूनला ‘ङ्योकोनला मिश्रदुकी तेन्ला दुरू खुलाङकान्ते मोशा खापा गाल खापा। थे स्याप्तेताङ सोम्बो ओताते ङ्योकोनगी छ्याःङ छ्या मास्येसुङ। थोगी था ङ्योकोनला ग्युरला ड्वाप्ला ङेराङ गोमा गोमा लाम तेन्गीन ख्याम्कान्ते ल्हा लु जोला नाङ,’ सिन साबा ओतान। 41दि बात खानामेई थेबेकी फौकी मूर्तिज्यीक जोकीन थेलाराङ खोपरोङ ल्हा सिन पूजा खाईन आउदी गा खिन छ्येज्यीक भोज लै खाबा ओतान। 42थेबेकी थोक खाबेकी खित्सादु परमेश्वरगी थेबाला मन परे माक्यासुङ। थेकी थेबाला था जेसुकै खित्स्यीत सिन खोपरोङ खुशीला ताङसुङ। थोक ओङनामेई थेबेकी दागार, ङीमाताङ कार्मालाका ल्हा सिन माने खिताला स्यूसुङ। थेबेकी थोक खाईन परमेश्वरला माने खिता ताङा ओतान सिन परमेश्वरगी थेबाताङ खाबाते बात परमेश्वर बात खित्कान्तेबेकी दोक सिन टिला दुक। चुक सासीन
‘इस्राएलीवे, ख्योकोनगी लो खाल ङिसाक ठाःकताङ बालुवा बाई छ्याःङ मेत्से नाङला देत्जीन पूजा खिन ओतान।
च्यि थे पूजा ख्योकोनगी ङाला सिन खाबा ओतानरो?
43ख्योकोननी थेजीन खेराङ ल्हा सिन खेराङगी जोबाते मोलोख सिराते ल्हाताङ रेफन सिराते कार्मे मूर्तिका खुरला ख्याम्गीन ओतान।
थोक खाईन ख्योकोनगी ङाला माने खिता ताङेकी खित्सादु था ङा ख्योकोनला बेबिलोन फारकेनपा तोङगो।
थेरू ख्योकोनगी दुक्पा ङेत्क्यो,’ सिन साला दुक।#आमोस ५:२५-२७
44थोरूमोङ च्यि सासीन ङुरूङ ज्युज्यु पुर्खा ठाःकताङ बालुवा बाई छ्याःङ मेत्से नाङला देते बेलाला परमेश्वर थेबाताङ ङ्योम्बु ओत सिन सिराला पालज्यीक जोबा ओतान। थेबेकी थे पाल चुक खाला ज्वा फाप्कीते सिन परमेश्वरगी मोशाला तेन्गीन बिन्दा च्योकराङ खाईन जोबा ओतान। 45तिरी यहोशू थेबेते छ्येते मि ओङनामेई परमेश्वरगी जात जातकी मिला उरगीन ताङगीन खोपरोङला तेरग्यो सिन साबाते लुङबापा डोजीनोङ थेबेकी थे पाल ङ्योम्बुराङ खेरा ओतान। थोक खाईन थेबेकी थे पालचेन खोपरोङ सन्तान दर सन्तान पालोसाकराङ ङ्योम्बुराङ ज्याक्पा ओतान। दाऊद गेल्बो ओङ ओङसाकराङ थे पाल थेबाताङराङ ओतान। 46गेल्बो दाऊद परमेश्वर बात आउदी खाला ङेन्कानज्यीक ओतेकी थेला परमेश्वरगी आउदी मन परे खाबा ओतान। थेकी ङुरूङ पुर्खा याकूबकी माने खाबाते परमेश्वरला देताला पालकामा मायाङसुङ, था देत्च्येते ज्येनज्यीक ठाउँ ज्वामीन सिन परमेश्वरताङ बिन्ती खासुङ। ईन्सीनोङ परमेश्वरगी थेलाराङ थोक खित माच्युत्सुङ। 47तिरी थे फुज्युङ सोलोमनगी परमेश्वरला देताला सिन मन्दिर जोसुङ। 48तर गाङे भन्दा छ्येते परमेश्वर मिकी जोबाते मन्दिरदु देतराङ मेदेदो। दि बात खिन परमेश्वर बात खित्कान्ते यशैयेकी परमेश्वरगी साबाते बात दोक सिन टिबा ओतान। 49चुक सासीन प्रभु परमेश्वरगीचेन
‘ङा देत्च्येते ठाउँ स्वर्ग ईन। पृथ्वीचेन ङेते काम्बा ज्य्वाच्येते ठाउँ ईन। थोगी ख्योकोन ङाला देताला
चुकस्यिक ठाउँ ज्वाप सिते? थेमे ङा देत्च्येते ठाउँ खापा ईन सिराच्योक लाङगीका?
50च्यि दि सा नाम जेसुकै जोकान्ते ङाराङ मेनरो?’ सिन साबा ओतान।#यशैया ६६:१-२
51ङे थाल्लासाक खाबाते बात थोकान ख्योकोन गाङेराङ जति सासीनोङ टेरेराङ मिक्किच्या स्यिङ दो च्योकराङ गाल्ला दुक। ख्योकोनते नामज्योक थुक्पु गाल्ला दुक। ख्योकोनचेन परमेश्वरगी साबाते ङेनराङ मेङेन्दुक। ख्योकोन खेराङ ज्युज्यु पुर्खा च्योकराङ गाल्ला दुक। थेबेकी खाबा च्योकराङ ख्योकोनोङ परमेश्वर आत्मेकी साबाते ङेनराङ मेङेन्दुक। 52परमेश्वर बात खित्कान्तेबे नाङ खाङलाचेन ख्योकोन ज्युज्यु पुर्खेकी मेलेबा खाबा मेतानेरो? थेबेकीनी परमेश्वरगी खि साबा च्योककामा खित्कान्ते तिरी दुरू ओङगो सिन परमेश्वर बात खित्कान्तेबा गाङेला खेदा खाईन सेता ओतान। थेमे तिरी थेबेकी ओङगो साबाते वानामेकी ख्योकोनगीचेन थे परमेश्वरगी तोङगो साबाते ईनराङ मेन सिन दुक्पा बिन्गीन सेत्सुङ। 53परमेश्वरगी ख्योकोनला थे खोरोङ दूतकी छ्य्वापेई थे खोरोङ नियम बिन्दा ओतान। नियम ङेत्सीनोङ ख्योकोनगी थे नियमतेबा ङेनराङ माङेन्सुङ,” सिन सिदुक।
स्तिफनसला दोई ग्याप्कीन सेताते
54स्तिफनसकी दोक दोक सानामेई थेरू ओताते छ्ये छ्ये पूजारी, धर्मे गुरूओन थेमे इस्राएल छ्ये छ्ये मि गाङेला स्येदाङगी मे बारसुङ। थेमे था दिला खइँदा माक्याबाला मायाङसुङ सिन थेबा स्येदाङगी सा थाक्पाला स्यूसुङ। 55स्तिफनसचेन परमेश्वर आत्मेकी खाङा ओतेकी नामने ताजीन थेकी स्वर्गने परमेश्वर फेरोला मिगी ताराङ मुथुप्च्या झिलिमिली नाम्दाक थोङसुङ। येशूङ परमेश्वर सामे छ्य्वापा लाकीन देता ओता थोङसुङ। 56थोक थोङगीन थेकी याङराङ थेबाला “लो तो, ङेनी थाल्ला स्वर्गे गो फेत्कीन परमेश्वर ओत्सादुई वाबाते मि थे सामे छ्य्वापा लाकीन देताते थोङगीदुक,” सिन सिदुक। 57थोक खाईन येशू परमेश्वर सामे छ्य्वापा देत्ला दुक साकीन थेला परमेश्वर च्योकराङ जोसुङ, दिलानी सेताराङ फाप्क्यो सिन थे मिओन खाज्यीकराङ खाईन मिताराङ खाच्या खाईन छेरा खासुङ। थेमे थोक्ते बात मोथोस्यीत सिन थेबेकी खोपरोङ नामज्योक काक्सुङ। थेमे थेबा गाङेराङ थे लाक फुङ पुकीन 58थेला जुम्गीन ठुत्कीनकामा सारदुकी तेन्गीन खेरगीन दोईकी देक्पाला स्यूसुङ। स्तिफनसकी चुक चुक खासुङा सिन गोमा साक्षी बके खित्कान्तेबेकी खोपरोङगी लाक्तु खोन्दाते खोलाकतेबा शावल सिराते स्याराते मिज्यीकला तो सिन बिन्गीन ज्याक्सुङ। 59दोक खाईन थेबा गाङेकी सरे पुङलु खाईन थेला दोईकी ग्याप्सुङ। थेबेकी थोक खित्जीन स्तिफनसकीचेन “ए प्रभु येशू, ङे आत्मा खोरोङ लाःक्तु लोङ,” सिन प्रार्थना खासुङ। 60थेमे खोबुकला देत्कीन गाङेकी थोच्या खाईन “ए प्रभु, दिबेकी दोक मेलेबा पाप खासीनोङ दिबाला माफ बिन,” सिन सिदुक। थोस्यिक साकीन च्याकीन थे दाक स्यिसुङ।
स्तिफनसलानी सेताराङ फाप्च्या ओतान सिन शावलोङ आउदी खाईन गा खाबा ओतान।
Currently Selected:
शक्ति काम 7: JUL
Highlight
Share
Copy
Want to have your highlights saved across all your devices? Sign up or sign in
© 1992 Wycliffe Bible Translators Inc. All rights reserved.
