Rasul 4

Yuk nang arye Peterus ap, Yohanes ap dobuka, Sandeheren nang dam bobiyikura, sikce nyaprik yupu

1Peterus ap, Yohanes ap, yok kwanyamuknye kweteprikura, awekuka dinmek nang tuba peterenmarik talak ara, Yahudi yala nang Allah arena ati deiyok nang ap, tonda, Yahudi yala nang, sik Allah ati arilbalamik aik kaliklamik nang#4:1a Allah arin aik kalikna nang ara, aning kel kina ati, laka nyana yupu nomor 8 dipdelulume., sik deiyoknye apura, sik Saduki nang#4:1b Saduki nang ara, Yahudi yala deiyok nang ulamik bukni, sik anang ara, ‘Ninye akunum dibicopura, tamubuka kam kum buknamake,’ tenelamik. Tonda, lak len yupu nomor 9 dipdelulume. tonok-tonok ap, anang nirya arye Peterus ap, Yohanes ap, peterenmarikak yayik. 2Yayikura, abitinye nang arye, “Nun kele. Yesus dibukba, Allah arye kam bukeibuk ati, yatanye do, Allah yupu dib tenen ninye nirya dibicopura, aminyan talak Allah arye tamubuka kam bukeipnamle,” nyabuka peterenmarik anyak, kekebikura, sik Saduki yala nang arye kekebikura, sik talima ak yu ubuk ati, ‘Ayupu ara, nun like’ tenen, sik kanye talima tulum weik ubuk. 3Tulum ubukura, Peterus ap, Yohanes ap talibik. Talibik talak ara, akunum inibuka ati, anang dobuka wenena aik#4:3 wenena aik lak len yupu ara, nomor 11 dipdelulume. pum tam dongobikura, mapmarik.

4Sik Saduki nang arye dib kum tenebik bukni, sik peterenmarik yupu kekenmek nang ara, yupa weik diba tenebik akarye, Yesus minyuma dib tenelamik nang ap, tabakuka yupa weik pamubarye ribu (5.000) nang kibik. 5Anang sik mapmeka berekukopura, Yahudi yala nang, sik deiyok nang ap, wisi nang ap, Allah arye, ‘Wininamlulume, aning kum wininamlulune,’ nyapdeiamukba, Musa arye sekeiamuk yupu, mem yupu peterena deiyok nang ap, ara Yerusalem mutuku yupu talipnuyika ati, tonok aikuk bulubuka wekik.

6Ura, Yahudi yala nang, sik Allah arena nang, sik weik deiyoknye#4:6 Allah ati arena deiyok nang, sik weik deiyoknye ati, laka nyana yupu nomor 14 dindelelume. el si Hanas ap, el yala tam nang ap, tonda Kayapas ap, Yohanes ap, Aleksander ap, sik nirya wekmek. 7Wekmek akarye, sikce nyabikura, yuk nang arye Peterus ap, Yohanes ap, wenena aik pum arye dobuka yana deibikura, deiyok koubuka yupu asipdeyik. “Anggunda ayok kwanyamuknye kwetepdeipmarum ning ara, yata ning si deice arye do? Yata mikip deice arye kwetepdeipmarum do?” nyabuka asipdeyik. 8Asipdeyikura, Peterus arye Allah El Dib Kanye minop arye wekamuk anya arye, atalak langdibuka dinibuk deice arye ayupu nyabuk.

“Telebe na kayapu. Nun Yahudi yala nang na ni yapu ap, nun yupu lipsisikna ati wisi nang ap, anggunti telebe nyapsine. Anggun nirya kekepnuse. 9Nunce ayok kwanyamuknye bico upsu ati, kwetepdeipmanam ning ati, yukupmasulum akarye nun wenepnusulum ning ati ara, tonda, ‘Yata deice arye anye kweteipmarum do?’ nyabuka asipdenusulum ning ap, anggun nirya ap ara, nun Yahudi yala deiyok nang ap, Israel ninye nirya ap, na nyapnusin yupu moubuka biknulume.

10Nasaretnye Yesus Kristus, anggunce wanwanun yo deice oplumura, dipmok bukni, Allah arye kam bukibuknye bira, el si mikip deice aryuk, yok kwanyamuk bukni, atikmalanye kwetepmal ak, pia teleb kibuka unmal anyak anggun elinmalume. 11Allah el yupu laka nyalamuknye Daud arye, aYesus ati nyapdeiamuk domon yupu ani.

‘Anggun kel aik dona deiyok ninye arye batakamlum keil ara, winira mambul geil#4:11 Keil aik – Minop talak ara, sik Yahudi yala ninye weik keil dobuka, sik asik dolamik. Adomon yupu noutam ara, mambul keil nyapdeibuk ning ara, Yesus ati nyabuk. pia teleb ning akunum upmale.’ (Mazmur 118:22)

12Yata nang arye do nirya, nun kum lyepsitinge. Yesus elcuk lyepsutue. Allah arye ninye si mutuku sirya im sirya areamsuk nirya ara, adeice arye tonok babye ton kum lyepsutue. Yesus el si mikip deice aryuk lyeipsitue. Yesus elcuk lyesulule.” Peterus arye nyabuk.

13Peterus arye nyanmokura, akekenmek nang arye, Peterus ap, Yohanes ap, sik ilil kum arye mikip aryuk wininmarikak eibikopura, ‘Anang ara, sekolah deice arye kum kel bikamrik nang, sik talye nang ururake,’ tenebikce lukdayik bukni, ‘E ara, Yesus ap, abitinye nang ap, neika ulamika deice arye, mikip yupu arye nyanmasirake,’ tenebik. 14Sik Yahudi deiyok nang arye, ‘Yan kwanyamuk anyak buk akunum kwetepmarik ning ara, nun like,’ tenebik. Utenebik bukni, yok kwanyamukak akunum kwetepmariknye bira, mening dam tikmokak akunum teleb upmokba, eipmek ati, yupu tonap, kum nyapmanto ubik. 15Winibik akarye, Peterus ap, Yohanes ap ati, “Nun Sandeheren#4:15 Sandeheren nang ara, kel kina ati, lak len yupu nomor 12 dipdelulume. nang aik wekmap aik pum arye buru tam birurume,” nyabikura, sik adiparyuk birik talak ara, awekmek nang arye yupu talinmek.

16Yupu talipdayik akarye ayupu nyabik. “Abitinye nang ara, yata wiripnamap do? Ara, sik bitinye nang arye, pia nun kum elinyap ning, winipman kum pil dopmarak anyak, nun Yerusalem mutuku unyap ninye akunum kel bikmapa ati, ‘Aning ara dipkoprop kum ulule,’ kum nyaptibye. 17Bukni, sikce Yesus ati ayupu nyapdiceura, yuk nang kekebikirye, ‘Kel kibicak’ tenen, sekelongona ati ara, abitinye nang ati nyapnuyabe. ‘Yesus el si deice arye, yuk nang kekenak, tonap kum peterenamlurume,’ nyapnuyabe,” nyabik.

18Nyabik akarye, Peterus ap, Yohanes ap, buru tam binmarika ati, anang yukubikura, aik pum akunum yarikopura, ayupu nyabik. “Yesus si deice ap, el mikip deice ap ara, ‘Yuk nang kekebikirye kel bikicak’ tenen, tonap pia kum peternamrurume,” nyabuka wenebik. 19Nyabuka wenebik bukni, Peterus ap, Yohanes ap, sikce tamubuka nyaprik. “Anggun bidamnang tenebuka wipnalume. Allah el kanye pia teleb tenesilye ning ara, anggun deiyok nang arye nyanmasulum yupu kekebuka dobolbanamap do?

Allah arye elce nyalisulul yupu kekebuka dobolbanamap do? Ati, ‘Teleb winina ara dan ning do?’ tenen, anggun bidamnye tenepnululume. 20Ara, nun eibupe ning ap, kekebupe ning ap, peterenamne ning ap ara, kum batakdongoptinimnye. Ara, kum winipmanto. Pia peterenamnam atia,” Peterus ap, Yohanes ap arye sik Sandeheren deiyok nang ati nyaprik.

21Ura, sik winipman kum pil dopmarik ak, Allah arye yok kwanyamuk anyak kwetebuknye bira, keting tahun yupa weik 40 tahun akunum wisi deiamuka ati, amutuku ulamik nang nirya arye Allah ati, “Allah anda pia teleb,” nyabuka el si erenmeka ati, aSandeheren deiyok nang arye, ‘Abitinye nang ara, nunce yata wiribuka obuka weneptibye do?’ tenen, teniltonauk unmek. 22Wininmekce, Sandeheren wekmek nang arye, ‘Peterena bataknamdak,’ tenebikce, “Tuba peterepdumunyopura, nunce opnamsiyape,” nyabuka, yupu weik tonap wenebikopura, lopdongobik.

Yesus dib tenelamik nang arye, Allah morobik yupu

23Akunum loplobikopura, Peterus ap, Yohanes ap, sik dib tenebuka neika ulamik nang dam tamubuka birikopura, Yahudi yala nang sik yupu lipsisikuka bokolina deiyok nang ap, Allah arena weik deiyok nang ap arye, wenepmek yupu nirya laka nyaprik. 24Laka nyaprikura, anang kekebikce, sik nirya arye neika Allah moronmek. Sik moronmek yupu ara, ani.

25“Nun ni Allah, ance nyaplumura, Allah an Dib Kanye arye ayupu dobuka an melyamkuknye nun apu Daud, el talima ak nyapdeibukura, Daud arye ayupu nyabuka sekamuk.

Yahudi yala kum nang mutuku sirya im sirya nirya arye, yu upmala ati, ‘Winipnamap’ tenen, yupu talyeuk sisikinmaka ara, yata deiyok ati do? 26Mutuku-mutuku nirya weik ninye deiyok nang, Raja nang ap, ninye talinyak deiyok nang ap arye, mikip kibuka erebuka tikmakce, ‘Nun ni Allah ap, elce ninye mutuku-mutuku nirya lyeplirye, talinamle’ tenen, wibuka deiamuknye, ara, Mesias#4:26 Mesias nyalamuknye bira, Yesus ati laka nyalamuk. Aning atouk ayat 20 ton aupmale. ap ati, ‘Opbisipnamap’ tenen, bulubuka wekmake.” (Mazmur 2:1-2)

Nyabuka moronmek. Daud arye sekamuk yupu dobuka Allah moronmek nang nyabik deice arye ayupu ton moronmek.

27“Ara, Daud arye nyapdeiamsuk touk, dipkoprop Herodes ap, Pontius Pilatus ap, Yahudi yala kum ninye babye, Yahudi yala ninye ababye, anang ap, Yerusalem mutuku bulubuka wekik akarye, ‘Obisipnamap’ tenen, an yupu uk kekebuka, an piluk melibuka mambul pil dolulnye Yesus ati, yupu sisikinmek. Anye Yesus ara, ance wipdeiamlum akarye, ‘Ninye lyepnamle’ tenen, erepdeiamlumnye biti, yupu sisikinmek. 28Minop talak, an mikip arye, ‘Winipnamak’ teneplum touk, aninguk Yesus ati akunum winibik. 29Bukni, wini talak ara, anang aryuk nunti, ‘Opnamsiabe,’ nyanmasiak ara, an kekelaminyak arye dinamsilame. An piluk melibuka donyap nang ara, ance melisiminyeura, nun ilil kum asa weik mikip arye, ‘An yupu talye mangkau peterepnamap’ tenen, moropkiayape, nun ni Allah.

30An mikip deice arye ninye kwetena ap, ninye kum winipmanto pil ap, mambul pil dobipyeba yuk ninye eibikirye, ‘Se, dipkoprop Allah aryuk apil donmasile,’ tenen, tenepmanto pil ap, ‘Ance donamsilyama’ tenen, moropkiyabe. Ara, an piluk dobuka, an Melinanye Yesus, el si deice aryuk, ‘Apil domasile’ tenen, moropkiyabe, nun ni Allah.”

Ayupu nirya Yohanes ap, Peterus ap, Yesus ati dib tenelamik kili sal ap, arye nyabuka Allah ati moronmek.

31Akunum morobikopura, sik bulubuka wekmek aik nirya, weik arye long-long abukura, Allah El Dib Kanye sik talima ak nirya wekukura, langdibuka talyamuka deice arye, sik nirya arye ilil kum asa weik mikip arye deiyok koubik akarye, Allah el yupu peterelamik.

Yesus dib tenelamik nang, sik talyamik ning arildalamik yupu

32Amutuku dib tenebik nang ara, sik kanye talima imun ulamuk ning ap, sik kanye tenelamik ning ap, neika ansinibuka, sik talima dukdongobuka ulamik. Tonoknye babye ton, el talyamne ning ati, ‘Ara pia na dokola,’ kum tenelamik. Aning pia kum tenelamik bukni, sik talyamik ning nirya melibuka talye arildalamik. 33Yesus el wipdeiamuk Rasul nang arye, Yesus el kam bukukura, eibik ati, mikip deice arye nun ni Yesus el kam bukuk yupu pia teleb kibuka yupu peterepra balamik. Tonda, apeterelamik nang babye, talye yuk ninye Yesus ati dib tenelamik ninye babye, Allah arye weik melilamuk.

34Atalak ton, atalak ton sik aik ap, wa tuku ap, talyamik nang arye, Yuk nang ati aning dekuka dololamik yo bok ara, Yesus wipdeiamuk nang ati arilyangalamik. Ara, ‘Anang arye aning bokuka patalamne ninye arepnamak’ tenen, arilyangalamik. 35Winilamika ati, adib tenelamik nang, sik kan-kan arye aning-aning nirya patalamne ninye tonok babye, dina kum ninye babye, ton kum patalamuk. Sik nirya arye Yesus wipdeiamuk Rasul nang ati, ayo bok arilyangalamikce, sikce Yesus dib tenebik nang patalamne ning ati, sik patalamuk touk bokuka arildalamik.

36Awa tuku dekuka doprobuk yo bok ara, Yesus wipdeiamuk Rasul nang dam yanuka aribuk. Yusuf ara, Yesus elce wipdeiamuk Rasul nang arye, el si ati ton Barnabas#4:36 Barnabas ara, el tonok bukni, el si ati bitinya si silamik. Barnabas ara, Yesus arye 12 nang wipdeiyamuk talak ara, Barnabas ap, kum wipdeiyamuk bukni, aminyan talak, el babye diba tenebukce, Yesus wipdeiyamuk nang pil dolamik touk, el babye apiluk dolamuka ati, sikce elti, “Nun neika unyabe,” nyalamik. Ara, Allah arye Barnabas dopdeibukura, elce Allah yupu dobuka peterelbalamuka ati, sikce nyalamik. nyalamik. Sik yupu deice arye ninye si ‘Barnabas’ nyalamika deiyok ara, Ninye Talima Kwadinanye ati nyalamik. 37Yuk nang winilamik touk, Lewi#4:37 Lewi yala nang ara, Allah si erena aik pum pil deiyok nang ati melilamik. yalanye tonok, Siprus mutuku, ara laut mekwen dana-dana tam sekdongamuk mutuku deiamiknye bira, el si Yusuf, el si ton Barnabas, elce ton wa tuku talyamuka dekuk.

Currently Selected:

Rasul 4: EIPA

Highlight

Copy