Rasul 5

Ananias ap, el kil Sapira ap, sikce tilila nyabuka, pil iprik yupu

1Yusuf ara, el wa tuku dekuka, Yesus wipdeiamuk nang aribuk bukni, tonoknye el si Ananias ap, el kil Sapira ap, sik babye, sik talyamrik tuku ton yuk nang arye dekik. 2Dekikura, Ananias arye atuku ati arepmek yo bok doprobukura, dana tam bokuka doprobuk ning ara, Yesus elce wibuka deiamuk Rasul nang ati, ‘Anang arye bokuka patalamle ninye arepnamak’ tenen, aribuk. Danatam yo bok ara, dungnubuk. Ananias awinibuk ning nirya, el kil arye bikmok.

3Ananias ayo bok akunum aribukopura, Peterus arye Ananias ati nyabuk. “Ananiaso, Isa Mutuku Dongonye#5:3 Isa Mutuku Dongonye nyabuk ning ara, isa mer sik weik deiyoknye ati, nyabuk. Isa Mutuku Dongonye nyanyapnye bira, sik Yahudi yala ninye, sik Ibrani yupu deice arye, ‘Setan’ nyalamik. ‘Setan’ yupu deiyok ara, atau artinya ning ara, ‘Ninye Onanye’, tonda ‘Minina Yupu Nyana Deiyoknye’, tonda, ‘Lululina Yupu Nyana Deiyoknye’ ulule,” nyalamik. Tonda, laka nyana yupu nomor 13 dindelelume. an talima pum tam ara, weika arye wekuka talipkuka deice arye, an tuku dekmom akarye yo bok dopropmo yo bok ara, dana tam bokuka, ‘Na’ tenen, dungnupmumce, Allah El Dib Kanye ati talye tilila ati nyapmalam ara, yata ati do? 4An tuku min kum dekmom talak ara, an ninguk min kum talyamlum do? Tonda, akunum dekmomce dopropmom yo bok ara, an deiyoknye ati ara, ‘Aning bokuka winipnamne, aning bokuka winipnamne,’ kum tenepmom do? Kanya arye, ance tenepmum touk, winipmatume.

Bukni, wini talak ara, tilila nyapmasilame. Amalye winipmalam ning ara, yata deice tenepmom akarye awinipmalam do? Amalye winipmalam ning ara, yata tenipmum deice arye, awinipmalam do? Ance talye tukwak ninye ati telil yupu kum nyapmalame. Allah ati telila yupu nyapmalam atia!” Peterus arye Ananias ati nyabuka akarye wenebuk.

5Nyabuk ati, Ananias ayupu kekebukura, adiparyuk tukwak daksakuka pubuk akarye dibuk. Pubuk akarye dibuk ati, awinibuk ning lak nyabikura, kekenmek nang nirya weik ilil ubuk akarye, sirim talibuk. 6Ananias akunum dibukura, kam nang arye yanuka el nong baju arye kitibikce, baya wibuka buru bobiyik akarye weibik. 7Baya wibuka bobiyik akarye weipmeka ani, daunmek ara, winilye ketingto, ara, jam tiga atonun, akunum kibukopura, Ananias el kil awinipmok ning kum bikmok anya arye, mangkau uk Peterus unmokak yayuk.

8Wekelyayukura, Peterus arye Sapira ati asipdeyuk. “Ance laka nyapnilyame. An ap, an akanye Ananias ap, anggun tuku dekuka dopropmarum yo bok ara, winibuka akunum do, kum do?” nyabuka asipdeyuk. Asipdeyukura, Sapira arye, “Diba, elce arepmakil yo bok ara, winibuka akunuma,” nyabuk. 9Nyabukura, Peterus arye tamubuka nyabuk. “Yata kanye arye, ‘Winiptinimnye’ tenen, anggun bitinye malye winipmaruma deice arye, Allah El Dib Kanye ati, tilila deice arye, pilipmarerum do? Ani, an akanye akunum weipmak nang buplan dam akunum yanmaka dipdelyame. An babye, sikce bobuka buru bobinukiake,” Peterus arye nyabuk.

10Peterus arye ayupu nyanmoka ani, sirye batakalongoyuk talak ara, Sapira adiparyuk Peterus el yan dam daksakuka dibuk. Dibukopura, akam nang arye wekuka tomobik anye, el nong bobuka buru bobiyik akarye, el akanye weipmekak damuk binuka weibik. 11Anirya akunum winibukopura, Yesus el diba tenebik nang nirya ap, awinyabuk ning kekenmek nang nirya ap, ilil weik ulamukce, mambul kanye weik bolamikce, sik nong nirya sirim talilamuk.

Yesus wibuka deiamuk nang arye, ninye weik kwetelamik yupu

12Yesus wipdeiamuk Rasul nang arye, amutuku ulamik ninye kan-kan arye, ninye kum winipmanto ning ap, winipmanto kum pil ap, tonda yuk ninye eibikirye, ‘E Allah arye dipkoprop pil donmasile, tenepnamak’ tenen, mambul pil ap dolamik. Tonda, Yesus el diba tenebik nang nirya arye, Allah yupu kekena ap, yupu sisikina ap ati weklamik atolong si ara, Salomo Atolonga bulubuka weklamik. (Sik yupu deice Salomo Kolonade nyalamik).

13Yuk nang nirya arye, Yesus diba tenebik nang ati, ‘E anang teleb nang,’ tenelamik bukni, Ananias ap, Sapira ap, dipmarika ati, ilil unmoka ati, ‘Yesus dib tenelamik ninye dam bibirye neika kum unamabe,’ tenelamik. 14Ton ninye ara, utenelamik bukni, ton ninye ara, sal babye, kilapu babye, Yesus diba tenebuka tabaknin balamik akarye, minop talak, Yesus ati dib tenelamik nang ap, tabaknin balamikura, Yesus ati dib tenelamik nang yupa ara, weik kipnin balamuk.

15Yesus wibuka deiamuk nang arye pia teleb pil dolamik ati, amutuku ulamik nang arye, uk dilamne ninye bobuka, aik dana-dana dolamik anye, bisik noutamak yangapdeiyamikak delilyangalamik. Ara, ‘Peterus el bisik baturye, uk dilamle ninye el kanya arye nun nong bolpipsutu ura, kweteipsetu’ tenen, uk dilamne ninye sik amsuna tokuka man ning alip delilyangalamik. 16Tonda, Yerusalem mutuku noutamak dana-dana ulamik ninye arye, uk talyamne nang ap, isa talima ak wekamnarye talyamne nang ap, anirya bulubuka anang dam boyangalamikura, anang nirya kwetelilamik.

Yesus wibuka deibuk nang, yuk nang arye, sik nong deice ikin ning delilamik yupu

17Yahudi yala nang, sik Allah arena deiyok nang,#5:17a Allah el si erena ati arena deiyok nang ara, Allah el si eren aik pum pil dolamik. Sik deiyoknye lak len yupu, nomor 14 dipdelulume. sik weik deiyoknye ap, el melin nang ara, el yala nang arye elti, melyamik. Anang nirya ara, sik Saduki nang ulamik. Ura, Yesus wipdeiamuk nang arye, ninye winipmanto kum pil dolamika ati, anang arye sik yu ubuk ati sik talima wilildalamik. 18Winilamikce, Yesus wibuka deiamuk Rasul nang talibuka tapu koubik akarye, amutuku wenena aik dongobik. 19Wenena aik dongobik bukni, alukunyan noutamak arye, Allah el im deice pil donanye malaikat tonok yayukce, awenena aik buplan kukuk ak arye, anang nirya dobuka buru tam bobiyuk. 20Bobiyukura, ayupu nyabuk. “Anggun Yahudi yala nang Allah ati arilbalulum akarye el si erelulum aik#5:20 Allah ati arin aik, tonda, Allah el si erena aik ara, tonok aik uka. Anyaik ara, Yerusalem mutuku noutamak domikak ubuk. Anyaik ara, deiyok ara atonun. Ara Yahudi yala nang, sik malye winilamik ning dekna ati, kam un ning obukapnarye Allah arena ati, anyasik boyangalamikce, arilyangalamik. Winilamikce, anyaik pum Allah el si erelamik. Tonda, lak len yupu nomor 15 dipdelulume. damak binuka tikmunyak akarye sik awekmakce nang ati, Allah arye winiryuk kam una deiyok ning arepnamsila ati, ayupu nirya peterepnamlulume. Tonok yupu babye, ton kum bataknamalume,” nyabuk.

21Nyabukura, daunmeka ani, akunum berekukopura, Yahudi yala nang, sik Allah ati arilbalamik aik buru tam wiyamik poka wekukabikce, anyaik dam binuka wekmek. Wekmekce, Allah el im deice yupu lak lenanye nyapdeipmok touk, awekmek nang ati, deiyok koubuka peterenmek. Sik peterenmek talak ara, Yahudi yala nang sik Allah arena deiyok nang, sik weik deiyoknye ap, el melina nang ap, bulubuka wekikce, Israel nang sik du yapu#5:21 Israel ninye sik du yapu – Israel nang sik yala 12, yala yuk-yuk ulamik. Ayala-ayala yuk-yuk ning ara, sik wisi nang weik kel bikamikce, yupu lipsisikilin deiyok nang ulamik. Tonda, yupu bokolin deiyok nang ulamik. Israel ninye sik weik ninye deiyok nang ap, Allah arena deiyok nang ap wekuka, “Yupu talipnuyabe,” nyapne talak ara, awisi nang ap, ansinibuka weklamik. Israel ninye, sik wisi nang, tonda sik du yapu nyalamik ning ara, ananguk bukni, Yahudi yala ninye, sik yupu bokolina deiyok nang, Sandeheren nang ton nyanyabe. nirya, ara Sandeheren nang yukubikce, tonda sik amu tam pil dolamik nang ati ayupu nyabik. “Yesus wibuka deiyamuk nang wenena aik pum bisik dongopmapa ara, dobuka boyalulume,” nyabuka anang dopkwetebik.

22Dopkwetebikura, anang arye wenena aik pum binuka dipdeyikba, kum eibika ati, tamubuka Sandeheren nang unmekak binuka laka nyabik. 23“Wenena aik ara, buplan tirikin ning kunci arye tirikdongopmango touk upmoe, tonda, wenena aik kalekna nang buplan dam tuba kalikmong touk tuba upmangu ak, eipmabe. Eipmap bukni, buplan kuklobuka dipdeyap bukni, tonoknye babye, kum unmake,” nyabuka laka nyabik.

24Laka nyabikura, Yahudi yala nang sik Allah ati arilbalamik aik kalikina nang, sik deiyoknye ap, Allah arena deiyok nang ap, anyanmek yupu kekebikopura, teniltonauk unmekce, ‘Akunum winipmala ati aminyan talak, yata ning ton winipnamsil do?’ tenenmek. 25Tenenmeka ani, yuknye birye sik unmekak yanuka laka nyabuk. “Na kekenululume, anggunce wenena aik dongopmalum nang ara, nun Allah arinyap aik dam tikuka, awekmak nang ati peterenmak anya arye dipdelulume,” nyabuk.

26Nyabukopura, Allah el si erena aik kalikna nang, sik deiyoknye ap, el amu tam pil melina nang ap, anang peterenmekak binuka, anang dobuka tamubuka, Sandeheren nang wekmek aik pum tam delilyayik. Delilyayik talak ara, ‘Allah si erena aik dam wekmek nang arye, Yesus wipdeiyamuk nang arye peteremak yupu, telebe teneyaka anya arye, anang mikip arye tongobibyopura, akekenmek nang arye, keil dobuka opsikcak’ tenen, mikip kum asa nimalya mitanga aryuk dobuka boyayik.

27Boyayikopura, Allah arena deiyok nang, sik weik deiyoknye birye, Yesus wibuka deiamuk nang ati, ‘Wenebuka asipdenul’ tenen, Sandeheren nang dam delilyayik. 28Delilyayikura, adeiyoknye birye nyabuk. “Nunce, ‘Yesus si deice tonap kum peternamlume,’ nyapmapu ning ara, ‘Peterena kum arye, talyeuk unamlum’ tenen, weik arye wenebuka nyapmapu. Nyapmapu bukni, anggunda, pia tuba peterenuk wininmalumbuk, Yerusalem unyak ninye weik tonap, kekenmake. Tonda, Yesus obik ning deiyok nirya ara, Sandeheren nang, sik nong deice deipminyopura, yuk nang arye, ‘Sandeheren nang, Yesus obika deiyok nang ara, anang akunuma, tenepnamak’ tenen, tenepmasulumce, tuba peterelulum do?” nyabuk.

29Nyabukura, Peterus ap, Yesus wibuka deiamuk Rasul nang, yuk nang nirya ap arye, tamubuka nyabik.

“Nunda, ninye yupu kuma. Allah el yupu uk kekebuka dobolbanamabe. 30Anggun yupu arye nyapluma ati, yuk nang arye Yesus wanwanun yo deice deibikura, obike. Deiyok ara, anggunca. Winiplum bukni, nun apu yapu talyamikce, si erelamik Allah arye, Yesus tamubuka kam bukeibuk.

31Yesus ara, Weik Ninye Deiyoknye#5:31a Weik Ninye Deiyoknye nyabik ning ara, Allah arye Yesus tamubuka kam bukeibukce, aning-aning deice tam deibukura, elda weik mikip ulirye, aning-aning nirya talilule. Ayupu laka nyana ati, lak len yupu nomor 16 dipdelulume. una ap, ninye mutuku-mutuku nirya, Lyena Deiyoknye#5:31b Ninye Lyena Deiyoknye Alkitab noutamak ara, Lyena Deiyoknye sekenyaka ara, ton talak Allah tenena ati sekenyake. Ton talak ara, Yesus tenena ati sekenyake. Bukni, deiyok ara, Yesus el ining arye kilipsuka deice arye, Allah arye lyesulule. Lukas arye, Yesus biti ayupu sekuk. Tonda, lak len yupu ara, nomor 17 dipdelulume. una ap, ‘Unamle’ tenen, Allah arye Yesus dobuka, el sirik taruk tam erebuka deibuk. Ara Allah arye, Yesus pil dobuk deice arye, Israel ninye lyeplirye, sik malye wininyak ning batakikirye, balye tamubikcopura, ‘Na Allah arye, sik malye wininyak ning nirya kum kipdeipnamne’ tenen, Allah arye el sirik taruk tam Yesus erepdeibuk.

32Nunda, Allah arye Yesus tamupra kam bukdeibuk ning nirya dilamuba arye, yuk nang ati, laka nyanyabe. Tonda, nun ap, Allah El Dib Kanye ap arye, ayupu laka nyanyabe. Allah el yupu uk kekebuka dobolbanyak ninye nirya ara, Allah El Dib Kanye, akunum dopkwetepsuk ati, diba tenebiceura, Allah El Dib Kanye, aresulule.”

Yesus arye wipdeiamuk nang nirya arye sik Sandeheren nang ati ayupu nyabik.

33Nyabikopura, ayupu kekenmek nang nirya arye, yu weik ubukura, ‘Anang opnamabe,’ tenebik. 34Utenebik bukni, tonok Farisinye,#5:34 Farisi nyalamik ning ara, Allah arye minop talak ‘Wininamlulume, aning ara kum wininamlulume,’ nyalamuk yupu Musa arye sekeiamuk yupu peterena deiyok nang ulamik. Ayupu ara weikto arye kel bikamik. Tonda laka nyana yupu nomor 10 dindelelume. el si ara, Gamaliel, ara, amutuku nang nirya si erebuka kisal dolamiknye birye aSandeheren nang wekmeka noutamak arye tikukabukce, yuk nang ati, “Yesus wibuka deiamuk nang dobuka buru tam bobinapmunya ani, tamubuka boyanululume,” nyabuk. Gamaliel ara, Musa el sekamuk yupu peterena deiyoknye ulamuk. 35Gamaliel arye, “Buru tam bobilulume,” nyabukopura, anyaik tuba wekmek nang, Sandeheren nang wekmeka ati, ayupu nyabuk.

“Na kayapo Israel nang deiyok nango, ayupu peterena nang ati, ‘Winipnamabe,’ tenepmalum ning ara, moubuka tenipdelulume ara, ‘Talye ati malye winipmunyak’ tenen, nyapsine.

36Orkiting tamun unmaputo talak arye, tonoknye, el si ara, Teudas, weiknye erebuka tikamukce, ‘Nara, weiknye,’ nyalamukbuk, ninye yupa weik 400 nang atonun, el yupu uk kekebuka dobolbalamik. Winilamik bukni, yuk nang arye Teudas obikura, el melibuka dobolbalamik nang nirya, ‘Bilulume,’ nyabuka yakika ati, bokuka yuk-yukak bindobikbuk, awinilamik ning kum dayuk.

37Yudas kum dayukura, aminyan talak ara, Galilea tamnye, el si ara, Yudas, ninye si nukuka sekamik talak arye, sisinanye erebuka tikuk. Sisinanye erebuka tikuk akarye, el yupu nyalamukbuk, ninye weik, ‘Amutuku talisinyak nang obuka bisipnamap’ tenen, bululamik. Ura, yuk nang arye el babye, obikbuk, el melibuka dobolbalamik nang nirya bokuka yuk-yukak bindobik.

38Sik winilamik ning nirya kum kibuka ati, wini talak ayupu peterenmak nang ati, anyapnusine. ‘Anang opnamap’ tenen, warikina bataklulume! Anang ara, ur talye batakdongoplulume! Sik dib tenelamak ning ap, sik wininamak ning ap, sik bidamnang kanye aryuk winilamiceura, nong kum upnamle. 39Bukni, sik awininyak ning ara, Allah mikip deice arye winilamiceura, anggunce anang ati kum sekdongoptume. Awininamak ning ara, Allah el mikip deice arye winilmatingtoura, aminyan talak, nun mankau arye Allah ati yanipmanto uptibye. Aning moupra tenepnamlulume.” Gamaliel arye ayupu nyabuk.

40Gamaliel arye ayupu nyabukopura, Sandeheren nang awekmek arye, ‘El dipkoprop nyanmasile,’ tenebik. Utenebikce, sik yukubikura, Yesus wibuka deiamuk Rasul nang dobuka, anyaik pum yanuka deibikopura, Sandeheren nang arye nyabikura, yuk nang arye Yesus wipdeiyamuk nang ati kama arye obik. Akunum kama arye obikopura, Sandeheren nang arye Yesus wipdeiamuk nang ati nyabik. “Yesus si deice tonap kum peternamlume,” nyabuka wenebikce batakdongobik.

41Batakdongobikura, Yesus wipdeiamuk nang Sandeheren nang wekmek ak batakuka yukak biyikopura, utenebik. E sik Sandeheren nang arye, ‘Yesus ap, Yesus el si ap ati, nun like. Ati anang onmabe,’ tenepmasiakce, opmasiaka ati, ‘Allah arye nunti kanye deipmasila ati, opmasiaka babye, telebuka,’ tenebikce kanye deibuka kil-kil asa biyik. 42Asum-asum nirya Yahudi yala nang Allah arilamik aik dam ap, aik yuk-yuk ap, peterepra balamikce, ayupu peterenmek. “Allah arye, ‘Ninye Lyeplirye, talipnamle’ tenen, wipdeiamuknye, Mesias bira, ara, Yesus el uka,” nyabuka laka teleb yupu ninye lyen yupu peterena ap, laka nyana ap, tonok ton batakana kumce, pia tuba-tuba peterenauk ulamik.

Currently Selected:

Rasul 5: EIPA

Highlight

Copy