लुका 16
16
चालाक खाजान्चिको तुलना
1इसु ताइको चात्यागेलाइहेङ दोअ्हि, “एमि हेन्जा टाका काउरि हिका द्याङको साअ्द्वार खाङका एमि खाजान्चि हिघाहि। एनि आधेमि द्याङगेलाइ इङको हिका चाका द्याङकोता लोतेङ ‘इङको खाजान्चि नाङको टाका काउरि दोपापिलि तोमदोङखे’ दोअ्तेङ हिङपाहि। 2कालाउ वा खाजान्चिहेङ काइतेङ हिअ्हि, ‘नाङको बारेता का इदोइ हाइ हिङदोङखा? नाङको पाका गोताङ हर हिसाब कासेहेङ बुझाइ। हाइपानु एलासो उसो ना खाजान्चि जेङलि मानिनाना।’ 3एन्सा जेङलाउ इङको खाजान्चि मन मनताङ दोअ्हि, ‘काङको मालिक कासेहेङ खाजान्चिको कामसो ओल्हेपालि तोम्का हि; एला का हाइपालि? का तोलिचोइलि बुङ माद्वाङका रो र्हेतेङ चालिबुङ लेदेरखा। 4एला का फोमपाहोइका! काङको मालिक कासेहेङ खाजान्चिसो ओल्हेपालाउ बुङ सानाइति बान्हाइतेङ ताअ्घा पानु ओबालाइ ते खानाङ वाला!’ 5इङकोन्हुअ्सो वा मालिकको रिन र्हुका झाराङहेङ एमि एमि पा काइहि। कालाउ वा एमिहेङ हिअ्हि, ‘काङको मालिकको रिन ना हेथे र्हुका हिना?’ 6वा दोअ्हि, ‘सुम हाजार लिटर जैतुनको चुइति।’ खाजान्चि दोअ्हि, ‘को नाङको तमसुकता एला ए हाजार नासाइ लिटर खिनिङ बान्हाइ।’ 7आरोङ वा भेनेङहेङ हिअ्हि, ‘नाङको तिरिलि गोइका रिन हेथे हि?’ वा दोअ्हि, ‘येअ् हाजार पाथि गहम।’ खाजान्चि दोअ्हि ‘को नाङको तमसुकता येअ् साइ पाथि खिनिङ बान्हाइ।’
8“इदोइ काथा गितेङ इङको मालिक बाइमान खाजान्चिको चालाकिहेङ तिङतेङ बाखिन्हि। हाइदोनु परमेस्वरता खान्धुर मापाकालाइ ताइको द्याङगेलाइ दोफा बेभार पालाउ परमेस्वरता खान्धुर पाकालाइ खान्तेङ हेन्जाङ चालाक जेङखे।
9“का नेलाइहेङ दोअ्ताङका, दुनियाको टाका काउरिसो सानाइति बान्हाइसु। जेलाउ इङको टाका काउरि दोकावा नेलाइहेङ सादेलता स्वागत पावा।”
आतुइका काथाता बुङ भरपरेका जेङलिगोयाङ
(मत्ति ६:१४)
10इसु आरोङ दोअ्हि, “आतुइका काथाता भर पालि दोका द्याङ दोफा बारा काथाता बुङ भर पालि दोखे। एन्साङ आतुइका काथाता बाइमानि जेङका द्याङ बारा काथाता बुङ बाइमानि दोङ जेङखे। 11इदोइखातिर सुमिङको टाका काउरिता खान्धुर पाका माजेङनु ते नेलाइहेङ जातिङको सादेलता हिका टाका काउरि हासु जिम्मा प्यावा कुनु? 12यदि नेलाइ बोमिको टाका काउरिता खान्धुर पाका माजेङनु ते नेलाइको निङलि गोइका टाका काउरि हासु प्यावा कुनु?
13“हिदोइ बुङ कामत्या न्हेमि मालिकको सेवा पालि माद्वावा। हाइपानु वा एमिहेङ मारेम्का पावा रो भेनेङहेङ दायावा। आरोङ एमिहेङ आदर पावा कालाउ भेनेङहेङ खाङलि माकिअ्तावा। एन्साङ पातेङ नेलाइ बुङ परमेस्वर रो टाका काउरि न्हेमिकोङ सेवा पालि मादोस्वाना।”#मत्ति ६:२४
इसुको बो आधे कथनगेलाइ
(मत्ति ११:१२-१३; ५:१८,३२)
14इदोइ गोताङ काथागेलाइ हिङतेङ फरिसिगेलाइ लेङतेङ इसुको खिल्लि उराइपाहि। हाइदोनु एम्बालाइ टाका काउरिहेङ दोङ माया पाघाहि। 15कालाउ इसु एम्बालाइहेङ दोअ्हि, “नेलाइ द्याङगेलाइको नजरता धरम तिङलि ते भोसुखेना कुलाउ परमेस्वर नेलाइको कोन्धाङ गेखे। द्याङको झाउका फोमपाका इन्सिका काथागेलाइहेङ परमेस्वर आखेका दोअ्तेङ मोन्दा माताखे।
16“चिभुअ्लि पिका युहन्नाको पहरथिकापा मोसाको पिका नियम रो आगाधुइकालाइको बिद्या यहुदि आगुवागेलाइ मानेतेङ लोदोङघाहि। इङको पहरसो एला थिकापा सादेलको सारभिको रेम्काबानाल हिम्पाका काम जेङदोङ खे। कालाउ झाराङ सादेलको सारभिता दुल्लिको भाअ्सिङ बल पादोङखे।#मत्ति ११:१२-१३ 17आदेल रो सुमिङ राम्तेङ हानेलि द्वावा कालाउ परमेस्वरको नियमको एलोङ काथा बुङ मारामावा।#मत्ति ५:१८ 18जाइ ताइको बेअ्हेङ लाअ्तेङ भेनेङ बेबालहेङ बिहु पावा वा कुकरम पावा। कालाउ जाइ केअ्को लाअ्का बेबालहेङ बिहु पावा वा बुङ कुकरम पावा।”#मत्ति ५:३२; १ कोरिन्थि ७:१०-११
धनि द्याङ रो लाजरस
19इसु आरोङ दोअ्हि, “ए पहरता एमि गिह्रि द्याङ हिघाहि। वा जेलाउ बुङ जाङका मलमलको धाबा लागाइतेङ मोज माजा पातेङ ज्यान दोपाघाहि। 20एमि लाजरस दोअ्का हाइदोङ मान्थुका द्याङ हिघाहि। कालाउ वाको गोताङ जिउता पेचारा दोङ पेचारा जेङका हिघाहि। द्याङगेलाइ वासेहेङ धनि द्याङको सालेङको मुल फिनुता चुमातेङ ताअ्पाघाहि। 21इङको धनि द्याङ चाका थामेसो हुल्का टुकारा टुकिरि चालि निनाङका बे दोअ्तेङ वा आसपातेङ हिघाहि। कालाउ खियागेलाइ लोतेङ वाको पेचारागेलाइ देअ्पिघाखे।
22“एनि इङको निरधन लाजरस सिहि रो सादेलचरगेलाइ वासेहेङ चुमपुतेङ आब्राहामको दोसा ताअ्हि। इङको गिर्हि द्याङ बुङ सिहि रो लिअ्न्हाहि। 23पातेलता हानेतेङ हेन्जाङ तु: निङचानाङ वा र्हुता म्हालतेङ खाङलाउ आब्राहामको भेर्पाङ लाजरसहेङ योम्तेङ हिका तिङहि। 24कालाउ वा र्हिकाइतेङ दोअ्हि, ‘आबा आब्राहाम, कासेहेङ दायातेङ इता लाजरसहेङ दिङगिल्पि। वा ताइको आङगुलि चिता चोभेरतेङ एथोपा लाउ बुङ काङको देतोङता ह्याअ्पा प्याको। हाइदोनु का इदोइ मेको रापता सातपाताइदोङखा।’ 25कालाउ आब्राहाम वासेहेङ दोअ्हि, ‘चान, हाइ नासेहेङ फोम मान्थु? फोमपातेङ खाङ त! ना सुमिङता हिलाउ नाङको ज्यानता रेम्कारेम्का आनेमाने निङन्हा। कालाउ लाजरस मारेम्फाङ तु: निन्चाका हिघाहि। कालाउ वा इता सुख रो सुबिस्ता निङकाहि कालाउ ना एला तु: भोगिदोङखेना। 26आरोङ नाङको रो केलाइको माझाता बारा वाङखारा हि। एन्सा जेङलाउ हासु बुङ वारपार पातेङ हानेलि लोलि माद्वावा।’ 27कालाउ इङको धनि द्याङ दोअ्हि, ‘आबा, एन्सा जेङनु का नासेहेङ बिनइ पाखा लाजरसहेङ काङको आबाको साअ्ता दिङगिल्पि। 28हाइदोनु बो काङको नामि दादा ओनेगेलाइ हि। वा एम्बालाइहेङ इदोइ पातेलको पिरता मालाको दोअ्तेङ चेतानि प्याको।’ 29कालाउ आब्राहाम दोअ्हि, ‘एम्बालाइहेङ चेतानि पिलिको भाअ्सिङ मोसा रो आगाधुइकालाइको लेखेका धरम किताब हिदोङ हि। नाङको दादा ओनेगेलाइ इङकोङ मानितेङ ह्याको!’ 30आरोङ इङको धनि द्याङ दोअ्हि, ‘आबा आब्राहाम, इङकोझोको खिनिङ माज्याङ। हाइदोनु एमि सिका द्याङ दोङ सिन्हुतेङ आरोङ एम्बालाइकोता हानितेङ सम्झाइ बुझाइ पानु खिनिङ एम्बालाइ ताताइको कुकरम मानितेङ परमेस्वरपाहा घुरिधावा।’ 31कालाउ आब्राहाम वासेहेङ दोअ्हि, ‘मोसा रो आगाधुइकालाइको काथा दोङ माहिङकालाइ; सिका द्याङ दोङ सिन्हुतेङ हानेलाउ बुङ एम्बालाइ खान्धुर मापावा।’”
Currently Selected:
लुका 16: DHIM
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
