मर्कुस 13
13
ओताका दिनाको चिनोगेलाइ
(मत्ति २४:१-२४; लुका २१:५-१९)
1जेलाउ इसु थान्सो ओल्हेदोङघाहि कोलाउ एमि चात्या वासेहेङ दोअ्हि, “खाङ, मास्टर, हेथे बाबारका उन्ठुइगेलाइ रो हेथे सोबाइका साअ्गेलाइ।” 2कालाउ इसु एम्बालाइहेङ दोअ्हि, “इता ते एलोङ उन्ठुइर्हुता भेनेङ उन्ठुइ मालाअ्सिङ गोताङ र्हाअ्तावा।”
3कालाउ इसु थान्को आगाता जाइतुन आरदाङता योम्तेङ हिलाउ पत्रुस, याकुब, युहन्ना रो अन्द्रियास लोतेङ वासेहेङ सिपापा हिअ्हि, 4“केलाइहेङ दोअ्, इदोइ गोताङ घाटानागेलाइ हेअ्लाउ ज्याङ? कालाउ इदोइ गोताङ काथा पोङघालि तोम्काहि दोअ्तेङ केलाइ हेसा गिलि?” 5इसु एम्बालाइहेङ दोअ्हि, “होसपातेङ हिसु, हासुङ नेलाइहेङ इन्तानाजालता मावाङपाको। 6हेन्जाङ द्याङगेलाइ काङको मिङता ‘का वा दोङ हिघा’ दोअ्तेङ लावा रो एम्बालाइ हेन्जाहेङ इन्तानाजालता वाङपावा। 7जेलाउ नेलाइ धुम रो धुमगेलाइको खलबल हिङस्वाना, कालाउ बुङ माथिसु। इसिका बारदातगेलाइ दरकार हि। इदोइ गोताङ बारदात जेङलि दोङ गोयाङ, कालाउ बुङ इङको दोङ पहर दुनिया न्हुअ् माज्यावा। 8हाइदोनु जात्याको खिलापता जात्या रो सारभिको खिलापता सारभि जाअ्तावा। थामेथामेता भुइचालगेलाइ हानावा रो आनिकालगेलाइ जेनावा। इदोइ ते जामाल जेङलाउ बेबालाइहेङ जेङका तु:को लाङ खिनिङ एइ।
9“नेलाइ ताइको बारेता होसपातेङ हिसु। एम्बालाइ नेलाइहेङ कचहरिता चुमप्वावा। नेलाइ कचहरिसाअ्ता दान्हाइनिन्चास्वाना। कालाउ हाकिमगेलाइ रो राजागेलाइको आगाता काङको भाअ्सिङ एम्बालाइहेङ दासि पिलि नेलाइ जाअ् स्वाना।#मत्ति १०:१७-२०; लुका १२:११-१२ 10इदोइ दुनिया ओताका खान्तेङ लाम्फा गोताङ जात्याको द्याङगेलाइहेङ रेम्काबानाल हिम्पालि गोयाङ। 11जेलाउ द्याङगेलाइ नेलाइहेङ रिम्पुतेङ चुमपुलाउ, कोलाउ हाइ धुयाङ दोअ्तेङ पिर मापासु। इङकोङ पहर धुइका नेलाइ माको कालाउ बुङ पुनित हाङसा नेलाइसो धुयावा।
12“इङको पहर द्याङगेलाइ ताइकोङ दादाओनेगेलाइहेङ सेअ्लि प्यावा। एन्साङ पातेङ आबा चानचामिन्दिहेङ, चानचामिन्दि आबा आमाइको खिलापता ल्होकावा रो एम्बालाइहेङ सेअ्लि लागायावा। 13कालाउ काङको मिङको भाअ्सिङ नेलाइ झाराङसो खाङलि माकिअ्तावा, कालाउ बुङ जाइ न्हुअ्थिकापा खान्धुरता ह्यावा इङकोको भालाइ ज्यावा।#मत्ति १०:२२
थिलिगोइका पहरको बारेता
(मत्ति २४:१५-२८; लुका २१:२०-२४)
14“जेलाउ नेलाइ माजेङलि गोइका थामेता नेलाइ मुअ्पाका आखेका काथा तिङस्वाना (पर्हेकालाइ ग्याको), कोलाउ यहुदियाता हिकालाइ लाखभारि खाअ्ताको।”#दानिएल ९:२७; ११:३१; १२:११; लुका २१:२०-२२ 15साअ् र्हुता हिकालाइ लेता माखुअ्ताको ना ताइको साअ्सो हाइदोङ ओल्हेपालि लिअ्ता दुलाको।#लुका १७:३१ 16मिलिङता हिकालाइ ताइको गुअ्का नानि साअ् माघुर्याको। 17इङको पहर गान्धितेअ्का रो दुदु आम्पाका आमाइगेलाइहेङ ते झन हिसिका बिजोक ज्यावा। 18इङको चुङदिङता माज्याको दोअ्तेङ पुकार पासु। 19हाइपानु इदोइ दिनागेलाइता इसिका आपत ल्वावा, परमेस्वरको पाका सिरजाइको लाम्फासो एलाथिकापा ना इसिका जेङका हि ना हेअ्लाउ ज्यावा।#दानिएल १२:१; फाइसालामका ७:१४ 20परमेस्वर इदोइ दिना माघाटेपापिका हिनु ते हिदिङ द्याङ माबान्चेधाङ, कालाउ बुङ वा साल्तेङ दिङगिल्कालाइको भाअ्सिङ इङको दिना घाटेपाका हि। 21इङको पहर हासुङ नेलाइहेङ “खाङसु, ‘ख्रिस्ट इता हि’, ‘इन्ता हि’ दोअ्नु नेलाइ खान्धुर मापासु। 22हाइदोनु ढाटाइका ख्रिस्ट रो ढाटाइका आगाधुइका जाअ्तावा, कालाउ दोनु साल्तेङ दिङगिल्कालाइहेङ मायाजालता पालि एम्बालाइ चिनो रो भारभुसाइका कामगेलाइ पावा। 23कालाउ बुङ नेलाइचाहिँ होसपातेङ हिसु। खाङसु, का नेलाइहेङ गोताङ काथा लाम्फासोङ दोअ्पिकाङ हिघा।”
इसु आरोङ ल्वावा
(मत्ति २४:२९-३१; लुका २१:२५-२८)
24“कालाउ बुङ इङको दिनाता इङको आपतन्हुअ्सो बेला तु:को कितिकितितावा रो तालि ताइको फाइसालामका माप्यावा,#यसैया १३:१०; योएल २:१०,३१; ३:१५; फाइसालामका ६:१२; इजकिएल ३२:७ 25फुरुगेलाइ आदेलसो हुलावा रो आदेलता हिका सरबङगेलाइ हेङगालाइन्हावा।#यसैया ३४:४; फाइसालामका ६:१३; योएल २:१० 26कालाउ इङको पहरता द्याङगेलाइ का द्याङको चानहेङ सरबङ रो प्रतापदोसा बादेलता लोकाताङपाका तिनावा।#दानिएल ७:१३; फाइसालामका १:७ 27कोलाउ वा सादेलचरगेलाइहेङ दिङगिलावा रो सुमिङकको न्हुअ्थिकापा आदेलको न्हुअ्थिकापा चारपाहाङसो ताइको साल्तेङ दिङगिल्कालाइहेङ जोम्पावा।”
दुमिरिको सिङसो बिद्या
(मत्ति २४:३२-३५; लुका २१:२९-३३)
28इसु आरोङ दोअ्तेङ हानेहि, “दुमिरिको सिङसो धिरसु: इङकोको दालेङ नोमका जेङतेङ ल्हाअ्बा दोरतेङसाङ भेमका पहर भेर्पा लोहोइ दोअ्तेङ नेलाइ गेस्वाना। 29एसा दोङ नेलाइ बुङ जेलाउ इदोइ बारदातगेलाइ जेङतेङहिका तिङन्हाखे, कोलाउ वा भेर्पा हि, फिनुता दोङ हि दोअ्का गेसु। 30जातिङको का नेलाइहेङ दोअ्खा, इदोइ गोताङ काथा जेङलि मादोपाधाउ इदोइ पुस्ता सितेङमान्हावा। 31सादेल रो सुमिङ सितेङहानावा, कालाउ बुङ काङको बाचा हेअ्लाउ सितेङमान्हावा।
चालाक जेङतेङ हिसु
(मत्ति २४:३६-४४; लुका १२:३८,४०)
32“कालाउ बुङ इङको दिना रो इङको पहरको बारेता हासुङ मागेखे। ना सादेलता हिका सादेलचर, ना चान दोङ गेखे। इदोइ काथा ते सादेलता हिका परमेस्वर आबा खिनिङ गेखे।#मत्ति २४:३६ 33होसपातेङ हिसु, नाङघातेङ हिसु रो पुकार पासु, हाइपानु इङको पहर हेलाउ ल्वावा, नेलाइ मागेस्वाना। 34इदोइ ते गिर्हि ताइको कामत्यागेलाइहेङ साअ्को गोताङ काम जिम्मा पितेङ, कालाउ द्वारता हिकाहेङ नाङघातेङ हि दोअ्तेङ हुकुम पितेङ बोमुलुक हानेका भाइका एइ।#लुका १२:३६-३८
35“इदोइभाअ्सिङ नेलाइ बुङ नाङघातेङ हिसु, हाइपानु साअ्को गिर्हि दिलिमा, माकोनु आधा दिलिमा, माकोनु धाङगाइ ओलाउ, माकोनु र्हिमा, हेअ्लाउ ल्वाङ, इङको नेलाइ मागेस्वाना। 36माकोनु वा एकासि लोलाउ नेलाइहेङ निन्धातेङहिका दुस्वावा। 37जे का नेलाइहेङ दोअ्ताङका इङको का झाराङहेङ दोअ्खा, ‘नाङघातेङ हिसु।’”
Currently Selected:
मर्कुस 13: DHIM
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
