मत्ति 6
6
मान्थुकालाइहेङ साघाइलि
1इसु आरोङ दोअ्तेङ हानेहि, “होसपातेङ हिसु, नेलाइ द्याङगेलाइहेङ तिङपालि धरमकाम मापासु। माकोनु सादेलता हिका नेलाइको आबासो नेलाइ हाइ दोङ इनाम मानिङस्वाना।#मत्ति २३:५
2“इदोइखातिर जेलाउ नेलाइ मान्थुकालाइहेङ दान पिलाउ, तिनाको रो हिन्हाको दोअ्तेङ धुतुरु माम्होअ्सु। इसिका ते चिम्काटागेलाइ कि द्याङगेलाइसो बाखिन्का निङलि कचहरिसाअ् रो दामागेलाइता पाखे। जातिङको, का नेलाइहेङ दोअ्खा, एम्बालाइ ताइको इनाम निङलि दोहोइ। 3कालाउ बुङ जेलाउ ना दान पिलाउ, नाङको दाम्पाहा खुर हाइ पाखे इङको केपाहा खुर माग्याको। 4ना दान पिलाउ सिकापा पि कालाउ सिकापा पिलाउ तिङका परमेस्वर आबा नासेहेङ इनाम प्यावा।
पुकारको बारेता बिद्या
(लुका ११:२-४)
5“जेलाउ ना पुकार पाखेना कालाउ चिम्काटागेलाइभाइपा माजेङ, हाइपानु एम्बालाइ ते कचहरिसाअ्गेलाइता रो दामागेलाइको कोन्हाता द्याङगेलाइ तिनाको दोअ्तेङ जाअ्तेङ पुकार पालि मोन्दाताखे। जातिङको, का नेलाइहेङ दोअ्खा, एम्बालाइ ताइको इनाम निङलि दोहोइ।#लुका १८:१०-१४ 6कालाउ बुङ ना जेलाउ पुकार पाखेना, ताइको लिअ्ताको कोठाता दुल रो फिनु गिअ्तेङ नाङको आबाहेङ सिपापा पुकार पा, कालाउ सिपापा पाका तिङका परमेस्वर आबा नासेहेङ इनाम प्यावा।
7“पुकार पालाउ बोजात्यागेलाइभाइपा बित्थाता माभारभाराइसु। हाइदोनु एम्बालाइ ते र्हिङर्हिङका पुकार पालाउ खिनिङ जावाफ निङखे दोअ्का ठहर पाखे। 8नेलाइ एम्बालाइभाइपा माजेङसु। हाइदोनु नेलाइ वाकोदोफा र्हेकाखान्तेङ लाम्फासोङ नेलाइहेङ हाइहाइ आनेमाने गोइका हि, इङको नेलाइको परमेस्वर आबा गेखे। 9कालाउ बुङ नेलाइचाहिँ एसापा पुकार पासु:
हे सादेलता हिका केलाइको आबा,
नाङको मिङ पुनित ज्याको।
10नाङको सारभि ल्वाको,
नाङको लाल्सा सादेलता जिसिका हि, इन्सिकाङ इदोइ सुमिङता पोङघाको।
11दिनाङ गोइका चाकाआनेमाने केलाइहेङ नानि बुङ पि।
12केलाइको पाका कुकरमगेलाइ माफ पापि,
जेसापा केलाइ बुङ केलाइको खिलापता कुकरम पाकालाइहेङ माफ पाका हिन्हाहि।
13केलाइहेङ जाचता फासेपाका काथागेलाइसो दुरे ताअ्,
कालाउ बुङ दुरजनसो बान्चेपा।
[हाइदोनु सारभि, सरबङ रो प्रताप दिनाङको भाअ्सिङ नाङकोङ हि, आमेन।]#६:१३ इदोइ भाग आधे बाइबल स्रोतता मान्थु।
14“हाइपानु नेलाइ द्याङगेलाइको कुकरम माफ पापिनु, नेलाइको सादेलता हिका परमेस्वर आबा बुङ नेलाइहेङ माफ पावा।#मर्कुस ११:२५-२६ 15कालाउ बुङ नेलाइ द्याङगेलाइको कुकरम माफ मापानु, नेलाइको परमेस्वर आबा बुङ नेलाइको कुकरम माफ मापावा।
म्हितुपाङ हिका बारेता बिद्या
16“जेलाउ नेलाइ म्हितुपाङ हिसुखेना, कालाउ चिम्काटागेलाइ भाइपा झामाका र्हाइ मातिङपासु। हाइपानु द्याङगेलाइहेङ म्हितुपाङ हिका तिम्पालि एम्बालाइ ताइको र्हाइ झामा पातेङ हिखे। जातिङको, का नेलाइहेङ दोअ्खा, एम्बालाइ ताइको इनाम निङलि दोहोइ। 17कालाउ बुङ नाचाहिँ म्हितुपाङ हिलाउ ताइको पुरिङता चुइति लागाइ रो ताउको र्हाइ झा। 18नाङको म्हितुपाङहिका द्याङगेलाइ माको, कालाउ बुङ मातिङपा हिका परमेस्वर आबा तिनाको रो सिपापा पाका तिङका परमेस्वर आबा नासेहेङ इनाम प्यावा।
सादेलता जोम्पालि गोइका ताका काउरि
(लुका १२:३३-३६; १६:१३)
19“ताइको भाअ्सिङ सुमिङता ताका काउरि माजोम्पासु। जेता पेअ्सा लाग्यावा, खिह्याँ चावा रो खुकालाइ खुतेङ चुमप्वावा।#याकुब ५:२-३ 20कालाउ बुङ ताइको भाअ्सिङ सादेलता टाका काउरि जोम्पासु, जेता पेअ्सा मालाग्यावा, खिय्हा माचावा रो खुकालाइ बुङ माचुमप्वावा। 21हाइपानु जेता नाङको ताका ह्यावा, इन्ताङ नाङको मन बुङ ह्यावा।
22“मिँ जिउको गिसा एइ। इदोइखातिर मिँ सुग्घर हिनु, नाङको गोताङ जिउ फाइसालाम तावा। 23कालाउ बुङ नाङको मिँ दुलदुल्का हिनु, नाङको गोताङ जिउ कितिकिति तावा। इदोइखातिर नालिअ्ता हिलिगोइका फाइसालाम्काचाहिँ कितिकितिका जेङनु, इङको कितिकितिका झन हिसिका ज्यावा!#६:२३ यहुदि सामाजता जाइ दानि हिघाहि, इङकोको “मिँ रेम्का हि” दोअ्घाहि, कालाउ बुङ जाइ दिअ्का हिघाहि, इङकोको “मिँ मारेम्का हि” दोअ्घाहि।
24“हासुङ न्हेलोङ गिर्हिको सेवा पालि माद्वावा। हाइदोनु इङको एमिहेङ दिगमिग रो भेनेङहेङ माया पावा। माकुनु इङको एमिको दोअ्का मनसोङ साअ्तावा रो भेनेङहेङ खाङलि माकिअ्तावा। एन्साङ पातेङ नेलाइ बुङ परमेस्वर रो ताका न्हेमिकोङ सेवा पालि मादोस्वाना।
पिर मापासु
(लुका १२:२२-३१)
25“इदोङभाअ्सिङ का नेलाइहेङ दोअ्खा, ‘हाइ चाङका, हाइ आमाङका’ रो हाइ लागायाङका दोअ्तेङ ताइको ज्यानको भाअ्सिङ पिर मापासु। हाइ ज्यान चाकाआनेमानेखान्तेङ रो जिउ धाबाखेन्ताराखान्तेङ मोलहिका माको कुनु? 26आतेलता उराइका जिह्याँ जुइलेङहेङ खाङसु। एम्बालाइ ना चालाइ बिअ्खे, ना आनाज चेखे, ना भाकारता सान्तेखे। कालाउ बुङ सादेलता हिका नेलाइको परमेस्वर आबा एम्बालाइहेङ चापाखे। हाइ नेलाइ एम्बालाइखान्तेङ हेन्जा मोलको माहिसुन्हा कुनु? 27नेलाइता हासुचाहिँ पिर पातेङ ताइको बोइसा आतुइसा बुङ र्हिङपालि दोस्वाना कुनु?
28“कालाउ धाबाखेन्ताराको भाअ्सिङ नेलाइ हाइपालि पिर पासुखेना? चाउरको घासि ल्हेअ्हेङ खाङसु, इङको हेसापा बाराखे। इङको ना काम पाखे, ना सुते फेरखे। 29कालाउ बुङ का नेलाइहेङ दोअ्खा, राजा सोलोमन बुङ ताइको टाकाकाउरि हिकाहिकाताङ वा इङको ल्हेअ्गेलाइ झोको रेम्लि दोका मान्थुघाहि।#१ राजा १०:४-७; २ इतिहास ९:३-६ 30नानि भारका कालाउ जुम्नि दोङ चुअ्तेङ मेता थालन्हाका घासि रो ल्हेअ्हेङ परमेस्वर एसापा सोबाइपाखे पानु हाइ वा नेलाइहेङ झन मासोबाइपावा कुनु? खोइ कुनु नेलाइको खान्धुर?
31“इदोइभाअ्सिङ ‘हाइ चाङका’, ‘हाइ आमाङका’ रो ‘हाइ होनाङका’ दोअ्तेङ पिर मापासु। 32हाइपानु बोजात्यागेलाइ इदोइ गोताङ सामान भोखे रो सादेलता हिका आबा नेलाइहेङ इदोइ गोताङ सामान गोइका हि दोअ्तेङ गेखे। 33कालाउ बुङ झाराङ खान्तेङ लाम्फा वाको सारभि रो वाको हुकुमगेलाइ साअ्सु, कालाउ वा नेलाइको भाअ्सिङ इदोइ गोताङ थपिप्यावा। 34इदोइभाअ्सिङ जुम्निको पिर मापासु, हाइपानु जुम्निको पिर जुम्निहेङ दोङ लाअ्पिसु। नानिको पिर नानिकोङ भाअ्सिङ थेम्का हि।”
Currently Selected:
मत्ति 6: DHIM
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
