Lukas 17

Yesus arye, el mapu obarye 12 nang ati, nyabuk yupu

1Yesus arye el mapu obarye 12 nang ati ayupu nyabuk.

Yata ning do malye upsilyeura, Allah el yupu dib tenebuka dobolbalulum ning ara, yaniltalulum akarye malye unamlume. Ayupu malye ulina deiyok ning ara, pia tuba unamle bukni, malye una deiyok ulilamsiyak nang ara, sik pia kanye imun upnamle. Anang ara, Allah weik arye wenepnamla atia. 2Yata nang do nirya, sik malye ulamice deice arye, yuk ninye ton eibikirye, ‘Sik unyak atonun nun babye, ton winipnuyabe’ tenen, malye ubicopura, sik malye una deiyok nang sik wenena ati ning ara, winipmanto ning nyapnusine. Kanam ning ara ani. Ara minop malye ulamika deiyoknye bira, weik keil arye, el ngang kirikuka, laut mekwen noutam dongoptingura, mekwen diptue. Aning ara, mitik ikin bukni, amalye una deiyok nang ara sik malye unyaka ara, yuk nang ati, malye ulinyaka anyapce yuk nang ababye, malye unyak anya arye Allah arye, amalye una deiyok ninye weik arye wenepnamla ara, aning ara ikin pia weik upnamle.

3-4Aning ati ara, anggun winin ning ara moubuka tenenamlulume. Yuk nang arye malye ubicopura, “Anggunce malye upmalume,” nyabuka wenepmunye bukni, wenepmunyeura, malye unanye el malye winilamlye ning bataklyopura, anggunce el malye winipmalye ning ati, tuba tenena kumce, talya mangkau kibuka unamlume. Tonda, asum bukni, amalye unanye birye anggunti, like tekbarye deice arye malye upmasilye bukni, anggun dam yalirye, “Na malye winipmasin ning ati ara, ‘Duplye’ tenen batakanamnelume,” nyabuka laka arye nyabuka, dipkoprop el malye winin ning bataklyopura, tekbarye ababye, el malye winipmasilye ning ati, ‘Dauplye’ tenen, batakanamlulume, Yesus arye nyabuk.

5Nyabukura, elce wibuka deiamuk Rasul nang, el mapu sik obarye 12 nang arye, tamubuka nyabik. “Naio, nun dib tenenyaba deiyok ning ara, weik arepsutumura, weik upnin basilirye, anti weik upnin baliba, diba tenenamkiyape,” nyabuka morobik.

6Nyabuka morobikopura, Yesus arye tamubuka nyabuk. “Sumik yala pia mitik ning bukni, anggunce nati dib tenepmanulum ning ara, amitik ning atonun mitik anunuk, dib tenepnutumopura, okwarang yo ati, ‘Ancuk erepdakuka, asukum arye otam laut mekwen deice tikilbilyame,’ nyaptumura, anggunce ayupu anyapmatum touk, ayo el yuk erepdakuka, laut mekwen deice tikilbitue,” Yesus arye nyabuk.

Ayupu nyabukopura, ‘Na mapu arye, nun ni birye nyasilye touk, nun pil ara teleb-telebuk ubuka, pil donamape, tenepnamak’ tenen, winipmanto yupu ton nyabuk. Yesus arye nyabuk yupu ara ani.

7Tonda, yata weik deiyoknye do, el pil melinanye birye, wa win pil ap, basam wein pil ap, wininmalya ani, aik tamubuka yalyopura, anggunce elti, “Minpola bukuka din diplyame,” nyaptum do, kum do? 8Aning ara, kum nyapnamlum bukni, anggunce elti, nyapnamlume. “Minopce ara, an teleb baju ongapminye akarye, na din ning kintinipnamnilyame. Na din dinmanye talak ara, an talye melibuka bukmaminye an ni, na din dibuka sirya daknyopura, an aminyan, dinamlyame,” nyapnamlulume.

9Tonda, anggunce elti, “Winibuka pil dopsilyame,” nyapmunyeura, anyapmamunye touk pil dopsilyopura, anggunce elti, “E, nun kwit telebe,” nyabuka kum kilulume. Anye bira, talye pil donanye ati ara, ‘Dawaplye’ tenen, mangkau kildongolulume. 10Aning atonun anggun babye, atalye pil donanye atonun unamlume. Allah yupu nyasilye touk akunum pil dopmunyopura, adiparyuk nyanamlulume. “Allah arye nyapsuke atouk pil dopmaba ati, nunda, weik mambul nang kume. Nunda malye pil dona nanguk,” nyanamlulume. Utenebuka, kanye lamabuka namin arye amu tam unamlume. ‘Nunda, mambul nang unyabe,’ tenebuka, kanya talima ereldan nang kum unamlume. Yesus arye nyabuk.

Yesus arye, taku barye 10 nang, suse dilamukak, kwetebuk yupu

11Yesus arye, ‘Yerusalem mutuku binun’ tenen, bisik banmoka ani, noutamak ara, Samaria danatam, Galilea dana tam noutam kan-kan bisik kwa delekuka biyuk. 12Bisik banmoka ani, tonok asik dolamikak wekelbiyuk talak ara, taku barye 10 nang, barye suse dilamuk anyak unmekak biyukura, eipdayik. 13Eipdayik akarye, anang ara, barye suse dilamuka ati ara, ‘Yum nang dam kum yatibye,’ tenepmeka anya arye yukak unmekce, Yesus ati weik yupu arye yukubik. “Nai Yesuso, bico tenepsutum akarye, kwetepsutume,” nyabuka morobik.

14Morobikopura, Yesus el yuk bisik banmokbuk, yukubik ati kekebuk akarye, tamubuka dipdeyukce ayupu nyabuk. “Anggunda, Allah arena ati, weik deiyoknye dam bimunyeura, dipdesikirye, ‘Anang ara suse akunum lopdobuk anya arye ila tamubuka Allah el si eren aik yatinge,’ nyapnamsila ati, anggun nong amul bilulume,” Yesus arye nyabuk. Nyabukura, sik barye suse dilamuk nang adiparyuk bisik banmek talak ara, sik suse nirya lopdobukura, telebuk ubuk.#17:14 Suse dilamuk nang – Atalak ara, sik Yahudi Yala nang arye, ‘Weik suse dilamne nang ati ara, Allah el si eren aik dam yangana meme. Sikda, pia malyeuk unyake atia. Sik suse lopdoptopura, Allah el si eren aik dam tonap yatinge. Ati, Musa arye sekeiamuk touk, Allah arena ati deiyok nang arye, suse dilamuk ninye dipdenak, ‘Suse akunum lopmana eipnopura, telebe. Ati ur yalulume,’ nyapnopura, aninye tonap, Allah el si eren aik dam yatinge. Kum lopnopura, kum yatinge,’ tenelamik.

15Sik barye suse nibuk akarye teleb ubukura, tonok suse dilamuknye tamubuka, Allah si erenmokak arye Yesus dam biyuk. 16Allah si erenmokak arye, Yesus yan dam gutam tuku dipdongobuka Yesus ati, “Telebe,” nyabuk. Telebe nyabuknye bira Samaria#17:16 Samaria tam nang – Yahudi yala ninye arye, Samaria mutuku nang ati, ‘Ayala nang ara, nun pia nun like,’ tenelamik. Anye bibabye, Samaria mutukunye ulamuk bukni, Yesus ara, Yahudi yalanye birye, anye ati bico tenebukce, anye kwetebuk. tamnye birye nyabuk. 17Yesus arye kwetebuknye, Samaria tamnye birye Yesus ati “Telebe,” nyabukura, Yesus arye ayupu nyabuk. “Narye taku barye 10 nang kwetepmanu bukni, sik Yahudi yala nang tupne barye (9) nang ara tamubuka kum yanmak nang ara danak unmak do?

18Yata ati ninye asiknye Samaria tamnye el tonok aryuk, teleb nati tamubuka nyanmanil do? Barye suse dilamuk nang ara, taku barye (10) nang kweteipmanu bukni, anye biti tonok aryuk Allah si erebuka ‘Telebe,’ nyalyanmasile. Sik yuk nang tupne barye nang Yahudi yala nang nirya ara kwetepmanu bukni, teleb nyabuka kibuka si erena ara, batakmasiake,” Yesus arye el ap neika banmek nang ati nyabuk. 19Nyabukopura, akwetep mok Samarianye biti nyabuk. “Ance nati dib tenepmanilama deice arye, akunum kwetepmakine ati, bukuka tikdopmince bindoplyame,” Yesus arye nyabuk.

Yesus arye, Allah ninye lyeplirye, ‘Sik kanye talima talinamne’ tenen, yanamle talak ati, nyabuk yupu

20Tonok talak ara, sik Farisi nang arye, Yesus ati, “Allah arye ninye lyeplirye, nun talima talinamsil talak ara, yata talak yanamle do?” nyabuka asipdeyikura, Yesus arye tamubuka nyabuk. “Kume, Allah arye ninye lyeplirye, kanye talima talinamsila ara, talye lak akarye kum yanamle. 21Tonda, Allah ninye lyeplirye, kanye talima talisilya ara, ninye kanye talima pum usilye ning atia. Ara, talye lakak ning kuma anya arye, yalyopura, yuk nang arye, ‘Oyanuka unmale, ayanuka unmale,’ kum nyanamake,” Yesus arye, sik Farisi nang ati. nyabuk. 22Nyabukopura, Yesus arye wipdeiyamuk mapu ati nyabuk.

Aminyan talak ara, anggun nirya arye, ‘Se, nun ni koprop Ninye Mi Koprop Atonunye birye tamubuka yalirye, arye, talinamsil talak noutamak tonok sumuk eiptibye’ tenen, pia patapsilyeura, dipra unamlumbuk, kum eipnamlume.

23Dou talak noutam ara, yuk nang arye, anggunti, “E, Ninye Mi Koprop Atonunye amutuku akunum yanuka unmale. Se, Ninye Mi Koprop Atonunye omutuku akunum yanuka unmale,” nyanamsiak buk, sik yupu kekebuka diba tenen, adiparyuk bik-bik abuka kum elbanamlulume.

24Nara, Ninye Mi Koprop Atonunye aminyan yanamne talak ara, bebea laklyeura, im sirya dana-dana dirina ulamle atonun, na atalakuk, pia lak ubuka lakak yanamne. Ati, ara yanyopura, ninye mutuku-mutuku nirya, dipkoprop moubuka biknamake. Ninye arye, ‘Yanmal do, kum do?’ tenen, teniltona pia kum wininamake. Lakak ayanyopura biknamake. 25Minpola yanamne bukni, anoutam talak ara, wini talak unyak nang arye, ikin ning na nong deice delilamnice ani, “Anye bira nun like,” nyabuka bataknamniake.

26Minopa Nuh ulamuk talak ara, el ap ulamik nang winilamik atonun, na Ninye Mi Koprop Atonunye yanamne talak ara, ninye mutuku-mutuku nirya atonun wininamake. 27Ara, Nuh ulamuk talak weik mekwen min kum deiamuk talak ara, sik aninye nirya arye, mek dina ap, din ning yala nirya dina ap, kil talye dolana ap, anirya winipnin balamika ani, Nuh weik mek bukna yo pum wekdopnuyuk sum babye, tuba wininmek. ‘Mekwen dipsilyak,’ tenena kumce, talye kanye bobuka winipra balamik. Winipra balamikura, weik mok celamuk akarye, mekwen deibuka weik obuk akarye, aulamik ninye nirya dibuk. (Sik talye mangkau kanye bobuka ulamikbuk, mekwen deibuka dibuk atonun, na Ninye Mi Koprop Atonunye yanamne talak ara, atonun talye mangkau kanye bobuka ‘Yesus tamubuka kum yanamle’ tenen, unamake.)

28Aning atonunuk, Lot ulamuk talak babye, sik yuk nang nirya arye atonunuk winilamik. Sik din ning dina ap, mek dina ap, bona dekna ap, wa wina ap, aik dona ap, ulamikak arye talye kanye bobuka winilamikura, Lot arye Sodom mutuku batakuka biyuk. 29Sik talye mangkau kanye bobuka ulamikura, Lot arye Sodom mutuku batakuka biyuk sum ara, Allah arye uku buk ap, keil lyein ap, im deice arye dopkwetebukura, Sodom mutuku ap, aninye ap dibuk.

30Sik talye mangkau kanye bobuka ulamika ani, uku im deice arye dopkwetebukura, aninye minpola dibuk atonun, na Ninye Mi Koprop Atonunye yanamne talak ara, atonun kum bikmace talak talye karen arye minpola tukwak mutuku tamubuka yanamne. 31Na yanamne talak ara, anggun aik kopropa kum unmamunye nang ara, aik pum batakmamunye ning tamubuka kum dolbinamlume.

Tonda atalak anggun wa winmamunye nang ara, anggun ning aik deipmamunye ning ara, tamubuka aik pum deipmamunyak kum dolbinamlume. 32Anggunda, moubuka tenenamlulume. Lot el kil ara, Sodom mutuku batakuka, bisik banmoka ani, ‘Na Sodom mutuku tamubuka binun do?’ tenen, tamubuka dinmokura, keil garam atonun ubuk akarye, taiya darabuke. Yesus arye ayupu nirya nyabuk.

33Nyabukce, ayupu ton dukdongobuka nyabuk. Aning atonunuk, yata nang do nirya, sik ning atibuk, ‘Aning mambul’ tenen, sik pataplye ninguk tenebuka, aninguk talibuka winilamice ani, ‘Yesus el mapu danana ara, nun like’ tenen, bataknice nang ara, aminyan sirya talak ara, Allah arye ato ninye weneplirye, oplyeura, dibikirye, tuba, el ap kam pia kum unamake. Uku din mutuku uk unamake. Bukni, yata ninye nirya, ‘Nun koprop ning ap, nun patapsilye ning ap, aninguk mambul’ tenena kum aryuk, na yupu uk kekebuka, ‘Aning ara weik mambul’ tenen, dobolyanganamak ninye ara, aminyan ara sik nong dipnamak bukni, Allah ap neika pia kam unamake.

34Winipmanto yupu winilye nyapnusine. Na tamubuka yanamne talak, alukunyan ara, ninye bitinye tonok amsuna mapmarice ani, tonye bataklirye, tonye dem Allah arye dopropnamle. 35Tonda, atalak ara, kilapu bitinye arye duk ning el si ara yakong teikinmarikirye din ning kintinilinmarice ani, ton kil batakuka, ton kiluk Allah arye dopropnamle. 36Tonda, atalak ara, ninye bitinye wa winmarice ani, tonye bira batakuka,#17:36 ton nang bataknamle – Ayupu bitinye nyabuk ning deiyok ara ani. Ara, Yesus tamubuka yanamle talak ara, ton nang bataknamle bukni, diba tenen nang ara, doproplirye, im deice bobinamle. Ati winipmanto yupu winilye nyabuk. tonye dem Allah arye dopropnamle. Yesus arye el mapu ati nyabuk.

37Yesus arye nyabukura, el mapu arye tamubuka asipdeyik. “Naio, anyapmasilam yupu ara, dan mutuku arye winipnamsil do,” nyabuka asipdeyikura, Yesus arye tamubuka nyabuk. “Oltakna ning oploplyeura, lyulamlirye, tong nyalamlyak kata, dei bum weika arye amulamlyeura, ninye arye, ‘E lyun ning anye,’ tenelamak atonun, na yanamna ara, lake yanamna ati, ‘Oyanmal do, ayanmal do?’ kum tenenamnulume. Lakak upnamle ati ara anggunce biknalumca,” Yesus arye nyabuk.

Currently Selected:

Lukas 17: EIPA

Highlight

Copy