Lukas 5

Yesus arye, ‘Na yupu peterepnamak’ tenen, deiyok koubuka, el mapu wipdeibuk yupu

(Matius 4:18-22; Markus 1:16-20; Yohanes 1:40-42)

1Tonok sum ara, Yesus Genesaret mekwen,#5:1 Genesaret – Amekwen tonok bukni, ton talak ara, Galilea mekwen nyanyake. Ton talak ara, Genesaret mekwen nyanyake. weik mekwen lilun tikuka peterenmok talak ara, ninye pia weik arye, ‘El yupu kekepnuyap’ tenen, el dam wekelyanganmekce, tiklim daraldanmekak Allah yupu peterenmokura, kekenmek. 2Wininmek talak ara, mekin bal youn nang arye, sik mek lia bukna yo amekwen lilun deipmekce, sik mekin bal ati yangabuka dolamik aling atonun ning, mek likinmek, talak Yesus arye, sik mek lia bukna yo deipmekak eibuk. 3Sik mek lia bukna yo eibukopura, Simon el mek lia bukna yo pum wekelbiyukce, Simon ati morobukopura, Simon arye mek lia bukna yo gisibuka mitikto yukak mekwen deice deililbiyuk. Deililbiyukura, Yesus arye amek lia bukna yo deice bukuka, awekmek nang nirya ati Allah yupu peterenmok.

4Allah yupu peterenmoka ani, akunum sekdobukopura, Simon ati ayupu nyabuk. “Simono, anmek lia bukna yo dobuka mekwen karu noutamak delilbimince, an mekin bal yangabuka youn aling atonun ning ara, mekin bal weknamla ati, mekwen pum dongopnulyame,” nyabuk. 5Nyabukura, Simon arye tamubuka nyabuk. “Naio, alukunyan noutamak nirya ara, na kwit ap, pil pia weikdopmanam bukni, mekin bal tonok babye, ton pia kum wekmasile. Kum wekmasil bukni, ance nyapmasilama ati, na mekin bal yangabuka youn butum ara, mekwen pum dongopnune,” nyabuk. 6Nyabukura, mekin bal yangabuka don aling mekwen pum dongopmeka ani, mekin bal pia weik wekukce, ikin ubukura, sik mekin bal yangabuka, don baju kwilikmanto ubuk.

7Winibukopura, sik kayapu, yuk mek lia bukna yo deice otam unmek nang ati, ‘Yakirye melipsikibuk dopdopnuyap’ tenen, “Yalulume,” nyabuka, taruk langum apdobik. Taruk langum apdobikura, anang yayik akarye, sik nirya mekin bal wekmokbutum, mek lia bukna yo deice bitinye dongobikura, pia langdibuk. Langdibukura, mekin bal ikin arye mek lia bukna yo mekwen wekmanto ubuk.

8Simon ap, el kayapu nang nirya ap arye, amekin bal weik dopropmekce ngalukunmek. Ngalukunmekba, Simon Peterus arye aning nirya eibuk ati Yesus dam mek liya yo deice kutam dipdongobukabukce Yesus ati yupu nyabuk. “Se, na deiyoknye Yesuso, nara malye wininanye ununa anya arye na batakuka yukak binulyame” nyabuk. 9Ayupu nyabuk ning ara, deiyok ara ani. Ara el ap el kayapu nang ap mekin bal pia weik dopmek ning ati, mambul kanye bobuka ngalukunmekce, el Simon bira, ‘Se anye Yesus ara dipkoprop telebnye,’ tenebuka ayupu nyabuk.

10Tonda, Zebedeus el mapu bitinye Yakobus ap, Yohanes ap ara, Simon ap, sik mekin bal youna ati, pil neika dolamik nang, sik babye, ngalukunmarik. Simon Peterus arye Yesus ati, “Na batakuka yukak bilyame,” akunum nyabukopura, Yesus arye Simon biti tamubuka nyabuk. “Simono, an ilil una meme nyabuk. Wini talak arye dipdongobuka dotalak ara, ‘Allah lyeplirye, sik talima talinamle’ tenen, ance ninye weik bulubuka na dam boyanganamlame,” nyabuk. 11Akunum nyabukopura, sik mek lia bukna yo bopmek nang nirya, mekwen lilun anyuk lukuka deibikce, aning-aning nirya anyakuk batakuka Yesus melibuka biyik.

Yesus arye, barye suse atonun suse dilamuknye, kwetebuk yupu

(Matius 8:2-4; Markus 1:40-44)

12Tonok sum ara, Yesus arye ninye asik dolamik noutamak banmukba, weik barye suse atonun kororoma ara, el nong bol nirya dilamuknye, aunmokak arye, Yesus eibukce yayuk. Yesus dam gutam tuku dipdongobuka bulyayukce, Yesus ati morobuk. “Naio, an kanye deipnutumce, ‘Anye bira kwetepnune,’ tenepnutumtoura, na barye kororoma, adiparyuk kwetepnutume. ‘Akwetepnutum’ tenen, ati moropmakine,” nyabuk. 13Anye birye nyabuka morobukopura, Yesus arye anye bira, el nong deice taruk talibuk. Talibukce nyabuk, “Na anti kanye deibuka kwetepnukine. Winira akunum teleb ubuka kwetepmakine,” nyabuk. Yesus arye nyabukopura, adiparyuk anye el kororoma atonun dilamuka koroksakukce, mikdobuk.

14Yesus arye anye biti, “Narye akwetepmakin ning ara, yuk nang ati laka kum nyanamlyame,” nyabuka yupu moupdeibuk. Tonda, Yesus arye nyabuk. “Laka kum nyanamlyambuk, an nong dipdekilirye, ‘Anye bira, akunum telebuk ulule,’ nyapnamkil ati, Yahudi yala nang, Allah arena deiyoknye dam binuka, an nonge lak nyapnulyame. Tonda, uk dilamle ninyeuk kum danapnopura, Musa sekamuk touk, Allah si erena ati, kam un ning obuka arelbalamak touk, an babye, arel bilyame.

Ara, Allah arena deiyoknye birye, anti nyapnamkile. ‘Allah ara pia telebnye anya arye, an barye suse dilamkuk talak ara, Allah arye derepsulul tenen, nun neika kum ulamubu bukni, winira Allah arye, an barye suse akunum kumdanmakil ati, nun neika una telebe,’ nyapnamkile. Nyapkilyeura, ‘Yuk ninye kekebikirye, kel biknamak’ tenen, nyapkine. Tonda, ‘Allah arye akunum kwetepmale, tenepnamkiyak’ tenen, nyapmakine,” Yesus arye nyabuk.

15Yesus arye akwetebuknye biti, nyabuk bukni, anyabuk ning batakukce, Yesus arye kwetebuk ninguk laka nyapnin banmokura, ninye weik kekenmek. Ninye weik arye kekenmek ati, atalak deiya koubukce, dana-dana tam nirya arye ninye weik bulubuka, ‘Yesus el yupu kekepnuyap’ tenen, tonda, ‘Elce kwetepnusil’ tenen, Yesus dam yangalamik. 16Ninye weik yangalamik bukni, ‘Ninye weik bulubicak’ tenen, Allah morona ati, ninye una kum mutuku ak, Yesus el yuk Allah morolbalamuk.

Yesus arye, nong nirya malye uamuknye, kwetebuk yupu

(Matius 9:2-8; Markus 2:3-12)

17Tonok sum ara, Yesus arye peterenmok talak ara, sik Farisi#5:17 Farisi nyalamik ning ara, Allah arye minop talak ‘Wininamlulume, aning ara kum wininamlulume,’ nyalamuk yupu Musa arye sekeiamuk yupu peterena deiyok nang ulamik. Ayupu ara weikto arye kel bikamik. Tonda laka nyana yupu nomor 10 dindelelume. nang ap, Allah arye, ‘Aning wininamlulume, aning ara kum wininamlulume,’ nyapdeibukura, Musa sekamuk yupu peterena deiyok nang ap, Yesus peterenmokak bukuka kekenmek. Anang ara, dana-dana nirya, Galilea tam ap, Yudea tam ap, ton weik asik dolamik asik Yerusalem mutuku ap, amutuku-amutuku nirya arye yanmek. Sik nirya aunmekura, Yesus arye peterenmok talak ara, Allah arye, ‘Yesus ara, uk dilamuk ninye kwetepnul’ tenen, el mikip weik akunum arepmoka anya arye, kintinibuk. Yesus ulamuk aik ara, lo mitik atonun babye, pia kum ubuk. Aik buplan dam, buru tam babye, lo kum ubuk, nirya langdibuk. Winibukura, Yesus arye anang ati, Allah yupu peterenmok.

18Yesus anyaik pum peterenmok talak ara, dumbarye nang pala yo deice arye, nong nirya malye uamuknye baya wibuka boyayik. Ura, ‘Yesus arye nun kwit kweteptue’ tenen, anyaik wekdeyik bukni, ninye weik wekmeka arye, buplan dam diknepmek ati, Yesus dam bobinmanto kum ubuk. 19Winibuk ati, lyu ubuka domik aik aruma deice welebikce,#5:19 aik aruma deice welebik – Aik aruma deice welebik ning ara, deiyok ani. Amutuku ara, mok mitik tonun celamuka ati, sik aik aruma ara, gat ning arye pala lilibuka dolamik. Tonda, lak len yupu nomor 27 dipdelulume. aik pum Yesus bukmok sukumuk, aruma barabikce, pala yo ap, anye ap talibuka, aik aruma deice arye dopkwetepnin banmeka ani, Yesus peterenmok sukumuk, anyaik pum dopkwetebik.

20Sikda, ‘Yesus arye anye bira kweteptue’ tenen, wininmake tenebukce, Yesus arye, ‘Sikda nati dipkoprop diba tenepmaniyake,’ tenebukura, anye bira min kum kwetebuk talak arye, malye uamuknye ati nyabuk. “Na mio, an malye teneminye ning ap, an malye winiminye ning ap, kum danipmakine,” nyabuk.

21Yesus arye ayupu nyanmok talak ara, sik Farisi nang ap, Musa sekamuk yupu peterena deiyok nang ap, abukuka kekenmekce, sik kanye noutam ara teninmek. ‘Anye bira nyanmala ara, yata ati do? Yesus ayupu nyanmoka deice arye, ‘Na Allah atonunye unune,’ nyanmoka ati, elda pia malye yupu nyanmasile. Allah elcuk nun malye wininyap ning kum kilisulul ati, yatanye birye tonap apil doptu do?’ tenebikce, Yesus ati yu ubuk. 22Sik kanye talima noutamak nirya tenebik ning ara, Yesus el kanye pum noutamak akunum kel bikukura, elce tenebuka ati, elce sikti, nyabuk.

“Ayupu anggun kanye talima pum noutamak tenipmaluma ara, yata ati do? 23Na kanam arye, anong malye ubuknye biti, ‘An malye ulyam ning nirya kum danipkine,’ talye nyaploptinye do? Akumopura, kanam aryuk, ‘Tikropmince banulyame,’ talye nyaploptinye do? Talye yupu deice arye aning nirya nyaploptinye bukni, ‘Apil ara dipkoprop doptu do, kum doptu do?’ tenepmanuluma ati, minopce anye kweteipnune. Ara, anggunce nati, ‘Yesus ara ninye tukwak malye unyak ning ara, kum kilina deiyoknye dipkoprop ulule, tenepnamanulum’ tenen, anye kweteipnune. Ati ayupu ton yapnune. Amalye uamuknye ati, ‘Tikmince yan yanibuka bilyame,’ nyapkine,” Yesus arye nyabuk.

24Nyabukce, ayupu ton dukdongopra nyabuk. “Bukni, nara Ninye Mi Koprop Atonunye,#5:24 Ninye Mi Koprop Atonunye nyabuk ning, ara im deicanye ulamuk bukni, tukwak ninye lyena ati yayuk talak ara, ninye nong dayukce, talya tukwak nang urasin atonunye dayukce yayuk. Ninye urasin kibuka yayuka ati, ayupu nyabuk. na mikip deice arye, tukwak ninye sik malye ulamice ning nirya ara, ‘Dipkoprop kum danipsutue’ tenen, biknamanuluma ati, amalye ubuknye biti kwetepnune,” nyabuk. Nyabukce, amalye uamuknye ati ayupu nyabuk. “Anda tikukapmince an amsuna dobuka an aik tamubuka bindoplyame nyapkine,” Yesus arye nyabuk.

25Nyabukopura, adiparyuk nong malye uamuknye teleb ubukura, tikdobukce, el amsuna dobuka awekmek nang nirya, sik adinmek talak ara, anyaik pum arye buru tam binuka, el aik koprop tamubuka biyuk. El aik banmok talak ara, Allah ati, “Se, na ni Allah, anda pia telebe,” nyabuka, Allah si erenmokce biyuk. 26Yesus winibuka deice arye awekmek nang nirya, se tenebuka mambul lenmekce, Allah el si erenmek. Tonda, “Awininmeka ara, ninye kum winipmanto ning eipmabe. Aning atonun ning ton kum elilamupe,” nyabuka malye nyabik.

Yesus arye, ‘Anye bira na yupu peterelbinamle’ tenen, Lewi doprobuk yupu

(Matius 9:9-13; Markus 2:14-17)

27Yesus amutuku batakuk akarye, yukak banmok. Banmoka ani, tonoknye el si ara, Lewi eibuk. Roma mutuku nang arye amutuku nirya talyamika ati, amutuku nang arye sik yo bok, Roma weik ninye deiyok nang ati arilamik. Lewi ara, Roma mutuku nang arena ati, sik yuk nang arye ayo bok bulubuka deililamikura, elce pajak yo bok#5:27 Pajak yo bok dolona aik – Roma mutuku nang arye, amutuku nirya talilamika ati, amutuku ninye arye, sik yo bok, Roma weik ninye deiyok nang ati arilamik. Lewi ara, Roma mutuku ninye arena ati, sik amu tam ulamik ninye nirya arye, yo bok buluyana arepniba, elce bulubuka delilamuk. Ayo bok delin aik, anyaik bukmok buk, Yesus yayukce eibuk. Sik pajak yo bok dololamik ning ara, ubula weik dololamika ati, Israel ninye nirya arye anang ati, ‘Anang ara, nun like. Sikda pia malye winin nange,’ tenelamik. deililamuk aik, anyaik pum ulamok ak, Yesus ara yayukce Lewi eibuk. Eibukura, Lewi ati, “Anda na melipniminyeura, na ap neika binuname,” nyabuk. 28Yesus arye nyabukura, Lewi adiparyuk el ning nirya anyakuk bataklobukce, tikuka Yesus melibuka dobolbiyuk.

29Banmarika ani, Lewi el aik koprop wekelbirik. Ura, Lewi arye, ‘Yesus kipnun’ tenen, weik kwalya kwalibukce, el kayapu nang weik yukubuk. Lewi arye yukubuk nang, ara amutuku talyamik nang, sik Roma mutuku nang ulamik ati, pajak yo bok bulubuka, arelamik nang ulamik. Tonda, yuk nang ap, weika arye yanuka wekik akarye, sik nirya dina neikak dinmek.

30Dinmekbuk, Musa sekamuk yupu peterelamik nang ap, Farisi nang ap, tabakuka ulamik nang, tonda Farisi nang kopropa ap, Roma mutuku deiyok nang arena ati, pajak yo bok bulubuka delina deiyok nang ap, tonda yuk malye-malye winilamik nang ap, Yesus ap anyaik wekuka neika din dinmek.

Dinmek talak ara, sik Farisi nang arye eibikce, Yesus el melina nang ati asipdeyik. “Yesus ara, pajak yo bok bulubuka delina deiyok nang ara, sikda ubula dolon nang unyaka anya arye, anang ap, malye-malye wininyak nang ap, Yesus anang kan-kan din dinmal ara, yata ati do? Ara malye wininmale,” nyabuka wenebik. 31Nyabuka wenebikura, Yesus arye ayupu kekebukce, anang ati nyabuk.

“Uk din malyeura, aning tenena kum nang ara, ‘Ninye kwetenanye dokter dan do?’ tenen, kum enyake. Akumura, ‘Se, uk dinmalibuk, nun malye unmabe,’ aning tenenyak ninye ara, ninye kwetenanye dokter ati imun uplyeura, enyake. Aning atouk nara malye winin nang, teleb ulina ati yase.

32Aning atonun, mitik diksukumuk ulamice bukni, sik talima noutamak malye ning tuba upmalye ning ara, aning tenena kumce, ‘Nunda teleb nanguk unyabe,’ tenenyak ninye ati, ‘Lyepnamne’ tenen, kum yase. Ara anggun Farisi nang ara, ‘Nunda teleb nanguk unyap,’ tenemunya anya arye, uk kwetena nang kum pataplye ati, kum enyak nang atouk ninye ululum ati, ‘Anggun malye umunye ning batakuka balye tam tamupmunce, Allah el tam kiproplulume,’ nyabuka, ‘Lyepnamne’ tenen, kum yase.

Bukni, na yase deiyok ara, sik malye uce ning batakuka, kanye dangubuka, ‘Allah el tam kiplulume,’ nyabuka, ‘Lyepnamne’ tenen, yase. Sik malye wininyakce, ‘Se aning ara, nun malye wininyabe,’ tenenyakce, malye kanye bobuka unyak nang ara, ‘Sik malye wininyak ning batakiceura, ato ninye dobuka lyepnamne’ tenen, yase.” Yesus arye nyabuk.

Kwaning bulang mabuka, Allah morona ati, asipdeyuk yupu

(Matius 9:14-17; Markus 2:18-22)

33Yohanes mek dongonanye, elce peterelamuk yupu kekelamikce, melibuka balamik nang ap, sik Farisi nang arye nyapnopura, kekelamik nang ap arye, sik malye winilamne ning ati, ‘Allah moropnuyap’ tenen, dina bulang mabuka, Allah morolamika anya arye, sik farisi nang arye Yesus ati nyabik. “Yohanes el yupu kekekirye melinyak nang ap, nun Farisi nang, nun yupu nyapnopura, kekebuka bace nang ap, anang nirya arye, ‘Allah si erena ap, Allah morona ap winipnuyap’ tenen, din bulang, si tebuka Allah moronyake. Sik anang ara wininyak bukni, Yesus an mapu ara, awininyak touk kum wininyake. Sikda kwaning ap, mek ap, talye urdem dinuk unyake. Wininyaka ara yata ati do?” nyabuka asipdeyikce wenebik.

34Ayupu asipdeyikce wenebikopura, Yesus arye anang, domona yupu deice arye tamubuka nyabuk. “Kil donanye dopnulye talak ara, el kayapu ap, el milina nang ap ara, kwalya kwalibuka neika kum dinyak do? Kume, sik kwit, el kil don talak ara, kanye deipmaca anya arye, kwalibuka neika dinyake. Aning atonun, nara kil donanye atonun ati, na mapu ara kanye imun uplibuk, dina bulang kum unyake. 35Bukni, na talibuka bobinamiak talak ara, sik kanye ikin uplibuk, din dina kum arye, bulang upnamake,” Yesus arye ayanuka, asinmek nang ati nyabuk.

36Ura, Yesus arye sikti, adomon yupu deice arye nyabuk ara, ani. Yesus arye, ‘Allah yupu sekamik ning teleb ulul bukni, sik Farisi nang ap, sik apu yapu ap arye, sik bidamang arye talyamikce, talya tabakuka mem ning peterenyak ara, malye ning biknamak’ tenen, awekmek nang nirya ate, domon yupu bitinye nyabuk. Tonda Yesus arye, ‘Na peterenya ning ap, na wininye ning ap deice arye, kanye tenena winiryuk ning tia biknamak’ tenen, awekmek nang nirya ak, ayupu bitinye nyabuk. Yesus arye nyabuk yupu ara, ani.

“Yatanye do nirya, minop baju kwiliklyeura, abaju lipsisikuka wina ati, winiryuk kain kwilikikirye, minop baju deice taplakikirye, kum winyake. Aning atonun winibiceura, winiryuk wipmace ning el urasin yuk, minop baju el urasin yuk ulya ati, aning kum wininyake. Tonda, abaju mek ilikikirye, mikdeipmakiba, akunum miklyopura, minop baju kwilikilule. Ara, winiryuk baju wipmaca arye winilula ati, winiryuk kain ap ansinibuka kum winyake.” Yesus arye nyabuk.

37Ton ning ara ayupu nyabuk. “Aning atonun ton, ninye domba bol dobuka potong leklobikirye, dana-dana tam nirya wibicopura, pum bisik anggur mek kwebuka dikdongobuka deilinyake. Wininyaka ati, ninye arye purubuka, winiryuk kwelamak anggur mek ara, minop domba basam bol pum kum dikdongobuka deilinyake. Winiryuk anggur mek kwebuka minop domba bol pum dikdongopting bukni, dikdongoptingura, anggur mek mikip arye neplirye, domba bol coloplyeura, mek balule. Coloplirye, balyopura, anggur mek ap, domba bol ap, kum dalirye, malye ulule.

38Aning ati ara, winiryuk anggur mek ara,#5:38 Winiryuk anggur mek nyabuk ning ara, domon yupu deice arye nyabuk. Ayupu nong ara, ani. Ara Musa arye sekamuk yupu nirya ara, teleb yupu uamuk bukni, Yesus arye peterelamuk yupu nirya ara, winiryuk yupu ulamuk. Aning ati ara, ‘Ninye nirya arye, Musa sekamuk yupu batakuka, na yupu dobolbanamek,’ tenebukce, adomon yupu peterebuk. winiryuk domba basam bol pum bisikuk dikdongoptinge. 39Tonda, yata ninye do nirya, minop anggur ninye kanye wangalamak mek akunum dibicopura, el mikip ap, to ap, pia teleb anya arye, aminyan ara anggur mek winiryuk ning kum pataplye ati, kum dinyake. Minop ning ara, pia teleb mek ati, winiryuk ning ara kum pataplye ati kum dinyake.” Yesus arye nyabuk.

Currently Selected:

Lukas 5: EIPA

Highlight

Copy