शक्ति काम 1
1
1येशूकी दुरू वाकीन खिताला स्यूबाते कामताङ बातकी विषयलानी थियोफिलस खोल्ला ङे गोमाका टिबाते किताबलाराङ टिबा ओतान। 2नामसाक बात सासीन थे खोरोङगी खटे खाबाते मिओनला था च्यि च्यि खिता फाप्कीते सिन परमेश्वर आत्मे छ्य्वापेई लाप्कीन बिन्नामेई परमेश्वरगी थे खोरोङला स्वर्गने खेरे छोमुसाक बाततेबा ङे थे किताबलाराङ टिबा ओत। 3थे खोरोङगी भोगे खिता फाप्च्येते दुक्पातेबा भोगे खाईन स्यिइन सिन्नामेई थे खोरोङ साँच्चीराङ सोम्बो लोक्पाते दुका सिन थे खोरोङगी खटे खाबाते मिओनगी लेमु खाला छ्या स्येस्यीत सिन थेकी याङ याङ थेबाताङ ठेता खाबा ओतान। थोक खाला ङीमा खाल ङिसाक थेबाताङ ठेत्जीन थेकी थेबाला परमेश्वर राज्य बादोङ लाप्कीन बिन्सुङ। 4थेबाताङ ठेत्कीन ङ्योम्बुराङ देता ओते बेलाला ङीमाई थेकी “ख्योकोन दि बात ङेन। ङे ख्योकोनला गोमाका साबा ओता च्योकराङ ङे आबेकी तेरग्यो सिन साबाते परमेश्वर आत्मा था ख्योकोनगी ङेत्क्यो। थे माङेतथुप ख्योकोन दि यरूशलेम सारदुकी खापाङ मोन्डोबा खाला दुरूराङ गुला देत। 5यूहन्नेकीनी मिओनला खालि छ्युलाकामा लुगीन बप्तिस्मा बिन्दा ओतान। था टिक्पी दिन तिरीचेन ख्योकोनगी परमेश्वर आत्मे बप्तिस्मा ङेत्क्यो,” सिन सिदुक।
प्रभु येशू स्वर्गने ग्युरगीन गालाते
6थोक खाला ठेते बेलालाराङ ङीमाई थेबेकी थेला “प्रभु, था खुई ङुरूङ इस्राएलीओनते गोमा तोराते राज्य दाक्पोन लाःक्तु लाला राज्य खिओ मेन?” सिन ठिसुङ। 7थोक सिरजीन थेकी थेबाला “दोक खित्च्येते नाम च्यि छोमु खित ज्युत्च्ये सिरच्येते बात आबा थे खोरोङगीराङ खित्च्येते काम ईन। दि बात ख्योकोनला छ्या स्येबा माफाबो। 8दि बातचेन ङेन। च्यि सासीन था ख्योकोनगी परमेश्वर आत्मा ङेत्क्यो। थे ङेत्नामेकी ख्योकोनगी शक्ति ङेत्क्यो। थेमे थरिङसाक खेराङ मिगी थोङातेताङ नामज्योककी थोबाते ङे बाततेबा गाङे ख्योकोनगी यरूशलेमदु, यहूदियाताङ सामरिये अञ्चल खाङ थेमे सा लुङबा खाङगी मि नाङ लोपाला डुइओ,” सिन सिदुक।
9दि बात खाईन सिन्नामेकी थेबेकी तेइन तेइनलाराङ थे नामने थेगीन थेगीन गाल्गीन परमेश्वरगी थेला स्वर्गने खेरसुङ। थोक खाला खेरजीन मुक्पा वाकीन थेला दाक उप्सुङ। थेमे थेबेकी थेला थोङा माथुप्सुङ। 10दोक ईन्सीनोङ थेबाबरीचेन नामने ताकीनराङ देता ओतान। थे बेलालाराङ खोलाक कार्मु खोन्दातेन्दे मेन्दा ङि मि थेबे खादु लेप्कीन 11“ए गालीलपे मिवे, ख्योकोन च्यिला दोक खाला नामने ताला देत्कीते? येशूला परमेश्वरगी स्वर्गने खेरसुङ। आनाङ ख्योकोनगी थेला चुक खाईन थेने ड्वा थोङा ओताने, था तिरी ङीमाई लोक्ला थे होथोकराङ खाला देमा ग्युरला ओङगो,” सिन सिदुक।
यहूदे साटोला ज्येन मि छाने खाबाते
12दि तिरीचेन येशूकी खटे खाबाते मि गाङेराङ जैतुन बोम सिरसादुकी यरूशलेमपा ग्युरगीन गाल्सुङ। थेरूकी थेपा ड्वाप्ला आता थारी मेतान। 13थेपा ख्योल्नामेकी थेबा खोपरोङ देत्च्येते खाम्बादु स्यूकीन ताले लाकने गाल्सुङ। थेबाचेन पत्रुस, यूहन्ना, याकूब, अन्द्रियास, फिलिप, थोमा, बारथोलोमाइ, मत्ती, अल्फयस फुज्युङ याकूब, देशभक्त सिराते पाटी मि शिमोन थेमे याकूब सिराते मि फुज्युङ यहूदा ओतान। 14थेबाताङ थेरू गोमा येशूताङ ख्याम्कान्ते फेम्मे मिओन, येशू आमा मरियम थेमे येशू न्वातेबाङ ओतान। थेबाबरी गाङेराङ ङ्योम्बुराङ परमेश्वरला प्रार्थना खिन देत्कीन ओतान।
15येशूला विश्वास खित्कान्ते मिओन थोक खाला जम्मा ओङजीन ङीमाई मेन्दा खाल ठुकचो ओतान। थेमे पत्रुसकी थेबा गाङे दोन्दु लाकीन 16“आज्यो न्वावे, येशूला पक्रे खित ओङकान्ते मिओनला थे खाङ ईन्दे सिन तेन्ला तेरकान्ते यहूदाला चुक ओङगीते सिन परमेश्वर आत्मेकी गेल्बो दाऊदला थाङबोका सिर च्युता ओतान। परमेश्वर बातला साबाते थे बात साबा च्योकराङ ओङा फाप्सुङ। 17दि बात ङुरूङला छ्याराङ ओत। चुक सासीन यहूदालाङ ङ्योकोनला च्योकराङ थे खोरोङ बात लोपाला येशूकीराङ खटे खाबा ओतान। थेकी खटे खाबाते ङ्योकोन मेरा च्युन्ङी नाङ दोक्पोई थेङ ओतान। 18येशूला पक्रे खित ज्युताला लाबाते पैसेकी थेकी स्यीङज्यीक ङ्योबा ओतान। थेमे थेचेन थे स्यीङदुराङ गोः थुल्लाला खाईन रिल्गीन सुबा फोङगीन ग्युमाक नाङज्याक गाङे थोरगीन स्या ओतान। 19यरूशलेम मि गाङेकी थे बात थोकीन थे स्यीङगी मिन खोपरोङ बातनापेई आखेल्दामा सिन ज्याक्पा ओतान। आखेल्दामा साबाते ठागी म्वाबाते स्यीङ साबाते ईन।
20थे बात भजन किताबला चुक सिन टिबा ओते सासीन ‘थे खाम्बादु देत्कान्ते थेते सखा सन्तान दर सन्तान सुङ मायाङला थे खाम्बा तोङबा सिली डोरस्यीत,’ सिन टिबा ओत।#भजन ६९:२५ लोक्ला थे किताबलाराङ ‘थे साटोलाचेन ज्येनगी काम खित्स्यीत,’ सिनोङ टिबा ओत।#भजन १०९:८ 21-22बात दोक ईन्देकी था ङुरूङगी यहूदे साटोला मिज्यीक छाने खिता फाप्क्यो। थे मिचेन यूहन्नेकी मिओनला छ्युला लुक्ला बप्तिस्मा तेरच्येते काम खिते बेलामेकी प्रभु येशूला परमेश्वरगी स्वर्गने खेरे छोमुसाक ङ्योकोन च्योकराङ थेत्ताङ ङ्योम्बुराङ देत्कीन थेकी खाबाते कामताङ बाततेबा गाङे थोङातेताङ थोबाते ओङा फाप्क्यो। च्यिला सासीन थेकीङ ङ्योकोनगी च्योकराङ खाला प्रभु येशू स्यिसादुकी सोम्बो लोक्पाते बात मिओनला लोपा फाप्क्यो,” सिन सिदुक।
23पत्रुसकी थोक सानामेई थेरू ओताते मिओनगी खोपरोङ नाङदुकी यूसुफताङ मत्तियास सिरातेन्दे मेरा ङिला छाने खासुङ। यूसुफलाचेन मिओनगी बारसाबास सिन ओतान। थेला कोईकी युस्तसोङ सिन ओतान। 24-25थेबा ङिबोला छाने खानामेई थेरू ओताते मिबरी गाङेकी “प्रभु, खो मि गाङे सेमगी बात छ्या स्येकान्ते ईन। थोगी था यहूदे साटोला खुई खटे खाबाते मिकी खित्च्येते काम खिताला ङ्योकोनगी छाने खाबाते दिबा ङिबो नाङ खाङला ज्य्वाच्ये ङ्योकोनला तेन्ला नाङ। यहूदाचेन थे खोरोङगी खिता फाप्च्येते काम माक्याकीन नरककुण्डमा गालाते बात खोल्ला छ्याराङ ओत,” सिन प्रार्थना खासुङ। 26प्रार्थना खाईन सिन्नामेकी थेबेकी थेबा ङिबो मिनला चिट्ठा ग्याप्सुङ। थेमे मत्तियास मिनला चिट्ठा फाप्सुङ। दोक खाईन येशू ख्रीष्टकी खटे खाबाते मिओन मेरा च्युच्यीक लाक थे दोक्पोई थपे खासुङ।
Currently Selected:
शक्ति काम 1: JUL
Highlight
Share
Copy
Want to have your highlights saved across all your devices? Sign up or sign in
© 1992 Wycliffe Bible Translators Inc. All rights reserved.
