Maleaki 3
3
Allah Yahweh arye, ninye nirya weneplirye, yupu bokeipnamle talak yanamla ati, nyabuk yupu
1Allah Yahweh arye nyabuk. Anggun nirya moubuka dipdelulume! ‘Na yupu laka nyalbanamle’ tenen, narye wipdeipniba yanamlanye bira, na bisik yalina ati dopdeipniba, el minopce yalirye, na bisik yabuka kintinipnamnile. Akunum kintinipnilyopura, na talye karin arye yanamne. Anggunce enumunye, na Allah Yahweh ara, na si eren aik koproba noutamakuk yanamne. Tonda, anggun kanye deiplumce, ‘Se, Allah el nyalin yupu nun dam laka lelyanamlanye bira, minopce yanuka nyapsutue,’ tenemunye bira, dipkoprob minopce nyalyanamsile. Nara Allah Yahweh, aning-aning ap, im deice yin talin malaikat nirya ap, sik weik deiyoknye birye nyapsina ati, dipkoprob winipnamle.
2Bukni, nara Allah Yahweh yanamne sum ara, yatanye birye, pia darapdongobuka tikturye, na eipnutu do? Na yanamne sum ara, kat weik ning uku dana deiyok nang arye, uku dongobikiba, mil paraplirye, malye ning nirya diplirye, teleb ninguk laka nyelelamle touk, narye malye un ning, aning-aning nirya, pia kum daneipnamne. Winipmanto ning ara, sabun mikip ning memena deiyok nang arye, memebuka deibikirye, nininga palepmalye baju, asabun arye mek likikiba, pia teleb kibuka liklamak touk, narye malye ning nirya kum kipdeipniba, diksukum ninguk tuba unamle.
3Na yanamne sum ara,#3:3 sum ara – Ton Allah yupu buku noutamak ara, ‘asum ara,’ nyalamak bukni, ton buku noutamak ara, ‘talak ara,’ nyanyake. Nun mitik ton walwal usulule. Tonok sum deice arye ninye nirya wenebuka, yupu bokeipnamle do? Tonok sum kum bukni, tonok talak noutamak arye, apil donamle do? malye ulamice ninye ap, teleb ulamikce ninye ap ati, yupu lipsisikuka bokolina ati yanamne. Nara, yupu lipsisikuka bokolina deiyoknye unune. Winipmanto ara, dekna weik ning el si perak, uku dabikirye, moubuka dinmakibuk, uku arye malye wamlye nirya uku diplirye, teleb ninguk laka upliba, aning dobuka, moubuka memelamak touk, narye malye ning aning-aning nirya, kum kipdeipnirye, teleb kipdeipnamne. Malye ning bataknamne. Teleb ning ara, ‘Naʼ tenen, deipnamne.
Aning atonun, dekna pia weik ning emas do, perak do, malye wamlibuk, teleb kililamak touk, narye sik Lewi yala nang, imam-imam nang nirya ati, yanuka yupu lipsisikuka bokeipnirye, teleb kipdeipnamne. Winipnyopura, sik Lewi yala deiyok nang arye, ila tuba tamubuka, na Allah Yahweh ati, kam ning obuka arelyakirye, na si erena ati, uku dongopnamake. Winibikiba, na Allah arye kanye deipnamne. Narye sikti, teleb kipdeipniba, na tenenye touk wininamake.
4Sik akunum teleb kipdeipniba, minop talak Yehuda yala ninye ap, Yerusalem mutuku ulamik ninye ap, sikce na Allah Yahweh ati, arin ning boyangalamikce, uku dongolamik touk, aminyan talak babye, na arena ati, teleb ning arelyanganamniake. Winibuka arelyangalamnicopura, narye sikti, kanye delinamne. Ati, minop talak Allah ap dukdongobuka, teleb ulamik touk, aminyan talak tamubuka batakdongopnyopura, sik ap, na ap, teleb kibuka neika unamabe.
5Na Allah arye, anggun dam yanamne talak ara, talye ati kume. Anggun wenebuka yupu lipsisikuka bokolina ati yanamne. Tonda, na minopce yanamne talak ara, anggun asing keten nang ap, tonda kil talye-talye mal olan nang ap, tilila yupu nyana nang ap ati, ‘Anggunda dipkoprob malye winilulume,’ nyabuka, weik arye wenepnamsine. Aning atonun, bona utotoa kum nang ati, weik ikin pil arukikiba donyak bukni, dekna mitik tonun arinyak nang ap, youwak kilapu ap, kwaknamne mapu ap ati, sik ning ubula dolonyak nang ap, tonda ninye asik nang ati, deiyok kum upmalibuk, malye yupu sik deice nyanyakce, malye kinyak nang ap nirya ati, na yanirye, ‘Anggun malye weik ululume,’ nyabuka wenepnamsine.
Deiyok ara, sik amalye-malye weik wininyak nang arye, nati ilil kum ulule. Sikce, na si kum ereninyaka ati, yanirye sikti, wenebuka oplopnamne. Na Allah Yahweh, im deice yin talin malaikat nirya, sik weik deiyoknye birye nyapsin ning ara, dipkoprob winipnamne, nyapsine. Allah arye Israel ninye ati, nyabuk.
Israel ninye arye min yuma ning ap, teleb ning ap, Allah ati bokuka, kum arelyangalamika ati, wenebuk yupu
6Allah arye nyabuk. Nara Allah Yahweh, pia min kume kum danmantonye unune. Minop talak ulamse touk, wini talak babye, aminyan talak babye, pia ati aunamne. Na si ton pia kume kum danamnile. Narye nyalin yupu nyapyopura, pia kum luba kinune. Pia teninune. Ati ara, anggun Yakub birye deiamsukba, dadeipdanin yangalulum ninye ara, malye weik umunya ati, talye lukparabuka wenebuka, obuka sirya dakamsitinye bukni, aning ara min kum winipsise.
7Anggun apu yapu nang ulamik arye dipdongobuka, atalak-atalak noutamak nirya ara, narye, ‘Wininamlulume, aning ara kum wininamlulume,’ nyapdeiamsise yupu, yanibuka batakalulume. Narye nyasinye yupu uk, talibuka dukdongobuka, kum dobolbalulume. Ati ara, anggun adiparyuk, tamubuka na dam yanululume. Yamunyopura, narye bataksise ning ara, ila tamubuka anggunti, dilyanamsine. Na Allah Yahweh, aning-aning nirya talibuka, im deice yin talin malaikat nirya, sik weik deiyoknye birye nyapsine. Bukni, anggunce nyalulume, ‘Se, nunda nun ni koproba Allah, el dam arye batakuka, yukak kum bindobupa anya arye, yata wiribibirye tamubuka, Allah dam binamap do?’ nyalulume.
8Winibuka nyanululum bukni, wini talak ara, narye tamubuka anggunti, asipdenusine. Ninye arye Allah ati, tilila yupu nyaltakanyakce, el ‘Naʼ tenen, ning ubula dona teleb do? Aning ara, dipkoprob malye bukni, anggunce tilila yupu nyamunce, ‘Naʼ tenen, ning ubula dolonululume. Ara, narye, ‘Anggun wenye kwaning ap, min yuma teleb ning ap bokuka, na si erena ati, arelyanganamnululume,’ nyapdeiamsise bukni, anggunce tilila yupu nyamunce, aning ayala-ayala nirya, ubula dopropmunce, na dam kum boyanganululume.
Dipkoprop aning ara, kum nyapnutum bukni, anggunce nati, nyalulume. “Kume, aning-aning nirya ara, ‘Allah arye aresulule’ tenen, weinye kwaning ap, min yuma teleb arin ning ap, noutam bokuka, Allah arena ati, dan talak arye, ubula dolamupu do? Dan talak arye, tilila yupu lelamkupu do?” nyabuka asilenululume. Bukni, na dipkoprob nyapsine. Na kele, anggun Israel ninye arye, tilila yupu nyamunce, na si erena ati, arena teleb ning ara, na dam kum arelyanganululume. Anggun dem aniryuk ubula dololulume.
9Winimunya deice arye, anggun amutuku noutamak umunye ninye nirya arye, nati tilila yupu nyaltakanumunya ati, narye, ‘Anggun nirya malye winin ninguk dopropnamaka’ tenen, supdeipsisiba, wini talak ara, anggun talilulum ning ap, koululum ning ap, anggun mutuku ap nirya, malyeuk ululba, ikin asauk, ululume.
10Minop talak arye, nyapdeiamsise touk, ila tuba tonap nyapsine. Ati ara, anggun talibuka umunye ning ton aupmasilyopura, ‘Aning bokuka, winibuka-winibuka arenamnulume,’ nyapsise touk, weinye kwaning ap, kam un ning ap, min yuma teleb arin ning ap, dobukapmumce, na Allah si eren aik bobuka arelyanganulume. Winipmunba, na si eren aik koproba pum tam ara, din ning weik upnamle. Kum suknamle. Narye anggunti, ‘Winibuka arenamnululume,’ nyapdeiamsise touk, winipnumunya deice arye, anggun din ning nirya ara, pia weik upnamsile. Kume kum danamsile.
Na Allah Yahweh ati, ton yanuka nyapnululume. Anggunce na nyapmasin touk, winipnumunyopura, narye im deice din ning yangan bisik bublan kukeipniba, anggun dam din ning ap, yuk teleb ning ap, pia weik upliba, anggunce dopman kumce, pia weik upnamsile. Anggunce, ‘Dib do, tilila do,’ tenena kume. Piripmunyopura, eipnamlume. Aning-aning nirya weika arye, arenamsine. Na Allah Yahweh, im deice yin talin malaikat nirya, sik weik deiyoknye birye, narye nyapsina ati, dipkoprob winipnamle.
11Tonda, narye anggun din ning koumunye ning, bok nirya dilul ning ap, nong malye ulul ning ati, yupu sekniba, tonap kum dinamsile. Tonda, nong bol malye kum unamsile. Telebuk unamle. Tonda anggur tapu nirya babye, teleb ubuka bongobuka paplirye, bok teleb kibuka paplirye, duk weika arye mounamsile. Na Allah Yahweh, im deice yin talin malaikat nirya, sik weik deiyoknye birye nyapsina ati, dipkoprob winipnamle.
12Winipsiniba, anggun unamlum mutuku nirya, ulul ning nirya pia teleb upnamle. Tonda, anggun unamlum mutuku noutamak babye, tuku teleb arepnamsine. Winipnyopura, yuk pera mutuku unyak ninye mutuku-mutuku nirya eipsikirye, ‘Se, sikda teleb kanye bobuka, pin-pin asa arye unyake,’ nyanamsiyake. Na Allah Yahweh, aning-aning nirya ap, im deice yin talin malaikat nirya ap ara, sik weik deiyoknye birye nyapsina ati, dipkoprob winipnamle.
13Allah Yahweh arye nyabuk.
“Teleb kipdeipnamsine,” nyapsin bukni, dipkoprob anggunce nati, malye yupu weik nyanululume. Bukni, anggunce nyalulum diparyuk, tamubuka nyanululume. “Kume, nunce Allah an dam ara, yata malye yupu nyakinyap do?” nyabuka asilenululume.
14Ati ara, anggunce nati, malye yupu nyanululum ning ara, nyapnusine. Ara, anggunce nyalulume. “Nunce Allah el si erenyap ning ara, deiyok kum bukni, talye atibuk erenyabe,” nyalulume. Tonda, “Allah elda aning-aning nirya talibuka, im deice yin talin malaikat nirya, sik weik deiyoknye ulul bukni, elce nunti, ‘Wininamlulume, aning ara, kum wininamlulume,’ nyalisilye yupu ara, dobolbanyap bukni, winibibya deice arye, yata teleb ning ton dolonyap do? Urtalya ati wininyaba anya arye, aning ara, nun like,” nyanululume.
Tonda, anggun nirya arye, ‘Nunda el nyapdeipsuk yupu talibuka unamap’ tenen, winilelamupu bukni, ila tuba ton malye winibipyopura, Allah el dam ati, “Se, nunda malye wininyap nang anya arye, namin kipsimince, lyepsilyame,” nyabuka, “El dam anyuk binuka loplobibirye, el amu tamuk una ara, deiyok yata ning ati wininamap do? Aning nirya ara, nun like,” nyabuka, malye yupu nyanululume.
15Tonda nyanululume. “Nun bidamnye asing arye akunum elinyabe. Ara, sik kanye talima pum tam erelana deice arye karye dobuka, kwalinyak ninye babye ara, ikin ning ton sik nong deice kum yangalule. Teleb aryuk ukirye, teleb kanye bobuka, kil-kil asa aryuk unyake. Tonda, sik malye wininyak nang nirya babye, dekna weik ning dopdobikirye, bona weik talin nang unyake.”
Tonda, malye unyakce, “Malye winin ninguk winibirye, Allah ati winipdenuyabe,” nyalulume. ‘Allah arye, nunti wenebuka kum opnamsile,’ tenekirye, “Pia mandipna kanye bobuka, kum kekamna atonun malye-malyeuk wininyak nang ara, tuba telebuk unyake. Allah arye sikti, kum oplirye, ikin ning sik dam kum yangalule. Ati, anang malye wininyak touk, nun babye atonun wininamabe,” nyanululume. Allah arye Israel ninye ati, nyabuka wenebuke.
Allah arye, “Sirya talak ara, bico tenebuka, Israel ninye lyepnamsine,” nyabuk yupu
16Allah arye Israel ninye ati, weik arye wenebuka, Israel ninye kan-kan, sikce Allah ati, tuba ilil ulamukba, diba tenebuka ulamik ninye arye, bulubuka yupu talipmikce, yupu nyalanmikba, Allah el si Yahweh arye, sik talipmek yupu kekebuk. Sik tuba dib tenen, kili sal ap, sik kayapu dib tenen ninye ap arye, amambul yupu buku dobuka sekik. Ara, ‘Nun ni koproba, Allah Yahweh ati, tuba dib tenebuka elti, ilil tenebuka unyap ninye ara, nun si abuku noutam sekenamabe.
Tonda, Allah ati kanye deibuka ubirye, tuba-tuba tenebuka, el siuk erenyap ninye ara, nun si abuku noutamak sekenamabe. Aning sekibirye, luba kina kumce, pia tuba tenenauk unamabe. Tonda Allah arye, aning eiplirye tuba tenenamsile,’ tenebikce, dib tenen ninye si abuku noutamak sekik.
17Winibikopura, Allah Yahweh aning nirya talibuka, im deice yin talin malaikat nirya, sik weik deiyoknye birye eibukce, ayupu nyabuk. “Sikce na si tuba ereninyak ninye nirya ara, na mapu koproba, ‘Naʼ tenen, ninye unamake. Tonda, na tenepse sum akunum uplyopura, ninye nirya ati, yupu lipsisikuka bokeipnirye, wenepnamne. Atalak ara, sik aninye ara, na mapu koproba, na kanye delin ninye unamake. Ara, narye sikti, tuba bico tenenamne.
Winipmanto ara, el mapu deiamlinye bira, tonok mi arye, ‘Na ni koproba’ tenen, el nyapmalye yupu kekebuka melilamlye mi ara, el li birye, ‘Na mi koproba,’ tenebuka melilamle touk, nati tuba diba tenenyak ninye ati, atonun tenebuka wininamsine. Ara, nati diba tenebuka, na si ereninyak ninye ati bico tenen, lyepropnamne. Sik wenebuka kum oplopnamne.
18Aning nirya akunum winipnyeba, na mapu anggun nirya arye eipmunce, kel biknamlume. Ara, sik telebuk unyak nang ara, sik urasin laka upliba, eibuka kel biknamlume. Aning atonun, malye ninguk talibuka unyak nang babye, sik urasin laka upliba, eibuka kel biknamlume. Ara, na si erepnikirye, na amu tam unyakce, na piluk donyak nang ap, tonda na si kum ereninyak nang ap ati, narye yupu lipsisikuka bokeipnamsin talakuk, eibuka kel biknamlume. Na Allah Yahweh arye nyapsine.” Allah arye nyabuk.
Currently Selected:
Maleaki 3: EIPA
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.
