Lukas 19

Yesus ap, Zakeus ap, epdarik yupu

1Yesus arye asing kuamuknye lapdeibukce, Yeriko mutuku asik dolamik noutamak banmok. 2Yeriko mutuku banmok talak ara, tonoknye el si ara, Zakeus elce amutuku talyamik nang Roma mutuku nang ati, pajak yo bok bulubuka delina deiyoknye ulamuka ati ara, pia bona weik talinanye ulamuk.#19:2 Pajak delin nang – Roma mutuku nang arye, Yudea mutuku nirya talyamika ati, sikce nyapdeibikba, amutuku noutamak ulamik nang arye, sik Roma mutuku deiyok nang ati, yo bok talya arilamik. Sik arilamik yo bok ara, pajak nyalamik. Yudea tam ninye arye, pajak yo bok arilamikba, ayo bok bulubuka delina deiyok nang arye, ayo bok bulubuka, Roma deiyok nang ati, arilamik bukni, sik bidam kanye arye, ‘Yo bok ton tabakuka arepsululume,’ nyabuka, ubula dololamik. Ati ara, ubula dololamikce, bona weik nang ulamik. Ati ara, amutuku noutam ulamik ninye nirya arye, sik pajak yo bok dololamik nang ati, ‘Anang ara, nun pia like,’ tenelamik. 3Yesus yanganmok talak ara, Zakeus kekebukce, ‘Na ton eipnune,’ tenebukura, tikuka dipdeyukce, Yesus ap melibuka yanganmek nang ara, ninye weik langdipdanmek ati, kum eipmanto ubuk. El Zakeus ara, pia bumang anyapce, anang deice kum eipmanto ubuk.

4Kum eipmanto ubuk ati, Zakeus minopce menekuka bik-bik abuka biyukce, ‘Yesus eiptinye’ tenen, yo dup welebuka tikukce, Yesus yanuyuk bisik ati dinmok. 5Dinmok talak ara, Yesus banmoka ani, Zakeus welepmok yo deiyok dam biyukopura, erebuka yo dup eidipdeyukce, “Zakeus eitikmokak eibukura, Zakeus anda adiparyuk kolukuka yalyame. Kolukuka yaminyeura, an ap, na ap an aik mapnamaname,” nyabuk. 6Nyabukura, Zakeus kekebukce, adiparyuk kouluka yayukopura, Yesus ati kanye deibuka, el aik birik.

7Sik bitinye nang neik aik birikopura, abisik banmek nang nirya eibikce, yuprobik akarye ayupu nyanmek. “Anango, Yesus ap, apia malinye ap, birak ara, yata ati do?” nyanmek. 8‘Anye bira, pia malinye aik binmale’ tenen, nyanmekura, Yesus ap, Zakeus ap, aik birikopura, Zakeus arye Yesus ati ayupu nyabuk. “Se naio, na pia malye ulamse ning ara akunum batakne. Wini talak ara, na talinye ning nirya bokuka noutam dopdopnirye, talye bona utotoa talina kum ninye ati arenamne.

Tonda, yuk nang yo bok ubula dololamse, atonun kume, tonap tabakuka arenamne. Ati, tonok dopromsinye bira, dumbarye arepnamne. Dumbarye dopromsinye bira, takudekin 16 arepnamne. Aning atonun, na ubula dopropse atonun, sik yo bok dololamse nang nirya ati, tabakuka yo bok empat kali arye tamubuka arepnamne.” Zakeus arye Yesus ati nyabuk.

9Nyabukopura, Yesus arye Zakeus ati nyabuk. “An apu kopropa Abraham arye, Allah yupu kekelamuk touk, arup ara na yupu kekebuka diba tenepmanilama ati ara, arup ara an malye winiminye ning nirya, Allah arye kum danipkilarye, akunum lyepkile. 10Nara, Ninye Mi Koprop Atonunye birye, ‘Allah diba tenena kum nang ati, eibuka lyepnamne’ tenen, na yase. Aning ati ara, arup ara Allah arye anti akunum lyepkile,” Yesus arye nyabuk.

Winipmanto yupu deice arye, “Tonok deiyoknye bira, el pil dolamik nang ati, yo bok weik aribuke,” nyabuk yupu

11Yesus aunmok talakuk, Yerusalem mutuku dam binmoka anya arye, el yupu kekenmek nang nirya arye, Allah aning-aning nirya malye kibuka taliplirye, ‘Israel ninye nun weik ninye deiyoknye upnamsil’ tenen, ‘Talinamle talak adiparyuk upnusile, akunum dam uple,’ tenenmek. Utenenmeka ak bikuk ati, Yesus arye winipmanto yupu ton dukdongobuka nyabuk.

12Tonok talak ara, ninye yala deiyoknye, el amu tam tuba ulamuk talak ara, utenebuk. ‘Yuk karin mutuku binyopura, omutuku ninye arye, ‘Nun raja unamsil’ tenen nati, ninye deiyoknye una ati, erepdeipniceura, tamubuka na mutuku yanirye Raja unamne,’ tenebuk. Utenebukce, el pil melin nang nirya ati yukubuk. 13Yukubuka ati yayikopura, el pil melina nang taku barye nang ati, weik yo bok talen ning#19:13a Weik yo bok aribuka deiyok ara, ani. Ayo bok tonok aribuk ning ara, wala winilye (3) deice pil dobikirye, dolamaka atonun aribuk. Ati, 10 kibuka aribuk ning ara, yupa weik, wala 30 bulan deice pil doptingura, gaji yo bok doproptinga atonun aribuk. Ayo bok ara, dekna pia weik atia. taku barye (10) yuk-yuk aribuk. Aribukura, sik tonok-tonok arye weik yo bok tonok#19:13b weik yo bok tonok – Ayo bok tonok aribuk ning ara, wala winilye deice pil dobikirye, dololamaka atonun 10 kibuka aribuk. doprobik. Aweik yo bok taku barye (10) kibuka sik yuk-yuk aribukce, ayupu nyabuk. “Na yuk mutuku binamne talak ara, ayo bok deice arye, pil donamlume,” nyabuk. Nyabukce biyuk.

14Bisik banmok talak ara, el amu tam ulamik nang, yuk talya nang arye, ninye wibuka deibikura, aRaja unamuknye biti laka nyalbiyik. “An Raja una ati, erepdeipnukiyak bukni, ‘Anda nun weik ninye deiyoknye Raja unamsilama ara, nun like,’ nyalyanmakiyabe,” nyabik. 15Nyabikura, bisik yanganmoknye bira, akaren mutuku akunum yayukopura, amutuku ninye arye anye dobuka weik ninye deiyoknye, Raja una ati, erepdeibikura, Raja kibuk. Raja una ati erepdeibikura, anye bira el mutuku kopropa tamubuka biyuk. Biyukopura, el weik yo bok aribinamukura, pil dolamik nang ati yukubuk. Ara, na aribinamsiseura, ‘Pil dopluma deice arye, yo bok ton tabakuka deipnamnulume,’ nyamse touk, ‘Upmaniyak do?’ tenen, asipdeyuk.

16Asipdeyuk talak ara, minopce yayuknye birye ayupu nyabuk. “Naio, ance weik yo bok tonok areamnulum ak, pil dolamsa deice arye, taku barye ton tabakuka deipmakine,” nyabuk. 17Nyabukura, aweik ninye deiyoknye birye el pil donanye biti, tamubuka nyabuk. “Anda, pil pia teleb ubuka dopnulume. Mitik anunuk areamkisibuk, pil merekuka dolamnuluma ati, wini talak ara, weik asik 10 dokcak talibuka weik deiyoknye unamlame,” nyabuk.

18Bitinye anye yayukura, aweik deiyoknye birye, atonun asipdeyuk. Asipdeyukura, bitinye anye birye ayupu nyabuk. “Naio, ance weik yo bok tonok areamnulum ak, pil dolamsa deice arye, weik yo bok 5 tonap tabakuka deipmakine,” nyabuk. 19Nyabukura, aweik ninye deiyoknye birye, apil donanye ati, tamubuka nyabuk. “Aning ati ara, wini talak ara, weik asik 5 dokcak talibuka weik deiyoknye unamlame,” nyabuk.

20Amenyan ara, yuk pil donanye yayukce ayupu nyabuk. “Kume, naio, an weik yo bok tonok areamnulum touk, tamubuka yana deipkine. Aripnulumura, adiparyuk cang kain arye kitibuka moubuka deiamse touk, tamubuka tonok ninguk boyakine. 21Winyamsa ara, laka nyapnukine.

Ara, anda, yu weiknye ati, na ilil upnukura, talye moubuka deiamse. Anda moubuka kum deiplum ning bukni, talye lukdanuka dolonauk ulyame. Tonda, ance kum kouamlum ning bukni, anda talya libuka dilyama ati, ‘Na deiyoknye birye wenepnilyak’ tenen, ilil upnuk ati, an yo bok tonok kitibuka tenepce deipse,” nyabuk.

22Apil donanye birye nyabukura, aweik deiyoknye birye anyanmuknye biti, tamubuka nyabuk. “Anyapmanilama ati, an nyapmanilam yupu deice arye yupu bokeipnukine. Ance nati, ‘Elda yunye ulirye, moubuka minop deibuk ning ara, talye lukdanuka dololule. Tonda el minop koubuk ning ara, talye lukdanuka libuka dilule,’ nyanmanilame. 23Aning ara, akunum kel kipnuluma ati, na weik yo bok areamkisibuk, pil teleb ubuka dona kum arye, ton tabakuka kum deipmanilama ara, yata ati do?” nyabuk.

24Nyabukopura, el dam tikinmek nang ati, ayupu nyabuk. “Anye bira arepse yo bok, tonok weik yo bok ara, dopropmunce, arup weik yo bok 10 arepmanilanye binyak arilbilulume,” nyabuk. 25Nyabukura, ayupu kekenmek nang arye tamubuka nyabik. “Winipnuyap bukni, anyapmasilamnye bira, weik yo bok 10 akunum upmala ati, yata ati do?” nyabuka asipdeyik. 26Asipdeyikura, aweik ninye deiyoknye birye tamubuka nyabuk.

“Na dipkoprop nyapsine. Yata nang do nirya, aning weik anun uplinye bira, Allah arye weika arye tonap areplibuk pia weik upnamle. Bukni, aning mitik anunuk uplinye bira, Allah arye el mitik anun wamlye ning babye, doproplyeura, talye nong dem unamle. 27Bukni, ‘Anye bira, nun weik ninye deiyoknye Raja kum unamsile,’ tenepnikce, ‘Anye bira, nun like,’ tenelamnik nang ara, na dam boyanumunce, oplopmunyopura eipnune. Aninye deiyoknye birye el pil don nang ati nyabuk.” Yesus arye nyabuk. Yesus arye awinipmanto yupu nyabukura, el ap unmek nang arye kekebik.

Yesus arye, Yerusalem asik dolamikak, wekuk yupu

28Yesus arye, ayupu nyabukopura, Yeriko mutuku batakuka ‘Yerusalem mutuku binamap’ tenen, Yesus ap, el mapu ap, bisik mapnin balamik. 29Bisik mapranin balamika ani, asik dolamik asik si ara, Betania asik ap, Betfage asik ap mapnin balamika, an ni Zaitun mutuku dup welepnuyik talak ara, el mapu bitinye nang ati nyabuk.

30“Ortam mutuku birumunce, asik dolamikcak anyuk birumunye talak ara, keledai basam mitik ning kirikdeipmacak eipdumunyeura, tapu kirikdongomica ara lobuka, el ngang kirikuka boyanururume. Amitik keledai basam ara, ninye bukuka kum balamikirye, anyuk weilamice keledai basam dobuka boyanururume. 31Winirumunya ak, yuk nang eipsikirye, ‘Yata ati wininmarum do?’ nyabuka asipdesicopura, anggunce tamubuka nyapnamrurume. ‘Nun ni Yesus patapmala ati, bobiname,’ nyapnamrurume,” Yesus arye abitinye nang ati nyabuk.

32Nyabukura, asik dolamik noutam birikce, Yesus arye, “Winipnamale, aning eipnamarurume,” nyapmok touk anirya winibuk. 33Mitik keledai basam kirikdeipmeka eprikce, binuka lolorikura, akeledai basam deiyok nang arye nyabik. “Amitik keledai basam lolonmaruma ara, yata ati do?” nyabuka asipdeyik. 34Asipdeyikura, sikce “Nun ni kopropa Yesus patapmala atia,” nyaprik. Nyaprika ati, atikmek nang arye mangkau kibukikura, sikce lobuka bobirik.

35Lobuka bobanmarika ani, Yesus dam bobirikura, sik nong deice ongon baju kwiribuka, keledai basam balye deice yangabuka deibikura, Yesus adeice bukukopura bobiyuk. 36Yesus ara, Yerusalem mutuku bisik keledai deice bukuka banmokura, ton nang ara, ‘Yesus si erepnuyap’ tenen, sik deice tam ongon baju kwiribuka, Yesus yanibuka yanamukak, yangabuka delinmek. 37Yesus bisik banmoka ani, Zaitun mutuku kolukuka bana ati, bisik bokolanak biyuk talak ara, Yesus ati diba tenebikce, melibuka banmek nang nirya ara, Yesus arye ninye winipman kumto pil, weik dolamukura, elilamika ati, kanye deibuka, Allah si erenmekce, ‘Yesus ara, nun weik ninye deiyoknye Raja kipnamsil’ tenen, ayupu weik arye nyanmek. Ara, Allah yupu laka nyalamik nang, nabi nang minop arye sekamik yupu, dobuka nyapra banmekce, weik yupu nyanmek. Nyanmek yupu ara, ani.

38“Allah el mikip ap, el si ap deice arye yanmalanye, ninye deiyoknye bira, Allah weik arye meliplibuk, telebuk unamle.#19:38 Ayupu ara Mazmur 118:26 aupmale. Anye bira weik mambulnye binya arye, ‘Im deice ara, Allah ati si erena ap, pia teleb una ap, dirina weik ulina ap, unamle’ tenen, Allah moropmabe,” nyabuka weik arye nyanmek.

39Ayupu nyanmekura, sik Farisi nang kekebikce, Yesus ati ayupu nyabik. “Ance an ap melibuka yanganmak nang ara ayupu nyanmak ati, weneplyame,” nyabik. 40Nyabikura, Yesus arye aFarisi nang ati tamubuka nyabuk. “Ayanganmak nang arye tunim abicopura, talye aupmal keil ara yupu weik arye nyapnamake,” nyabuk. 41Yesus arye ayupu nyabukce, bisik banmoka ani, Yerusalem mutuku asik dolamik dam biyukopura, amutuku dipdeyukce, bico ubuk ati, engenmok deice arye ayupu nyabuk.

42“Se, anggun Yerusalem mutuku noutam ululum nango, Allah ap, ninye ap neika una ati, ninye lyebuka teleb updeipmanto ning diba tenebuka kel kipmatumtoura, Allah arye akunum lyepsutubuk, anggunda, kel bikmanto kum nang ululume. Anggunce Allah ati, bataklum ati, Allah arye, ‘Anang kel bikicak’ tenen, adeiyok ning akunum dungnupmasila ati, ninye lyena deiyok ning kel kum bikmalume.

43Anggunda bicoe, aminyan talak ara, anggun olyanamsiak nang arye, anggun asik noutamak doplumce, dana-dana doplum poka ara, apoka buru tam arye, yo ap, keil ap, tuku ap, deipnin yanganmaca ani, poka deice tam uplyopura, poka kaplibuka aik pum wekikirye opnamsiake. Danatam babye, dana tam babye, kalikuka unamaka ati, anggunce yukak kum binmanto ubnaluma ati, anggun olan nang arye oplopnamsiake.

44Anggun opnamsiak talak ara, anggun wisi ninye ap, anggun mapu nirya ap, yan bulbul talibuka tuku deice pouklopsiceura, gisok cobuka kwisi yunga lubuka binamle. Tonda anggun asik dolamlum keil nirya ara, uluplobiceura, yuk-yuk dabindaknamle. Tonok babye, ton nirya pia kum upnamle. Ara ‘Allah arye aninye lyepnamne’ tenen, lo areamsuk talak ara, kel bikna kumce talya ululuma ati nyapsine,” Yesus arye Yerusalem ninye ati nyabuk.

Yahudi yala nang, Allah ati arilbalamikce, el si erelamik aik pum bisik, Yesus arye winibuk yupu

45Amenyan ara, Yesus arye Yahudi yala nang Allah ati arilbalamikce el si erelamik aik dam biyuk. Tikilbiyukce, Yahudi yala nang, ‘Nun malye unyap ning Allah kum daneipsilirye, lyepnamsile’ tenen, kam ning obuka Allah arilamik ning, ining ning dekenmek nang ati, Yesus wabukce yakuka buru tam dopkwetebuk. 46Wininmok talak ara, aunmek nang ati, ayupu nirya peterenmok. Allah arye nyapdeibukura, nabi Yesaya arye sekiamuk yupu ara kum tenelulum do? Ayupu ara ani.

‘Allah arye, na aik ati, “Ninye mutuku-mutuku nirya Allah ati moronyak aik atia,” nyanamake, nyabuk.’ (Yesaya 56:7)

Tonda, Yesus arye ayupu nyabuk. “Allah arye nyapdeibukura, Yesaya arye, anyapmasin yupu sekamuk bukni, ayupu ton aubuke.

‘Allah arye, na aik bukni, anggunda, ubula nang arye ubula dobuka dungnulamak aik atonun, akunum updeipmalume.’ (Yeremia 7:3)

Nabi Yeremia arye nyamuk yupu dobuka nyapsine,” Yesus arye nyabuk.

47Yesus asum arye deiyok koubukce, dosum nirya ara, Allah ati arilbalamikce el si erelamik aik dam ulamukce, Allah yupu peterelamuk. Peterelamuk bukni, Allah arye, ‘Aning wininamlulume, aning ara kum wininamlulume,’ nyapdeibukba, Musa sekamuk yupu, peterena deiyok nang ap, Allah arena ati, weik deiyok nang ap, yuk talye weik deiyok nang ap arye, Yesus winilamuk ning ati, elilamikce, yu weik ubukura, ‘Dan talak arye Yesus ati oploptibye do?’ tenen, yupu sisiklamikce pirildelamik. 48Pirildelamik bukni, atalak ara Yesus nyanmoka, kekenmek ninye nirya arye, el yupu moubuka kekenmekce, Yesus ati, pia kanye deipmeka ati ara, amalye nang arye Yesus opmanto kum ulamik.

Currently Selected:

Lukas 19: EIPA

Highlight

Copy