Lukas 3

Amenyan ara, Yesus yanamuka ati, Yohanes arye peterelamuk yupu

(Matius 3:1-12; Markus 1:3-8)

1Roma mutuku nirya weik ninye deiyoknye Kaisar Tiberius talyamuk talak, anirye dipdongobuka, keting tamun koklom dekin 15 akunum ubuka talak ara, Pontius Pilatus dobuka, ‘Yudea tam talipnamle’ tenen, Gubernur kipdeibuk. Atalakuk Galilea tam talyamuknye, Herodes pemerintah nang deiyoknye kipdeibuk. El weit kopropa Pilipus arye Iturea tam ap, Trakonitis tam ap, talyamuk. Atalakuk Abilene tam talyamuknye bira, Lisanias ulamuk. 2Anang talyamik noutamak arye, sik Hanas ap, Kayapas ap, Allah arena ati, el si erena aik pum pil dona weik deiyok nang#3:2 Allah ati arena deiyok nang, sik weik deiyoknye ati, laka nyana yupu nomor 14 dindelelume. ulamrik. Sik apil dobuka ulamrik keting tamun deice arye, Zakaria, el mi Yohanes ninye kum mutuku ak ulamukba, Allah arye Yohanes ati Yupu nyalyayuk. Apeterelamuk talak ara ayupu peterelamuk. 3Yupu yanuka nyabukopura, Yohanes arye Yudea tam noutamak bukni, Yordan mek dana-dana Allah yupu peterepra balamukce, diba tenebik ninye bobuka, mek dongolamuk. Peterepra balamuk talak ara, ayupu peterelamuk.

Yohanes peterelamuk ning ara, ani. “Anggun nirya, anggun kanye talima malye tenelulum ning ap, anggun malye umunye ning ap, batakmunce kanye dangupmunyeura, Allah arye anggun malye winin ning nirya kum kipdeipsilirye, kum daneipsilyopura, narye mek dongopnamsine,” nyabuka peterelamuk. 4Ara talye ati kume. Allah yupu laka nyalamuknye, nabi Yesaya arye nyalilamuk touk, anye bira Yesus yanamuka ati, Yohanes arye apil dolamuk. Yesaya arye nyalilamuk domon yupu ara ani.

‘Na Allah ara na yupu laka nyalinanye birye, ninye kum mutuku ak ayupu nyalule. “Nun weik ninye deiyoknye yanamle bisik ara, kintinipnamlume. Ara ninye deiyoknye yanamle ati, bisik funguk yabuka delinamlulume. 5Mutuku dokbong-bong ak nirya ara, gon ak arye dalubuka pala kilinamlulume. Mutuku dup nirya ap, dalubuka pala kilinamlulume. Gwalin bisik nirya ara, lepsisikuka funguk yalinamlulume.#3:5 “Pung bisikuk yapdeipnin banamlulume,” nyabuka ara, dipkorop bisik yapdeipnin bana ati kum bukni, ninye sik talima kintinilina ati nyabuk. Ara, sik malye wininyak ning nirya batuka, Yesus diba tenebikirye, ‘Telebuk unamak’ tenen, adomon yupu nyabuk. Bisik mutuku lilkwa bisik nirya ara, pum uawamlya ak ara, tuku delinamlulume. Keil dula belyamlya ak nirya ara, lukuka lepsisikuka telebuk ulinamlulume. 6Amenyan ara, ninye mutuku-mutuku nirya Allah lyeplirye, ninye kanye talima pia talinamsil ning deiyoknye eipnamaka” atia.’ Yesaya arye nyabuk. (Yesaya 40:3)

7Yohanes arye, ninye mek dongolamuk talak ara, ninye sik weika arye, ‘Mek dongopnamsil’ tenen, Yohanes peterelamukak, kekelbalamik. Balamikce, sik tuba malye ulamik ninye yayikura, eibukce anang ati, ayupu nyabuk. “Anggun yu una ap, tenebuka arye, talye yupu nyabuka duknuna ap, winimunya ara, ninye si ton kwatima duknubuka mapmalya arye, si tolamla atonun ululume. Allah arye malye winin ninye wenebuka opnamle ati, ‘Opsilyak’ tenen, ‘Bik-bik abuka bilulume,’ nyabuka, laka nyapsuknye bira, yatanye birye do?

8Anggunce, ‘Nun malye wininyap ning akunum batakape,’ nyabuka, talye yupu deice arye nyapnutum bukni, yo duk moulamlya eklamle touk, dipkorop batakmunce, diksukumuk winiptumbuk, eiptinyetoura, diba tenepsitinye. Ati, anggun malye winimunye ning adiparyuk batakmunce, telebuk wininamlume.

Tonda, ‘Kume, nun apu kopropa bira, Abraham usulula ati, Allah arye kum wenepnamsile,’ tenebuka kum nyanamlulume. Aning ara, utenena meme. Allah arye, ‘Abraham el mapu na doproptinye’ tenen, teneptuopura, aubuk keil arye dobuka, Abraham el mapu kwepdeiptue. 9Yo wena deiyoknye birye, yo wepnamle ati,#3:9 Yo wena nyabuka deiyok ara, ani. Ara, malye winilamice ninye ara, Allah arye aninye ati, wenebuka opnamle talak, akunum dam upmasila ati, adomon yupu nyabuk. el ya dobuka, yo deiyok dam kintinipmale. Teleb yo duk kum moulamlye yo nirya ara, weplirye, uku dongopnamle.” Yohanes arye aninye nirya ati, adomon yupu nyabuk.

10Nyabukopura, el yupu kekenmek ninye arye tamubuka asipdeyik. “Aning ati ara, ‘Allah arye nunti, wenebuka opsulyak’ tenen, nun adiparyuk yata wiripnamap do?” nyabuka asipdeyik. 11Asipdeyikura, Yohanes arye tamubuka ayupu nyabuk. “Ongon baju bitinye uplinye bira, ongon baju pia kum uplinye biti, arepnamlule. Din ning uplinye bira, din ning pia kum uplinye biti, arepnamlule,” nyabuk. 12Tonda, amutuku talyamik deiyok nang arena ati, pajak yo bok bulubuka delin nang ton, “Nun ni peteresinanye guruo nunda, ‘Allah arye lyepsutue’ tenen, ati ara yata wiripnamap do?” nyabuka asipdeyik. 13Asipdeyikura, Yohanes arye tamubuka nyabuk. “Amutuku talina deiyok nang arye, ‘Pajak yo bok ara, winibuka dolonamlulume,’ nyalamak touk, aninguk dolonamlulume. Tonap tabakuka ubula dolona meme,” nyabuk.

14Tonda, yin talin nang arye asipdeyik. “Nunda, yata wiripnamap do?” nyabuka asipdeyik. Asipdeyikura, Yohanes arye nyabuk. “Anggun deiyok nang arye, anggun pil dona ati, dekna ning arepsikce ninguk, kanye deibuka dolonamlulume. Yuk talye urdem ninye sik ning ton dalubuka doldona meme. Tonda, sik malye kum upmakibuk, telila yupu deice ‘Anggun malye winipmalume,’ nyabuka luluna meme.” Yohanes arye ayin talin nang ati nyabuk.

15Atalak ulamik ninye nirya ara, ‘Allah arye Ninye Lyenanye, Kristus dopkwetepnamsil’ tenen, kintinipdeibuka dilamik anya arye, ‘Kristus ara, Yohanes akunum ulul do, kum do?’ tenen, teniltonauk ulamik. 16Utenebuka nyanmeka ati, Yohanes arye aninye ati nyabuk.

“Anggun malye ning nirya batakmunyeura, mek dem dongosunun bukni, nara mitik mambul tonye binya arye, aminyan talak yanamlanye deiyoknye bira, elda weik mambulnye. Nara, mambulnye kuma ati ara, pia malye piluk bukni, el sandal kulongon tapu narye kum loploptinye. Narye mek dem dongosinibuk, anggun nong nirya mek siknilamle atonunuk, aminyan yanamlanye bira, el mikip pia weike ati, elce Allah Dib Kanye arepsilyeura, anggun kanye talima nirya talinamsile. Uku arye malye ning dilolamle touk, Allah El Dib Kanye arye, anggun malye winin ning nirya dobuka donoksilirye, kum daneipnamsile.

17Yakong dipnulinye bira, yakong bama labuka uku dongoplirye, yakong nonguk dilamle atouk, Allah arye ninye nirya bokuka atonun winipnamle.#3:17 Bace bama – Allah yupu minop talak sekik ning ara, bace kum nyabik. Sikce, Gandum ning ati, domon yupu nyabik bukni, ayupu deiyok ara, atouka. Ninye arye din ning teleb ning, yo lalina deice delilamak touk, Allah arye elti, diba tenebuka teleb unyak nang ara, dobuka im deice deiplibuk, el ap neika unamake. Tonda, ninye arye din ning bama labuka uku dongolamak atonun, Allah arye malye un ninye nirya dobuka ukuak dongopnamle. Auku ara pia kum tangaproptue, pia dinamle.” Yohanes arye awekmek nang nirya ati nyabuk. 18Ayupu ap, yuk yupu ap deice arye, ‘Aninye sik malye wininyak ning batakuka, telebuk wininamak’ tenen, “Yesus ati dib tenebibyopura, elcuk nun malye ning kum daneipsilirye, lyepnamsile,” nyabuka, Allah el laka teleb yupu peterelamukura, kekelamik.

19Ara, aninye kekelamik bukni, amutuku pemerintah weik ninye deiyoknye Herodes, el malye winibuk ning ati, Yohanes arye wenebukba, Herodes arye nyapdeibukura, Yohanes tapu koubukabikce, wenena aik dongobik. Yohanes arye Herodes wenebuk ning ara deiyok ara ani. Ara Herodes el weit koprop kil Herodias, ubula dalubuka doprobukce, doprobuk ning ap, ton malye ning pia weik ulamuk ning ap ati, Yohanes arye Herodes ati wenebuk. 20Herodes ara malye winin ning weike akunum winilamukura, Yohanes wenena aik dongobuk ning ara, aning deice arye malye ning tonap tabakuka winibuk.

Yohanes arye, Yesus mek dongobuk ning ap, Yesus el yok pununa nang ap ati, nyabuk yupu

(Matius 3:13-17; Matius 1:1-7; Markus 1:9-11)

21Amutuku ninye weik arye, ‘Yohanes mek dongopnamsil’ tenen, el dam yangalamik talak ara, Yesus ton yayukura, Yohanes arye mek dongobuk. 22Mek dongobukba, lukuka tikukura, Yesus arye dinmok talak ara, adiparyuk Allah arye im deice pakibukce, Allah El Dib Kanye ara, yalma maka atonun dayukce, Yesus el nong deice bulyayuk. Bulyayukopura, Allah im deice arye ayupu nyabuk. “Anda na Mi Koprop ulyame. Narye anti pia bicoe tenekenuna anya arye, anti na kanye pia delikunune.” Allah arye Yesus ati nyabuk.

23Yesus deiyok koubuka peterepra balamuk talak ara, keting tamun yupu tonok kepdonye, taku barye akunum ubuk. Yesus el li bira, Yusuf tenelamik. Yesus el yok pununa nang si ara, ani. Yusuf el li si ara, Heli. Heli el li si ara, Matat. 24Matat el li si ara, Lewi. Lewi el li si ara, Malki. Malki el li si ara, Yanai. Yanai el li si ara, Yusuf. 25Yusuf el li si ara, Matica. Matica, el li si ara, Amos. Amos el li si ara, Nahum. Nahum el li si ara, Hesli. Hesli el li si ara, Nagai. 26Nagai el li si ara, Mahat. Mahat el li si ara, Matica. Matica el li si ara, Simei. Simei el li si ara, Yosek. Yosek el li si ara, Yoda.

27Yoda el li si ara, Yohana. Yohana el li si ara, Resa. Resa el li si ara, Zerubabel. Zerubabel el li si ara, Sealtiel. Sealtiel el li si ara, Neri. 28Neri el li si ara, Malki. Malki el li si ara, Adi. Adi el li si ara, Kosam. Kosam el li si ara, Elmadam. Elmadam el li si ara, Erya. 29Erya el li si ara, Yesua. Yesua el li si ara, Eleasar. Eleasar el li si ara, Yorim. Yorim el li si ara, Matat. Matat el li si ara, Lewi. 30Lewi el li si ara, Simeon. Simeon el li si ara, Yehuda. Yehuda el li si ara, Yusuf. Yusuf el li si ara, Yonam. Yonam el li si ara, Elyakim. 31Elyakim el li si ara, Melea. Melea el li si ara, Mina. Mina el li si ara, Matata. Matata el li si ara, Natan. Natan el li si ara, Daud.

32Daud el li si ara, Isai. Isai el li si ara, Obed. Obed el li si ara, Boas. Boas el li si ara, Salmon. Salmon el li si ara, Nahason. 33Nahason el li si ara, Aminadab. Aminadab el li si ara, Admin. Admin el li si ara, Arni. Arni el li si ara, Hesron. Hesron el li si ara, Peres. Peres el li si ara, Yehuda. 34Yehuda el li si ara, Yakup. Yakup el li si ara, Isak. Isak el li si ara, Abraham. Abraham el li si ara, Terah. Terah el li si ara, Nahor. 35Nahor el li si ara, Seruk. Seruk el li si ara, Rehu. Rehu el li si ara, Pelek. Pelek el li si ara, Eber. Eber el li si ara, Salmon.

36Salmon el li si ara, Kenan. Kenan el li si ara, Arpaksad. Arpaksad el li si ara, Sem. Sem el li si ara, Nuh. Nuh el li si ara, Lamek. 37Lamek el li si ara, Metusalah. Metusalah el li si ara, Henok. Henok el li si ara, Yared. Yared el li si ara, Mahalalel. Mahalalel el li si ara, Kenan. 38Kenan el li si ara, Enos. Enos el li si ara, Set. Set el li si ara, Adam. Adam kwepdeibuknye el si ara, Allah.

Currently Selected:

Lukas 3: EIPA

Highlight

Copy