मर्कुस 14
14
इसुहेङ सेअ्लि खाङका
(मत्ति २६:१-५; लुका २२:१-२; युहन्ना ११:४५-५३)
1साउरि माह्वाअ्का तोले चाका लाअ्पिका पारबाखान्तेङ लाम्फा इसु यरुसलेमता लोहि। मुल धामिगेलाइ रो धरममास्टरगेलाइ इसुहेङ सिकापा रिम्तेङ सेअ्लि दाउ भोदोङ घाखे।#दामालाअ्का १२:१-२७ 2हाइदोनु एम्बालाइ दोअ्का हिघाहि, “पारबाको पहरता माको, माकोनुते द्याङगेलाइता हुलदाङगा ल्होकावा।”
इसुको पुरिङता बेबाल आतर हुपिका
(मत्ति २६:६-१३; युहन्ना १२:१-८)
3इसु बेथानियाता रोग्याल्होका सिमोनको साअ्ता हानेहि। वा चाकाताङपालाउ एमि बेबाल रेम्का उन्ठुइको सिसिता हेन्जा जाङका आतर चुमतेङ लोहि। इङको हाइदोङ मामिसालाइन्हाका हेन्जाङ जाङका आतर जटामसि दोअ्का सिङसो बान्हाइका हिघाहि। वा इङको सिसि दोङ भोइतेङ इसुको पुरिङता हुपिहि।#लुका ७:३७-३८ 4कालाउ बुङ आधेमि चेर ताम्पातेङ ताताइमिता दोअ्लि तेङहि, “इदोइ जाङका मालामालाका आतर हाइपालि एसापा नास पाखे? 5भुरुङ इदोइ आतर सुमसाइ रुपाको टाकाखान्तेङ हेन्जाता पिअ्तेङ इङको टाका निरधनगेलाइहेङ पिलि दोधाङ।” कालाउ एम्बालाइ इङको बेबालहेङ हाप्काइहि।
6कालाउ बुङ इसु दोअ्हि, “जेङहोइ, हाइपालि नेलाइ यासिहेङ सानताइसुकेना? या काङको भाअ्सिङ एलोङ रेम्काङ काम पाकाहि। 7हाइदोनु निरधनगेलाइ ते नेलाइदोफा जेलाउ ह्यावा कालाउ नेलाइ ओबालाइको जेलाउ बुङ भलो पालि दोअ्स्वाना। कालाउ बुङ का ते दिनाङ नेलाइदोसा माह्याङका।#नियम १५:११ 8इदोइ बेबाल जे पालि दोधाङ, इङकोङ पाका हि। या काङको जिउहेङ लिअ्लिको भाअ्सिङ लाम्फासोङ मालामालाका आतर लागाइपितेङ त्यार पाका हि।#१४:८ कुकरम मापासिङ सिकालाइहेङ यहुदिगेलाइ गोताङ सिकाजिउगेलाइता जाङका आतर लागाइ पिघाखे। 9जातिङको, का नेलाइहेङ दोअ्खा, गोताङ दुनियाता जेताजेता इदोइ रेम्काबानाल पारचार पावा, इदोइ बेबाल जे पाका हि याको फोमपालिको भाअ्सिङ इदोइ कामको बाखिन पावा।”
यहुदा इसुहेङ रिम्पालि राजि जेङका
(मत्ति २६:१४-१६; लुका २२:३-६)
10इसुको तेन्हे चात्यागेलाइता एमि यहुदा इस्करियोतचाहिँ इसुहेङ रिमपातेङ एम्बालाइको खुरता पिलिको भाअ्सिङ मुल धामिगेलाइकोता हानेहि। 11एम्बालाइ इदोइ हिङतेङ लेङचाहि रो इङकोहेङ टाका पिलि राजि जेङहि। कालाउ यहुदा इसुहेङ हेसापा रिम्पालि दोअ्तेङ दाउ भोलि तेङहि।
इसु चात्यागेलाइदोफा न्हुअ् भात्यार चाका
(मत्ति २६:१७-३०; लुका २२:७-२३; युहन्ना १३:२१-३०; १ कोरिन्थि ११:२३-२५)
12साउरि मामिसालाइका तोले चाका पारबाको लाङदिनाता, जेलाउ एम्बालाइ लाअ्पिका पारबाको पान्ठा भोक पिघाखे। कालाउ इसुको चात्यागेलाइ वासेहेङ हिअ्हि, “नाङको लाल्सा हाइ हि? केलाइ हिता हानितेङ नाङको भाअ्सिङ लाअ्पिका पारबाको भात्यार त्यार पालि?”
13कालाउ इसु ताइको चात्यागेलाइता न्हेमिहेङ एसा दोअ्तेङ दिङगिल्हि, “पुरता हानेसु, इन्ता नेलाइ घाइलाता चि फातेङ एमि द्याङ हानितेङपाका दुसुस्वाना। वासेहेङ पिताइतेङ हानेसु। 14इङको द्याङ जेता दुलावा इङको साअ्को गिह्रिहेङ दोअ्सु, ‘मास्टर दोअ्खे, काङको चात्यागेलाइदोफा लाअ्पिका पारबाको भात्यार चाका काङको बानसालाइ कोठा हिता हि?’ 15वा नेलाइहेङ साजाइतेङ ताअ्का र्हुताको तालाता एलोङ फाराका बारा कोठा तिम्पावा। इन्ता नेलाइ केलाइको भाअ्सिङ भात्यार त्यार पासु।” 16कोलाउ इङको चात्यागेलाइ हानेहि रो पुरता दुल्हि। कालाउ इसु एम्बालाइहेङ दोअ्काभाइपाङ निङहि। इङकोन्हुअ्सो एम्बालाइ लाअ्पिका पारबाको भात्यार त्यार पाहि।
17बेल्हालाउ इसु ताइको चात्यागेलाइदोफा थुकालिलोहि। 18ओबालाइ चाकाताङ पालाउ इसु दोअ्हि, “जातिङको का नेलाइहेङ दोअ्ताङका, नेलाइता कादोफा चाका एमि कासेहेङ रिम्पावा।”#ले ४१:९ 19इदोइ हिङतेङ एम्बालाइ मन तु:पातेङ पालापा इसुहेङ हिअ्लि तेङहि, “हाइ इङको का हिघा?”
20वा एम्बालाइहेङ दोअ्हि, “तेन्हेता एमि, जाइ कादोफा थालिता तोले चोदोङखे। 21हाइपानु का द्याङको चानहेङ वाको बारेता लेखेकाभाइपाङ ज्यावा, कालाउ बुङ धिकार इङको द्याङहेङ जाइसो का द्याङको चानहेङ रिम्पावा। इङको ते भुरुङ जोलोम माजेङलाउ बुङ रेम्का जेङधाङ।”
22चाकाताङपाका पहरता इसु तोले र्हुहि, सहसाम्पा पितेङ तोले पेङहि रो चात्यागेलाइहेङ पितेङ दोअ्हि, “र्हुसु, इदोइ काङको जिउ एइ।” 23कालाउ इसु बाति र्हुतेङ च्याबास पिकान्हुअ्सो चात्यागेलाइहेङ पिहि रो एम्बालाइ झाराङ इङकोसो आम्हि। 24आरोङ इसु एम्बालाइहेङ दोअ्हि, “इदोइ नावा केराको काङको हिति एइ, जाइ हेन्जाङको भाअ्सिङ झोपावा।#दामालाअ्का २४:८; यर्मिया ३१:३१-३४ 25जातिङको, का नेलाइहेङ दोअ्खा, का आङगुरको निघारसो इङको दिना थिकापा मामाआमाङका, जेलाउथिकापा सादेलको सारभिता इङको नावा पातेङ माआमाङका।” 26कालाउ एम्बालाइ एलोङ ले लेतेङ जाइतुन आरदाङभारि हानेहि।#१४:२६ सिकासाजाइ निङका यहुदिगेलाइ दिलिमाको उमचातेङ लेगेलाइ लेघाखे।
पत्रुस इसुहेङ नामन्जुर पाका
(मत्ति २६:३१-३५; लुका २२:३१-३४; युहन्ना १३:३६-३८)
27इसु चात्यागेलाइहेङ दोअ्हि, “नेलाइ झाराङ कासेहेङ लाअ्तेङ खाअ्स्वाना, हाइपानु इसिका लेखेका हि:
‘का घोकालाइहेङ दान्हायाङका,
भेरागेलाइ इसोओसो जेङतेङ खाअ्तावा।’#जकरिया १३:७
28“कालाउ का सिन्हुतेङ ल्होकान्हुसो का नेलाइखान्तेङ लाम्फा गालिलता हानाङका।”#मत्ति २८:१६ 29पत्रुस इसुहेङ दोअ्हि, “झाराङ लाअ्तेङ खाअ्लाउ बुङ का नासेहेङ हेअ्लाउ बुङ मालाअ्ताङका।”
30इसु पत्रुसहेङ दोअ्हि, “जातिङको, का नासेहेङ दोअ्ताङका, नानिकोङ दिलिमा न्हेखे धाङगाइ ओका लाम्फा ना कासेहेङ सुम्खे मानाल्खा दोअ्ताना।” 31कालाउ बुङ पत्रुस बल पितेङ दोअ्हि, “नादोफा सिलि गोइलाउ बुङ का नासेहेङ मानाल्खा मादोअ्ताङका।” कालाउ बो झाराङ चात्यागेलाइ बुङ एन्साङ दोअ्हि।
गेतसमनि बागाइचाता इसुको पुकार
(मत्ति २६:३६-४६; लुका २२:३९-४६)
32इङकोन्हुअ्सो ओबालाइ गेतसमनि दोअ्का थामेता हानेहि रो इसु ताइको चात्यागेलाइहेङ दोअ्हि, “का पुकार पापाधाउ नेलाइ इताङ हिसु।” 33कालाउ बुङ वा पत्रुस, याकुब रो युहन्नाहेङ दोफाङ चुमपुहि। कालाउ वाको मन तु:तेङ हेन्जाङ छिटपिटाइलि तेङहि। 34इसु एम्बालाइहेङ दोअ्हि, “काङको कोन्धाङ सिकाथिकापाङ पिरसो तुलबुल जेङका हि। नेलाइ इताङ हिसु रो नाङघातेङ हिसु।” 35कालाउ इसु आसा ओसो हानितेङ भोनोता तिर्होथोहि रो एसा दोअ्तेङ पुकार पालि तेङहि, “जेङलि दोनु इङको तु:को पहर कासो हानाको।” 36आरोङ वा दोअ्हि, “ओइ आबा, ना गोताङ काथा पालि दोखेना। इदोइ तु:को बाति कासो लाअ्पापि। कालाउ का लाल्सा पाकाभाइपा माको, ना लाल्सा पाकाभाइपा ज्याको।”
37इसु लोलाउ एम्बालाइ निन्धातेङहिका तिङहि रो वा पत्रुसहेङ दोअ्हि, “सिमोन हाइ ना निन्धातेङहिन्हा? हाइ ए घान्टा बुङ मानिन्धासिङ हिलि मादोन्हाना? 38मानिन्धासिङ हिसु, कालाउ पुकार पासु रो नेलाइ जाचता मापरेसु। हाङसा ते जातिङको त्यार हि, कालाउ बुङ जिउ खिनिङ बल मान्थुका हि।”
39आरोङ हानेतेङ इसु दोर्हाइतेङ इन्ताङ पुकार पाहि। 40आरोङ लोतेङ वा एम्बालाइहेङ निन्धातेङहिका तिङहि, हाइदोनु एम्बालाइको मिँ निन्धासो हेलिङ मादोहि रो वासेहेङ हाइ दोअ्लि इङको मागेहि।
41इसु सुम्खे लोतेङ एम्बालाइहेङ दोअ्हि, “हाइ नेलाइ आरोङ बुङ जिम्तेङ निन्धाङसुखेना? एला जेङहोइ, पहर थुकालिलोहोइ। खाङसु, का द्याङको चान निठुरिगेलाइको खुरता रिम निङचालि तोम्का हि। 42ल्होसु, हानाइने। खाङसु, कासेहेङ रिमपाका भेर्पाङ हि।”
इसु रिम निङचाका
(मत्ति २६:४७-५६; लुका २२:४७-५३; युहन्ना १८:३-१२)
43इसु धुइकाताङपालाउ तेन्हे चात्यागेलाइता एमि यहुदा ओदोङघरि इन्ता देखाल पिहि। वाको दोफा लाठि रो काति चुमका द्याङगेलाइ बुङ हिघाखे। एम्बालाइहेङ मुल धामिगेलाइ, धरममास्टरगेलाइ रो आगुवागेलाइ दिङगिल्का हिघाखे। 44इसुहेङ रिम्पाका यहुदा इङको द्याङगेलाइहेङ एसा दोअ्का हिघाहि, “जाइहेङ का चुमायाङका, वा दोङ इसु एइ, इङकोहेङ रिम्सु रो घेराइतेङ चुमपुसु।” 45कालाउ यहुदा सारासरपा इसुकोता हानितेङ, “मास्टर सेउपाखा” दोअ्तेङ वासेहेङ चुमाइहि। 46कालाउ एम्बालाइ इसुहेङ रिम्हि। 47इन्ता भेर्पा जाअ्तेङहिकालाइता एमि काति होअ्तेङ बाराका धामिको बान्धाइतिहेङ पाल्तेङ वाको न्हातोङ पुक्का पापिहि।
48इसु एम्बालाइहेङ दोअ्हि, “हाइ नेलाइ एलोङ डाकुहेङ भाइपाङ काति रो लाठिसुदाङ चुमतेङ कासेहेङ रिम्लि लोका हिसुन्हा? 49दिनादिनाङ थानता धिरपातेङ का नेलाइदोफा हिघाखा, नेलाइ कासेहेङ मारिम्सुन्हा? कालाउ बुङ धरमकिताबता लेखेन्हाका काथा पोङघाको।”#लुका १९:४७; २१:३७ 50इदोङघरि झाराङ चात्यागेलाइ इसुहेङ लाअ्तेङ खाअ्हि।
51एलोङ खिनिङ धाबा गुअ्का एमि धाना इसुहेङ पिताइहि कालाउ एम्बालाइ वासेहेङ बुङ रिम्हि। 52कालाउ वा ताइको धाबाङ लाअ्तेङ धाअ्हि।
इसु बाराकचहरिको आगाता
(मत्ति २६:५७-६८; लुका २२:५४-५५,६३-७१; युहन्ना १८:१३-१४,१९-२४)
53कालाउ एम्बालाइ इसुहेङ बाराका धामिकोता चुमपुहि रो इन्ता झाराङ मुल धामिगेलाइ, धरममास्टरगेलाइ रो आगुवागेलाइ जोम्तेङ हिघाहि। 54पत्रुसचाहिँ दुरेसोङ बाराका धामिको सालेङलिअ्ता इसुहेङ पिताइहि रो इन्ता पलटनदोफा योम्तेङ वा मे एम्लि तेङहि।
55एला मुल धामिगेलाइ रो बाराकासभाको झाराङ सदस्यगेलाइ इसुहेङ सेअ्लिको भाअ्सिङ वाको दासि भोहि, कालाउ बुङ हाइदोङ मानिङहि। 56हेन्जाङ द्याङगेलाइ इसुको खिलापता असत दासि पिहि। कालाउ बुङ एम्बालाइको पिका दासि मामिलिहि। 57आधेमि ल्होतेङ इसुको खिलापता एसा दोअ्तेङ दासि पिहि, 58“या एसा दोअ्का केलाइ हिङन्हाहि, ‘द्याङको खुरहोइ बान्हाइका इदोइ थान र्हाअ्ताङका रो खुरमाकोसिङ बानाह्याङका भेनेङ थान का सुम्निता जाअ्पाङका।’”#युहन्ना २:१९ 59कालाउ बुङ इदोइता बुङ एम्बालाइको दासि ए खालको मान्थुघाहि।
60कालाउ बाराका धामि माझाता जाअ्तेङ इसुहेङ हिअ्हि, “हाइ नादोफा हाइदोङ उतर मान्थु? इदोइ द्याङगेलाइ नाङको खिलापता दासि पिका हाइ कुनु?” 61कालाउ बुङ इसु सिकापा हि रो हाइदोङ उतर मापिहि। आरोङ बाराका धामि वाहेङ हिअ्हि, “हाइ ना जातिङकोङ परमेस्वरको चान ख्रिस्ट हिना?” 62इसु वासेहेङ जावाफ पिहि, “का हिघा, कालाउ एअ्नि नेलाइ का द्याङको चानहेङ सरबङहिका परमेस्वरको दाम्पाहा सिंहासनता हिका रो सादेलसो आदेलको बादेलता लोकाताङ पाका तिङस्वाना।”#दानिएल ७:१३ 63इदोइ हिङतेङ बाराका धामि ताइको धाबा थेअ्तेङ दोअ्हि, “एला केलाइहेङ बो दासिगेलाइको हाइ दरकार जेङहि कुनु? 64नेलाइ परमेस्वरहेङ बादनामि पाका ते हिङसुहोइना। ते दोसु, नेलाइको हाइ ठहर हि?” एम्बालाइ दोअ्हि, “या आपाराधिहेङ सेअ्लि दोङ गोयाङ।”#१४:६४ लेबि २४:१६ 65कालाउ आधेमि इसुहेङ थोअ्लि तेङहि रो वाको नुइ थुम्तेङ चाउरेतेङ दोअ्हि, “आगाधुइका धुइ।” इङकोन्हुअ्सो पालेगेलाइ वासेहेङ ताइको जिम्माता र्हुहि रो दान्हाइकाताङ चुमपुहि।
पत्रुस इसुहेङ मानाल्खा दोअ्का
(मत्ति २६:६९-७५; लुका २२:५६-६२; युहन्ना १८:१५-१८,२५-२७)
66पत्रुस लेता सालेङता हिलाउ बाराका धामिको कामत्या कामत्याइनिगेलाइता एमि इन्ता लोहि। 67पत्रुसहेङ मे एम्तेङहिका तिङतेङ वासेहेङ रेसितेङ खाङहि रो दोअ्हि, “ना बुङ नासरतको इसुदोफाङ हिघान्हा।”
68कालाउ बुङ वा माको दोअ्तेङ एसा दोअ्हि, “ना हाइ दोअ्खेना का ते हाइदोङ माबुझिघा।” कालाउ पत्रुस बाहारको मुल फिनु भारि हानेहि रो इङको दोङ घरि धाङगाइ ओहि।
69पत्रुसहेङ फिनुभेर्पा जाअ्तेङ हिका तिङतेङ कामत्याइनि इन्ता हिका द्याङगेलाइहेङ दोअ्लि तेङहि, “या बुङ एम्बालाइता एमि हिघाहि।”
70पत्रुस आरोङ माको दोअ्हि। इघुरिङन्हुअ्सो इन्ता जाअ्का द्याङगेलाइ आरोङ पत्रुसहेङ दोअ्हि, “पाक्काङ, ना एम्बालाइता एमि हिन्हा, हाइपानु ना बुङ गालिलि हिन्हा रो वाकोङ चात्याङ हिन्हा।”
71आरोङ बुङ पत्रुस केरा चातेङ दोअ्लि तेङहि, “जाइको बारेता नेलाइ दोअ्सुखेना इङको द्याङहेङ का मामा नाल्खा।”
72एन्सा दोअ्तेङसाङ न्हे खेप धाङगाइ ओहि रो पत्रुसहेङ इसुको दोअ्का काथा फोम लोहि, “धाङगाइ न्हे खेप ओका खान्तेङ लाम्फा ना कासेहेङ सुम खेप मामा नाल्खा दोअ्ताना।” कालाइ वा इङको काथा फोमपातेङ घोनोघोपा खारहि।
Currently Selected:
मर्कुस 14: DHIM
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
