लुका 17
17
इसु कुकरम रो खान्धुरको बारेता बिद्या
(मत्ति १८:६-७,२१-२२; मर्कुस ९:४२)
1इसु ताइको चात्यागेलाइहेङ दोअ्हि, “द्याङगेलाइहेङ कुकरमको आस्तिता देपाका काथागेलाइ ते जातिङकोङ ल्वावा। कालाउ धिकार, इङको द्याङगेलाइहेङ जाइ बोमिहेङ कुकरम पालि लागाइखे। 2जाइ म्हुइकालाइहेङ कुकरम पालि लागाइखे; इन्सिकाहेङ ते निर्घाता उन्ठुइको जान्ता तोइपितेङ जाहादिता थाल्गिल्लि दोङ रेम्फा जेङधावा। 3एन्साङ होस पातेङ हिसु, नाङको ओने कुकरम पानु वासेहेङ गावाइ। वा ताइको कुकरम मानितेङ परमेस्वरपाहा घुरिनु ते वासेहेङ माफ पि।#मत्ति १८:१५ 4कालाउ नाङको ओने नाङको खिलापता दिनाता न्हिअ्खे कुकरम पाखे रो वा न्हिअ्खे दोङ ताइको कुकरम मानितेङ परमेस्वरपाहा घुरिनु ते वासेहेङ माफ पि।”
5केलाइ इसुहेङ साल्तेङ दिङगिल्कालाइ, “प्रभु, केलाइको खान्धुर बार्हेपापि।” 6कालाउ इसु दोअ्हि, “नेलाइको खान्धुर पासाइको चालाइ झोकोका हिनु ते इदोइ मिच्किरिको सिङहेङ ‘उअ्न्हातेङ ना चावान्दिता थिङन्हालि हाने’ दोअ्नु ते वा मान्यावा।”
कामत्याको पालिगोइका
7“नेलाइता हासु बुङ ताइको कामत्याहेङ हाले चोइतेङ रो भेडा घोकासो घुरितेङ लोलाउ ‘मार्फा लोतेङ उम चालि योम्सु’ दोअ्स्वाना? 8भुरुङ ‘काङको भाअ्सिङ उम सार गा रो मिङतेङ कासेहेङ चालि पि। कालाउ का चालि दोअ्तेङ खिनिङ ना चा।’ 9हाइ ताइको कामत्या दोअ्का भाइपा कामपाहि दोअ्तेङ वा च्याबास प्याना कुनु? 10एन्सा दोङ नेलाइ बुङ आर्हाइका काम पालि दोअ्तेङ एसा दोअ्सु, ‘केलाइ ते नाङको कामत्या खिनिङ हिना हि। केलाइ ते नाङको दोअ्का भाइपा खिनिङ पाका हिन्हा हि।’”
इसु तेमि रोग्याखोअ्कालाइहेङ एल्पाहि
11इसु यरुसलेम हानेलाउ सामरिया रो गालिल माउजाको सिमाना जेङतेङ हानिहि। 12वा एलोङ देराता दुल्लि तोम्लाउ तेमि रोग्याल्होकालाइहेङ दुसुहि। एम्बालाइ आसा दुरे जाअ्तेङ 13बारा गाला पातेङ दोअ्हि, “प्रभु इसु, केलाइहेङ दाया पा!” 14जेलाउ इसु एम्बालाइहेङ तिङहि कालाउ एम्बालाइहेङ दोअ्हि, “नेलाइ धामि कोता हानेतेङ तिङपासु।” कालाउ एम्बालाइ धामि कोता हानेकाताङ पालाउ दामाताङ रोग्याखोअ्कासो एल्हि।#लेबि १४:१-३२ 15एम्बालाइता एमि ताइमि एल्का गेतेङ बारा गालाहोइ परमेस्वरको प्रताप पातेङ घुरितेङ लोहि। 16कालाउ वा इसुको खोकोइता सेउपातेङ वासेहेङ च्याबास पिहि। इङको सामरि जातको द्याङ हिघाखे। 17कालाउ इसु दोअ्हि, “तेमि एल्का माको कुनु? बो क्हामि हिसो हि? 18इदोइ सामरिबिना बोचाहिँ परमेस्वरहेङ च्याबास पिलि हाइपालि मालोहि?” 19इङकोन्हुअ्सो इसु इङको सामरिहेङ दोअ्हि, “एला ल्होतेङ हाने; हाइदोनु नाङको खान्धुरसो दोङ नासेहेङ एल्पाका हि।”
सादेलको सारभि
(मत्ति २४:२३-२८,३७-४१)
20एनि फरिसिगेलाइ इसुहेङ हिअ्हि, “सादेलको सारभि हेअ्लाउ ल्वाङ?” इसु एम्बालाइहेङ दोअ्हि, “सादेलको सारभि तिङपातेङ माल्वाङ। 21हासुलाउ बुङ सादेलको सारभि ‘इता हि’ कालाउ ‘उता हि’ दोअ्लि माद्वावा। हाइदोनु सादेलको सारभि नेलाइको माझाताङ हि।”
22इङकोन्हुअ्सो इसु ताइको चात्यागेलाइहेङ दोअ्हि, “इन्सिका पहर बुङ ल्वावा; जेलाउ नेलाइ ‘का द्याङको चानहेङ एनि झोको तिङलि निङलाउ बुङ जेङधाङ’ दोअ्तेङ दोस्वाना। कालाउ नेलाइ खाङलि मानिङस्वाना। 23द्याङगेलाइ नेलाइहेङ ‘इता खाङसु’ कालाउ ‘उता खाङसु’ दोअ्तावा। कालाउ एम्बालाइको काथाता खान्धुर मापासु। 24हाइदोनु जेसापा आदेलता बिजुलि जोल्लाउ फाइसालामपा तिङखे; एन्साङ पातेङ का द्याङको चान लोलाउ बुङ झाराङ द्याङगेलाइ तिनावा। 25कालाउ इदोइ जेङका खान्तेङ लाम्फा का द्याङको चान हेन्जाङ तु: भोगिलि गोयाङ। कालाउ इदोइ पुस्ताको द्याङगेलाइ कासेहेङ इन्कार पावा। 26जेसापा नोआको पालाता जेङका भाइपाङ का द्याङको चान लोका दिनाता बुङ एन्साङ ज्यावा।#सिरजाइ ६:५-८ 27इङको पहर नोआ जाहाजलिअ्ता मादुल्पाधाउ द्याङगेलाइ चादोङघाहि, आम्दोङघाहि रो बिहु पादोङघाहि। एन्सालाउ बारा वाइ लोतेङ बाने लोलाउ झाराङहेङ दुबिपाहि।#सिरजाइ ७:६-२४ 28एन्साङ दोङ लोतको पहरता बुङ एन्साङ जेङका हिघाहि। द्याङगेलाइ चातेङ आम्तेङ, चोलतेङ पिअ्तेङ; बालि लागाइतेङ रो साअ् धाम्का काम पादोङघाखे।#सिरजाइ १८:२०; १९:२० 29कालाउ लोत सदोम लाअ्का दिना दोङ सादेलसो मे रो गन्धक हुल्तेङ झाराङ द्याङगेलाइ सिहि। 30का द्याङको चान लोका दिना बुङ एन्साङ ज्यावा।
31“इङको पहर साअ् बाहार हिका द्याङगेलाइ ताइ आनेमाने नानि साअ् लिअ्ता मामादुलाको। एन्साङ पातेङ मिलिङता हिकालाइ बुङ साअ्ता माघुर्याको। 32लोतको बेअ् घुरितेङ खाङलाउ मुलुकको खाम्भा जेङका काथा फोमपासु।#सिरजाइ १९:२६ 33जाइ ताइको ज्यान बान्चेपालि भोकावा, वा इङको गुमाइपावा। जाइ ताइको बायु गुमाइपावा वा असिम ज्यान निनावा।#मत्ति १०:३९; १६:२५; मर्कुस ८:३५; लुका ९:२४; युहन्ना १२:२५ 34हाइदोनु का नेलाइहेङ दोअ्ताङका, इङको दिलिमा एलोङ सिदाउता जिम्का न्हेमिता एमिहेङ चुमप्वावा रो भेनेङहेङ लाअ्ध्यावा। 35आरोङ दोसा दोसाङ योम्तेङ जान्ता म्हाइतेङहिका न्हेमि बेबालता एमिहेङ चुमप्वावा रो भेनेङहेङ लाअ्ध्यावा। 36[एन्साङ पातेङ मिलिङता दोसा दोसाङ काम पातेङ हिका न्हेमिता एमिहेङ चुमप्वावा रो भेनेङहेङ लाअ्ध्यावा।”]#१७:३६इदोइ दारजा आधे स्रोत बाइबलता मान्थु।
37कालाउ चात्यागेलाइ इसुहेङ हिअ्हि, “प्रभु, इदोइ हिता ज्याङ?” इसु एम्बालाइहेङ दोअ्हि, “जेता सिका गुपुस हि, इन्ता दोङ सिघुनगेलाइ जोम्खे।”
Currently Selected:
लुका 17: DHIM
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
