युहन्ना 1
1
कथन जिउ जेङहि
1लामफोर्ति बचन हिघाहि, बचन परमेस्वरदोफा हिघाहि, कालाउ बचन परमेस्वर हिघाहि। 2वा लामफोर्ति परमेस्वरदोफाङ हिघाहि।
3गोताङ थोक वासो सिरजाइन्हाहि, जेङका हिदिङ थोक बुङ वामाकोसा मासिरजाइन्हाहि। 4वाता ज्यान हिघाहि रो इङको ज्यान द्याङगेलाइको जोल्का हिघाहि। 5इङको जोल्का कितिकितिकाता चिल्काखे रो कितिकितिका इङकोहेङ जितिलि दोका मान्थु।
6परमेस्वरसो दिङगिलन्हाका ए मि द्याङ हिघाखे, जाइको मिङ युहन्ना हिघाहि।#मत्ति ३:१; मर्कुस १:४; लुका ३:१,२ 7वासो झाराङ द्याङगेलाइ खान्धुर पालि द्वाको दोअ्तेङ इङको जोल्काको दासि पिलि वा दासि जेङतेङ लोहि। 8युहन्ना ताइमिङ इङको जोल्का मान्थुघाहि, कुलाउ वा इङको जोल्काहेङ दासि पिलि लोहि।
9झाराङ द्याङगेलाइहेङ आकिल पिका जातिङको जोल्का दुनियाता लोदोङघाहि। 10वा दुनियाता हिघाहि, दुनिया वाकोसो सिरजाइन्हाहि, कोलाउबुङ दुनियाको द्याङगेलाइ वासेहेङ मानाल्हि। 11वा ताइकोङ द्याङगेलाइकोता लोहि, कुलाउ वाको ताइको द्याङगेलाइ वासेहेङ मार्हुहि। 12कुलाउ जेथे वासेहेङ र्हुहि रो वाको मिङता खान्धुर पाहि, वा एम्बालाइहेङ परमेस्वरको चानचामिन्दि जेङका खाबारा पिहि। 13एम्बालाइ हितिसो, जिउको लाल्सासो रो हिदिङ द्याङको लाल्सासो माको, कुलाउ परमेस्वर दोङ एम्बालाइहेङ ताइको चान चामिन्दि बान्हाइहि।
14कालाउ कथन द्याङ जेङहि, वा निगाहा रो सतसो पोङघा न्हातेङ केलाइको माझाता बासा हि। केलाइ वाको प्रताप तिङन्हाहि, जेदोङ प्रताप आबासो लोका एखिनिङ चानको भाइका हिघाहि।
15युहन्ना वाको बारेता दासि पितेङ बारा गालाता दोअ्हि, “वा इङको खामाल हि, जाइको बारेता का दोअ्घा, ‘कान्हुअ्सो लोका काखान्तेङ हेन्जा बाराका हि, हाइदोनु वा काखान्तेङ लाम्फासोङ हिघाहि।’”
16वाको निगाहासो केलाइ एलोङ निगाहार्हुता भेनेङ निगाहा निङका हिन्हाहि। 17हाइदोनु नियम मोसासो पिन्हाहि, कुलाउ निगाहा रो सतचाहिँ इसु ख्रिस्टसो लोहि। 18परमेस्वरहेङ हासुङ हेअ्लाउ तिङका मान्थु। कुलाउ आबाको दोसा हिका ए खिनिङ चान वासेहेङ देखाल पिका हि।
चिभुअ्लि पिका युहन्नाको दासि
(मत्ति ३:१-१२; मर्कुस १:१-८; लुका ३:१-१८)
19जेलाउ यरुसलेमसो यहुदि आगुवागेलाइ धामिगेलाइ रो लेबिगेलाइहेङ वाकोता “ना हासु एइ?” दोअ्का काथा हिअ्लि दिङगिल्हि, कोलाउ युहन्नाको दासि इदोइ हिघाहि। 20वा नामन्जुर मापाहि, “का ख्रिस्ट माको” दोअ्तेङ मन्जुर पाहि।
21कोलाउ एम्बालाइ वासेहेङ हिअ्हि, “एन्सानु ना एलिया हिन्हा?”
युहन्ना दोअ्हि, “आहाँ माको।”
एम्बालाइ हिअ्हि, “हाइ ना इङको आगाधुइका हिन्हा?”
वा दोअ्हि, “माको।”#मलाकि ४:५; नियम १८:१५,१८
22एम्बालाइ वासेहेङ दोअ्हि, “ना हासु कुनु? केलाइहेङ दोअ् रो केलाइहेङ दिङगिल्कालाइहेङ केलाइ दोअ्लि द्वाको। ना ताइको बारेता हाइ दोअ्खेना?”
23युहन्ना दोअ्हि, “यसैया आगाधुइकाको दोअ्काभाइपाङ का ‘प्रभुको दामा त्यार पासु’ दोअ्तेङ उदादाङका थामेता र्हिकाइका एमि खामालको का गाला एइ।”#यसैया ४०:३
24इङको हिअ्लि लोकालाइहेङ फरिसिगेलाइ दिङगिल्का हिघाखे। 25कालाउ एम्बालाइ युहन्नाहेङ हिअ्हि, “ना ख्रिस्ट बुङ माको, एलिया बुङ माको, केलाइको दामा खाङका इङको आगाधुइका बुङ माको पानु, हाइपालि चिभुअ्लि पिखेना?”
26युहन्ना एम्बालाइहेङ दोअ्हि, “का ते चिहोइ चिभुअ्लि पिखा, कुलाउ नेलाइको माझाता एमि जाअ्का हि, जाइहेङ नेलाइ मानालसुखेना। 27कान्हुअ्सो लोका वा दोङ हि। का वाको जुताको तुना खाइलि लायकको बुङ मान्थुघा।”
28इदोइ काथा यर्दन झोरा ओदोइपार बेथानियाता जेङका हिघाखे, जेता युहन्ना चिभुअ्लि पिदोङ घाखे।
परमेस्वरको भेरा इसु
29जुम्निदिना युहन्ना इसुहेङ ताइमिभारि लोतेङहिका तिङतेङ दोअ्हि, “खाङसु, दुनियाको द्याङगेलाइको कुकरम तोल्हेतेङचुम्पुका परमेस्वरको भेरा! 30वा वादोङ हि जाइको बारेता का दोअ्का हिघाखा, ‘कान्हुअ्सो ए मि लोदोङखे, जाइ काखान्तेङ झाउका हि, हाइदोनु वा काखान्तेङ लाम्फासोङ हिघाहि।’ 31का ताइमिङ वासेहेङ नाल्का मान्थुघाघा, कुलाउ वा इस्राएलता देखाल ज्याको दोअ्तेङ दोङ चिहोइ चिभुअ्लि पितेङ लोघा।”
32युहन्ना एसा दोअ्तेङ दासि पिहि, “का परमेस्वरको हाङसाहेङ कुरजाको आकारता सादेलसो खुअ्तेङ वार्हुता न्होअ्का तिङघा। 33का वासेहेङ नाल्का मान्थुघाघा, कुलाउ जाइ कासेहेङ चिहोइ चिभुअ्लि पिलि दोअ्तेङ दिङगिल्हि, वा दोङ कासेहेङ एसा दोअ्का हिघाहि, ‘जाइर्हुता ना परमेस्वरको हाङसाहेङ खुअ्तेङ रो न्होअ्तेङहिका तिनाना, पुनित हाङसाहोइ चिभुअ्लि पिका वा दोङ हि।’ 34का तिङका हिघा रो दासि पिका हिघा, परमेस्वरको चान वा दोङ हि।”
इसुको लाङ चात्यागेलाइ
35आरोङ भेनेङ दिना युहन्ना वाको चात्यागेलाइता न्हे मिदोफा जाअ्तेङ हिघाखे। 36वा इसुहेङ हानेतेङहिका तिङतेङ दोअ्हि, “खाङसु, परमेस्वरको भेरा!” 37वाको दोअ्का इदोइ काथा हिङतेङ इङको न्हेमि चात्यागेलाइ इसुहेङ पिताइहि।
38इसु घुरितेङ खाङहि रो एम्बालाइहेङ न्हुअ्न्हुअ् लोतेङहिका तिङतेङ हिअ्हि, “नेलाइ हाइ भोदोङसुखेना?” एम्बालाइ वासेहेङ दोअ्हि, “मास्टर, ना हिता हिखेना?”
39वा एम्बालाइहेङ दोअ्हि, “लोसु, नेलाइ तिङस्वाना।” इङको पहर दिलिमाको द्या बजेलि तोम्का हिघाहि। एम्बालाइ इसुदोफा हानेहि, कालाउ वाको हिका थामे खाङहि रो इङको दिना वाकोदोफाङ बासा हि।
40युहन्नाको दोअ्का काथा हिङतेङ इसुहेङ पिताइका न्हेमिता ए मिचाहिँ सिमोन पत्रुसको ओने अन्द्रियास हिघाखे। 41वा लाम्फा ताइको दादा सिमोनहेङ दुसुहि रो वासेहेङ दोअ्हि, “केलाइ मसिहहेङ (हिब्रु राउता जाइको माने ख्रिस्ट एइ) दुसुन्हाका हिन्हाहि।” 42अन्द्रियास सिमोनहेङ इसुकोता चुमाहि।
इसु सिमोनहेङ खाङहि रो दोअ्हि, “ना योआनेसको चान सिमोन हिन्हा। खाङ, ना केफास (जाइको माने, उन्ठुइ) दोअ्न्हावा।” (जाइको माने ग्रिक राउता पत्रुस जेङखे।)
फिलिप रो नथानेल
43जुम्निदिना इसु गालिल माउजाता हानेलि निधो पातेङ ओल्हेहि। इङकोङ पहर वा फिलिपहेङ दुसुहि रो दोअ्हि, “कासेहेङ पिताइ।”
44अन्द्रियास रो पत्रुसभाइपाङ फिलिप बुङ बेथसेदा पुरको दोङ हिघाखे। 45फिलिप नथानेलहेङ दुसुतेङ दोअ्हि, “जाइको बारेता मोसा नियमता रो आगाधुइकालाइ बुङ लेखेका हिघाखे, योसेफको चान नासरतको इसुहेङ केलाइ दुसुका हिन्हाहि।”
46नथानेल इङकोहेङ दोअ्हि, “हाइ नासरतसो हिदिङ रेम्का काथा लोलि द्वावा कुनु?”
फिलिप इङकोहेङ दोअ्हि, “लोतेङ खाङ।”
47इसु नथानेलहेङ ताइमिभारि लोतेङहिका तिङतेङ इङकोको बारेता इसु दोअ्हि, “ए मि जातिङको इस्राएलिहेङ खाङसु, जाइता हिदिङ जाल मान्थु।”
48नथानेल वासेहेङ हिअ्हि, “ना कासेहेङ हेसापा नालन्हा?”
इसु इङकोहेङ दोअ्हि, “फिलिप नासेहेङ काइका लाम्फा, दुमिरिको सिङलेता का नासेहेङ तिङका हिघाखा।”
49नथानेल वासेहेङ दोअ्हि, “मास्टर, ना परमेस्वरको चान हिन्हा रो ना इस्राएलको राजा हिन्हा।”
50इसु इङकोहेङ दोअ्हि, “का नासेहेङ दुमिरिको सिङलेता तिङघा दोअ्नाङ दोङ ना खान्धुर पाखेना? ना इदोइखान्तेङ आरोङ बाराका काथागेलाइ तिनाना।” 51कालाउ इसु इङकोहेङ दोअ्हि, “जातिङको, का नासेहेङ दोअ्खा, नेलाइ सादेल हेनाका रो परमेस्वरको सादेलचरगेलाइ द्याङको चानर्हुता ताङतेङ रो खुअ्तेङ हिका तिङस्वाना।”#सिरजाइ २८:१२
Currently Selected:
युहन्ना 1: DHIM
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
