Lukas 14

Yesus arye, Farisinye aik bukmokce, nyabuk yupu

1Tonok Sabat sum deice arye, Farisinye tonok weiknye, el aik pum Yesus ara din dibuka bukmokopura, yuk nang arye, ‘Yesus el malye winipnul do?’ tenen, kalekuka dinmek. 2Sikce Yesus kalekuka dinmek talak ara, weik uk dilamuk anyak nong bol nirya nemuk ati aik bulamuknye Yesus dam bukmokak eibuk.

3Yesus arye aik ulamuknye eibukce, Farisi nang ap, Musa sekamuk yupu peterna deiyok nang ap, awekmeka ati nyabuk. “Allah arye, ‘Winamlulume, aning ara, kum wininamlulume,’ nyapdeibukba, Musa sekamsuk yupu noutam ara, yata nyasulul do? Sabat sum deice ara, pil dona kumce Allah elti, kinyap sum anya arye arup ara, ninye kwetena teleb do, malye do?” nyabuka asipdeyuk. 4Asipdeyukbuk, sik urdem tunim abuka bunauk unmeka anya arye, Yesus arye aik bukamuknye dobuka kwetebukce, “Dabilyame,” nyabukura, tikuka biyuk.

5Anye bira biyukopura, Yesus arye awekmek nang ati nyabuk. “Anggun mapu do, sapi basam do, Sabat sum deice#14:5 Sabat sum – Farisi nang arye, ‘Allah ati si erenyap sum, Sabat sum deice arye, pil mitika ababye, kum doptibye. Aning ara, malye,’ tenelamik bukni, Yesus ara, aning kum peterelamuk. ‘Ninye kwetena ap, yuk nang melina ap, wininyap ning nirya ara, asum-asum nirya deice arye, pil dobuka winina ara teleb uka,’ nyabuka peterelamuk. arye weik tuku pum bisik saktingopura, adiparyuk kum dobuka deiptum do?” nyabuk. 6Yesus arye nyabuk bukni, sikce, ‘Yata yupu nyapnuyap kuma’ tenen, tunim abuka bukmek. 7Sik din dipnuyik talak ara, Farisi nang arye weik nang bukmanto akuk wibuka bukmekak, eibuk. Yesus eibukce adomon yupu nyabuk.

8“Sikda, weik yuna kwalibikirye, ‘Anggunda dilyalulume,’ nyapsikcopura, weik nang bukmanto akuk wibuka kum bunamlulume. Anggunda mitik mambul ululum bukni, yuna deiyok nang arye, weik sisin nang akunum yukupmating ati, aminyan yatunye bira, weik nang bukmantoak ara, ‘Anggun bukmaluma anya arye, anggunda lopdeiplulume. Asisinanye anggun bukmalumak buknule,’ nyapsiceura, anggunuk alye unamsulule. 9Akwalina deiyoknye birye, weik sisin nang akunum yukupmatopura, anggun bukmalum buna ara, weik nang yanuka buknuyaka ati, ‘Anggun lopra dongo tam bunak bulbinululme,’ nyapsutuopura, alye upsutue. Dongo tam talye bona utotoa talina kumnye bukmakcak bunamlulume.

10Anggun arye, ‘Teleb akuk buknamap’ tenena, meme. Aning ara kum wininamlum bukni, yuna ati yukupsilyopura, kankan ninye bulamakak binuka bukmamunyeura, ayuna deiyoknye birye, ‘Weik nang bunakak bulyalulume,’ nyapsilyopura, sik awekmakce ninye nirya arye, ‘Anye bira weiknye,’ tenepsikceura, pia teleb akuk bulbinamlulume. 11Ara talye ati kum nyapsine. Yata ninye do nirya, sikce sik bidamnye ati erelilalamak nang ara, aminyan talak Allah arye anang dobuka amu kipdeipnamle. Bukni sik talima darapdongobuka amu tam ulamice nang ara, aminyan talak Allah arye anang erebuka teleb ak deipnamle.” Yesus arye nyabuk. Nyabukopura, Yesus arye el bukmok aik deiyoknye biti nyabuk.

12“Anggun yuna kwalibuka deipmamunye talak ara, anggun kayapu nang ap, anggun weitcapu silip ap, anggun yala nang ap, bona talin nang ap, ‘Yuna dilyanuyak’ tenen, ananguk kum yukupnamlulume. Ato nanguk yukupmunyopura, sikce tuba tamubuka anggunti kwalibuka delinamsiak anya arye, ‘Elce tamubuka yuna kwalibuka deipnamnile,’ tenepmunye nanguk kum yukupnamlulume.

13Anggun yuna kwalibuka delinamlum talak ara, talye bona utotoa talina kumnye ap, yok kwalin ninye ap, aik bun ninye ap, asing guna ninye ap, ‘Sik nirya dilyanuyak’ tenen, yukupnamlulume. 14Winilamunyopura, Allah arye anggunti teleb ulinamsile. Ato ninye ara, sikce tamubuka, yuna kwalibuka kum deipsiting bukni, Allah arye sik diksukum wininyak ninye kam bukeipnamle talak ara, Allah arye sik areamuk ning dekna ati, mininga ning weike urdem arenamsile.” Yesus arye el bukmok aik deiyoknye biti nyabuk.

Weik yuna kwalina ati, winipmanto nyabuk yupu

15Yesus arye ayupu nyabukopura, Yesus ap dinmek nang kan-kan tonoknye birye, ayupu nyabuk. “Allah arye ninye lyeplirye, aning-aning nirya talinamla talak, weik yuna kwalibuka deiplibuk dinamlanye bira, weik mambule. Allah arye atonye biti, teleb kilinamle,” nyabuk. 16Anye birye nyabukura, Yesus arye el yupu kekenmek nang ara, ninye dib tenebicopura, ‘Allah arye sik kanye talima talibuka ulul ning kel kipnamak’ tenen, winipmanto yupu deice arye nyanmok. Yesus arye nyanmok.

17Adeiyoknye birye, ‘Na yuna dilyanamak’ tenen, min arye akunum nyapdeiamuk nang ati, akunum kintinibukopura, el melina nang dopdeibukura, nyalbiyik. Anang arye, “Winira, nun deiyoknye birye aning-aning nirya akunum kintinipmasila ati, anggun dilyalulume,” nyalbiyik. 18Anang arye, “Winira, dilyanulume,” nyabukura, nyalbiyik bukni, el nyapdeiamuk nang arye lik ubukaura, “Nun kum yanamabe,” nyabuka anang nirya tonok-tonok arye lik ubukura, yuk-yuk biyik. Sik yuk-yuk biyikura, sik nirya arye tenepce yupu deice arye, “Nun kum diptibye,” nyabik. Tonye birye, na wa tuku winiryuk dekmanu ati, dilbinune. Winipnamne anya arye, kum yanune, nyabuk.

19Tonye birye, “Kume, ‘Na pil don sapi basam pamubarye winiryuk dekmanu ara, pil teleb kibuka dopnamniak do?’ tenen, pirildelbinun anya arye, kum yanune. Talya moropmanila anya arye, elda kum yanamale, nyapdeipnilyame,” nyabuk bukni, tenepce arye talye yupu nyabuk. 20Tonye birye, “Kume, na kil winiryuk dopmana anya arye, na babye, kum yanune. Talya moropmanila anya arye, elda kum yanamale, nyapdeipnilyame,” nyabuka tenepce arye talye yupu nyabuk.

21Sik anang-anang nirya arye nyabikura, anyaik nyalbiyuknye kekebukce, el deiyoknye dam laka nyalyayuk. Laka nyabukopura, akwalina deiyoknye birye, yu weik ubukaura, el melinanye ati ayupu nyabuk. “Minpola weik bisik ap, mitik buru bisik ap nirya, bimunce eipdamunye talye bona utotoa talina kumnye ap, yok kwalin ninye ap, asing guna nang ap, aik bun nang ap, anang nirya ati, ‘Nun deiyoknye yuna kwalibuka deipmala ara, dilbilulume,’ nyapmunce, dobuka boyanululume,” nyabuk.

22Nyabukura, el melinanye birye el nyapdeibuk touk, bisik bokolanak nirya banmokce, elinmok nang nirya bulubuka el li aik biyik. Biyikopura, amilinanye birye, el li koprop ati nyabuk. “Naio, ance nyapmanilam touk akunum winipman bukni, aik lo tuba upmale,” nyabuk. 23Nyabukura, akwalina deiyoknye birye tamubuka nyabuk. “Aning ati ara, pia mitik buru bisik ap mitik mutuku unyakak ap pia karen mutuku ap bimince, ninye ton aunmakcopura, aninye nirya mikip yupu arye yukupminbuk, yakcopura, na aik lipnamnile. 24Yuk ninye yakce na aik lipnilyopura, na minop arye yukupse ninye nirya, tonok babye, na kwalibuka deipmanye ning kum dipnamake,” akwelina deiyoknye birye nyabuk. “Ayupu akunum nyapsine,” Yesus arye nyabuk.

Yesus arye, “Na ti diba tenepmunce, dobolyanamnulum ning ara, ikin unamluma anya arye, moubuka tenenamlulume,” nyabuk yupu

25Yesus arye peterepra banmok talak ara, ninye pia weike arye ‘Yesus el yupu kekebuka elti, dobolbanabe’ tenen, melibuka banmekura, Yesus arye el ap neika abanmek nang ati ayupu nyabuk. 26“Yata nang do nirya, sik ni yapu ap, sik nin yapu ap, sik kilapu ap, sik weitcapu silip ap, sik mapu ap ati, weik arye kanye talima delilul bukni, nati ara, kanye talima mitik anun delinululce nati bataknicopura, anang ara, na mapu kum uptinge. 27Tonda yata nang do nirya, na dobolyanganamak talak ara, sik babye wanwanun yo bobuka, na yupu kekebuka nati kum dobolyanganamniak nang ara, na mapu kum uptinge.

Ara, sik mining ning atibuk, ‘Aning ara teleb anye arye, mambul ulule,’ tenebikirye, ‘Yuk nang arye nun opsicak’ tenen, lik tenebikirye, na yupu kum dobolyanganamak nang ara, na mapu kum uptinge.” Yesus arye nyabuk. 28Nyabukopura, awinipmanto yupu tonap nyabuk.

Yata nang do nirya, ‘Nun weik aik dopnuyap,’ tenebice talak ara, ‘Teleb ning ara dipdetinirye, yo bok aupmanil ning deice arye sirya daktinye do?’ tenepnamake. 29Aning kum dipdetingopura, deiyok kouptingce dolamtinga ani, ayukumna yo ap, aik abilinga yo noutamak ning ap, akunum doptingce, nirya sirya kum daktingce, bataktingopura, yuk nang eiptingce, yupu lyek-lyek abuka, anang ati akutupnamake. 30Akutubukaptingce, “Anye bira, ‘Weik aik dopnun’ tenen, deiyok koubuka dopnin balamuk bukni, suktalibukce, kum sirya dakmanto ubuka ati, batakuka ati ara, walwalnye ulule,” nyabuka akutunamtinge.

31Aning ara, atonun, tonok weik ninye deiyoknye birye, ‘Yuk nang opbisipnamne,’ teneptu talak ara, minopce tenipdetue. Ara, ‘Na ap, na yin talin nang 10 ribu nang ap arye, omutuku 20 ribu nang olyangalamsiak nang ara, opbisiptibye do, kum do?’ tenen, tenipdenamle. 32Tenipdeturye, ‘Kume ninye weik anya arye, kum opbisiptibye’ tenen, teniploptu ura, 10 ribu nang, sik deiyoknye birye, yupu sekna ati, ninye dopdeiptu ura, 20 ribu nang bisik yanamatingak binuka, “Nun neika teleb una ati, nyalin yupu nyapdatibye. Nun olana kumce, teleb ubuka neika unamabe,” nyabuka yupu moropnamake. Yesus arye winipmanto yupu deice arye nyabuk. Nyabukce ayupu ton dukdongobuka nyabuk.

33Adomon yupu nyapmasin nang wininyak touk dipkoprop deiyok ara ani. ‘Ara aminyan yata wiripnamsil do?’ tenen, pia moubuka tenenamlulume. Aning ati ara, yata nang do nirya, sik talyamice ning kum batakikcopura, na kum dobolyanganamake. Ara Na mapu kum uptinge.

34Garam uwa teleb nyalamle ning kum uptu bukni, ila tamubuka teleb kipdeiptum do? Kume, aning ara pia kum winipmanto ati, kum diptinge. 35Talya buru tam donokiceura, ninye arye aning deice yanibuka banyake. Garam uwa akunum mitang nyaplyopura, yata ning do, nirya yuk ning babye, teleb kum updeiptue. Yuk ning arye lipsisikuka teleb kum updeiptue. Aning atouk, anggunda Allah yupu nyasilye touk kum winipmunce, malye ninguk winipmunyeura, yuk nang eibikirye, Allah winin ning kum kel biknamake. Tonda, anggun malyeuk winimunye nang ara, Allah arye bataknamsile. Ati, anggun amul usilyeura, ‘Ayupu deiyok ani’ tenen, ayupu kekepmanto nang ara, moubuka kekepnamlulume. Yesus arye ayupu nirya nyabuk.

Currently Selected:

Lukas 14: EIPA

Highlight

Copy