Lukas 18

Tonok youwak kil arye batakna kumce, Allah ati pia morolamuk yupu

1Yesus arye, ‘Na mapu ara, batakna kum arye Allah moronauk unamak,’ tenebukce, ‘Winipmanto yupu nyapnyeura, kel biknamak,’ tenebuk ati, ayupu nyabuk.

2Tonok asik dolamik noutam ninye yupu bokolina deiyoknye ulamuk. Anye bira, Allah dib kum tenyamuka anya arye, Allah el si kum erelamuk. Tonda yuk nang ati, bico pia kum tenelamuk. 3Aning winilamukura, anyasik noutam ara, youwak kil tonok ulamukce, ayupu bokolinanye ati, pia morolyangalamukce, ayupu nyalamuk. “Yuknye birye, malye ubuka deipnuka ati, ance yupu lipsisikuka bokeipnutume,” nyabuka tuba-tuba morolyangalamuk.

4-5Asum-asum nirya ayupu uk nyabuka morolyangalamukura, ayupu bokolinanye birye, “An yupu kum bokeipnukine,” nyabuka batakalongolamuk. Winilamukura, sirya ara, anye birye nyabuk. “Allah diba kum tenenirye, yuk nang ati bico kum tenenun bukni, ayouwak kil batakna kum arye, pia tuba-tuba morolyanganauk unilya ati, elti, yupu lipsisikuka bokeipnamne. Elda pia morolyanganauk unilyebuk, lik unilya ati, winira el yupu bokeipnamne,” nyabuk.

6Yesus arye winipmanto yupu nyabukopura, ayupu tonap dukdongobuka nyabuk.

“Ayupu bokolina deiyoknye diksukum kum ulamuk bukni, sirya talak nyabuk ning ara, moubuka tenenamlulume. 7Allah arye wibuka deiamuk ninye ati, yuk nang arye, sik nong deice ikin ning weik delilamikceura, sik yu nang ati, Allah el mapu arye, ‘Nun ni Allah arye, yupu lipsisikuka bokeipsilirye, telebuk keipnamsile’ tenen, keting noutam babye, lukunyan babye, tuba-tuba moronauk unyake. Allah el mapu arye wininyaka ati ara, Allah arye sik pirinamle do?

8Kume, na dipkoprop nyapsine. Allah arye el mapu, anggun ikin upsilye ning ati, minopce yupu bokeiplirye, teleb updeipnamle. Allah arye wininamlebuk, nara, Ninye Mi Koprop Atonunye tukwak mutuku tamubuka yanamne talak ara, Allah ati diba tenenyak nang tuba aunmakibuk, eipnamne do? Ikin ati batakiceura, diba tenen nang kum dacak eipnamne do?” Yesus arye nyabuk.

Allah arye, ton ninye ereipnamle, ton ninye ara, lungnupdeipnamle ati, nyabuk yupu

9Tonda, Yesus arye el yupu kekenmek nang ati, ayupu nyabuk. “Ton nang ara, sik kanye talima ak malye ning aupmalibuk, sikce sik bidamnang ati, nunda pia telebuk unyabe. ‘Nunda pia teleb nang bukni, yuk ninye nirya ara, malye nanguk unyake’ tenen, unyake. ‘Unyak nang ara, sik wininyak ning kel kipnulum’ tenen, winipmanto yupu nyapnusine,” Yesus arye, el mapu ati nyabuk. Nyabukce ayupu ton nyabuk.

10Tonok talak ara, ninye bitinye, tonye bira, Farisinye ulamuk. Tonye bira, amutuku talinyak deiyok nang, Roma mutuku nang arena ati, pajak yo bok bulubuka delinanye, malye winina weiknye winilamuk. Tonok talak aryuk, sik yuk-yuk buk, sik bitinye Yahudi yala ninye arye, ‘Allah el si erena ati, moropnunam’ tenen, Yahudi nang nirya, Allah ati arilbalamikce, el si erelbalamik aik birik. Birikce, sik yuk-yuk Allah moronmarik talak arye winibuka nyaprik.

11Birikce, Farisinye tikukce, Allah moronmok noutam arye, elce winilamuk ning atibuk ayupu nyabuk.

“Na ni Allah, yuk ninye nirya malye ulamak touk kum wininune ati, teleb nyapkine. Anang ara, wininyake. Ton ning ara, ‘Weika arye dopropnamap’ tenen, yuk nang tia aryamice, ato kum bukni, weik tonap tabakuka tamudolonyak nang unyake. Ton ning ara, pia malye-malye wininyak nang ap, sik domik kilapu kum bukni, talye kilapu yona nang ap unyake. Sik wininyak atonun kum wininune. Tonda, otikmalnye yo bok boyangace buk, ubula dololamle atonun, nara kum wininune.

12Nara, an si erena ati, minggu tonok noutamak, liki bitinye sum deice arye, din ning dini kumce si tebuka, nai Allah anti morokunune. Tonda, na dololamne ning nirya bokuka, anti tuba seper sepuluh#18:12 Seper sepuluh nyabuk ning ara, seratus ribu (100.000) uaptopura, sepuluh ribu (10.000) areptue. Sepuluh ribu uk (10.000) waptopura, seribu (1.000) areptue. arikunune. Ara, yata ning do, nirya, sepuluh dopdopnyopura, tonok bokuka arikunune,” Farisinye birye, Allah ati nyabuka morobuk.

13Farisinye birye nyabuka morobukura, ‘Amutuku talina deiyok nang arepnamne’ tenen, pajak yo bok bulubuka delinanye birye, mitikto yukak tikukce, ‘Nara, pia malinye’ tenen, mambul kanye bobuka, ‘Allah ulyak kum elinune’ tenen, gisok talipdanuka amnyok dunupdongobuka, Allah morobukce nyabuk. “Se, nai Allah, nara pia malinye ununa ati ara, bita opnutum bukni, ‘Bico tenepnulumce bataknulumce, lyepnutum’ tenen, moropkine,” nyabuka Allah morobuke. Yesus arye nyabuk.

14Nyabukopura, ayupu tonap dukdongobuka nyabuk. “Ara na dipkoprop nyapsine. Allah arye pajak ayo bok bulubuka delina deiyoknye ati, el malye winin ning kum danibukce lyebuke. Allah arye tenebuk ning ara, anye bira akunum lyepnyeura, teleb upnamle, tenebuk. Bukni, Farisinye ati ning ara, Allah arye kum lyebuk. Allah arye tenebuk ning ara, ‘Anye bira, nara telebnye, tenebuka ati, kum lyepnamne,’ tenebuk. Aning ara, talye ati kume. Yata ninye do nirya, sikce sik bidamang ati, kanye erebuka unyak nang ara, Allah arye anang ara, amuak du deipnamle. Bukni, sik kanye talima lamapdongobuka amuak unyak nang ara, Allah arye ereipnamle.” Yesus arye, el yupu kekenmek nang ati nyabuk.

Yesus arye, el mapu koprop ati, nyabuk yupu

15Yuk talak ara, ‘Yesus el taruk sik nong deice deiplirye, teleb updeipnamle’ tenen, sik ni yape ap, sik nin yape ap, sik mitik mapu weika arye Yesus dam boyayik. Boyanganmekura, Yesus arye wipdeibukura, el yupu kekebuka melibuka balamik nang arye, amapu sik ni yape ap, sik nin yapu ap ati, “Mapu boyangana bataklulume,” nyabuka, yupu sekenmek. 16Yupu sekenmek bukni, Yesus el mapu ati wabukce, ayupu nyabuk.

“Mitik mapu ara, na dam yanganmaka ara, telebe. Sik amapu ati yupu sekenmaluma ara, meme. Allah lyeplirye, talibuka, Allah el mapu unamak nang ara, amitik mapu atonun unyak nanguk, Allah el mapu kipnamake. 17Na dipkoprop nyapsine. Amapu arye talye lukdanuka diba tenebuka unyak touk kum unyak nang ara, Allah diba kum teneptinga ati, Allah ninye lyeplirye, kanye talima talisilya ara, kum dolonamake. Ato ninye ara, Allah arye kum dopdopnamle anya arye kum lyeplyeura, sikda im deice kum weknamake,” Yesus arye nyabuk.

Bona weik talinanye tonok, Yesus dam yayukce, nyabuk yupu

18Yesus arye amapu ati, Allah akunum morobukopura, sakwetebuka bayuka ani, tonok bona talinanye birye Yesus ati asipdeyuk. “Naio, anda, peterena telebnye ulyama ati ara, yata teleb pil doptinyeba, Allah lyepnutu deice arye, bol koplobuka pia kam una deiyok ning doproptinye do?” nyabuka asipdeyuk.

19Asipdeyukura, Yesus arye tamubuka nyabuk. “Mutuku sirya, im sirya nirya unyak ninye ara, tonok nang babye, teleb nang ton kum unyake. Allah el tonokuk telebnye ulula ati ara, yata ati, ‘Telebnye,’ nyapmanilam do? 20Allah arye, ‘Winipnamlulume, anye kum winipnamlulume,’ nyapdeibukura, Musa arye sekamuk yupu noutamak, mem yupu ubuk ning ara, anda akunum kel kilyame.

‘Ara, kil talye-talye yona meme. Ninye talye oltakana meme. Ubula dolona meme. Yuk nang ati, ubula kisina meme. Anggun ni yapu ap, anggun nin yapu ap ati, bico tenebuka kinamlulume,’ nyabuka sekeiyamsuke. Musa arye sekamsuk yupu#18:20 Musa arye sekamsuk yupu – Ayupu ara, Ulangan 5:16-20; Keluaran 20:12-16 daupmale. ara nyapkine,” Yesus arye bona weik talinanye biti nyabuk. 21Nyabukura, bona weik talinanye birye tamubuka nyabuk. “Naio, an nyapmanilam yupu ara, na mitik talak arye kekelamsirye winilamse,” nyabuk.

22Nyabukura, Yesus arye anye biti tamubuka nyabuk. “Aning ati ara, ‘Diksukumuk utinye’ tenen, patapkilyopura, narye nyapnukin ning, bataklum ning ara, winipnululume. Talyamlum ning dekuka bona utotoa talina kumnye arepminyopura, Allah arye teleb ning, im deice deipkilyeura, binuka dopdopnalame. Bona utotoa talina kumnye akunum arepminyopura, na yupu kekebuka dobolyanganamlyame,” Yesus arye nyabuk.

23Yesus arye ayupu nyabukopura, bona weik talinanye urasin yuprobukce, malye kanye bobuka, dei amua langapdongobuk. Anye bira, aning-aning weika arye talyamuknye binya arye, ‘Anyapnil ning ara kum winiptinye’ tenen, malye kanye bobuka dei amua langapdongobuk. 24Winibukopura, Yesus arye anye binyak dipdeyukce, ayupu nyabuk. “Allah arye ninye weik lyeplirye, sik kanye talima taliplirye, nyaplyeura, el amuak bukuka unamak nirya ara, bona weik talin ninye ara, ikin uplibuk, kanye imun aryuk kekenyake. Ara, bona weik talin nang arye, sik talinyak ning deice, sik kanye delinyaka atia.” Yesus arye nyabuk.

25Nyabukce, ayupu ton dukdongobuka nyabuk. “Ara, winipmanto yupu nyapnune. Unta basam ara, nong weik basam bukni, weik unta basam ara, ongon baju wilamak yumce pum wekena ara, kanam aryuk wektue. Bukni Allah arye ninye lyeplirye, sik kanye ap, talima ap, taliplirye, nyapdeiplibuk, el mapu wininamak nirya ara, bona weik talin nang ara, kanam aryuk kekebuka kum dobolbitinge.

Ikin kanye bobuka unyaka deice arye, Allah el mapu ubikirye, im deice banamake. ‘Ara, bona weik talin nang arye, sik talinyak ning ati, nun bona ara, pia teleb ning ati, mambul ning’ tenen, aning deice sik kanye delinyaka atia,” Yesus arye nyabuk.

26Nyabukopura, Yesus el yupu kekenmek nang arye, ‘Se,’ tenebuka, Yesus ati asipdeyik. “Aning ati ara, Allah arye yatato ninye lyepnamle do?” nyabuka asipdeyik. 27Asipdeyik ati, Yesus arye tamubuka nyabuk. “Ninye mikip deice arye, ninye kum lyepdatinge. Bukni, ninye arye kum winipmanto ning nirya ara, Allah elcuk, kanam arye winilule. Ati Allah arye lyepnamle ninye ara, kanam aryuk lyepnamle ati, ikin kum uptue.

Aning-aning nirya, Allah el mikip deice aryuk kanamuk winilule. Ikine kum uptue,” Yesus arye nyabuk. 28Nyabukura, Peterus arye tamubuka nyabuk. “Naio, an melina ati, nun talyamubu ning nirya batakuburye, an yupu kekebuka dobolyangakinyabe,” nyabuk.

29Nyabukura, Yesus arye el wipdeiamuk nang nirya ati, nyabuk. “Na dipkoprop nyapsine. Yatanye do, yata kil do? Allah arye sik lyebuka sik kanye talima talibuka, Allah el bisik dobolbana ati, sik min arye talilamice ning batakikirye, na yupu kekebuka, na balye tam dobolyangalamice ninye ara, sikce batakice ning atonun ning yupa weik, atalak noutamuk dolonamake. 30Ara, sik ulamice mutuku ap, sik aik ap, sik weit yapu ap, sik du yapu ap, sik nin yapu ap, sik ni yapu ap, sik bidamang mapu ap, anirya bataklamik ning ati ara, atalak noutamuk aning atonun ning, yupa weik dolonamake. Tonda, aminyan yanamle talak ara, kam pia un ning doprobikirye, pia kam unamake, nyapsine,” Yesus arye nyabuk.

Malye winin nang arye, Yesus opnamika ati, Yesus arye, laka nyabuk yupu

31Amenyan ara, Yerusalem mutuku binameka ati, yuk nang ara batakukabukce, elce wibuka deiamuk nang, obarye 12 nanguk dobuka, yukak biyukce ayupu laka nyabuk. Ara, aminyan winipnamik ati, laka nyabuk. “Nun nirya Yerusalem mutuku welebibyopura, nara Ninye Mi Koprop Atonunye ati, Allah yupu laka nyalamik nang, nabi-nabi nang arye nyalamnik touk winipnamniyake.

32Na yukubuka bobinicopura, Allah arena ati deiyok nang ap, Musa sekamuk yupu peterena deiyok nang ap arye, ‘Opsululume,’ nyabuka, Yahudi yala kum nang amutuku talina ninye deiyok nang ati arepnamniake. Aripnicopura, nong bol deice nalibuka lyek-lyek ana ap, si maka tuluna ap, kama nong deice ona ap, winipnikirye, na nong dobuka wanwanun yo deice arye opnamniyake.

33Opnicopura, dipmanya ani, like winilye sum akunum upnyopura, na Ninye Mi Koprop Atonunye birye, tamubuka kam buknamne,” Yesus arye nyabuk. 34Yesus arye nyabuk bukni, el mapu obarye 12 nang ara, bita kum kekebik. Ara, Allah arye Yesus nyanmok yupu duknubuka ati, Yesus ayupu nyanmok talak ara, ‘Deiyok ani,’ kum tenebik.

Yesus arye, asing kuamuknye, lapdeibuk yupu

35Yesus arye nyabukura, sik nirya amutuku batakuka, bisik mapnin balamika ani, Yeriko mutuku asik dolamik dam, Yesus ap, yuk ninye yupa weik ap, banmek. Banmeka ani, asing kuamuknye, sik banmek bisik lilun ulamuk. Ulamukce, abisik banmek nang ati, ‘Yo bok talye ton arenamiyak’ tenen, moronmok. 36El aulamukce moronmok talak ara, Yesus ap, banmek nang ara, ninye yupa weik banmeka ati ara, lelim kekebukce, ‘Yata ning ati, banmak do?’ tenebukce, asipdeyuk. 37Asipdeyukura, yuk nang arye, “Yesus Nasaret mutukunye yanganmale,” nyabik.

38Nyabikura, kekebukce, weik yupu arye nyanmok. “Yesuso, anda Raja Daud el yala nang arye deipkiknye#18:38 Daud yala nang arye deipkik – Asing kuamuknye birye, ‘Daud yala nang arye, deipkiknye’ nyabuknye ning ara, urdem ati kum nyabuke. Sik Yahudi yala nang arye, ‘Aminyan talak, Daud yalanye, nun Lyena Deiyoknye yanuka unamsile,’ tenelamika ati, anye birye, Yesus ati diba tenebukce, ayupu nyabuk. ati ara, na bico tenebuka melipnilyame,” nyabuka moronmok. 39Nyabuka moronmoka ani, sik menekuka banmek nang arye, “Moronmalama ara meme,” nyabuka yupu sekik. Yupu sekik bukni, ‘Elce Yesus arye kekepnunil’ tenen, weik arye tonap, ngalukukce ayupu nyanmok. “Anda Daud yala nang arye deipkiknye birye, nati bico tenebuka melipnilyame,” nyabuka weik arye moronmok.

40Moronmokura, Yesus banmoka ani, kekebukopura, abinuka tikukce, aunmek nang ati, “Anye bira dobuka na dam boyalulume,” nyabukura, boyayik. Boyayikopura, asing kuamuknye biti, ayupu nyabuk. 41“Anda, ‘Yata wiripdeipnutu’ tenen, patapmakil ati, moronmanilam do?” nyabuk. Nyabukura, asing kuamuknye birye tamubuka nyabuk. “Naio, na asing arye aning-aning elina ati, ‘Kwetepnutum’ tenen, patanmanil ati moronmakine,” nyabuk.

42Nyabukura, Yesus arye anye biti, ayupu nyabuk. “Ance nati, diba tenepmanilama deice arye, an asing lapdeipkine,” nyabuk. 43Yesus arye ayupu nyabukura, atalak aryuk, el asing teleb ubukura, aning-aning nirya eibukce, Yesus bisik banmok ati, anye birye aminyan banmokce, “Allah ara pia teleb,” nyabuka Allah si erenmok. Yesus arye anye bira el asing lapdeibuk ati, el ap banmek nang nirya eibikce, sik babye, “Allah el pia teleb”, nyabuka el si erenmek.

Currently Selected:

Lukas 18: EIPA

Highlight

Copy