मत्ति 5
5
इसु आर्दाङता पिका आर्ति
(लुका ६:२०-२६)
1एनि द्याङगेलाइको चेअ्सुमेअ्सुका जेङका तिङतेङ इसु आरदाङता ताङहि रो वा योम्कान्हुअ्सो चात्यागेलाइ वाकोता लोहि। 2कालाउ वा एम्बालाइहेङ बिद्या पिलि तेङहि:
3“परमेस्वरको आगाता ताइमिहेङ हाइदोङ माको दोअ्तेङ फोमपाकालाइ सहसाम्पा निङकालाइ ज्याङ,
हाइदोनु सादेलको सारभि एम्बालाइको ज्यावा।
4सुर्ता पाकालाइ सहसाम्पा निङकालाइ ज्यावा,
हाइदोनु एम्बालाइ सुबिस्ता निनावा।#यसैया ६१:२
5नोइकालाइ सहसाम्पा निङकालाइ ज्यावा,
हाइदोनु सुमिङता हिका गोताङ चिज एम्बालाइकोङ ज्यावा।#ले ३७:११
6धरमकाम पालि लाल्सा पाकालाइ सहसाम्पा निङकालाइ ज्यावा,
हाइदोनु एम्बालाइको लाल्सा पोङघावा।#यसैया ५५:१-२
7दायाकालाइ सहसाम्पा निङकालाइ ज्याङ,
हाइदोनु एम्बालाइ दाया निनावा।
8चोखो मन हिकालाइ सहसाम्पा निङकालाइ जेनावा,
हाइदोनु एम्बालाइ परमेस्वरहेङ तिनावा।#ले २४:३-४
9मिलाप पापिकालाइ सहसाम्पा निङकालाइ ज्यावा,
हाइदोनु एम्बालाइ परमेस्वरको चानचामिन्दि गेलाइ दोअ्न्हावा।
10धरमकाम पानाङसिङ सान्ताइन्हाकालाइ सहसाम्पा निङकालाइ ज्यावा,
हाइदोनु सादेलको सारभि एम्बालाइको ज्यावा।#१ पत्रुस ३:१४
11“सहसाम्पा निङका नेलाइ, जेलाउ द्याङगेलाइ काङको भाअ्सिङ नेलाइहेङ निन्दा पावा, सान्तायावा रो ढाटाइतेङ नेलाइको खिलापता गोताङ खालको मारेम्का काथा दोअ्तावा।#१ पत्रुस ४:१४ 12कालाउ हेन्जा लेङचासु, हाइदोनु सादेलता नेलाइको इनाम बाराका ज्यावा। हाइदोनु एसादोङ नेलाइखान्तेङ लाम्फासोङ आगाधुइकालाइहेङ बुङ सान्ताइका हिघाखे।#२ इतिहास ३६:१६; साल्तेङ दिङगिल्का ७:५२
देसे रो जोल्का
(मर्कुस ९:५०; लुका १४:३४-३५; ११:३३)
13“नेलाइ सुमिङको देसे हिसुन्हा, कालाउ बुङ देसेको ताइका हानेनु इङको हाइहोइ आरोङ ताइका बान्हाइलि कुनु? इङको ते बाहार थालन्हाका रो खोकोइहोइ याङन्हाका खान्तेङ बो हाइदोङ कामको माज्यावा।#मर्कुस ९:५०; लुका १४:३४-३५
14“नेलाइ सुमिङको जोल्का हिसुन्हा। आरदाङता योम्पाका पुर माम्होनावा#युहन्ना ८:१२; ९:५ 15कालाउ हासु बुङ गिसा जोलाइतेङ पाथिहोइ माथुम्खे। कालाउ बुङ चेरादानिता ताअ्खे रो सिता हिका झाराङको भाअ्सिङ इङको फाइसालाम पिखे।#मर्कुस ४:२१; लुका ८:१६; ११:३३ 16एन्सा दोङ गेसाको जोल्का भाइपाङ नेलाइको जोल्का बुङ द्याङगेलाइको आगाता चिल्काको रो एम्बालाइ नेलाइको रेम्का काम तिनाको, कालाउ सादेलता हिका नेलाइको आबाहेङ बाखिनाको।#१ पत्रुस २:१२
नियम मानेलि गोइका बारेता बिद्या
(लुका १६:१७)
17“मोसाको लेखेका नियम रो आगाधुइकालाइको कथनहेङ बदर पालि का लोका फोममापासु। का इङको बदर पालि माको, कालाउ बुङ पोङघा पालि लोघा। 18हाइदोनु जातिङको का नेलाइहेङ दोअ्खा, जेलाउथिकापा सादेल रो सुमिङ मुअ्तेङ मान्हावा कालाउथिकापा मोसासो लेखिका नियमको म्हुइका खान्तेङ म्हुइका काथा बुङ मापोङघासिङ मालाअ्तावा।#लुका १६:१७ 19इदोइखातिर जाइ इदोइ हुकुमगेलाइता झाराङखान्तेङ म्हुइकाहेङ मामान्यावा रो द्याङगेलाइहेङ एन्साङ पालि धिरपावा, सादेलको सारभिता इङको झाराङखान्तेङ म्हुइका जेनावा। कालाउ बुङ जाइ इङको हुकुमगेलाइ मान्यावा रो धिरपावा, सादेलको सारभिता इङको बाराका जेनावा। 20का नेलाइहेङ दोअ्खा, नेलाइको धरममास्टर रो फरिसिगेलाइको पाका धरम काम खान्तेङ नेलाइको काम रेम्का माजेङनु नेलाइ हिदिङ बुङ रितसो सादेलको सारभिता दुल्लि मानिङस्वाना।
चेरको बारेता बिद्या
21“नेलाइ इसिका दोअ्का हिङका हिसुन्हा, लाम्फाको पहरता द्याङगेलाइहेङ एसा दोअ्का हिघाहि, ‘ना मासेअ्, जाइ सेअ्तावा वा डाड भोगेलि गोयावा।’#दामालाअ्का २०:१३; नियम ५:१७ 22कालाउ बुङ का नेलाइहेङ दोअ्खा, जाइ ताइको ओनेदोफा चेरताम्पाखे इङको डाड भोगेलि गोयावा। जाइ ताइको ओनेहेङ बिजेत पावा, इङको बाराकचहरिता जावाफ पिलि गोयावा। जाइ ताइको ओनेहेङ ‘ना हाइदोङ मागेका’ दोअ्खे, इङको पातेलको मेताङ वानावा।
23“इदोइखातिर ना भेटि पिकाथामेता ताइको भेटि पिलाउ नाङको ओने नादोफा चेरताम्पाका गेनु, 24ताइको भेटि इन्ताङ लाअ्धितेङ लाम्फा ताइको ओनेदोफा मिलाप पा रो इङकोन्हुअ्सो खिनिङ लोतेङ ताइको भेटि पि।
25“नाङको झागारियादोफा आडाता हानेलाउ दामाताङ मिलाप पा। माकुनु वा नाङको खिलापता न्याधिसकोता उजुर पावा। न्याधिस नासेहेङ सिपाल्हाइको जिम्मा लागाइयावा रो ना थुना निङचाना। 26जातिङको, का नेलाइहेङ दोअ्खा, इङको पहर डाडको टाका मातिरिपाधाउ ना इन्तासो खाअ्लि मानिनाना।
दुराचार मापाका बारेता बिद्या
27“नेलाइ इसिका दोअ्का हिङकाङ हिसुन्हा, ‘दुराचार पालि माएल।’#दामालाअ्का २०:१४; नियम ५:१८ 28कालाउ बुङ का नेलाइहेङ दोअ्खा, जाइ हिदिङ बेबालहेङ मारेम्का ठहरसो खाङखे, इङको लाम्फासोङ ताइको कोन्धाङता इङकोदोफा दुराचार पालिदोका हिखे। 29नाङको दाम्पाहाको मिँ नासेहेङ कुकरम पालि लागाइलि भोखे पानु इङकोहेङ ओल्हेपातेङ थाल्गिल, हाइदोनु नाङको गोताङ जिउ पातेलता थालन्हाकाखान्तेङ भुरुङ नाङको जिउको भाकगेलाइता एलोङ लाअ्लि नाङको भाअ्सिङ रेम्का ज्यावा।#मत्ति १८:९; मर्कुस ९:४७ 30एन्सा दोङ नाङको दाम्पाहा खुर नासेहेङ कुकरम पालि लागाइलि भोखे पानु इङकोहेङ चेतेङ थाल्गिल। हाइदोनु नाङको गोताङ जिउ पातेलता दुल्काखान्तेङ भुरुङ नाङको जिउको भागगेलाइता एलोङ लाअ्लि नाङको भाअ्सिङ रेम्का ज्यावा।#मत्ति १८:८; मर्कुस ९:४३
खाति पोका बारेता बिद्या
(मत्ति १९:९; मर्कुस १०:११-१२; लुका १६:१८)
31“एसा बुङ दोअ्का हि, ‘जाइ ताइको बेअ्हेङ लाअ्खे, इङको वासेहेङ खाति पोतेङ लाअ्ताको।’#नियम २४:१-४; मत्ति १९:७; मर्कुस १०:४ 32कालाउ बुङ का नेलाइहेङ दोअ्खा, जाइ ताइको बेअ्हेङ दुराचारको खातिरबेगार बो खातिरसो खाति पोकावा, इङको वासेहेङ दुराचार बान्हायावा रो जाइ लाअ्का बेबालहेङ चुमावा, इङको दुराचार पावा।#मत्ति १९:९; मर्कुस १०:११-१२; लुका १६:१८; १ कोरिन्थि ७:१०-११
केरा माचाका बारेता बिद्या
33“आरोङ नेलाइ इसिका दोअ्का हिङका हिसुन्हा, लाङ पहरको द्याङगेलाइहेङ एसा दोअ्का हिघाहि, ‘माजेङका काथाता केरा माचासु रो परमप्रभुको भाअ्सिङ पाका केरा पोङघा पासु।’#लेबि १९:१२; गान्देका ३०:२; नियम २३:२१ 34कालाउ बुङ का नेलाइहेङ दोअ्खा, केरा मामा माचासु। सादेलको मिङता केरा माचासु, हाइपानु इङको परमेस्वरको आसन एइ।#याकुब ५:१२; यसैया ६६:१; मत्ति २३:२२ 35सुमिङको मिङता बुङ केरा माचासु, हाइपानु इङको वाको खोकोइ ताअ्का थामे एइ। यरुसलेमको मिङता बुङ केरा माचासु, हाइपानु इङको राजाको पुर एइ।#यसैया ६६:१; ले ४८:२ 36ताइको पुरिङ साइतेङ बुङ केरा माचासु, हाइदोनु नेलाइ ताइको पुरिङको एलोङ पुसिङ बुङ जेका माकोनु दाका पालि मादोस्वाना। 37भुरुङ केरा माचासिङ नेलाइको दोअ्का काथाचाहिँ ‘एइ’ नु ‘एइ’, ‘माको’ नु ‘माको’ खिनिङ ज्याको। इदोइखान्तेङ हेन्जाचाहिँ दियाबलससो लोखे।
बादाला मार्हुका बारेता बिद्या
(लुका ६:२९-३०)
38“नेलाइ इसिका दोअ्का हिङका हिसुन्हा, ‘मिँको बादला मिँ रो तासिको बादला तासि।’#दामालाअ्का २१:२४; लेबि २४:२०; नियम १९:२१ 39कालाउ बुङ का नेलाइहेङ दोअ्खा, दुरजनदोफा धुम मापासु। जाइ नाङको दाम्पाहा गाल्भुङता चाउर्यावा, इङकोहेङ भेनेङ गाल्भुङ बुङ धोपिसु। 40हासुङ मुद्दा पातेङ नाङको लोखोन चुमपुलि भोखे पानु, इङकोहेङ नाङको गुअ्का धाबा बुङ पिगिल। 41हासुङ नासेहेङ सुम कोस चुमपुलि भोनु, वादोफा तु कोस हानेपि। 42नादोफा र्हेकालाइहेङ पि रो रिन र्हुलि भोकाहेङ माप्याङका मादोअ्।
दुस्मनहेङ बुङ इन्ताना पासु
(लुका ६:२७-२८,३२-३६)
43“नेलाइ इसिका दोअ्का हिङका हिसुन्हा, ‘भेर्पाकोहेङ माया पासु रो दुस्मनहेङ दिगमिग पासु।’ 44कालाउ बुङ का नेलाइहेङ दोअ्खा, ताइको दुस्मनहेङ माया पासु रो नेलाइहेङ सान्ताइकालाइको भाअ्सिङ पुकार पासु। 45एसा पासुन्हा पानु नेलाइ सादेलता हिका परमेस्वर आबा भाइपाङ जेङस्वाना। हाइदोनु परमेस्वर आसाति रो रेम्का न्हेमिहेङ साने पिखे रो धरम रो निठुरि न्हेमिहेङ वाइ लोपापिखे। 46ताइमिहेङ माया पाकालाइहेङ खिनिङ इन्ताना पासुन्हा पानु नेलाइ हाइ इनाम निङलि दोस्वाना कुनु? हाइ तिरो ल्होपाकालाइ बुङ एन्साङ मापाखे कुनु? 47नेलाइ ताइगेलाइहेङ खिनिङ आदरभाउ पासुन्हा पानु बोमिगेलाइ खान्तेङ हेन्जा हाइ पासुन्हा कुनु? हाइ बोजात्यागेलाइ बुङ एन्साङ मापाखे कुनु? 48इदोइखातिर सादेलता हिका नेलाइको परमेस्वर आबा गोताङ काथाता रेम्का हिकाभाइपाङ नेलाइ बुङ गोताङ काथाता रेम्का जेङसु।”#लेबि १९:२; नियम १८:१३
Currently Selected:
मत्ति 5: DHIM
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.