लुका 2
2
इसुको जोलोम
(मत्ति १:१८-२५)
1नाङको पहरता रोमि माहाराजा अगस्टस सारभिको गोताङ द्याङगेलाइको मिङ लेखेतेङ दार्ता पालिगोयाङ दोअ्तेङ हुकुम पाहि। 2एसापा दार्ता पालिगोयाङ दोअ्तेङ हुकुम लोका या लाम्फर्ति हिघाहि। एन्सालाउ कुरेनियस सिरिया माउजाको बारा हाकिम हिघाखे। 3माहाराजाको हुकुम मानेतेङ झाराङ ताताइको देरा रो पुरता मिङ दार्ता पालि हानेहि।
4इङको पहरता योसेफ गालिल माउजाको नासरत दोअ्का पुरता हिघाखे। वा राजा दाउदको खालको सान्तान हिघाखे। इङकोखातिर वा ताइको खाल दाउदको पुर यहुदियाको बेथलेहेमता मिङ लेखेपालि हानेहि। 5योसेफदोफा मरियमको बिहुपाका काथा पाक्का जेङनाङसिङ वा मरियमहेङ बुङ दोसाङ चुमपुहि। इङको पहर मरियम गान्धितेअ्का हिघाखे। 6एम्बालाइ बेथलेहेमता हिलाउ दोङ मरियमको जामाल जेङका पहर जेङहि 7रो वा लाङ चान जोन्माइहि रो धाबाता लुन्दाइतेङ पिसालता हिका दोङगोता जिम्पाहि हाइदोनु ओबालाइ पाउवाता हिलि हिता बुङ थामे मानिङहि।
सादेलचर रो भेरा घोकालाइ
8इङको न्हिसिङता बेथलेहेम पुर भेर्पाङ चाउरता घोकालाइ ताइको भेरा र्हुमतेङ हिघाखे। 9प्रभुको एमि सादेलचर एम्बालाइकोता देखाल पिहि रो प्रभुको जोल्का एम्बालाइको कोरबितिङ चिलकाहि, कालाउ एम्बालाइ हेन्जाङ थिहि। 10कुलाउ सादेलचर एम्बालाइहेङ दोअ्हि, “माथिसु, हाइदोनु का गोताङ द्याङगेलाइहेङ बेराजा पिका रेम्काबानाल चुमतेङ नेलाइको आगाता लोका हिघा। 11हिङसु, दाउद जोन्मिका पुरता नानि मुक्ति पिका ख्रिस्टको जोलोम जेङकाहि। वा दोङ प्रभु जेनावा। 12नेलाइ जामालहेङ धाबाता लुन्दाइतेङ दोङगोता जिम्पातेङताअ्का निङस्वाना। इदोइसोङ नेलाइ वासेहेङ नालस्वाना।” 13कोलाउ एकासि इङको सादेलचरगेलाइ इन्ता देखाल पिहि, कालाउ परमेस्वरको बाखिन पातेङ इसिका ले लेलि तेङहि:
14“झाराङखान्तेङ र्हुता सादेलता हिका परमेस्वरको प्रताप ज्याको,
कालाउ सुमिङता जाइ द्याङगेलाइदोफा वा लेङचाका हि, एम्बालाइहेङ सुबिस्ता जेङतेङ ह्याको।”
15सादेलचरगेलाइ सादेलभारि घुरिकान्हुसो घोकालाइ ताताइमिताङ दोअ्हि, “ते, प्रभु परमेस्वर केलाइहेङ दोअ्पिका काथा बेथलेहेमता खाङलि हानाइने” दोअ्तेङ 16एम्बालाइ धाअ्पुतेङ हानेतेङ खाङलाउ इन्ता एम्बालाइ मरियम, योसेफ रो दोङगोता जिम्पातेङ ताअ्का जामालहेङ तिङहि। 17घोकालाइ जामालको बारेता सादेलचरको दोअ्का काथा झाराङहेङ हिम्पाहि। 18इदोइ काथागेलाइ हिङकालाइ झाराङ भारभुसाइहि। 19कालाउ मरियमचाहिँ यिदोइ गोताङ काथा लिअ्ताको मनसो ठहर पातेङ मन्ताङ ताअ्हि। 20भेरा घोकालाइ सादेलचरको दोअ्काभाइपाङ हिङलि रो तिङलि निङलाउ परमेस्वरको प्रताप रो बाखिन पातेङ एम्बालाइ घुरितेङ हानेहि।
जामालको मिङ इसु ताअ्पिहि
21येअ्निको दिनाता जामालहेङ इस्राएलको नियममाफिक पाका खतना पालाउ वाको मिङ इसु ताअ्पिहि। जाइ मिङचाहिँ वा आमाइको कोखेता हिकाखान्तेङ लाम्फा दोङ सादेलचर ताअ्लि दोअ्का हिघाहि।#लेबि १२:३; लुका १:३१
थान्ता इसुहेङ तिम्पालि चुमपुहि
22मोसाको पिका नियमआन्सार जेलाउ वाको सुतिसिअ्का दिना पुरा जेङहि कालाउ वाको आबा आमाइ वासेहेङ यरुसलेमको थानता परमेस्वरको आगाता चुमाहि। 23हाइदोनु प्रभु परमेस्वरको नियमता लेखेन्हाका हि, “झाराङ लाङ चान परमेस्वरको भाअ्सिङ पुनित जेनावा।”#दामालाअ्का १३:२,१२ 24प्रभु परमेस्वरको नियमता दोअ्काभाइपा एजोर कुर्जा माकुनु एजोर पारेउको चान बुङ भोकपिलि चुमाहि।#लेबि १२:६-८
25इङको पहर सिमियोन दोअ्का द्याङ यरुसलेमता हिघाखे। वा धरम द्याङ हिघाखे रो परमेस्वरको भक्ति पाघाखे। वा इस्राएलिगेलाइहेङ बान्चेपाका द्याङको आस पातेङ दामा खाङघाखे। पुनित हाङसा वाकोदोफा हिघाहि। 26परमप्रभु परमेस्वरको दिङगिल्का मुक्तिपिका ख्रिस्टहेङ मातिम्पाधाउ ना मास्याना दोअ्तेङ पुनित हाङसा वासेहेङ लाम्फासोङ गेपाका हिघाहि। 27कालाउ पुनित हाङसाको हाउसा निङतेङ सिमियोन थानता हानेहि। इङकोघरि दोङ नियम पुरा पालि मरियम रो योसेफ बुङ इसुहेङ चुमपुतेङ थानता थुकालिलोहि। 28सिमियोन जामालहेङ खुर्ता बाअ्तेङ परमेस्वरको बाखिन पातेङ दोअ्हि,
29“प्रभु, ना ताइको बाचा पुरा पाका हिना, एला ताइको बान्धाइहेङ सुबिस्तासो सिलि पि
30हाइदोनु ना दिङगिल्का मुक्तिपिकाहेङ का ताइकोङ मिँसो तिङलि निङघा।
31ना वासेहेङ गोताङ जात्याको द्याङगेलाइ तिनाको दोअ्तेङ दिङगिल्का एइ,
32वा दोङ बो जात्याको द्याङगेलाइहेङ नाङको दामा तिम्पाका चोलका हिन्हा
रो वा दोङ नाङको इस्राएलिगेलाइहेङ प्रताप पिका जेनावा।”#यसैया ४२:६; ४९:६; ५२:१०
33जामालको बारेता सिमियोनको दोअ्का काथा हिङतेङ वाको आमाइ रो आबा भारभुसाइहि। 34सिमियोन एम्बालाइहेङ सहसाम्पा पितेङ जामालको आमाइ मरियमहेङ दोअ्हि, “हिङ, इस्राएलता हेन्जाङ द्याङगेलाइको मुअ्काको रो उदारको चिनो ज्याको दोअ्तेङ परमेस्वर नाङको जामालहेङ दोङ साल्का हि। वा परमेस्वरको तिम्पिका चिनो जेनावा। जाइहेङ हेन्जाङ बिरोध पातेङ ताइको कोन्धाङको ठहरगेलाइ तिम्पावा। 35कालाउ नाङको कोन्धाङ सुइसुइका कातिहोइ बान्हाका भाइपाङ मारेम्फाङ तु:कावा।”
36थानता हन्ना दोअ्का एमि बेराङ आगाधुइका हिघाखे। वा आसेर खालको फनुएलको चामिन्दि हिघाखे। बिहु जेङका न्हिअ् बाअ्सारन्हुसो दोङ वा रान्दि जेङका हिघाखे। 37कालाउ वा द्याकुरिद्या बाअ्सार जेङका हिघाखे। वा थान मालाअ्सिङ न्हिसिङ नितिम म्हितुपाङ हितेङ रो पुकार पातेङ परमेस्वरहेङ पुजिघाखे। 38वा बुङ मरियम रो योसेफको भेर्पा लोतेङ परमेस्वरहेङ च्याबास पिहि। कालाउ यरुसलेमको उदारको दामा र्हुम्कालाइहेङ इसुको बारेता दोअ्पिहि।
39प्रभु परमेस्वरको नियमता दोअ्काआन्सार पालिगोइका गोताङ काम पालिदोतेङ योसेफ रो मरियम जामाल इसुहेङ चुमपुतेङ गालिलको ताइको पुर नासरतता घुरिहि।#मत्ति २:२३ 40कालाउ जामाल इसु बाराकाताङ बल, बुद्धि रो आकिलसो पोङघान्हातेङ हानिहि। हाइदोनु परमेस्वरको आसिस वाकोर्हुता हिघाहि।
जामाल इसु थानता
41इसुको आबा आमाइ बाअ्सारकिअ्पाङ लाअ्पिका पारबा मानेलि यरुसलेमता हानेघाखे।#दामालाअ्का १२:१-२७; नियम १६:१-८ 42इसु तेन्हे बाअ्सारको हिलाउ ओबालाइ वासेहेङ दोसाङ चुमतेङ जेलाउ भाइपा पारबा मानेलि यरुसलेम हानेहि। 43पारबा मानेलिदोकान्हुअ्सो एम्बालाइ घुरिलाउ जामाल इसु यरुसलेमताङ हिन्दिहि। कालाउ वा लाअ्धिन्हाका वाको आबा आमाइहेङ फोमदोङ माजेङहि। 44इसु ताइ द्याङ रो बो सानाइतिगेलाइ दोफाङ हि वाला दोअ्तेङ एम्बालाइ लिअ्पाङ तेहि। बेलादुबिकान्हुसो खिनिङ वाको सानाइति भायागेलाइको माझाता वासेहेङ भोलि तेङहि। 45चानहेङ हिसो बुङ मानिङलाउ इङको न्हेमि जामाल इसुहेङ भोलि आरोङ यरुसलेम भारि घुरिहि। 46भोतेङ हानेलाउ सुम्निता खिनिङ ओबालाइ इसुहेङ बोलधाका थानता दुसुहि। वा इङको पहर धरम मास्टरगेलाइदोफा योम्तेङ एम्बालाइको काथा हिङतेङ रो हिअ्तेङ हिघाहि। 47इन्ता जोम्का द्याङगेलाइ इसुको आकिल तिङतेङ रो वाको दोअ्का काथा हिङतेङ झाराङ भारभुसाइहि। 48चानहेङ इन्ता तिङलाउ वाको आमाइ आबा भारभुसाइतेङ मरियम वासेहेङ हिअ्हि, “आबाउ ना केलाइहेङ इदोइ हाइ पाखेना? खाङ, नाङको आबा रो का आतितेङ नासेहेङ भोलिलोन्हिङ।” 49इसु दोअ्हि, “नेलाइ कासेहेङ हाइपालि भोसुखेना? का ताइको आबाको साअ्ता हिलिगोयाङ दोअ्तेङ हाइ नेलाइ मागेसुन्हा?” 50वाको दोअ्का काथा मरियम रो योसेफ न्हेमिदोङ बुझिलिङ मादोहि। 51कालाउ जामाल इसु ओबालाइदोफाङ नासरतता घुरितेङ आबा आमाइको दोअ्का मानेतेङ हि। कालाउ वाको आमाइ इदोइ गोताङ काथागेलाइ मानिल्सिङ ताइको मनताङ ताअ्हि। 52इसु परमेस्वर रो द्याङ न्हेमिङको निगाहा निङतेङ जिउता रो आकिलता बारातेङ हानिहि।#१ समुएल २:२६; रेम्काले ३:४
Currently Selected:
लुका 2: DHIM
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
