साल्तेङ दिङगिल्का 1
1
परमेस्वरको कबोल पाका पुनित हाङसा
1माननिय थियोफिलस, इसुको पालि रो धिरपालि भो:का गोताङ काथाको बारेता काङको लाङ किताबता का लेखेलि दोहोइका।#लुका १:१-४ 2इसु सादेल हानेका खान्तेङ लाम्फा ताइमिको साल्का साल्तेङ दिङगिल्कालाइहेङ पुनित हाङसाको सरबङसो हुकुम पिहि। 3इसु तु: भोगितेङ कुरुसता सिकान्हुअ्सो न्हेकुरि दिनाथिकापा साल्तेङ दिङगिल्कालाइकोता तिङन्हाहि रो वा ताइमिङहेङ सिन्हुका हिघा दोअ्तेङ दासि पिहि। एम्बालाइ वासेहेङ तिङहि रो तिङहि रो वा एम्बालाइदोफा परमेस्वरको सारभिको बारेता काथा पाहि।
4एअ्खे इसु एम्बालाइदोफा चालि योम्लाउ वा एम्बालाइहेङ इसिका हुकुम पिहि, “नेलाइ यरुसलेम काङको आबाको पाका कबोलहेङ र्हुम्तेङ हिसु। इङको कबोलको बारेता का नेलाइहेङ लाम्फा बुङ दोअ्का हिघाखा,#लुका २४:४९ 5युहन्ना ते चिको चिभुअ्लि पिघाखे, कालाउ एलाको आसा दिनान्हुअ्सो नेलाइ पुनित हाङसाको चिभुअ्लि निङस्वाना।”#मत्ति ३:११; मर्कुस १:८; लुका ३:१६; युहन्ना १:३३
इसु सादेल हानेका
6इदोइखातिर जेलाउ साल्तेङ दिङगिल्कालाइ जोम्हि, कोलाउ एम्बालाइ इसुहेङ हिअ्हि, “प्रभु, हाइ ना इदोइ पहर दोङ इस्राएलि सारभिहेङ छुटकारा प्याना?”#१:६ इङको पहर इस्राएल रोमको बसता हिघाहि। 7इसु एम्बालाइहेङ दोअ्हि, “इदोइ पहर ते आबा ताइमिङ तोकेका हि। वा हाइ तोकेका हि, इङको गिलि नेलाइको काम माको। 8कुलाउ पुनित हाङसा नेलाइर्हुता लोकान्हुअ्सो नेलाइ सरबङ निङस्वाना। इङकोन्हुअ्सो नेलाइ यरुसलेमता, गोताङ यहुदिया रो सामरिया माउजाता कालाउ सुमिङको कोन्हाथिकापा काङको दासि जेङस्वाना।”#मत्ति २८:१९; मर्कुस १६:१५; लुका २४:४७-४८
9इदोइ दोअ्लिदो:कान्हुअ्सो एम्बालाइ खाङकाखाङकाताङ इसु सादेलभारि तोल्हेन्हाहि। बादेल वासेहेङ थुमहि रो इङकोन्हुअ्सो एम्बालाइ वासेहेङ मातिङहि।#मर्कुस १६:१९; लुका २४:५०-५१
10एम्बालाइ आदेलभारि खाङतेङ हिलाउ जेका धाबा होङका न्हेमि द्याङगेलाइ एकासि एम्बालाइकोङ आगा जाअ्हि। 11एम्बालाइ दोअ्हि, “ओइ गालिलको द्याङगेलाइ, नेलाइ हाइपालि जाअ्तेङ आदेलभारि खाङदोङसुखेना? इसु ते सादेलभारि हानेहोइ। वासेहेङ जेसापा नेलाइ एला हानेतेङहिका तिङसुन्हा, एन्सा दोङ वा आरोङ एनि घुरितेङ ल्वावा।”
यहुदाको थामेता मतियासहेङ साल्का
12इङकोन्हुअ्सो एम्बालाइ जाइतुन आरदाङ लाअ्तेङ यरुसलेमभारि हानेहि। इन्तासो यरुसलेम थुकालि तेतेङ हानेलाउ आधा घान्टा झोको लागेखे। 13यरुसलेम थुकातेङ एम्बालाइ ताइमि हिका साअ्को र्हुताको तालाता ताङतेङ एलोङ कोठाता जोम्हि। इन्ता जोम्कालाइता पत्रुस, युहन्ना, याकुब, अन्द्रियास, फिलिप, थोमा, बारथोलोमाइ, मत्ति, अल्फयसको चान याकुब, मुलुकभक्त दोअ्का सिमोन रो याकुबको चान यहुदा हिघाखे।#मत्ति १०:२-४; मर्कुस ३:१६-१९; लुका ६:१४-१६ 14एम्बालाइता आधेमि बाइ ओनेगेलाइ रो इसुको आमाइ मरियम रो वाको ओनेगेलाइदोफा जोम्तेङ पुकार पाघाखे।
15एनि इन्ता झान्दै एसाइ एकुरि झोको खान्धुर पाका द्याङगेलाइ जोम्का हिघाखे। कालाउ पत्रुस जाअ्तेङ एम्बालाइको माझाता धुइलि तेङहि, 16“दादाओने बाइओनेगेलाइ, धरमकिताबको कथन पोङघालि गोइघाङ, जेदोङ कथन इसुहेङ रिम्पाकालाइको आगुवा यहुदाको बारेता दाउदको नुइसो लाम्फासोङ पुनित हाङसा धुइका हिघाहि। 17हाइपानु वा बुङ केलाइदोफाङ गान्देन्हाका हिघाहि रो इदोङ सेवाता भाग निङका हिघाहि।”
18यहुदाको अधरमसो कामाइका पाइसासो एलोङ मिलिङ चोल्हि। द्याङ दुस्कर्मको काम्हाइसो एलोङ मिलिङ चोल्हि। कालाउ वा इङकोङ मिलिङता पुरिङलेता जेङतेङ हुल्तेङ सिहि रो वाको हेमुङ भोइन्हातेङ तेरेङभुति राइन्हाहि। 19इदोइ काथा यरुसलेमता हिकालाइ झाराङ गेहि। कालाउ एम्बालाइ इङको मिलिङको मिङ ताइको राउता “आखेल्दामा” ताअ्हि। जाइको माने हितिको मिलिङ जेङखे।#मत्ति २७:३-८
20पत्रुस आरोङ दोअ्हि, “लेको किताबता एसापा लेखेन्हाका हि:
‘इङकोको हिकाथामे र्हाअ्न्हाको,
इन्ता बासा हिका हासुङ माज्याको।#ले ६९:२५
इङकोको पाका कामको जिम्मा बोमि दोङ र्हुकाको!’#ले १०९:८
21“इदोइखातिर केलाइदोफा हिका द्याङगेलाइता इसिका एमि साल्लि गोयाङ, जेदोङ द्याङ प्रभु इसु केलाइको माझाता हितेङ लिअ्ता बाहार पालाउ दिनाङ केलाइदोफाङ हिघाहि। 22इसिका खामाल जाइ युहन्नाको चिभुअ्लिसो वा केलाइसो र्हुता चुमपुन्हाका दिनाथिकापा केलाइदोफा हिघाहि। इङको द्याङ केलाइ दोफादोफाङ वाको सिकासोसिन्हुकाको दासि हिलिगोयाङ।”#मत्ति ३:१६; मर्कुस १:९; १६:१९; लुका ३:२१; २४:५१
23इदोइ काथा हिङकान्हुअ्सो इन्ता जोम्का द्याङगेलाइ न्हेमिहेङ आगा सारेहि। इङकोता एमिचाहिँ योसेफ हिघाखे, जाइहेङ बारसाबास माकोनु युस्तस बुङ दोअ्न्हाघाहि रो भेनेङचाहिँ मतियास हिघाखे। 24एम्बालाइ एसापा पुकार पाहि, “झाराङ द्याङको कोन्धाङको काथा गिका प्रभु, इदोइ न्हेमिता ना हासुहेङ साल्का हिन्हा इङको केलाइहेङ तिम्पा। 25इङको इदोइ सेवा साल्तेङ दिङगिल्कालाइभाइपा, जेदोङ सेवासो यहुदा भड्कितेङ ताइकोङ थामेता सिहि।” 26इङकोन्हुअ्सो एम्बालाइ इङको न्हेमिको मिङता चिथा ह्वाअ्हि। चिथा मतियासको मिङता परेहि रो एसापा इङको तेए साल्तेङ दिङगिल्कालाइता गान्देन्हाहि।
Currently Selected:
साल्तेङ दिङगिल्का 1: DHIM
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
