युहन्ना 2
2
काना पुरता बिहु जात्रि
1सुम दिना गालिल माउजाको काना पुरता एलोङ साअ्ता बिहु हिघाहि। इङको बिहुता इसुको आमाइ बुङ लोका हिघाहि। 2इसु रो वाको चात्यागेलाइहेङ बुङ बिहुता नेउतापिका हिघाखे। 3अङगुरको निघार दोकान्हुअ्सो इसुको आमाइ वासेहेङ दोअ्हि, “एम्बालाइदोसा हिका अङगुरको निघार दोहोइ।”
4इसु दोअ्हि, “आमाइ, का हाइपालि गोयाङका कासेहेङ मादोअ्। काङको पहर एलाथिकापा लोनाङ मान्थु।” 5वाको आमाइ कामत्यागेलाइहेङ दोअ्हि, “इसु जेदोङ दोअ्खे, इङकोङ पासु।”
6इन्ता उन्ठुइ खोपाइतेङ ताअ्का तु लोङ घ्याम्पागेलाइ हिघाखे। इङको घ्याम्पागेलाइता साइसाइ लिटर चि चाघाखे। इसिका घ्याम्पागेलाइचाहिँ यहुदिगेलाइ ताइमिहेङ चोखाइलि भाअ्सिङ चालाइगाइघाखे। 7इसु एम्बालाइहेङ दोअ्हि, “घ्याम्पागेलाइता चिहोइ पोङघापासु।” एम्बालाइ घ्याम्पाको नुइथिकापाङ चि पोङघापापिहि।
8इङकोन्हुअ्सो इसु एम्बालाइहेङ दोअ्हि, “एला आतुइसा सारितेङ देराको माझिकोता चुम्पुसु।” एम्बालाइ एन्साङ पाहि। 9जेलाउ देराको माझि इङको चि चाखेहि कोलाउ इङको अङगुरको निघार जेङका हिघाहि। इङको अङगुरको निघार हितासो लोहि, इङको हासुङ गेका मान्थुघाहि। कुलाउ चि पोङघापाका कामत्यागेलाइ खिनिङ गेघाखे।
कोलाउ देराको माझि दारुवाहेङ काइतेङ दोअ्हि, 10“बोमि ते लाम्फा ताका अङगुरको निघार आम्लि पिखे कालाउ बान्सालाइ हेन्जाङ आम्लिदोकान्हुअ्सो खिनिङ माताका अङगुरको निघार पिखे। ना ते एलाथिकापा ताका अङगुरको निघार ताअ्काहिना।”
11वाको चिनोगेलाइता इदोइ लाङ चिनो इसु गालिलको काना पुरता पाहि। एसापा वा ताइको प्रताप देखाल पाहि, कालाउ वाको चात्यागेलाइ वासेहेङ खान्धुर पाहि।
इसु थान पुनित पाका
(मत्ति २१:१२-१३; मर्कुस ११:१५-१७; लुका १९:४५-४६)
12इङकोन्हुअ्सो वा ताइको आमाइ, ओनेगेलाइ रो चात्यागेलाइदोफा कफर्नहुमता हानेहि रो आधे दिना इन्ताङ हि।
13यहुदिगेलाइको लाअ्पिका पारबा लोलि तोम्का हिघाहि रो इसु यरुसलेमता हानेहि।#दामालाअ्का १२:१-२७ 14वा थानता पिया, भेरा, पारेउ पिअ्कालाइहेङ रो टाका सोकालाइ चोल्तेङपिअ्तेङ हिका दुसुहि। 15कोलाउ दिह्यामको एलोङ छरि बान्हाइतेङ वा इङको झाराङहेङ, इङकोको भेरागेलाइ रो पियागेलाइहेङ सुदाङ थानसो बाहार गिल्गिल्हि रो टाका सोकालाइको चानचुन तुपितेङ एम्बालाइको टेबुल सुदाङ लोङपापिगिल्हि। 16पारेउ पिअ्कालाइहेङ वा दोअ्हि, “इतासो इदोइ गोताङ थोक चुमपुसु। काङको आबाको साअ्हेङ चोल्कापिअ्का थामे माबान्हाइसु!”
17इङको पहर वाको चात्यागेलाइ धरमकिताबता लेखेन्हाका इदोइ काथा फोमपाहि, “नाङको साअ्को जोसहोइ कासेहेङ ओअ्पावा।”#ले ६९:९
18यहुदि आगुवागेलाइ इसुहेङ दोअ्हि, “ना इदोइ काम पाखेना पानु, याको भाअ्सिङ केलाइहेङ हाइ चिनो तिङपाना?”
19इसु एम्बालाइहेङ दोअ्हि, “इदोइ थानहेङ र्हाअ्पिसु रो का सुम्निता यासेहेङ जाअ्पाङका।”#मत्ति २६:६१; २७:४०; मर्कुस १४:५८; १५:२९
20कोलाउ यहुदिगेलाइ दोअ्हि, “इदोइ थानहेङ बान्हाइलि न्हेकुरितु बाअ्सार लागेका हिघाहि। हाइ ना यासेहेङ सुम्निता जाअ्पालि द्वाना कुनु?” 21कुलाउ जेदोङ थानको बारेता इसु धुइका हिघाहि, इङको वाको जिउ हिघाहि। 22जेलाउ वा सिकासो सिन्हुहि, कोलाउ इसुको दोअ्का इदोइ काथा चात्यागेलाइ फोमपाहि। कालाउ एम्बालाइ धरमकिताब रो इसुको धुइका काथाता खान्धुर पाहि।
23जेलाउ वा लाअ्पिका पारबाको भतेरको पहर यरुसलेमता हिघाहि, कोलाउ वाको पाका चिनोगेलाइ तिङतेङ हेन्जाङ द्याङगेलाइ वाको मिङता खान्धुर पाहि। 24कुलाउ इसु ताइमिङ एम्बालाइको भरता मालाअ्पाहि। 25वासेहेङ द्याङको बारेता हासुङ धिरपालि जरुरि मान्थुघाहि। हाइपानु द्याङ हाइ एइ रो वाको कोन्धाङता हाइ हिखे, इङको वा ताइमिङ गेघाखे।
Currently Selected:
युहन्ना 2: DHIM
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
