Kejadian 36

1Ayupu deice ara, Esau, el si ton Edom, ulamuk ati sekupe. 2Esau birye, el domuk kilapu ara, Kanaan mutuku noutam ulamik ninye noutamak arye domuk. Esau el kilapu si ara, ani. Het mutukunye, el si Elon birye deiamuk kil, el si ara, Adah dobuk. Tonda, yuk kil el si Ana birye deibuk kil, el si ara, Oholibama ton dobuk. Akil el apu koproba si ara, Zibeon. Zibeon elda Hewi mutukunye ulamuk. 3Ton kil ara, Ismael arye deiamuk kil, el si ara Basemat, Esau birye domuk. Akil el weit kil si ara, Nebayot ulamuk. 4Esau bira, Kanaan mutuku noutamak tuba ulamuk talak ara, el ap, Adah ap arye, sik mi Elifas deiprik. Esau el kil Basmat birye, sik mi Rehuel deibuk. 5Esau ap, Oholibama ap arye, sik mapu Yeus ap, Yaelam ap, Korah ap, deiprik. Amapu nirya ara, Kanaan tam noutamak arye delilamuk.

6Esau birye, el kilapu nirya ap, el kilmapu ap, el aik neika ulamik ninye nirya ap, sikce weilamik kam un ning ap, ara yata ning do nirya, Kanaan mutuku noutamak bobuka, taleamuk ning nirya dobukabukce, yuk mutuku binuka ulamik. Ara, el weit koproba Yakub ulamuk mutuku batakuka, pera tonun, otam noutamak binuka ulamuk. 7Deiyok ara, Yakub ap, Esau ap, sik yuk-yuk bukni, sik taleamrik ning ara, pia weik ulamuk. Ati, tonok mutuku noutamakuk, neika kum upmanto ulamdik. Ara, sik bitinye arye, weilamrik kam un ning pia weik anya arye, tuku lo mitik ubukba, yuk-yuk binuka ulamdik. 8Ati ara, Esau ap, el mapu silip ap, Seir mutuku bukni, mutuku kon uamukak binuka ulamik. Esau bira, el ton si ara, Edom nyalamik. 9Esau bira, el ton si ara, Edom nyalamika anya arye, Edom nyanyak yala ninye ara, sik apu koproba ara, el uka. Edom ninye ara, Seir mutuku bukni, mutuku kon uamukak ulamik.

10Esau el kil Adah birye delilamuk mapu sik si ara, ani. Elifas deibuk, Esau el kil Basmat birye deibuk mi ara, Rehuel ap ulamdik. 11Elifas birye delilamuk mapu si ara, ani. Teman ap, Omar ap, Zefo ap, Gaetam ap, Kenas ap ulamik. 12Esau el mi Elifas bira, kil tonok ton dobuk kil ara, el si Timna ulamuk. Akil arye, el mi Amalek deibukba, Esau el kil Adah birye, anang ati, ‘Na mapu’ nyalamuk. 13Esau arye deibuk mi Rehuel birye, delilamuk mapu sik si ara, ani. Nahat ap, Zerah ap, Syama ap, Misa ap ulamik. 14Esau el kil Oholibama birye delilamuk mapu, sik si ara, Yeus ap, Yaelam ap, Korah ap ulamik.

15Esau birye delilamukba, ninye deiyok nang kibuka ulamik nang, sik si ara, ani. Esau birye, min yuma deiamuk mi, Elifas birye delilamuk mapu ara, weik deiyok nang kibuka ulamik. Sik si ara, Teman ap, Omar ap, Zefo ap, Kenas ap, ulamik. 16Korah ap, Gaetam ap, Amalek ap, ulamik. Anang nirya ara, Elifas birye, Edom mutuku ulamuk talak noutamak arye delilamuk. Sik capu kil bira, Esau el kil Adah ulamuk. 17Esau birye deibuk mi, Rehuel birye delilamukba, ninye deiyok nang kibuka ulamik nang, sik si ara, ani. Nahat ap, Zerah ap, Syama ap, Misa ap ulamik. Anang nirya ara, Rehuel birye, Edom mutuku ulamuk talak noutamak arye delilamuk. Sik capu kil si ara, Esau el kil Basemat ulamuk. 18Esau el kil Oholibama birye delilamukba, ninye deiyok nang kibuka ulamik nang, sik si ara, ani. Yeusi ap, Yaelam ap, Korah ap ulamik. Anang nirya ara, Esau el kil Oholibama birye delilamuk. Akil el lin si ara, Ana ulamuk. 19Asukum ninye si sekeibupu ning ara, sik ni koproba ara Esau, (el si ton Edom) ulamuk. Sik ninye deiyok nang kibuka ulamik touk sekupe.

20Tonda anoutam ulamuknye, Hori mutukunye el si ara, Seir ulamuk. Seir birye delilamuk mapu, sik si ara, ani. Lotan ap, Syobal ap, Zibeon ap, Ana ap ulamik. 21Disyon ap, Ezer ap, Disyan ap, ulamik. Seir birye delilamuk mapu ara, ninye deiyok nang kibuka ulamikce, Hori mutuku taleamik. Amutuku ara, Edom tam noutamak ulamuk. 22Lotan birye delilamuk mapu si ara, ani. Hori ap, Heman ap, ulamdik. Lotan el makal kil si ara, Timna ulamuk. 23Syobal birye delilamuk mapu si ara, ani. Alwan ap, Manahat ap, Ebal ap, Syefo ap, Onam ap, ulamik. 24Zibeon birye deiamuk mapu si ara, ani. Aya ap, Ana ap, ulamdik. Anye Ana bira, el li koproba Zibeon taleamuk keledai basam dobuka, ninye una kumak, bai tam mutuku weilamuk talak ara, mek puak bukni, buppu mek panalamukak, eibuk. 25Ana birye deiamuk mi el si ara, Disyon. Ana birye deiamuk kilmu el si ara, Oholibama ulamuk.

26Ana el mi Disyon birye delilamuk mapu sik si ara, ani. Hemdan ap, Esyban ap, Yitran ap, Keran ap, ulamik. 27Seir, el mi Ezer birye delilamuk mapu sik si ara, ani. Bilhan ap, Zawan ap, Akan ap, ulamik. 28Seir, el mi Disyan birye deiamuk mapu, sik si ara, ani. Us ap, Aran ap, ulamrik. 29Ati sik Hori yala ninye talina ati, ninye deiyok nang kibuka tikamikce ulamik nang, sik si ara ani. Lotan ap, Syobal ap, Zibeon ap, Ana ap ulamik. 30Disyon ap, Ezer ap, Disyan ap, ulamik. Aninye deiyok nang, sik nirya Seir mutuku noutam bukni, Hori yala ninye taleamikce, yuk-yuk bokuka ulamik touk sekupe.

31Edom mutuku noutam tikamikce ninye deiyok nang kibuka, Raja nang ulamik nang sik si ara, nyapnuyabe. Anang ara, sik Israel yala ninye deiyok nang, Raja nang min kum ulamik talak, Edom tam taleamik nang ati seknuyabe. 32Beor birye deiamuk mi, el si ara, Bela birye, Edom tam talibuka ninye deiyoknye ulamukce, weik asik dolamika ara, Dinhaba mutuku nyalamik. 33Bela dibukopura, Bosra mutukunye el si ara, Zerah birye deiamuk mi el si ara, Yobat birye tikuka, amutuku ninye deiyoknye ulamuk. 34Daulamuka ani Yobab dibukopura, Temanitnye el si ara Husyam, elce tikuka amutuku ninye deiyoknye ulamuk.

35Daulamuka ani, Husyam dibukba, Bedad birye deibuk mi, el si ara, Hadad tikuka, amutuku ninye deiyoknye ulamuk. Elda Moab mutuku noutamak arye, Midian mutuku ninye opra balamukce, malye kibuk. Habad birye domuk asik si ara, Awit mutuku nyalamik. 36Hadad daulamuka ani, dibukopura, Masreka mutukunye, el si ara Samla tikukce, amutuku ninye deiyoknye kibuka ulamuk. 37Daulamuka ani, Samla dibukopura, weik mek dam domik mutuku si, Rehobot mutukunye, el si ara Shaul tikuka, amutuku ninye deiyoknye ulamuk.

38Daulamuka ani, Akbor el mi Bahal-Hanan birye tikuka, amutuku ninye deiyoknye ulamuk. 39Daulamuka ani, Bahal-Hanan el mi Akbor dibukopura, yuknye el si ara, Hadar tikukce, amutuku ninye deiyoknye kibuka ulamuk. Elce domuk asik si ara, Pahu mutuku nyalamik. Elce domuk kil si ara, Mehetabeel ulamuk. Akil el lin si ara, Matred ulamuk. Matred el lin si ara, Mezahab ulamuk. 40Ura, aning ara, Esau birye deiamukba, dadeipdanin balamika ani, delilamikba, aminyan talak ninye deiyok nang kibuka ulamik nang, sik si ara, ani. Sik yala yuk-yuk ulamik touk, sik mutuku yuk-yuk aulamuk touk sekupe. Ara, Timna ap, Alwa ap, Yetet ap, 41Oholibama ap, Ela ap, Pinon ap, 42Kenas ap, Teman ap, Mibzar ap, 43Magdiel ap, Iram ap ulamik. Asi sekupe nang ara, Edom mutuku taleamikce, ninye deiyok nang kibuka ulamikce, sik tuku yuk-yuk taleamikce, asik yuk-yuk dolamik. Asekupu yupu ara, Esau birye delilamukba, dadeipdanin balamika ani, ulamik nang, si sekupe. Sik nirya ara, Edom mutuku noutamak ulamik ati, sik yala si ara, Edom yala ninye nyalamik.

Currently Selected:

Kejadian 36: EIPA

Highlight

Copy