Lukas 15

Domba basam tonok tunim amuk ati, el biyuk yupu

1Atalak-atalak nirya ara, Israel tam talyamik deiyok nang, Roma mutuku nang ati, pajak yo bok bulubuka arilamik nang ap, sik yuk nang arye, “Aninye pia malye ninye,” nyabuka tenelamik nang ap, ‘Yesus el yupu nun ton kekepnuyap’ tenen, bulubuka, Yesus dam tonap weik wekelyanganmek. Tonda, amalye-malye ulamik nang nirya ap, Yesus ap neika ansinibuka dina dinmek.

2Awinilamik touk, Yesus ap, amalye winin nang ap, dinmekura, sik Farisi nang ap, Allah arye, ‘Aning wininamlulume, aning ara kum wininamlulume,’ nyapdeibukura, Musa arye sekamuk yupu peterena deiyok nang ap arye, pajak yo bok bulubuka delin nang ap, malye-malye winilamik nang ap, Yesus ap, neika dina dinmeka eibikopura, nyabik. “Anye bira Yesus ara, pajak yo bok bulubuka delin nang ap, malye-malye unyak nang ap, ‘Anang ara malye unyak nang,’ tenena kumce, neika dina dinmaka ara, yata ati do? Awininmala ara, pia malye unmale,” nyabuka wenebik. 3Nyabuka wenebikopura, Yesus arye ayupu nyanmek nang ati winipmanto yupu nyabuk.

4“Anggun kanye ara, yata tenepmalum do? Tonoknye bira, el domba basam 100 ulamiceura, tonok ning dem, yukak banmalya ani, tunimaplyopura, domba basam 99 ning abatakuka tunimap malye ning ati, elbalul do, ‘Dawaplye’ tenen, batakalul do? ‘Kume, tunimap malye ning eipnun’ tenen, epnin banmalya ani, eiplyopura, ‘Akunuma eipmane,’ tenelule.

5Akunum eiplyopura, el domba basam 99 yukak kum banmakirye, tuba anyuk unmaca ati, mitik kanye delilul bukni, tonok tunimap malye ning eiplyopura, pia weik kanye deibuka, tomobuka boblyopura, el aik tamubuka bobalule. 6El aik tamubuka bilyopura, el kayapu nang nirya ati nyalule. ‘Na domba basam tunimapmanua ara eipmana ati, nun nirya kanye weik arye deipnamabe,’ nyanyake.” Yesus arye nyabuk.

7Nyabukce ayupu tonap nyabuk. “Adomon yupu nyapmasin touk, anggun ni Allah im deice ululnye el kanye ara, ninye tonoknye babye, ton, el malye winilul ning bataklirye, diksukumuk ulyopura, kanye pia teleb delilule. Yuk ninye yupa weike 99 malye kum unyakce, tuba telebuk unyak nang ara, el kanye mitik teleb delilul bukni, malye ulamice nang arye sik malye una ning batakuka diksukum ubikcopura, weik kanye delilule.” Yesus arye sik Farisi nang ap, Musa sekamuk yupu peterena deiyok nang ap ati ayupu nyabuk.

Keil uang tonok tunim abukura, enmoka ani, eibuk yupu

8Yesus arye ayupu nyabukopura, adiparyuk winipmanto yupu tonap nyabuk. “Anyapmasin yupu atonun, tonok kil arye, dekna weik keil uang, el si perak, taku barye 10 deiamtu bukni, tonok ning wangaptuopura, kum eiptu do? Kume, weisa upturye, el aik pum nirya ara, amsuna dangabuka, moubuka epra banmatua ani, keil uang akunum eiptopura, pia kanye deiptue. 9Akeil uang eiptopura, el asik dam ulamting nang ap, el kayapu nang ap, yukuptu ura, anang yatingopura, ‘Na dengna weik keil uang tunim nyapmanu akunum eipmana ati, nun nirya kanye deipnuyabe,’ nyaptue. 10Aning nyaptu touk, na dipkoprop nyapsine. Malye ulamice nang noutam arye, tonoknye babye, ton, el malye ulul ning bataklyopura, Allah arye nyalin yupu laka nyana ap, pil donanye ap unyak nang malaikat nirya arye, kanye deilinyake.” Yesus arye nyabuk.

Tonoknye birye, ‘Na mi tunim abuk ara, akunum dipnuke,’ tenebuk yupu

11Yesus ayupu nyabukopura, winipmanto yupu tonap, nyabuk.

Tonok talak ara, tonoknye el mapu bitinye deiamukba, nemdik. 12Neprikura, daulamika ani, tonok sum arye, dunye bira kum bukni, weiknye birye, ayupu nyabuk. “Naio, an taliplum ning ara, ‘Na dipnunye talak ara, arepnamne,’ tenepnulum ning ara, wini talakuk arepnunilyame,” nyabuka morobuk. Morobukopura, anyasik deiyoknye birye, el mapu bitinye ati, el talyamuk ning bokuka arebuk.

13Arebukura, daulamrika ani, wala bitinyeto, winilyeto ubukopura, el weit koprop arye, el talyamuk ning nirya bulubukabukce, ‘Na yuk mutuku unamne’ tenen, leibuka biyuk. Yuk mutuku biyukopura, aning-aning nirya dengna ap, malye ubuka una deice ap arye, el li arebukak, dopromuk ning nirya, kum daneibuk. 14El dopromuk ning nirya, kum danibuk talak ara, yuk mutuku noutam arye, din ning nirya kum ubukaura, dina patabuka ati, anye bira, ikin weik ubuk.

15Ami ara el dopromuk ning nirya kum ubuka anya arye, ikin weik ubukura, yuk mutuku noutamak tonoknye ulamukak biyukce, “Ance na pil nuknutumura, doptinye,” nyabuka morobuk. Morobukura, anye birye el basam weinanye kipdeibuk.#15:15 basam – Yahudi yala ninye, sik kanye ara, ‘Basam ara, pia malye ulul ning anya arye, pia kum weinamabe,’ tenelamik. Tonda, minop talak, Allah arye nyapdeibukura, Musa arye mem yupu sekeiamuk ning noutamak ara, Allah arye, Israel nang ati, “Basam weina ap, dina ap ara, pia meme,” nyapdeiyamuk. Ati, sik Yahudi ninye ara, ‘Basam pil nirya ara, pia malye pil uka,’ tenelamik. Ati ara, anye birye, pia malye kanye bobuka, apil dobuka ulamuk. 16Basam weinanye kipdeibukura, basam weilamuk talak ara, yuk nang arye el din ning kum arilamik ati, ‘Abasam dina dilamikce, dina si sekdoba mitik-mitikauk bulubuka diptinye,’ tenelamukce dilamuk.

17Ikin weik ubuk talak ara, kanye moubuka tenebukopura, utenebuk. ‘Se, na yata ning deiyok ati, malye ulamse do? Na ni el pil talye melinyak nang ara, din ning weik dinmaca ani, bouplyopura, sirya ara batakanyak bukni, na tonok ara din ning kum upnuka deice arye, dipmanto unune,’ tenebuk. 18Aning ati ara, na ni dam tamubuka binirye, nyapnamne. “Naio, Allah ap, an ap ati pia malye winipse. 19Na pia malye winyamsa anya arye, ance, ‘Ara na mi,’ tonap kum nyapnamnilam bukni, an milina nang atonun kipdeipnutumura, talye pil ababye, doptinye.” ‘Ayupu nyapnamne,’ tenebuk.

20Utenebukce, amutuku batakuka, el li dam biyuk. Bisikak ouyanganmokura, el li asik dam tikuka dinmokce, el miuk ouyanganmokak eibuk. Eibukopura, el mi ati bico ubuka ati, bik-bik abuka biyukce, binuka iribuka mutubuk. 21Winibukopura, el mi arye el li biti nyabuk. “Se naio, Allah ap, an ap ati, pia malye awinyamsa anya arye, aminyan talak nirya ara, ance nati, ‘Ara na mi,’ kum nyapnamnilyame,” nyabuk.

22Nyabuk bukni, ami el li birye, el pil melina nang ati ayupu nyabuk. “Anggunda, ‘Weik nang kipnamap’ tenen, arilamak cang baju, el si juba ati, pia teleb ning ara, minopce dobuka yamunce, na mi ati ongopdeipnulume. Tonda, ‘Anyaik deiyoknye atonun ulule, tenepnamake’ tenen, taruk dukdongon ning dobuka boyamunce ongopdeipnamlulume. Tonda, ‘Anye bira, talye melinanye kume, weiknye ulule, tenepnamak’ tenen, el yan ongon sandal boyamunce ongopdeiplulume. 23Winipmunyopura, ‘Weik sum yuna kwalibuka dipnamap’ tenen, weinyaka ak weik arye nebuk sapi basam ara, obuka kwalipnamlulume. Obuka kwalipmunyopura, nun nirya kanye deibibirye, pin-pin asa arye dipnamabe.

24Ara talye ati kume. Na mi yanmanila ara, dipna nang atonun ulamukbuk wini talak ara, kam ulamak nang atonun upmale. Tonda, na mi tunimapnuk bukni, akunum yanmalak eipmana anya arye, yuna kwalimunyeura, kil-kil arye dipnuyabe,” nyabuk. Nyabuka ati, sik nirya kanye deibikce, yuna deiya koubuka kwalinmek.

25Sik anang nirya arye yuna deiya koubuka kwalinmek talak ara, anye el du bira wa tuba winmok. Wa winmoka ani, asik tam tamubuka yayukopura, sik kil-kil asa kwalipmekce, mot nyanmekak kekenmok. 26Kekenmok anya arye, elce el li melinanye tonok yukubukba, yayukura, “Sik yata deiyok ati wininmak do?” nyabuka asipdeyuk. 27Asipdeyukura, amelinanye birye tamubuka nyabuk. “Kume, an weit korop, tunim abuka ani, wini talak ara, akunum teleb arye tamubuka yanmala ati, an ni birye, ‘Sapi basam weik nebuka ara, obuka kwaliplulume,’ nyapmal ati, obuka kwalipmakce wininmake,” nyabuk.

28Nyabukura, winiryuk tamubuka yanmoknye el du koprop arye, yu weik ubuka ati, ‘Nara, anyasik kum binune,’ tenebuk. Utenebuka ati, el li anyasik pum arye, el mi dam biyukce, ‘Aik yanul’ tenen, morobuk. 29El li birye morobuk bukni, el mi dunye birye tamubuka nyabuk. “Kume, ance deiamlum tok, an pil weik dolamsibuk, dolamse keting tamun noutamak nirya ara, ‘El ap, el kayapu nang ap kwalipnamak’ tenen, tonok kambing mi babye, kum areamnulume.

30Na teleb piluk dolamsibuk, yun ning kum areamnulum bukni, na weit koprop, an taliplum ning akunum areamlum ak, dobuka binamukce, aning-aning weik dengna ap, kil talye yona ati dengna ap deice arye kum danibuka ati, tamubuka yanmakilbuk adiparyuk weik arye nebuk sapi basam obuka, kwalip deipmalume. Winipmaluma ara yata ati do?” nyabuk. 31Nyabukura, el li birye tamubuka nyabuk. “Na mio, atalak-atalak nirya an ap, nun neika unyama anya arye, na talinye ning nirya ara, an babye, talilyame. Na ning ara an ning atonun kilule.

32Ara, an weit koprop ara, dipne nang atonun ubuk bukni, kam ulamak nang atonun upmale. Tonda, pia tunimamuk bukni, yanmalak, eipmana anya arye, elti, kanye deipmapce, yuna kwalipmapa ara, pia telebuka.” Anye el li birye, el mi dunye kopropa ati nyabuk. Yesus arye awinipmanto yupu deice nyabuk.

Currently Selected:

Lukas 15: EIPA

Highlight

Copy