Matyiu 28

1O ihuku ja Iyâjâ o majenjina ma buhwa boa wiki boa bohoboho, ka Meri Magdalini na Meri mepâkwě ba viya ka hilě njama. 2Na, umbwakiyate, he e ninganakiděndi nangudi, ’kabojana enjěl ya Upangiyi e hubakindi oviya Hěvěn, ka yâ ya viya ka vungulidě ilale oviya ubiyâ, ka yâ ya diya o jâ. 3Boho boaju bo diyakind‘ ona epělupělu, ngâi jaju botano ona mataya: 4jângâ jaju ndi ja bapepuwi i likimanakidi, ba bě ona bekengo. 5Ndi enjěl e yavwanakindi, ka yâ ya vâ na bajo, na, O bangake ’nyěni: ’kabojana mbi yowuděte na o butakandini Jisus, a weyakudwě o krâs. 6A ’bě okava, ’kabojana A pumbuwendi, ka Mâ‐a vâkidi. ’Ka, yěněkeni iboko via Upangiyi vi ma nangiya. 7Kěkěni wâwa, ka langwakeni beyokwedi beaju, na, A pumbuwendi oviya bawewe; ndi, umbwakiyate, a ’landi o boho n‘ inyěni o Galili; ovoně nd‘ inyěni o ka yěni Mâ ni: umbwakiyate, mbi languwendi ’nyěni. 8Ka bâ‐ba puma wâwâ oviya malonga na jângâ na mbya ’něně: ka bâ‐ba vala umbila ka pâdě sango o beyokwedi beaju be jadi. 9O bâ‐ba kěkidi ka pâdě beyokwedi beaju sango, umbwakiyate, ka Jisus a lata na bâ, na, Mbolani. Ka bâ‐ba bengiya ka bâ‐ba kupaně Mâ o beko beaju, ba ka kalakiya Mâ. 10Ka Jisus a vâ na bâ, na, O bangakeni: kěkěni, o ka pâkiděni bana‐bina sango, ovaně nd‘ o bâ‐ba ka ’lě o Galili, ovoně nd‘ o bâ‐ba ka yěně ’Mba.

11O bâ‐ba diyakidi ba kěkě, ka bavengi bâkâ ba viya o mboka, ka bâ‐ba levidě prist iněně belombo beěhěpi be ma hama. 12O bâ‐ba yolanakidě na batodu, ka bâ‐ba lata ’hoka, ka bâ‐ba vě sâjě hika eitě, 13na, Vâkâni, na, Beyokwedi beaju be vaki na bulu, ka bâ‐ba iba Mâ, o hwě ho diyakidi ho yaka. 14Oningě ekae ya pâ o matâ ma Gaven, ho ka tundudi mâ, na hwě hwa huludě njěnji ’anyu. 15Ka bâ‐ba nângâ hika, ka bâ‐ba ha ka bâ‐ba levakudwě: ndaga těkaně e ngite langwakwě o Jiu ba jadi na boa buhwa.

16Jâ ndi ja jomu ja beyokwedi na eyokwedi yâkâ ja vala o Galili o ukodi mua Jisus u levaki bâ. 17O bâ‐ba yěněki Mâ, ba ka kalakiya Mâ: ndi bâkâ ba bomaka penda. 18Ka Jisus a viya ka kala na bâ, na, Ipangiya jěhěpi i věwěngo ’Mba o Hěvěn na o he. 19Kěkěni nandi, o ka levakiděni betomba beěhěpi, o baptisaki bâ ni na dina ja Hangwě na ja Mwana, na j‘ Ilina Iyamu. 20O ka yokwakidi bâ ni itata ja belombo beěhěpi ibeamě be jadi ’nyěni languwango. Umbwakiyateni, Mbi te inyěni buhwa ka buhwa kwanga nala ihuku ja he.

Currently Selected:

Matyiu 28: BNG1895

Highlight

Copy