Maleaki 2
2
Imam-imam nang, Allah el yu sik nong deice deibuk yupu
1Allah arye, el si eren aik pum tam, pil dona deiyok nang, sik imam-imam nang ati nyabuk.
Narye, “Winiplulume,” nyapdeipnusin yupu ara, ara anggun imam-imam nang atibuk nyapsine. 2Anggun nirya ara, moubuka kekepnululume. Kekepmunce, anyapdeipnusin yupu ati, mambul kanye bobuka, pia moubuka talipmunce, unamlume. Na ap, na si ap ati, ‘Allah Yahweh ara, pia mambule’ tenen, teleb kibuka, si erenamnululume. Na Allah Yahweh im deice yin talin malaikat nirya, sik weik deiyoknye ununa ati ara, narye nyapsin yupu ara, moubuka kekepnululume. Anggunce na kibuka, si kum erepnumunyopura, narye anggun deice, malye yupu nyabuka sunamsine.
Aninguk kum bukni, tonda narye anggunti, teleb ning ton arisinye ning babye, malye nyabuka sunamsine. Aning nirya malye ninguk arepsinyopura, dolonamlulume. Narye anggunti, ‘Wininamlulume, aning kum winipmunyopura, ikin ning arenamsine,’ nyapsise yupu nirya ara, anggunce, ‘Aning ara, mambul kum ati ara, daupmalye’ tenen, batakanululuma ati, dipkoprob narye anggunti, akunum deiyok koubuka sunamsine. Winisununa deiyok ara, anggunce na nyapdeiamse ning ara, batakluma ati susunune.
3Anggunce na nyapdeiamse yupu kum kekenululuma ati ara, diksukum narye anggunce delinamlum mapu, anggun deice ara, wenepnamne. Tonda anggun kam ning obuka, uku dalyangalulum ning, domba ap, kambing ap, sapi ap ara, aning sik dei ap, dei suruk ap dobukapna arye, imam-imam nang anggun asok deice likilinamsine. Ara, ‘Sik alye weik daknamak’ tenen, winipnamsine. Winipsinyopura, anggun nong dobuka, malye ning donokolbamunba, weik aulyakuk bobinuka, donoknamsine.
4Winipsinyopura, narye anggunti, ‘Aning ara wininamlulume, aning ara kum wininamlulume,’ nyapdeiamsise ning ara, biknamlume. Ara, ‘Se, nunce, aning ara mambul kume, tenebupue bukni, dipkoprob Allah Yahweh arye, ayupu nyapsuka ati, nun malye winibupue,’ tenenamlume. Narye, ‘Anggun malye winilulum ning batakmumce, telebuk unamlume. Kumopura, weik arye wenepnamsine,’ nyapdeiamsise yupu ara, narye anggun Lewi yala nang ati, ‘Aninguk wininamlulume,’ nyabuka, nyalin yupu nyapdeiamse ning ara, ‘Sikce moubuka talinamak’ tenen nyapsise. Nara, Allah Yahweh im deice yin talin malaikat nirya, sik deiyoknye nyapsine.#2:4 Allah – Ibrani yupu deice arye, Allah el si ati, ‘Yahweh Sebaot’ sekik ning ara, deiyok lakak kibuka sekupu.
5Narye, anggun Lewi yala ninye ati, nyalin yupu nyapdeiamse ning deiyok ara, ‘Anggun Lewi yala nang, anyalina yupu deice arye, anggun nirya diksukumuk umunyopura, kam unamlume. Tonda, na ap, anggun ap kanye deipdabirye, telebuk neika unamabe’ tenen, ayupu nyapdeiamsise. Tonda, “Anggunce na nyalin yupu talibuka unamlum talak ara, diksukumuk upmunce, nati, ilil tenepnumunce, si erebuka, ‘Allah ara weik mambule,’ tenen, na si erenamnulume,” nyapdeiamse. Ayupu nyapdeiamse touk, teleb un ning nirya arelamsise. Na ap, anggun ap teleb kibuka neika ulamupu.
6Atalak ara, sik Lewi yala nang arye peterelamik ning babye, dipkoprob ninguk peterelamik. Narye nyalamse yupu uk peterelamik. Talye yupu ton pia kum peterelamik. Sik nirya ara, na ap ansinibuka ulamuburye, telebuk ulamik. Tonda sik nirya arye, yuk nang ati, tilila yupu kum nyalamikce, yuk ninye talilamik ning nirya babye, ubula ton kum dolamik. Tonda, sik malye winilamik ning bataklamikce, yuk nang ati, ‘Anggun malye winilulum ning bataklulume,’ nyalamika deice arye, ninye weika arye, sik malye ning bataklamikce, telebuk ulamik. Na tenelamse ninguk, diksukum teleb kibuka ulamikce pil dolamik.
7Na tenelamse ning ara, ani. Sik imam-imam nang ara, dipkoprob sik pil dona diksukum ninguk talibuka unyakce, kel weik bikna ning nirya ara, anang aniryuk yuk ninye ati, teleb kibuka peterenamake. Yata ninye do nirya, ‘Se, yata wiripnamap do?’ tenen, kanye wangapne talak ara, sik Lewi yala deiyok nang dam binuka asipdecopura, ‘Sik imam-imam nang arye, teleb yupu uk lak lenamaka,’ tenelamse. Ara, talye ati kum nyapsine.
Nara, Allah Yahweh aning-aning nirya talibuka deice tam erebuka unirye, im deice yin talin malaikat nirya, sik weik deiyoknye ununa anya arye, na nyanye yupu laka nyapniba, sik imam nang kekebikirye, yuk talye daunyak kili sal nirya ati, ‘Allah tenelye ning ara, ani, ani,’ nyabuka, ‘Laka nyabuka peterenamake’ tenen, anang wipdeiamsise. ‘Wininamak’ tenen, anang wipdeiamsise bukni, aning ara, kum winilulume.
8Na tenelamse touk kum bukni, wini talak ara, anggun imam-imam nang ara, narye, ‘Wininamlulume, abisik banamlulume,’ nyapsise ning ara, diksukum bisik bataklumce, malye una bisikuk dobolbaluluma deice arye, anggunce yuk ninye ati, ‘Wininamlulume,’ nyabuka peterelulum ning ara, teleb ning ton kum peterelulume. Malye ninguk petereluluma deice arye, ninye nirya bobuka, malye una bisikuk bobalulumba, malyeuk wininyake. Winiluluma deice, narye anggun Lewi yala deiyok nang ati, nyalin yupu nyapdeiamsisirye, ‘Aning ara wininamlulume, aning ara kum wininamlulume,’ nyapdeiamsise ning ara, pia moubuka talibuka, kum winimunce, yaniltalulume. Narye Allah Yahweh, im deice yin talin malaikat, sik deiyoknye birye nyapsine.
9Ati anggun babye narye, ‘Israel ninye ati namin kanye bobuka peterelanamak,’ tenebuka, anggun nong deice deipsise bukni, anggunce na yupu kekebuka kum winilulume. Narye anggunti, ‘Teleb bisikuk moubuka peterenamak’ tenen, nyapsise bukni, anggunce nati batakanululumce, yuk ninye ati, peterelulum talak ara, kirikukapmunce talye yuk yupu uk tabakuka peterelulume. Tonda, yuk ninye ati yupu moulin talak ara, ‘Na kwit ani, tonda anye bira na like’ tenen, lipsisikuka yupu kum moulilulume. ‘Teleb tenepnamsiak’ tenen, yupu moulin talak ara, talye kwalin yupu nyamunce, moulilulume.
Winiluluma ati ara, narye anggunti malye kipdeipsiniba, sik yuk Israel ninye nirya eipsikirye, anggunti, ‘Se, sik Lewi yala deiyok nang, imam-iman nang ara, malyeuk unyake,’ nyapsicopura, anggunda ikin kanye bobuka, alye dakalanamlume. Allah arye sik Lewi yala deiyok nang ati nyabuk.
Israel ninye arye, Allah nyapdeiamuk yupu yanibuka batakikce, kil talye-talye dolalamika ati, nyabuk yupu
10Nabi Maleaki birye Israel ninye ati nyabuk. Nun nirya nun ni koproba ara, tonok kum ulula ati do? Tonda, nun nirya ara, tonok Allah el dem arye kum kwepdeipsuka ati do? Ati ara, nunce yata ning ati, Allah arye nun apu yapu nang, sik deice nyalin yupu nyapdeiamukce, ‘Aninguk talibuka unamlulume,’ nyapdeiamuk ning yaniltanyap do? Winibibirye, nunce donyap kilapu ara, ‘Nun like’ tenen, talye lukparabuka batakanyabe. Winibya deice arye, minop talak, ‘Akil dopnirye, pia neika unamabe,’ nyabuka, nyalin yupu nyabupu ning ara, batakanyabe.
11Anggun Yehuda yala ninye ap, Israel yala-yala ninye nirya ap, tonda Yerusalem mutuku noutamak ululum ninye ap, anggun nirya arye malye weik winilulume. Malye umunya deice arye, Allah Yahweh el si eren aik ati, malye ulilulume. Anyaik ara, ‘Pia mambul aik,’ tenenyap bukni, anggun malye umunya deice arye, anyaik ati pia malye ulilulume. Anggunce malye winimunya ara, ani.
Ara, anggun amutuku umunye nang arye, Isa Mutuku Dongonye siuk erenyak mutuku kilapu dolalulume. Akilapu taruk mourulamunya deice arye, Allah Yahweh el si eren aik pum tam, noutamak akunum malye kililalulume. Ati Allah arye, ‘Aning ara wininamlulume, aning ara kum wininamlulume,’ nyabuka, nyalin yupu nyapdeiamuk ning ara, akunum yaniltalulume.
12Isa si erenyak kilapu dolulum nang ara, ‘Aning ara mambule,’ tenilena kum diparyuk, Allah Yahweh aning nirya talibuka mikip weik ulirye, im deice yin talin malaikat nirya, sik mikip weik deiyoknye, el si erena ati, kam ning obuka, uku dongolyangalulume. Winimunya ara, pia malye weik ati ara, na kanye ara, ‘Allah Yahweh arye, anggun awinilulum ninye nirya wenebuka opnamne,’ tenenune.
13Tonda, yuk malye winin ning ton awinilulume. Ara, Allah Yahweh ati, arin ning delilyangana ati, keil lelebuka yangapdeibikak boyangamunce, malye kanye bobuka, asing maka deice arye, engemunce nyalulume. “Se, yata ati, Allah Yahweh elti, arepmap ning ara, kanye deibuka kum dopropmasil do? Yata deiyok ati, nun ni Allah ara, nun moronyap ning kekebuka kum aresulul do?” nyabuka engelulume.
14Tonda anggunce, “Nun ni Allah yata ati bataksuk do?” nyabuka engelulume. Winimunya deice arye, asing maka sakasilirye, Allah arena ati, memebuka deibikak malye ululume. Adeice anggunce Allah Yahweh arena ati, kam ning obuka, uku dalulum ning ara, malye ululume. Allah arye, akunum bataksuka deiyok ara, laka nyapnusine.
Ara, talye ati kume. Anggun wel talak arye, Israel kilapu taruk mouruplumce, domlum talak ara, Allah Yahweh arye eipsukce bikamuke. Anggun ap, akilapu ap arye, ‘Kume, nunce pia neika unamaba ati ara, kum batakdanamabe,’ nyabuka nyalin yupu nyamlum ning ara, Allah arye akunum kekamsuke. Anggun domlum Israel kilapu ara, telebuk ulamikce, yuk nang ap, neika yupu talibuka kum ulamikce, anggunti kum bataklamsik bukni, anggun sal aniryuk, akilapu talye lukparabuka batakamumce, yuk kilapu ap, neika malulume. Tonda, ‘Yuk mutuku kilapu ton doptibye’ tenen, anggun min yuma dopdanamlum kilapu batakmunce, malye weik umunya ati, nyapsine.
15Anggun ton moubuka bita kum bikamlum do? Allah Yahweh arye, sal ap, kil ap, dopdalum talak ara, nong tonok atonun kum kilisulul do? Deiyok ara, sal babye, kilapu babye, dopdamunye talak ara, akil ap dukdongobuka nong tonok kilisulule. Dipkoproba anggun nong ap, kanye talima ap, dib kanye ap ara, Allah el ninguk ulule. Ati ara, Allah arye anggun nirya ati, utenesulule. ‘Kume anggun nirya arye, Allah ap, nong tonok dukdongobuka ubirye, teleb ubuka mapu deibikirye, na nyanye yupu moubuka peterebikiba, sik mapu nirya kekekirye, talinamak,’ tenesulule. Ati ara, anggun bidamang uk, pia moubuka kel bikdamunce, ‘Na dopse kil bataknamne’ tenen, kalikdanamlulume. Anggun wel talak arye domlum kilapu batakna kumce, anggun ap pia neika unamlulume.
16Aning ara, talye ati kum nyapsine. Ara, Allah arye, ayupu nyapdeipsuke. Anggun min yuma domunye kilapu batakamunye nang ara, na Allah arye yu weik unulula ati, weik arye wenepnamsine. Ara, Allah Yahweh, Israel ninye pia kalikuka melilulnye, anggun deiyoknye, Allah arye nyapsuka ati, aning ara weik mambule nyapsine. Allah Yahweh, im deice yin talin malaikat nirya, sik weik deiyoknye birye nyapdeipsuke.
Winipmanto ara, ninye arye, ton nang oplobikirye, adipmace nang sik ining palepmalye baju dobuka, ongobikcopura, pia malye ulule. Ara, bico tenena kum ninye arye, aning atonun ning wininyake. Ati, anggun domunye kilapu batakmunyopura, ara ayu un nang atonun ululume. Winina meme. Ati ara, anggun nirya arye, anggun bidamnye ati, ‘Nun dobupu kilapu deiyok kum upmalibuk, talye batakibirye, yuk kilapu dobipyopura, Allah arye yu kanye bopsilyak’ tenen, pia moubuka kalikelanamlulume. Min yuma domunye kilapu batakna meme. Ayupu nirya ara, Allah Yahweh, aning-aning nirya ap, im deice yin talin malaikat nirya ap, sik weik deiyoknye birye nyapsile. Na Maleaki birye lak nyapsine.
“Allah Yahweh arye, yupu bokeipnamle talak ara, akunum dam uple,” nyabuk yupu
17Tonda, na nabi Maleaki birye ayupu nyapsine. Anggun malye ululum diparyuk, Allah el dam yupu nyalulum ning ara, ‘Na pia like weike,’ tenesulule. Utenesulul bukni, anggun malye umunye diparyuk, Allah Yahweh ati tamubuka asiltolulume. “Nunda yata ning winibibya deice arye, Allah ati lik kilinyap do?” Ati, na Maleaki birye laka nyapnusine. Anggunce, Allah ati lik kililulum ning ara, ani. Ara, anggunce nyalulume. “Malye wininyak ninye nirya ati ara, Allah elce teleb uka tenesulule. Tonda, diksukum telebuk ulul Allah ara, dan sukum ulul do?” nyabuka asiltolulume. Winimunya deice arye Allah ati lik kililulume. Maleaki birye Israel ninye ati nyabuk.
Currently Selected:
Maleaki 2: EIPA
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.
