मत्ति 26
26
इसुहेङ सेअ्लि भोका
(मर्कुस १४:१-२; लुका २२:१-२; युहन्ना ११:४५-५३)
1इसु यिदोइ गोताङ काथा दोअ्लिदोकान्हुअ्सो ताइको चात्यागेलाइहेङ दोअ्हि, 2“नेलाइ गेसुखेना, एलाको न्हेनिन्हुअ्सो लाअ्पिका पारबा ल्वाङ, कालाउ का द्याङको चान कुरुसता टाङगाइन्हालि रिमनिङचाङका।”#दामालाअ्का १२:१-२७
3कालाउ कैयाफा मिङहिका बारा धामिको महलता मुल धामिगेलाइ रो आगुवागेलाइ जोम्हि। 4कालाउ एम्बालाइ इसुहेङ हेसापा रिम्लि रो सेअ्लि दोअ्तेङ साल्हा पाहि 5रो एम्बालाइ दोअ्हि, “पारबाको पहरता माको। माकुनुते द्याङगेलाइता खलबल ज्यावा।”
इसुको पुरिङता आतर हुपिका
(मर्कुस १४:३-९; युहन्ना १२:१-८)
6इसु बेथानिया देराको सिमोन दोअ्का द्याङको साअ्ता हानेहि। जाइ लाम्फा रोग्याखोअ्का हिघाहि। 7इन्ता वा चालि योम्लाउ एमि बेबाल एलोङ सिसिता जाङका आतर चुमातेङ इसुकोता लोहि रो वाको पुसिङता गोताङ आतर होपिहि।#लुका ७:३७-३८ 8इदोइ तिङतेङ चात्यागेलाइ चेरताम्पातेङ एसा दोअ्हि, “हाइको भाअ्सिङ इदोइ झोको आतर माअ्पान्हा? 9भुरुङ इदोइ आतर हेन्जा दामता पिअ्तेङ इङको टाका मान्थुकालाइहेङ पिलि दोधाङ।”
10कालाउ बुङ इसु इदोइ गोताङ काथा गेतेङ एम्बालाइहेङ दोअ्हि, “नेलाइ इदोइ बेबालहेङ हाइपालि तु: पिसुखेना? या ते काङको भाअ्सिङ एलोङ रेम्का काम पाका हि। 11हाइपानु मान्थुकालाइ नेलाइदोफा दिनाङ हिखे। कालाउ बुङ का नेलाइदोफा दिनाङ माह्याङका।#नियम १५:११ 12इङको इदोइ आतर काङको जिउता हुपितेङ लिअ्लिको भाअ्सिङ कासेहेङ त्यार पाका हि। 13जातिङको, का नेलाइहेङ दोअ्खा, दुनियाता जेता इदोइ रेम्काबानाल हिम्पावा, इन्ता या बेबालको पाका इदोइ काम बुङ वाको फोमको भाअ्सिङ पान्हावा।”
इसुहेङ रिम्पालि यहुदा त्यार जेङका
(मर्कुस १४:१०-११; लुका २२:३-६)
14कालाउ तेन्हेअ्मि चात्यागेलाइता एमि यहुदा इस्करियोत दोअ्काचाहिँ मुल धामिकोता हानेहि 15रो दोअ्हि, “का वासेहेङ नेलाइको खुरता रिम्पापिनु, कासेहेङ हाइ पिस्वाना?” एम्बालाइ इङकोहेङ रुपाको एकुरिते टाका पिहि।#जकरिया ११:१२ 16इङकोङ पहरसो यहुदा इस्करियोत इसुहेङ रिम्पापिलि दाउ भोलि तेङहि।
न्हुअ्सोको भात्यार
(मर्कुस १४:१२-२६; लुका २२:७-२३; युहन्ना १३:२१-३०; १ कोरिन्थि ११:२३-२५)
17एला साउरि मामिसालाइका तोलेको पारबाको लाङ दिना चात्यागेलाइ इसुकोता लोतेङ दोअ्हि, “नाङको भाअ्सिङ लाअ्पिका पारबाको भात्यार चाका थामे हिता त्यार पाङ?” 18वा एम्बालाइहेङ दोअ्हि, “पुरता एमि द्याङकोता हानिसु रो वासेहेङ दोअ्सु, ‘मास्टर दोअ्काहि, काङको पहर भेर्पा लोका हि। का ताइको चात्यागेलाइदोफा नाङको साअ्ता लाअ्पिका पारबा मान्याङका।’” 19कालाउ इसुको दोअ्काभाइपा चात्यागेलाइ पाहि रो एम्बालाइ लाअ्पिका पारबाको इन्तिजाम मिलिपाहि।
20दिलिमा जेङकान्हुअ्सो इसु तेन्हे चात्यागेलाइदोफा चालि योम्हि। 21ओबालाइ चाकाताङपाका पहरता वा दोअ्हि, “जातिङको, का नेलाइहेङ दोअ्खा, नेलाइता एमि कासेहेङ रिपाप्यावा।” 22इदोइ काथा हिङतेङ चात्यागेलाइ हेन्जाङ मन तुपातेङ झाराङ वासेहेङ हिअ्लि तेङहि, “प्रभु, हाइ इङको का हिघा?” 23कालाउ इसु एम्बालाइहेङ दोअ्हि, “जाइ कादोफाङ थालिता तोले चोभेरका हि, इङको कासेहेङ रिमपाप्यावा।#ले ४१:९ 24का द्याङको चान ते काङको बारेता धरमकिताबता लेखेका भाइपा हानेलिदोङ गोयाङ। कालाउ बुङ धिकार इङको द्याङहेङ, जाइसो का द्याङको चान रिमन्हाङका। इङको द्याङ ते भुरुङ जोलोम माजेङका हिनु दोङ इङकोको भाअ्सिङ रेम्का जेङधाङ।” 25कालाउ वासेहेङ रिम्पापिका यहुदा इस्करियोत हिअ्हि, “मास्टर, हाइ इङको का एइ?” इसु इङकोहेङ दोअ्हि, “ना ताइमि दोङ दोअ्दोङखेना।”
26एम्बालाइ भतेर चाकाताङ पालाउ इसु तोले र्हुहि, सहसाम्पा पिकान्हुअ्सो वा इङको पेङहि, चात्यागेलाइहेङ पिहि रो दोअ्हि, “र्हुसु, चासु, इदोइ काङको जिउ एइ।”
27कालाउ बाति र्हुतेङ सहसाम्पा पितेङ वा एम्बालाइहेङ एसा दोअ्तेङ पिहि, “नेलाइ झाराङ इदोइसो आम्सु। 28हाइदोनु इदोइ नावा केराको काङको हिति, जाइ हेन्जाङको कुकरमको फतुर माअ्पालिको भाअ्सिङ झोपावा।#दामालाअ्का २४:८; यर्मिया ३१:३१-३४ 29कालाउ बुङ का नेलाइहेङ दोअ्खा, आङगुरको निघार का कालाउथिकापा माआमाङका, जेलाउथिकापा ताइको आबाको सारभिता नेलाइदोफा नावा पातेङ माआमाङका।”
30कालाउ एलोङ ले लेकान्हुअ्सो ओबालाइ जाइतुन आरदाङभारि ओल्हेतेङ हानेहि।
पत्रुस इसुहेङ मानाल्खा दोअ्तावा
(मर्कुस १४:२७-३१; लुका २२:३१-३४; युहन्ना १३:३६-३८)
31कालाउ इसु एम्बालाइहेङ दोअ्हि, “नानि न्हिसिङता काङको भाअ्सिङ नेलाइ कासेहेङ लाअ्तेङ हानेस्वाना। हाइदोनु धरमकिताबता एसा लेखिन्हाका हि:
‘का घोकालाइहेङ सुतायाङका
रो भेरागेलाइ जेसोकोसोङ खेङन्हातेङ हानावा।’#जकरिया १३:७
32“कालाउ बुङ कासेहेङ सिकासो सिन्हुपाकान्हुअ्सो का नेलाइखान्तेङ लाम्फा गालिलता हानाङका।”#मत्ति २८:१६
33पत्रुस इसुहेङ दोअ्हि, “नाङको भाअ्सिङ झाराङ लाअ्लाउ बुङ का नासेहेङ हेअ्लाउ मालाअ्ताङका।”
34इसु इङकोहेङ दोअ्हि, “जातिङको, का नासेहेङ दोअ्खा, नानिङ न्हिसिङता धाङगाइ ओका लाम्फा ना कासेहेङ सुम खे मामानाल्खा दोअ्ताना।”
35पत्रुस इसुहेङ दोअ्हि, “नादोफा सिलिगोइलाउ बुङ का नासेहेङ मामानाल्खा मादोअ्ताङका।” बो झाराङ चात्यागेलाइ बुङ एन्साङ दोअ्हि।
गेतसमनि बागाइचाता इसु पुकार पाका
(मर्कुस १४:३२-४२; लुका २२:२९-४६)
36कालाउ इसु गेतसमनि दोअ्का थामेता चात्यागेलाइ दोफा हानेहि रो एम्बालाइहेङ दोअ्हि, “नेलाइ इताङ हिसु, काचाहिँ आसा ओसो हानितेङ पुकार पाङका।” 37कालाउ ताइमिदोफा पत्रुस रो जब्दियाको न्हेमि चानगेलाइहेङ चुमपुतेङ हानेहि रो वा हेन्जाङ सोकपातेङ ताइको मन तु:पालि तेङहि। 38कालाउ वा एम्बालाइहेङ दोअ्हि, “काङको मन हेन्जाङ सोकता दुबिका हि। नेलाइ इताङ हिसु रो कादोफा नाङघातेङ हिसु।”
39कालाउ इसु आसा ओसो हानितेङ भोनोता पोम्भेलेतेङ एसा दोअ्तेङ पुकार पालि तेङहि, “ओइ काङको आबा, जेङलि दोनु इदोइ तु:को बाति कासो लाअ्ताको। कालाउ बुङ काङको लाल्सा भाइपा माको, नाङको लाल्सा भाइपा ज्याको।”
40कालाउ इसु चात्यागेलाइकोता लोतेङ एम्बालाइहेङ निन्धातेङ हिका दुसुहि रो पत्रुसहेङ दोअ्हि, “हाइ नेलाइ कादोफा ए घान्टा बुङ जाग्वान हिलि मादोसुन्हा? 41जाचता मावानाङका दोअ्तेङ जाग्वान हिसु, पुकार पासु। हाङसा ते रेम्फापालि जातिङको त्यार हि, कालाउ बुङ जिउ चाहिँ निरधो हि।”
42इसु आरोङ हानितेङ पुकार पालि तेङहि, “काङको आबा, का इदोइ तु:को बाति माआम्सा माज्याङ पानु, नाङकोङ लाल्सा पाका भाइपाङ ज्याको।” 43वा आरोङ लोतेङ एम्बालाइहेङ निन्धातेङहिकाङ दुसुहि, हाइपानु एम्बालाइ मिँ हेलि दोङ मादोहि।
44इदोङभाअ्सिङ इसु आरोङ एम्बालाइहेङ लाअ्धितेङ हानेहि रो लाम्फाको काथा दोराइतेङ सुमखेको पालाता आरोङ पुकार पाहि। 45कालाउ वा चात्यागेलाइकोता लोतेङ एम्बालाइहेङ दोअ्हि, “नेलाइ एला बुङ निन्धातेङ हिसुन्हा? खाङसु, पहर भेर्पा लोकाहि। का द्याङको चानहेङ निठुरिगेलाइको खुरता रिम्पापिका पहर जेङलि दोहोइ। 46ल्होसु, हानाइने। खाङसु, रिम्पापिका द्याङ भेर्पाङ हि।”
इसु रिम निङचाका
(मर्कुस १४:४३-५०; लुका २२:४७-५३; युहन्ना १८:३-१२)
47इसु धुइकाधुइकाताङ तेन्हेमि चात्यागेलाइता यहुदा इस्करियोत दोअ्का एमि चात्या इन्ता लोहि। इङकोदोफा मुल धामिगेलाइ रो यहुदि आगुवागेलाइ दिङगिल्का एलोङ बारा चेअ्सु काति रो लाठि चुमातेङ लोहि। 48वाहेङ रिम्पापिका एम्बालाइहेङ एसा दोअ्का हिघाहि, “जाइहेङ का चुमायाङका इङको दोङ इसु एइ, वासेहेङ दोङ रिम्सु।” 49इङको दोङ पहर यहुदा इस्करियोत इसुकोता हानितेङ “मास्टर, सेउपाखा!” दोअ्तेङ वासेहेङ चुमाइहि। 50कालाउ इसु इङकोहेङ दोअ्हि, “सानाइति, ना जेदोङ पालि लोका हिना, इङको पा।” कालाउ यहुदा इस्करियोतदोफा लोका द्याङगेलाइ इसुको आगाता लोतेङ वासेहेङ रिम्हि।
51इदोइ तिङतेङ इसुको एमि चात्या ताइको काति होअ्तेङ मुल धामिको कामत्याको न्हातोङ पुक्कापापिहि। 52कालाउ इसु इङकोहेङ दोअ्हि, “नाङको काति दाबिता ह्वाअ्, हाइदोनु काति चालाइकालाइ झाराङ कातिहोइ दोङ सेअ्न्हावा। 53ना हाइ चिताइखेना, का ताइको आबाहेङ पुकार पानु, हाइ वा इघुरिताङ सादेलचरगेलाइको तेन्हे फाउजखान्तेङ हेन्जा काङको भाअ्सिङ मापिगिलावा कुनु? 54कालाउ बुङ का र्हेनु ते धरमकिताबता कासेहेङ इसिका जेङलिगोयाङ दोअ्तेङ लेखेन्हाका काथा हेसापा पोङघालि द्वावा कुनु?”
55इङको न्हुअ्सो इसु ताइमिहेङ रिम्लि लोका द्याङगेलाइहेङ दोअ्हि, “हाइ का डाकु हिघा कुनु नेलाइ लाठि रो काति चुमतेङ कासेहेङ रिम्लि लोसुन्हा? का दिनाङ थानता बिद्या पितेङ हिघाखा, इङको पहर नेलाइ कासेहेङ हाइपालि मारिम्सुन्हा?#लुका १९:४७; २१:३७ 56कालाउ बुङ आगाधुइकालाइ धरमकिताबता लेखेका काथा पोङघाको दोअ्तेङ दोङ इदोइ गोताङ जेङलि लोका हिघाहि।” कालाउ झाराङ चात्यागेलाइ इसुहेङ लाअ्तेङ खाअ्हि।
बाराकचहरिको आगाता इसु
(मर्कुस १४:५३-६५; लुका २२:५४-५५,६३-७१; युहन्ना १८:१३-१४; १९-२४)
57इसुहेङ रिम्कालाइ वासेहेङ बारा धामि कैयाफाकोता चुमपुहि। इन्ता धरममास्टर रो यहुदि आगुवागेलाइ जोम्का हिघाखे। 58पत्रुसचाहिँ इसुहेङ दुरेदुरेसोङ पिताइतेङ बारा धामिको साअ्को सालेङता थुकाहि। कालाउ इन्ता हाइ ज्याङ बे दोअ्तेङ खाङलि वा लिअ्ता दुल्तेङ पालेगेलाइदोफा योम्हि। 59कालाउ मुल धामिगेलाइ रो बाराकचहरिको झाराङ सदस्यगेलाइ इसुहेङ सिकासाजाइ पिलि दोङ गोयाङ दोअ्तेङ वाको खिलापता ढाटाइका दासि भोलि तेङहि। 60कालाउ इन्ता हेन्जा ढाटाइका दासि पिकालाइ लोतेङ वासेहेङ फतुर लागाइहि, कालाउ बुङ एम्बालाइ हिदिङ दासि मानिङहि। इङको न्हुअ्सो न्हेमि आगाता लोहि 61रो दोअ्हि, “इदोइ द्याङ ‘का परमेस्वरको थान र्हाअ्तेङ सुम्निता यासेहेङ बान्हाइलि द्वाङका’ दोअ्का हिघाहि।”#युहन्ना २:१९
62कालाउ बारा धामि ल्होतेङ इसुहेङ हिअ्हि, “हाइ ना हाइदोङ जावाफ माप्याना? नाङको खिलापता एबालाइको पिका दासिको बारेता नासेहेङ हाइदोङ दोअ्लि मान्थु?” 63कालाउ बुङ इसु सिपापा हि। बारा धामि वासेहेङ दोअ्हि, “सिन्हुका परमेस्वरको मिङता केरा चातेङ केलाइहेङ दोअ्, हाइ ना परमेस्वरको चान ख्रिस्ट हिन्हा?” 64इसु उतर पितेङ दोअ्हि, “इङको ते ना ताइमि दोङ दोअ्दोङखेना। कालाउ बुङ का नेलाइहेङ दोअ्खा, एलासो उसो नेलाइ का द्याङको चानहेङ सरबङहिका परमेस्वरको दाम्पाहा गादिता योम्का रो आतेलको बादेलता लोकाताङपाका तिङस्वाना।”#दानिएल ७:१३
65कालाउ इदोइ काथा हिङतेङ बारा धामि ताइको धाबा थेअ्हि रो दोअ्हि, “ते खाङसु, या परमेस्वरको बादनामि पाका नेलाइ हिङसुहोइना, एला केलाइहेङ बो हाइ दासि गोयाङ कुनु?#लेबि २४:१६ 66ते दोअ्सु, नेलाइ हाइ दोअ्सुखेना?” एम्बालाइ झाराङ दोअ्हि, “या ज्यानदार निङलिङ गोयाङ।” 67कालाउ एम्बालाइ इसुको र्हाइता थोअ्तेङ वासेहेङ भुकिन्दिहि रो आधेमि चाउरेतेङ एसा दोअ्हि,#यसैया ५०:६ 68“ना ख्रिस्ट आङ, नासेहेङ हासु दान्हाइहि? आगाधुइका धुइ।”
पत्रुस इसुहेङ मानाल्खा दोअ्का
(मर्कुस १४:६६-७२; लुका २२:५६-६२; युहन्ना १८:१५-१८,२५-२७)
69इङको पहर थिकापा पत्रुस बाहार सालेङता दोङ योम्तेङ हिघाखे। कालाउ एमि कामत्याइनि वाकोता लोतेङ दोअ्हि, “ना बुङ ते गालिलको इसुदोफाङ हिघान्हा, माको कुनु?”
70कालाउ बुङ पत्रुस एम्बालाइ झाराङको आगाता मानाल्खा दोअ्तेङ दोअ्हि, “ना हाइ दोअ्दोङखेना, का मागेखा।”
71कालाउ पत्रुस सालेङको द्वारभेर्पा ओल्हेकान्हुअ्सो भेनेङ एमि कामत्याइनि वासेहेङ तिङहि रो इन्ता हिका द्याङगेलाइहेङ दोअ्हि, “इदोइ द्याङ बुङ ते नासरतको इसुदोफाङ हिघाहि।”
72आरोङ पत्रुस केरा चातेङ दोअ्हि, “का इङको द्याङहेङ मामानाल्खा।”
73आसा न्हुअ्सो इन्ता हिका द्याङगेलाइ पत्रुसकोता लोतेङ दोअ्हि, “जातिङको, ना बुङ वादोफाङ हिघान्हा, हाइपानु नाङको धुइका गालिलको द्याङगेलाओको भाइकाङ हिङखे।”
74कालाउ पत्रुस दोअ्हि, “का आरोङ परमेस्वरको मिङता केरा चातेङ दोअ्खा का ते इङको द्याङहेङ मामानाल्खा।” कालाउ एन्सा दोअ्तेङसाङ धाङगाइओहि।
75इङको पहर पत्रुसहेङ इसुको दोअ्का इदोइ काथा फोम जेङहि, “धाङगाइ ओका लाम्फा ना कासेहेङ सुम्खे मानाल्खा दोअ्ताना।” कालाउ वा बाहार हानितेङ घोनोघोपा खारहि।
Currently Selected:
मत्ति 26: DHIM
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
