शक्ति काम 10

कर्नेलियसकी पत्रुसला कातोङ ताङाते

1सिजरियादु कर्नेलियस सिराज्‍यीक मि ओतान। थे इटाली सिराते पल्‍टनते क्‍याप्‍टेन ओतान। 2यहूदी मेन्‍सीनोङ थेत्ताङ थे खाम्‍बे मि गाङेराङ परमेश्‍वर नियम ङेन्‍ला परमेश्‍वरला माने खिन ओतान। थेकी दुक्‍पा ङेताते यहूदीओनला दुक्‍पाला तेइन ओतान। थेमे थे परमेश्‍वरला प्रार्थनाङ खिन ओतान। 3ङीमाई ग्‍वासे तीन बजे नाङला परमेश्‍वरगी थेला मिलाम खित ज्‍युताच्‍योक खित च्‍युत्‍सुङ। च्‍यि सासीन थेकी परमेश्‍वर दूतज्‍यीकला थे खोरोङ दोन्‍दु वाबाते लेमु खाईन थोङसुङ। थे दूतकी थेला “कर्नेलियस,” सिन काताङसुङ। 4परमेश्‍वर दूतकी कातोङजीन ज्‍यीबेकी थुरथुर गाल्‍गीन थेला ऊरीकामा ताकीन देत्‍कीन थेकी “च्‍यि साबे प्रभु,” सिदुक। थेमे थे दूतकी थेला “खुई प्रार्थना खाबाते थेमे दुक्‍पा ङेताते मिओनला दुक्‍पाला ताबाते परमेश्‍वरगी थोङगीन खोल्‍ला मन परे खाबा ओत। 5था खुई दोक खि। चुक सासीन योप्‍पापा ओताते शिमोन सिराते मिला लिन थोङ। थेला मिओनगी पत्रुस सिन सिओ। 6थेचेन शिमोन सिराते सर्की खाम्‍बादु देता ओत। शिमोन खाम्‍बाचेन समुन्‍द्रे छेउदुराङ ओत,” सिन सानामेई 7परमेश्‍वर दूतचेन थेरूकी तोरसुङ। थोक ओङगीन सिन्‍नामेकी कर्नेलियसकी थे खोरोङ खाम्‍बादु काम खित्‍कान्‍ते मेरा ङि मित्ताङ काल्‍बा च्‍योक थे खोरोङताङराङ देत्‍कान्‍ते मिल्‍टेरीज्‍यीकला काताङसुङ। थे मिल्‍टेरीङ परमेश्‍वरला माने खित्‍कान ओतान। 8कर्नेलियसकी थेबा सुमबोला थे खोरोङगी थोङाते बातबरी गाङे लाःप्‍कीन योप्‍पापा ताङसुङ।

परमेश्‍वरगी पत्रुसला बात खाबाते

9थेमे ङारो च्‍योक्‍ते थेबा सुमबो ङीम्‍मु बाह्र बजे नाङला योप्‍पे खानापा लेपा खाबा ओतान। थे बेलाला पत्रुसचेन परमेश्‍वरला प्रार्थना खिताला खाम्‍बे लाकने कौसीने गाला ओतान। 10प्रार्थना खिन खिनला थे त्‍वाबेकी स्‍याप खाबा ओतान। ताले चावामा थे खाम्‍बे मिओन सेन खिताला स्‍यूबा ओतान। थोक खिन खिनलाराङ ठामासोमुलाराङ पत्रुसकी दोक थोङसुङ। 11च्‍यि सासीन थेकी स्‍वर्गे गो फेताते थेमे थेनेकी गा च्‍योकस्‍यिक जोदाई छेउ छेउला सुइँदेकी जुम्‍बाच्‍योक खाईन थे ओत्‍सामा फाप्‍कीन ओङा थोङसुङ। 12थे नाङचेन थरी थरीतेन्‍दे चारखुट्टे पशुताङ री रीदाक, साला ख्‍याम्‍कान्‍ते चापाकताङ रूलतेबा थेमे छ्योज्‍युङमा ओतान। 13थेमे “ए पत्रुस, लाला खो दिबाला सेत्‍ला सो,” सिन सिरा पत्रुसकी थोसुङ। 14थोक सिरा थोजीन थेकी “प्रभु, ङ्योकोन यहूदीओनगी सा मेङगो साबाते दोक्‍तेबा थोरूमसाक ङे नोमुङ दोबाङ मेत। ङा दिबाला चुक खाला साच्‍येरो?” सिन सिदुक। 15थेकी याङराङ “परमेश्‍वरगी सा ओङगो सानामेकी था खो चुक खाला साच्‍ये सिन मासेर,” सिन सिरा थोसुङ। 16दोक खाईन बाजि सुमसाक थे गा च्‍योक्‍ते पत्रुस खानामा ङीम्‍गीन याङराङ थेनेराङ डुइन, ङीम्‍गीन याङराङ थेनेराङ डुइन खासुङ। थेमे थेकी बाजि सुमसाकराङ “दिबाला सेत्‍ला सो,” साबाते बादोङ थोसुङ। थे तिरीचेन थे गा च्‍योक्‍ते याङराङ स्‍वर्गनेराङ ग्‍युरगीन गाल्‍सुङ। 17परमेश्‍वरगी मिलाम खित ज्‍युताच्‍योक खाईन थे खोरोङला दि बात तेन्‍गीन सिन्‍नामेकी दोक ओङाते च्‍यि ईन्‍ताका सिन पत्रुस विचार खिन ओतान।

पत्रुस कर्नेलियस खाँपा गालाते

थे बेलालाराङ कर्नेलियसकी ताङाते मिओन थे सर्की खाम्‍बा छोल्‍गीन थे खाम्‍बे खादु लेप्‍सुङ। 18थेमे थेबेकी थे खाम्‍बे मिला काताङगीन च्‍याकीन “दुरू शिमोन सिराते मि ओताना मेते? थेला मिओनगी पत्रुस सिनोङ सिओ,” सिन ठिसुङ। 19थेतेसाकोङ पत्रुसचेन परमेश्‍वरगी मिलाम खित ज्‍युताच्‍योक खाईन थे खोरोङला तेन्‍गीन बिन्‍दाते बातराङ विचार खिन ओतान। थेमे परमेश्‍वर आत्‍मेकी थेला “पत्रुस, खो खोक लाला मिमा ग्‍युक। खोल्‍ला लिन्‍दाला थेमा मेन्‍दा सुम मि वाला दुक। 20थेबा यहूदी मेन्‍सीनोङ थेबाताङ चुक खाला ड्वाबे सिराच्‍योक खाला खो अप्‍ठेरो माने माकेत। खोल्‍ला लिन्‍दाला थेबाला ङेराङ ताङाते ईन,” सिन सिदुक। 21थेरूई पत्रुस मिमा फाप्‍कीन गाल्‍गीन च्‍याकीन थे मि सुमबोला “ख्‍योकोनगी चालाते मिनी ङाराङ ईन। च्‍यि कामला चाले?” सिन ठिसुङ। 22थेमे थेबा सुमबोकी “मिल्‍टेरी क्‍याप्‍टेन कर्नेलियसकी खोल्‍ला लाला खोरच्‍योक सिन ङ्योकोनला देपा ताङसुङ। थे परमेश्‍वरला आउदी खाला माने खित्‍कान्‍ते लेमु मि ईन। थेला यहूदीओनगीङ गाङेकी मन परे खाला दुक। खोल्‍ला थे खाम्‍बापा लाला खुलाला च्‍याला खुई साबाते बाततेबा ङेन सिन थेला परमेश्‍वर दूतज्‍यीगी सिदुक्‍लो। थोगी ङ्योकोन खोल्‍ला लिन्‍दाला देपा वाबाते ईन,” सिन सिदुक। 23थेबेकी थोक सानामेईका परमेश्‍वरगी थोङला भर्खर मिलाम खित ज्‍युताच्‍योक खाईन थे खोरोङला छ्या स्‍ये ज्‍युता चालाते बातचेन था ज्‍येन ज्‍येन जातकी मिला सानु जाति ईन मिसिरा खाला थेबाताङ देत्‍ला सा थुङा ओङगो साबाते दुका सिन पत्रुसकी खोकीन थेकी थेबाला नाङनेराङ काताङगीन खेरसुङ। थे छोमुचेन थेबाबरी थेरूराङ स्‍यासा देत्‍सुङ।

थेमे ङारो च्‍योक्‍ते पत्रुस थेबा सुमबोताङ योप्‍पादुकी सिजरियापा ख्‍याम्‍सुङ। येशूला विश्‍वास खित्‍कान्‍ते योप्‍पादु आज्‍यो न्‍वाओनोङ कोई कोई थेबाताङ ङ्योम्‍बु गाल्‍सुङ। 24ख्‍याम्‍बे ङारो च्‍योक्‍ते थेबाबरी सिजरियापा लेप्‍सुङ। कर्नेलियसचेन थेबे लाम ताकीनराङ देता ओतान। थेकी स्‍योक साबाते थे खोरोङ मि फाप्‍च्‍येतेबा थेमे र्‍वातेबा गाङेराङ थे खाम्‍बादु जम्‍मा ओङगीन देता ओतान। 25पत्रुस थेरू लेप्‍कीन खाम्‍बे नाङ स्‍यू मास्‍यूबालाराङ कर्नेलियसकी वाकीन थेला आउदी मान खिन काम्‍बाला से खासुङ। 26थोक खित्‍जीन पत्रुसकी थेला लाङगीन “ङाला दोक खाला से खिता माफाबो, ङाङ मिकामा ईन,” सिन सिदुक। 27थेमे पत्रुस थेत्ताङ बात खिनकामा नाङने गाल्‍सुङ। नाङने स्‍यूक्‍जीन थेकी थेरू मि काल्‍बेई जम्‍मा ओङगीन देता ओताते थोङसुङ। 28थेमे थेकी थेबाबरीला “ङ्योकोन यहूदीओन ज्‍येन जातकी मित्ताङ दोक खाला साङ खिता मेङगो। थेमे थेबे खाम्‍बादु गाल्‍ला थेबाताङ सा मेङगो। दोक खासीन ङ्योकोनगी परमेश्‍वर नियमताङ मिडिक्‍च्‍येते काम खाबाते ईन सिरच्‍येते बात ख्‍योकोनला छ्याराङ ओत। दोक ईन्‍सीनोङ ङाला परमेश्‍वर थे खोरोङगीराङ था ख्‍योकोन च्‍योक्‍ते ज्‍येन ज्‍येन जातकी मिलाङ सुङलाङ सानु जाति ईन सिरा मेङगो सिन छ्या स्‍ये च्‍युत्‍सुङ। 29थोगी खुई कातोङ तोङजीन ङा नियमताङ मिडिक्‍च्‍येते थोक्‍ते काम मिक्‍किओ मिसिरा खाईन दुरू वाबाते ईन। था ङाला च्‍यि कामला काताङाते ईन्‍दे, थे बात लोःप,” सिन सिदुक।

30थेकी थोक सानामेकी कर्नेलियसकी “हजूर, ङीमा स्‍यी गोमा होथामजोबा ग्‍वासे तीन बजे प्रार्थना खिते बेलाला ङा खाम्‍बादुराङ परमेश्‍वरला प्रार्थना खिन ओतान। प्रार्थना खिन खिनला ङे आउदी कार्मुज्‍यीक खोलाक खोन्‍दाई मिज्‍यीकला ङाराङ दोन्‍दु ओङा थोङसुङ। 31थेकी वाकीन ङाला ‘कर्नेलियस, खुई परमेश्‍वरला प्रार्थना खिन ओताते थेमे दुक्‍पा ङेतातेबाला ताबाते बात गाङे परमेश्‍वरगी छ्या स्‍येबा ओत। 32था योप्‍पादु ओताते शिमोन सिराते मिला कातोङ थोङ। थेला मिओनगी पत्रुस सिनोङ सिओ। थेचेन समुन्‍द्रे छेउदु शिमोन सिराते सर्की खाम्‍बादु डोम्‍बो ओङगीन देता ओत,’ सिन सिदुक। 33थोगी ङे छ्याःङ अलमल मिक्‍किता खाईन हजूर खोल्‍ला लिन ताङाते ईन। हजूर खो दिस्‍साक दुक्‍पा खाईन वाबा थोङजीन ङ्योकोनला गा लासुङ। दुरू ङ्योकोन गाङेराङ प्रभु परमेश्‍वर दोन्‍दु जम्‍मा ओङा ओत। प्रभु परमेश्‍वरगी हजूर खोल्‍ला च्‍यि बात खि साबा ओते था थे बात ङ्योकोनला लेमु खाला लाप्‍ला नाङ। खुई बात ङेन्‍दाला ङ्योकोन गाङेराङ जम्‍मा ओङाते ईन,” सिन सिदुक।

पत्रुसकी कर्नेलियस खाम्‍बादु येशू बात लापाते

34थेकी दोक सानामेई थेरू जम्‍मा ओङाते मिओनला पत्रुसकी दोक सिन बात खिताला स्‍यूसुङ। चुक सासीन “परमेश्‍वर लाईदु मि गाङे दोक्‍पोईराङ ईन। थेकी सुङलाङ काका पाका मिक्‍किओ। 35थेमे जातला छ्ये टेक्‍टे जे ईन्‍सीनोङ थेला माने खित्‍कानताङ थेकी खि साबा साबाच्‍योक खित्‍कान गाङेला परमेश्‍वरगी मन परे खिओ सिन ङे लेमु खाईन छ्या स्‍येसुङ। 36बात चुक सासीन गाङेपा गाङेला राज्‍य खित्‍कान्‍ते येशू ख्रीष्‍टकी खाबाते कामगी खित्‍सादु परमेश्‍वरगी मिओनला थे खोरोङताङ डिक ज्‍युत्‍क्‍यो सिरच्‍येते बात ङ्योकोन इस्राएलीओनला छ्या स्‍ये च्‍युत्‍कीन बिन्‍दा ओत। दि बात ङ्योकोनगी ख्‍योकोनला सिरा माफाप्‍तासीन। 37थोकराङ खाला यूहन्‍नेकी परमेश्‍वर छ्य्‌वापा लै खि सिन मिओनला छ्युला लुक्‍ला बप्‍तिस्‍मा तेरच्‍येते काम खाईन सिन्‍नामेकी गालील अञ्‍चलदुकी शुरू ओङगीन यहूदीओन देत्‍च्‍येते ठाउँ ठाउँला ओङाते अचम्‍बते कामताङ बाततेबा ख्‍योकोनला छ्याराङ ओत। 38चुक सासीन परमेश्‍वरगी नासरतपे येशूला खटे खाईन परमेश्‍वर आत्‍मा थेमे छ्येज्‍यीक शक्ति बिन्‍दा ओतान। परमेश्‍वर थेत्ताङ ङ्योम्‍बु ओतेकी थेचेन शैतानगी दुक्‍पा बिन्‍गीन ल्‍हन्‍डीक स्‍यिन्‍डीप खोबाते थेमे नाबाते मि गाङेला ठाक्‍पा खिन गाङेपा गाङेला लेमु खिन युगीन ओतान।

39थेकी यरूशलेमदु थेमे यहूदीओन देताते लुङबा गाङेपा थोक खाईन खाबाते कामओन गोमा थेत्ताङ ख्‍याम्‍कान्‍ते ङ्योकोन ङेराङ मिगीराङ थोङाते ईन। यहूदीओनगी तिरी थेला लाक्‍पा काम्‍बाला काँटी ग्‍याप्‍कीन स्‍यिङगी थामला टाँए खाईन सेता ओतान। 40थेबेकी थोक खासीनोङ परमेश्‍वरगी थेला ङीमा सुमगी छोमु स्‍यिसादुकी सोम्‍बो लोक्‍सुङ। सोम्‍बो लोक्‍नामेई येशूकी ङ्योकोनताङ ठेता खाबा ओतान। 41ईन्‍दानी यहूदी गाङेताङचेन थेकी ठेता माक्‍यासुङ। ङेराङगी थोङातेताङ थोबाते बात ज्‍येनला लोपाला परमेश्‍वरगी गोमा खटे खाबातेबा ङ्योकोनगीकामा थेला थोङा ङेत्‍सुङ। थे सोम्‍बो लोक्‍नामेई ङ्योकोनगी थेत्ताङ ङ्योम्‍बुराङ साप थुङाङ खाबाते ईन। 42थेमे थेकी ङ्योकोनला ‘गाल्‍ला यहूदीओनला गा लाङच्‍येते बात लोप। स्‍याप्‍तेबा थेमे सोम्‍बोराङ ओतातेबा मि गाङेला तिरी न्‍याय खितालाचेन परमेश्‍वरगी थे खोरोङलाराङ छाने खाबा ओत सि,’ सिन कोत्‍सुङ। 43थेमे परमेश्‍वर बात खित्‍कान्‍ते मि गाङेकी गोमाकाराङ येशू ख्रीष्‍ट विषयला बात खाईन थेला विश्‍वास खित्‍कान गाङेला परमेश्‍वरगी थेबेकी खाबाते पाप गाङे माफ तेरग्‍यो। दोक खाला पाप माफ तेरच्‍येते थेकी येशू ख्रीष्‍टकी खाबाते कामगी खित्‍सादु खिओ सिरच्‍येते बात खाबा ओतान,” सिन सिदुक।

ज्‍येन ज्‍येन जातकी मिकीङ परमेश्‍वर आत्‍मा ङेताते

44पत्रुस थोक सिन बात खिनराङ ओतान। थे बात खिन खिनलाराङ थेरू बात ङेन्‍कान्‍ते मि गाङेकी परमेश्‍वर आत्‍मा ङेत्‍सुङ। 45-46थोक ओङनामेकी थेबा गाङेकी खोपरोङगी छ्या मास्‍येबाते खुदुक खुदुकते भाषाला बात खाईन परमेश्‍वरला छ्ये ज्‍वाप्‍ला स्‍यूसुङ। थोक ओङा थोङगीन पत्रुसताङ ङ्योम्‍बु गालाते येशूला विश्‍वास खित्‍कान्‍ते यहूदीओन “ओहो, परमेश्‍वरगीनी ज्‍येन ज्‍येन जातकी मिलाङ परमेश्‍वर आत्‍मा तेरच्‍याक्‍वा,” सिन छकदाङ परे खासुङ। थेमे पत्रुसकीचेन 47“परमेश्‍वरगी दिबालाङ ङुरूङला च्‍योकराङ खाईन परमेश्‍वर आत्‍मा बिन्‍नामेकी था दिबाला छ्युई नाङ लुक्‍ला बप्‍तिस्‍मा तेरा मेङगो सिन सुई सिरा थुप्‍कीते?” सिन सिदुक। 48थेमे थेकी “लो था दिबाला येशू ख्रीष्‍ट मिनगी छ्य्‌वापेई बप्‍तिस्‍मा बिन,” सिन थे खोरोङताङ ङ्योम्‍बु गालाते मिओनला सानामेई थेबेकी थे मिओनला बप्‍तिस्‍मा बिन्‍सुङ। थेमे थे मिओनगी टिक्‍पी दिन पत्रुसला थेबाताङ ङ्योम्‍बुराङ देत्‍की सानामेई थे देत्‍सुङ।

Currently Selected:

शक्ति काम 10: JUL

Highlight

Copy