शक्ति काम 2
2
येशूला विश्वास खित्कान्तेबेकी परमेश्वर आत्मा ङेताते
1पेन्तिकोस छोमुङ येशूला विश्वास खित्कान्तेबा गाङेराङ ठाउँज्यीकराङ रूकीन देता ओतान। 2थेबा थोक खाईन देता ओते बेलाला च्यि ओङसुङा सासीन थेबेकी खोपरोङ देताते खाम्बा खाङ थाराङराङ आउदी छ्येज्यीक ल्हाबा चले खाबाते ङोरो च्योक थोसुङ। थे ङोरोचेन नामनेकी वाबा ओतान। 3थेमे जोदाज्यीक मे बाराते च्येला च्योकस्यिक थेरू ओङाङ थेबेकी थोङसुङ। थेचेन ठाल्गीन गाल्गीन थेरू ओताते मिबरी गाङे लाक्तु फाप्सुङ। 4थोक खाईन थेबा गाङेकी परमेश्वर आत्मा ङेत्कीन थेबा गाङेराङ परमेश्वर आत्मेकी खाङाते मि ओङसुङ। थेमे थेबेकी परमेश्वर आत्मेकी खोपरोङला खित ज्युताच्योक च्योकराङ खाईन खोपरोङगी छ्या मास्येबाते खुदुक खुदुकते भाषाला बात खिताला स्यूसुङ।
5थे बेलाला यरूशलेमदु लुङबा लुङबालेकी वाबाते यहूदीओनोङ ओतान। थेबा परमेश्वरला आउदी खाला माने खित्कान ओतान। 6थेबेकी थोक काल्बेई मि बात खाबाते ङोरो थोकीन च्यि ईन्ताका सिन थे खाम्बापा तार गाल्सुङ। थोक खिन खिन थेरू मि काल्बेई जम्मा ओङसुङ। थेरू लेप्ला ताजीन येशूला विश्वास खित्कान्तेबेकी थेरू तार वाबाते होथे मितेबा खोपरोङ खोपरोङ वाबाते लुङबे भाषाला बात खिन ओता थेबेकी थोसुङ। थेबेकी खोपरोङ भाषाला बात खिन ओता थोजीन थेरू तार डोकान्तेबा गाङेराङ छक्क परे खासुङ। 7छक्क परे खिनकामा थेबेकी “आबिई, दिनी अचम्बराङ ओङसुङ। दुरू बात खित्कान्तेबा च्यि गाङे गालीलपे मि मेनरो? 8गालीलपे मि ईनलाङ दिबेकी चुक खाला ङुरूङ वाबाते लुङबा लुङबे बात खिका? 9च्यिला सासीन ङुरूङ कोई पार्थीया, मेदीयाताङ एलाम लुङबापेकी वाबाते ईन। कोई कोई मेसोपोटामिये लुङबेते ईन। कोई यहूदिया, कापाडोसिया, पोन्टसताङ एशिये नाङपेते ईन। 10थेमे लाला फ्रिगिया, पामफिलियाताङ मिश्रे मिओन ईन। थोकराङ खाला कोई लिबिये लुङबेते साइरेनी सारगी छेउकी नाङपेते ईन। कोई रोम सारदुई वाबाते ईन। ङुरूङ कोई यहूदीओन थेमे कोई यहूदी धर्म माने खिताला स्यूबाते ज्येन ज्येन जातकी मि ईन। 11ङुरूङ कोई क्रेटीताङ अरबी ईन। दोक खाईन खुदुक खुदुक लुङबालेई वाकीन दुरू जम्मा ओङाते ईन्सीनोङ परमेश्वरगी खाबाते अचम्बते कामगी बात दिबेकी ङुरूङ दाक्पोन दाक्पोन लुङबे भाषाला खाबा थोकीदुक,” सिन बात खासुङ। 12थोक खाला थेबा छक्क परे खिन “दि दोक च्यि ओङाते ईन्ताका?” सिन ठिरीङ खिताला स्यूसुङ। 13तर थेबे नाङ कोई कोईकीचेन येशूला विश्वास खित्कान्ते मिओनला खिस्यी खिन “दि छ्याःङ अचम्बते बात मेन। दिबानी छ्याङगी जिला थाराङ दोक खिदुक,” सिन सिदुक।
पेन्तिकोस छोमु पत्रुसकी खाबाते बात
14थेबा गाङे बात थोकीन येशू ख्रीष्टकी खटे खाबाते ज्येनतेबा मेन्दा च्युच्यीकताङराङ लाकीन पत्रुसकी गाङेकी थोच्या खाईन थेरू जम्मा ओङाते मिओनताङ दोक सिन बात खिताला स्यूसुङ। थेकी च्यि सिका सासीन “लुङबा लुङबालेकी वाबातेताङ दुरू यरूशलेमदुराङ देता ओताते गाङे यहूदी आज्यो न्वावे, ख्योकोनगी दि बाततेबा लेमु खाला ङेन। 15च्यि सासीन ख्योकोनगी साबाच्योक दिबा छ्याङ थुकीन जाप्ते मेन। ङुरूङ नाङ ङोमु नौ बजे नाङलाराङ सुचेन छ्याङ रक्सी थुला जिइतेरो? 16ख्योकोनगी थरिङ थोङातेताङ थोबाते बातनी परमेश्वर बात खित्कान्ते योएलगी गोमाका दोक सिन साबाते बातका साबा च्योकराङ ओङाते ईन।
17थेकीचेन ‘परमेश्वरगी च्यि सिका सासीन था दि जुग सिन्दे खाला ङा मि गाङेला ङाराङ आत्मा तेरग्यो।
दोक ओङनामेई ख्योकोन फुज्युङ फुमुबेकी ङे सिर च्युताते बात खिओ। थेमे स्याराते मिओनला ङा मिलाम खित ज्युताच्योक खाला
ङे खिता चालाते कामओन तेन्ला तेरग्यो। थोकराङ खाला गान्दाते मिओनताङ ङा मिलामला बात खिओ।
18ख्योओ मि ईन्स्यीत, फेम्मे मि ईन्स्यीत ङे खि साबाच्योक खित्कान्तेबा गाङेला ङा थेजीन ङाराङ आत्मा तेरग्यो। थेमे थेबेकी ङे सिर च्युताते बात खिओ।
19थे बेलाला ङा नामताङ पृथ्वीदु अचम्बतेन्दे काम खाला तेन्ग्यो। थोक ओङजीन मिओनगी ठाकराङ ठाक खिलाते,
मे ज्वाला लाबाते थेमे थुतेकी मुन्दाक गालातेकामा थोङगो।
20थेमे ङीमा नाक्पो डुइओ, दागारचेन ठाक च्योकराङ मोर्मु डुइओ। थोक थोक ओङला प्रभु परमेश्वरते गाङे भन्दा छ्येतेताङ ज्यीबा लाङच्येते दिन ओङगो।
21थेजीन प्रभु छ्य्वापा लै खाला थेला मद्धत नाङ सिरकान्ते सुङगीङ सजाय भोगे खिता माफाबो,’ सिन टिबा ओतान।#योएल २:२८-३२
22इस्राएलीवे, था दि बाततेबाङ ङेन। नासरतपे येशूकी ङुरूङ मिगी दोन्दुराङ छ्ये छ्येताङ अचम्बतेन्दे काम खाईन तेन्दा ओतान। थेचेन थे खोरोङगी छाने खाईन ताङाते मि दुका सिन ख्योकोनगी छ्या स्येस्यीत सिनराङ परमेश्वरगी थेला छ्येज्यीक शक्ति बिन्गीन थोक अचम्बते काम खित च्युता ओतान। येशूकी च्यि च्यि खाबा ओताने, चुक चुक खाबा ओताने सिन ख्योकोनगीङ खेराङ मिगीराङ थोङा ओतान। 23थोक ईन्सीनोङ ख्योकोनगीचेन थेला पापीओन लाःक्तु सोम्पे खाईन लाक्पा काम्बाला काँटी ग्याप्कीन स्यिङगी थामला टाँए खाईन सेत च्युत्सुङ। ईन्दानी थेकी थोक खाला स्या फाप्क्यो सिन परमेश्वरगी गोमाका साबा ओतान। 24ख्योकोनगी थोक खाबा ईन्सीनोङ परमेश्वरगीचेन थेला कालगी खादुकी टाल्गीन स्यिसादुकी सोम्बो लोक्सुङ। च्यिला सासीन थेनी स्यिच्येते कालला ग्याल्ला सोम्बो लोक्पाराङ फाप्च्या ओतान। 25येशू स्यिनामेकी मुरूलो सिन गेल्बो दाऊदकी थोङलाका दोक साबा ओतान। च्यि सासीन
‘प्रभु परमेश्वरला ङे सधैँ ङाराङ दोन्दुराङ थोङगो। थे सधैँ ङात्ताङ ङ्योम्बुराङ देत्क्यो। थोगी ङाला छ्याःङ ज्यीबा मेङगो।
26थेमे ङा गा खाला लु लिन्गीन देता थुप्क्यो। स्यिसीनोङ ङाला छ्याःङ मेलेबा मेङगो सिन ङा ढुक्क खाला देत्क्यो।
27च्यिला सासीन प्रभु खोरोङगी छाने खाबातेला खुई सबी चावादु मोज्योओ। ङे सेमला पाप सिराते छ्याःङ मेतेकी खुई ङाला से चावादु रूल मुज्युदो।
28ङाला दि जुनी तेरकान्तेङ प्रभु परमेश्वर खोराङ ईन। परमेश्वर खो ङात्ताङ ओतेकी ङा आउदी गा खिओ,’ सिन साबा ओतान।#भजन १६:८-११
29थेमे आज्यो न्वावे, होदि बात खित्कान्ते ङुरूङ पुर्खा दाऊद गेल्बो बातनी ङुरूङ गाङेला लेमु खाला छ्याराङ ओत। थेनी स्यिइन दाक रूल्गीनोङ गाल्सुङ। थेला दिबाते थुर्सा थोरूमसाकोङ ङुरूङ दोन्दु ओत्कीन ओत। 30थेचेन दोक्पोई परमेश्वर बात खित्कान्ते मि ओतान। थेमे परमेश्वरगी तिरी थे सन्तान नाङ दोक्पोईला थे राज्यदु गेल्बो जोइओ सिन ना क्याल्गीन थेत्ताङ जमान खाबा ओतान। 31परमेश्वर बात खित्कान्ते मि ईन्देकी थेकी परमेश्वरगी तोङगो साबाते ख्रीष्ट स्यिसादुकी दाक सोम्बो लोइओ सिनोङ गोमाका छ्या स्येकीन परमेश्वरगी थेला स्यिनामेकी सबी चावादुराङ मोज्योओ, से चावादु रूलोङ मुज्युदो सिन ख्रीष्टला ओङच्येते बात साबा ओतान।
32दाऊदकी गोमाका साबा ओता च्योकराङ खाईन परमेश्वरगी येशूला स्यिसादुकी सोम्बो लोक्सुङ। थे सोम्बो लोक्नामेई थेला ङ्योकोन गाङेकी ङेराङ मिगीराङ थोङाते ईन। 33थोक खाईन सोम्बो लोक्नामेकी परमेश्वरगी थेला छ्येज्यीक मान बिन्गीन थे खोरोङ सामे छ्य्वापा ज्याक्पा ओत। थे खोरोङगी मिओनला तेरग्यो साबाते परमेश्वर आत्मा तेरच्येते जिम्मा थेकी येशूला बिन्सुङ। आबातेकी जिम्मा बिन्दा च्योकराङ खाईन थेकी ङ्योकोनला परमेश्वर आत्मा बिन्सुङ। ख्योकोनगी थरिङ थोङातेताङ थोबाते बात ङ्योकोनगी परमेश्वर आत्मा ङेतेकी खित्सादुराङ ईन। 34-35दाऊद गेल्बो खोरोङचेन येशू च्योकराङ स्यिसादुकी सोम्बो लोगीन स्वर्गने गालाते मेन। थेकीनी येशूला ओङच्येते बातका गोमाकाराङ दोक सिन साबा ओतान। चुक सासीन
‘प्रभु परमेश्वरगी ङे प्रभुला ङे खुई शत्रुओनला ग्याल्गीन खुई तिङबे ओक्तु माज्याकथुप
खो दुरू स्योक, ङे सामे छ्य्वापा देत,’ सिन साबा ओतान।#भजन ११०:१
36बात दोक दोक ईन्देकी परमेश्वरगी मान बिन्गीन प्रभु जोबाते थेमे थे खोरोङगी तोङगो साबाते ख्रीष्टचेन ख्योकोनगी सेत च्युताते येशूराङ ईन्दा दुका सिन थाचेन ख्योकोन इस्राएली गाङेकी लेमु खाला छ्या स्येबा खि,” सिन सिदुक।
37थेरू जम्मा ओङाते मिओनगी पत्रुसकी खाबाते दि बात थोकीन खोपरोङगी चुक छ्येज्यीक गल्ती खाबा ओता ईन्दाका सिन छ्या स्येकीन पत्रुस थेमे येशू ख्रीष्टकी खटे खाबाते ज्येनतेबा गाङेला “आज्यो न्वावे, थोक ईन्सीन था ङ्योकोनगी च्यि खिसे ओना?” सिन ठिसुङ। 38ठिजीन पत्रुसकी “था ख्योकोन गाङेकी खेराङ पापी दुका सिन छ्या स्येला परमेश्वर छ्य्वापा लै खि। थेमे येशू ख्रीष्ट मिनगी छ्य्वापेई बप्तिस्मा लोङ। थेमे परमेश्वरगी ख्योकोन पापतेबा माफ तेरग्यो। थेमे ख्योकोनगी परमेश्वर आत्मा ङेत्क्यो। 39ङुरूङ प्रभु परमेश्वरगी मिओनला तेरग्यो सिन साबाते परमेश्वर आत्मा थेकी ख्योकोनला, ख्योकोन सन्तानला थेमे ज्येन ज्येन लुङबाला देत्कान्तेबा गाङेला तेरग्यो। प्रभु परमेश्वरगी सु सुला थे खोरोङ दोन्दु स्योक सिन कातोङगीका थेबा गाङेला थे खोरोङ आत्मा तेरग्यो,” सिन सिदुक।
40बात खिन खिन पत्रुसकी थेबाला लोईन “पाप खाबेकी खित्सादु दि लुङबे मिओन गोःनामा परमेश्वर सजाय फाप्कीन सिन्दा ओत। थे सजायला माफाप्स्यीत सिन ओर्च्ये ङे बात ङेन्ला था ख्योकोनगीचेन ज्येन च्योकराङ खिन मादेत, पाप खिता थोङ,” सिन सासुङ। 41पत्रुस बात ङेन्कान्तेबाला पत्रुसबेकी छ्युला लुगीन बप्तिस्मा बिन्सुङ। थेबा मेन्दा हजार सुमजो ओतान। थोक खाईन थे छोमु थेबाङ येशूला विश्वास खित्कान्ते मिओनताङ थपे खासुङ।
येशूला विश्वास खित्कान्तेबा चुक चुक खिन ओताने
42येशूला विश्वास खित्कान्तेबेकी येशू ख्रीष्टकी खटे खाबाते मिओनगी लापाते बातओन लेमु खाला ङेन्गीन ओतान। थेबा ङ्योम्बुराङ डिक्ला देत्च्येते, प्रभु भोज साच्येते थेमे परमेश्वरला प्रार्थना खित्च्येते खिन ओतान। 43थोक थोङजीन मि गाङेराङ आते खिन ओतान। थेमे येशू ख्रीष्टकी खटे खाबाते मिओनगी अचम्बते काम काल्बेई खिन ओतान। 44येशूला विश्वास खित्कान्तेबा गाङेराङ डिक्ला थुन्ला देत्कीन ओतान। थेबे नाङ खोपरोङताङ जेराङ ओत्सीनोङ दि ङेतेताङ थे खुईते सिरच्येते छ्याःङ ओङगीन मेतान। 45खोपरोङ नाङ सुइँदाला खइँदा गोसुङ सासीन थेबेकी खोपरोङ स्यीङताङ सम्पत्तितेबा च्वालाङ थेबे खाँचो टारे खिन ओतान। 46थेबा ङीमे ठाङमा परमेश्वर मन्दिरदु जम्मा ओङला ङ्योम्बुराङ परमेश्वरला प्रार्थना खिन ओतान। थेबेकी दोक्पोईकी ज्येनज्यीकला ईख इबी खुरगीन मेतान। बरू खाम्बा खाम्बाला रूला प्रभु भोज साच्येते थेमे गा खिन ङ्योम्बुराङ साप साच्येते खिन ओतान। 47थोक खाला छ्वाला रूला थेबाचेन जहिलेङ परमेश्वरते जय जय खिन ओतान। ज्येन ज्येनगीङ थेबाला लेमु मि ईन सिन मान खिन ओतान। थेमे प्रभु येशूकी थे खोरोङ छ्य्वापा लै खित्कान्ते मिओनला पापदुकी टाल्ला थे खोरोङला विश्वास खित्कान्ते मिओन ङीमे ठाङमा फेल ज्युत्कीन ओतान।
Currently Selected:
शक्ति काम 2: JUL
Highlight
Share
Copy
Want to have your highlights saved across all your devices? Sign up or sign in
© 1992 Wycliffe Bible Translators Inc. All rights reserved.
