लुका 1
1
आमुख
1माननिय थियोफिलस, हेन्जाङ द्याङगेलाइ केलाइको माझाता घाटितेङ पोङघाका बारदातगेलाइको बायान लेखेका काम पाका हि। 2इङको बारदातगेलाइचाहिँ लाम्फासो दोङ ताइकोङ मिसो तिङका रो याको बारेता रेम्काबानाल पारचार पाकालाइ दोअ्का हि। 3का बुङ इदोइबारेता सुरुसो दोङ रेम्फा भोघा रो नासेहेङ इदोइ बारेता मेलाइसो लेखेलि रेम्का ज्याङ दोअ्तेङ लेखेदोङखा। 4इदोइ किताब पर्हितेङ नासेहेङ दोअ्का काथागेलाइ हेथे जातिङको हि दोअ्तेङ ना ग्याना।
चिभुअ्लि पिका युहन्नाको जोलोम
5यहुदियाको राजा हेरोदको पालाता जकरिया मिङ हिका एमि धामि हिघाखे। वा अबिया दोअ्का धामि समुहको द्याङ हिघाखे। इङकोको बेअ् हारुन खालको धामिको चामिन्दि हिघाखे। वाको मिङ एलिसिबा हिघाहि।#१ इतिहास २४:१० 6इङको न्हेमि परमेस्वरको आगाता धरम हिघाखे। एम्बालाइ परमेस्वरको गोताङ हुकुम रो नियमगेलाइ माबिराइसिङ मानिघाखे। 7कुलाउ एम्बालाइको हासुङ खाल मान्थुघाखे, हाइदोनु एलिसिबा बान्जि हिघाखे। इङको न्हेमि हेन्जाइ बोइसा चाका हिघाखे।
8जेलाउ जकरिया परमेस्वरको आगाता ताइ हुलको पालाता धामि काम पादोङघाखे, 9कोलाउ धामिको सेवाको रितमाफिक चिठा व्हाअ्लाउ परमप्रभुको थानलिअ्ता दुल्तेङ धुमाना जोलाइका काम जकरियाहेङ परेहि। 10धुमाना जोलाइका पहरता जोम्तेङ हिका द्याङगेलाइ बाहार पुकार पादोङघाखे। 11परमप्रभुको एमि सादेलचर धुमाना जोलाइका थामेको दाम्पाहा जाअ्तेङ हिका तिङहि। 12जकरिया वासेहेङ तिङतेङ थिद्वाहि रो थिहि। 13कुलाउ सादेलचर वासेहेङ दोअ्हि, “ओइ जकरिया माथि, परमेस्वर नाङको पुकार हिङकाहि। एला नाङको बेअ् एलिसिबा नाङको भाअ्सिङ एलोङ चान जेनावा रो ना इङकोको मिङ युहन्ना ताअ्पि। 14इङको पहर ना हेन्जाङ लेङचाना रो हेन्जाङ द्याङगेलाइ बुङ वाको जोलोमता लेङचावा। 15हाइदोनु वा परमप्रभुको आगाता बारा द्याङ जेनावा। वा अङगुरको निघार रो बो हिदिङ बुङ निघार हेअ्लाउ माआमावा। वा ताइको आमाइको कोखेसो दोङ पुनित हाङसासो पोङघान्हावा।#गान्देका ६:३ 16वा इस्राएलको खालगेलाइता हेन्जाङहेङ एम्बालाइको परमप्रभु परमेस्वरभारि घुरिपावा। 17वा आत्मा रो सरबङता एलियाभाइपाङ जेङतेङ प्रभुखान्तेङ लाम्फा लोतेङ वाको दामा त्यार पावा। वा आबा रो चान चामिन्दिको माझाता मिलाप चुमावा। आटेर पाकालाइहेङ परमेस्वरको हुकुम मानेका द्याङको आकिलभारि थोङगिलावा। एसापा वा प्रभुको जनहेङ वाकोङ भाअ्सिङ त्यार पाप्यावा।”#मलाकि ४:५-६
18कोलाउ जकरिया सादेलचरहेङ दोअ्हि, “इदोइ का हेसापा गेलि? का वाराङ जेङहोइका रो काङको बेअ्को बोइसा बुङ घाटेलि दोहोइ।” 19सादेलचर वासेहेङ दोअ्हि, “का गब्रिएल, का परमेस्वरको आगाता जाअ्तेङहिखा। नादोफा काथा पालि रो इदोइ रेम्का बानाल हिम्पालि का दिङगिलन्हाका एइ।#दानिएल ८:१६; ९:२१ 20जेदोङ दिनाथिकापा इदोइ काथा पोङघा माज्यावा, कोलाउथिकापा ना लाता ज्याना रो धुइलि माद्वाना। हाइदोनु ना काङको कथनहेङ खान्धुर मापान्हा। जेदोङ कथन ताइको पहरता पोङघावा।”
21द्याङगेलाइ जकरियाहेङ र्हुम्तेङ हिघाखे रो थानता बेलोमनाङ भारभुसाइतेङ हिघाखे। 22जेलाउ जकरिया थान लिअ्तासो ओल्हेहि कालाउ वा द्याङगेलाइ दोफा नुइ धुइलि दोङ मादोहि। एन्साजेङलाउ एम्बालाइ थानलिअ्ता वा दर्सन निङहि दोअ्का काथा गेहि। वा धुइलिङ मादोतेङ बाहार र्हुमतेङ हिका द्याङगेलाइहेङ खुरहोइ टिप्नि पाहि।
23जकरियाको पुजा पाका पाला दोकान्हुसो वा ताइको साअ् हानिहि। 24इङकोन्हुअ्सो वाको बेअ् एलिसिबा गान्धितेअ्का जेङलाउ वा ना माहिना थिकापा म्होतेङ हि रो एसा दोअ्हि, 25“इदोइ काम प्रभु परमेस्वर दोङ काङको भाअ्सिङ पापिका एइ। वा कासेहेङ दाया पातेङ कासेहेङ द्याङको फतुर लागाइकासो जोगाइहि।”
इसुको जोलोमको बारेता
26एलिसिबा गान्धितेअ्का तु माहिना जेङकान्हुअ्सो परमेस्वर गब्रिएल सादेलचरहेङ गालिलको नासरत दोअ्का पुरता दिङगिल्हि। 27वा एमि बेजानकोता हानेहि, जाइहेङ दाउदको खाल योसेफ दोअ्का वाजानहेङ लाअ्पिका हिघाहि। इङको बेजानको मिङ मरियम हिघाहि।#मत्ति १:१८
28सादेलचर इङकोकोता हानेतेङ दोअ्हि, “मरियम, सेउपाखा! परमेस्वर नाङकोदोफा एइ।” 29कुलाउ मरियम इङको काथाहोइ आवाइहि रो इदोइ हिदोइ खालको सेउपाका एइ दोअ्तेङ मनता फोमपालि तेङहि। 30कालाउ सादेलचर वासेहेङ दोअ्हि, “माथि, मरियम, हाइदोनु नासेहेङ परमेस्वर दाया पाका हि। 31एला खाङ, ना गान्धितेअ्का जेनाना रो एलोङ चान जोन्मायाना। ना वाको मिङ इसु ताअ्ताना।#मत्ति १:२१ 32वा बारा जेनावा रो वासेहेङ मुल परमेस्वरको चान दोअ्तावा। परमप्रभु परमेस्वर वासेहेङ वाकोङ खाल दाउदको गादि प्यावा।#२ समुएल ७:१२; यसैया ९:७ 33वा याकुबको खालर्हुता राज पावा रो वाको सारभिको न्हुअ् माज्यावा।” 34मरियम सादेलचरहेङ दोअ्हि, “इदोइ हेसा जेङलि द्वावा, हाइदोनु का बेजान दोङ हिघा।” 35सादेलचर दोअ्हि, “पुनित हाङसा नाता ल्वावा रो बारा परमेस्वरको सरबङ ना र्हुता पर्यावा। इदोइखातिर जाइ जोनम्यावा, वा पुनित परमेस्वरको चान दोअ्तेङ दोअ्तावा। 36खाङ, नाङको ताइकोङ एलिसिबा बेराङ जेङलाउ बुङ न्हेजिउको जेङका हि। जाइ बान्झि हिघाहि कुलाउ वा न्हेजिउ जेङका तु माहिना थुकालि दोका हि। 37हाइपानु परमेस्वरको भाअ्सिङ हिदिङ काथा पालि मादोका मान्थु।”#सिरजाइ १८:१४ 38कालाउ मरियम दोअ्हि, “खाङ, का प्रभुको बान्धाइति, कासेहेङ नाङको दोअ्का भाइपा ज्याको।” इङकोन्हुअ्सो सादेलचर इन्तासो हानेहि।
मरियम एलिसिबाहेङ दुसुलि हानेका
39इङको दिनाता मरियम हातार पातेङ यहुदियाको एलोङ लाख भारिको देराता हानिहि। 40इन्ता वा जकरियाको साअ्ता हानेतेङ एलिसिबाहेङ सेउपाहि। 41जेलाउ एलिसिबा मरियमको सेउपाका हिङहि कोलाउ वाको कोखेता हिका जामाल तोङहि रो एलिसिबा पुनित हाङसासो पोङघान्हाहि।
42कालाउ वा बारा गालापातेङ दोअ्हि, “बेबालाइता ना सहसाम्पाको हिन्हा रो नाङको कोखेको जामाल हेथे च्याबासको हि। 43कार्हुता हेसापा निगाह जेङहि, काङको प्रभुको आमाइ काङकोता लोहि। 44हाइदोनु नाङको सेउपाका हिङतेङ काङको कोखेता हिका जामाल लेङचातेङ तोङहि।
45“वा च्याबासको एइ, जाइ परमप्रभु वासेहेङ दोअ्का काथा पोङघातावा दोअ्तेङ खान्धुर पाहि।”
मरियमको ले
46कालाउ मरियम दोअ्हि,
“का काङको कोन्धाङसो दोङ प्रभु परमेस्वरहेङ बाखिन्खा,
47रो काङको आत्मा काङको मुक्तिपिका परमेस्वरता लेङचाखे।
48हाइपानु वा का भाइका बान्धाइतिहेङ बुङ दाया पाहि। एला ओसो गोताङ खाल कासेहेङ च्याबासको दोअ्तावा।#१ समुएल १:११
49वा जाइ सरबङहिका एइ, वा काङको भाअ्सिङ बारा काम पाका हि। वाको मिङ पुनित हि।
50वासेहेङ थिकालाइहेङ वा खाल खालथिकापा दाया पावा।
51वा ताइको सरबङहिका खुरहोइ तुजुकगेलाइको ठहरहेङ चारामचुरुम पापिका हि।
52वा तुजुक राजागेलाइहेङ गादिसो हुल्पाका हि, कुलाउ नोइकालाइहेङ वा र्हुता तोल्हेका हि।#अय्युब ५:११; १२:१९
53वा म्हितुकालाइहेङ रेम्का चिज घाइपाङ पिकाहि, कुलाउ गिर्हिगेलाइहेङ खालि खुर दिङगिल्का हि।
54वा ताइको आबाखालदोफा पाका बाचा पुरा पातेङ ताइको सेबक इस्राएलहेङ साघाइका हि,
55वा आब्राहाम रो वाको खालगेलाइहेङ दाया पालि हेअ्लाउ बुङ मानिल्हि।”#सिरजाइ १७:७; १ समुएल २:१-१०
56इङको पहर मरियम सुम माहिना झोको एलिसिबादोफा हि रो इङकोन्हुअ्सो ताइको साअ् घुरिहि।
चिभुअ्लि पिका युहन्नाको जोलोम
57एला एलिसिबाको जामाल जेङका पहर लोहि रो वा एलोङ चान जेङहि। 58परमप्रभु वार्हुता वाको बारा निगाह तिङपाका हि दोअ्का हिङतेङ वाको भेर्पा हिकालाइ रो ताइगेलाइ वाकोदोफा लेङचाहि। 59येअ्निता एम्बालाइ जामालहेङ खतना पालि लोहि रो इङकोको मिङ वाको आबाको मिङभाइपाङ जकरिया ताअ्लि भोका हिघाखे।#लेबि १२:३ 60कुलाउ वाको आमाइ दोअ्हि, “माको, याको मिङ युहन्ना ताअ्लिगोयाङ।” 61एम्बालाइ एलिसिबाहेङ दोअ्हि, “नाङको ताइकोङता इसिका मिङ हिका हासुङ मान्थु।” 62कोलाउ एम्बालाइ इङकोको आबाहेङ तिपनि पातेङ हिअ्हि, “ना याको मिङ हाइ ताअ्लि भोखेना?” 63जकरिया एलोङ लेखेका सिलेट र्हेतेङ, “याको मिङ युहन्ना एइ” दोअ्तेङ लेखेपिहि। एम्बालाइ झाराङ भारभुसाइहि। 64इदोङ घरि जकरिया धुइलि दोअ्का जेङहि रो परमेस्वरको बाखिन पालि तेङहि। 65इदोइ गोताङ काथा तिङतेङ भेर्पा हिकालाइ भारभुसाइ तेङ परमेस्वरहेङ थिहि। इङकोन्हुअ्सो इदोइ काथागेलाइको नावाइ यहुदियाको लाख भारि चारचाराइहि। 66इसिका चारचाराइका हिङकालाइ झाराङ मनमनताङ दोअ्हि, “इदोइ जामाल न्हुअ्सो हिसिका ज्याङ वाला?” हाइदोनु परमेस्वरको सरबङ वाको र्हुता परिका हिघाहि।
जकरियाको बाखिन्काले
67जामालको आबा जकरिया पुनित हाङसासो पोङघातेङ धुइलि तेङहि,
68“इस्राएलिगेलाइको परमप्रभु, परमेस्वरको बाखिन्का ज्याको, हाइदोनु वा लोकाहि रो ताइको द्याङगेलाइहेङ बान्चिपाका हि!
69वा केलाइको भाअ्सिङ ताइको बान्धाइ दाउदको खालता एमि सरबङहिका बान्चेपाका जाअ्पाका हि,
70जेसापा वा लाम्फासो दोङ ताइको पुनित आगाधुइकाको नुइसो धुइहि,
71केलाइको दुस्मनगेलाइसो रो केलाइहेङ दिगमिग पाकालाइ झाराङको खुरसो केलाइ भालाइ निनाको।
72वा केलाइको खालगेलाइहेङ दाया तिम्पालि रो ताइको पुनित केरा फोम पालि,
73जेदोङ केरा वा केलाइको खाल आब्राहामदोफा केरा चाका हिघाहि,
74केलाइ केलाइको दुस्मनको खुरसो लाअ्पावा
75कालाउ केलाइ माथिसिङ वाको आगाता उचित रो पुनितदोफा ज्यानहिपा वाको सेवा पालि निनाको।
76ओइ काङको चान, ना बारा आगाधुइका जेनाना, हाइपानु ना प्रभुको आगाआगा वाको दामा त्यार पालि हानाना।#मलाकि ३:१
77ना प्रभुको जनगेलाइहेङ कुकरमसो माफ निङतेङ बान्चेस्वाना दोअ्का काथा धिरपाना।
78हाइदोनु केलाइको परमेस्वर दायाका हि। कालाउ वा सादेलसो ख्रिस्टहेङ र्हिमाको ल्होका साने भाइपाङ केलाइको माझाता दिङगिल प्यावा।
79कालाउ कितिकितिकाता हिका रो कालको नुइता परिलि तोमकालाइहेङ फाइसालामका प्यावा। कालाउ केलाइहेङ वा सुबिस्ताको दामाता हिगिल्पावा।”#यसैया ९:२
80कालाउ जामाल युहन्ना जिउता बारातेङ रो आत्माता बोल्यातेङ हानिहि। कालाउ इस्राएलिगेलाइकोता मातिम्पाधाउ वा उदादाङका थामेता दोङ हि।
Currently Selected:
लुका 1: DHIM
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
