Luk 15

1Ka bayoli pago běhěpi na bato babe ba viya o Mâ‐a jadi ka yoka Mâ. 2Ka Farisi na balěndi ba hâkalâniyě, na, Momo těkaně a věhělěkiděndi bato babe, na Mâ‐a jaka na bâ.

3Ka Mâ‐a kaniya bâ ukanakâdi těkamu, 4na, A lě nja moto a didi o inyěni o jadi, a běkě mâ na kama ea medâmbě, na mâ‐a nyanga umbâkâ o tango ’abu, nd‘ a dike mabo ibuwa n‘ ibuwa o nginga, na mâ‐a ’la ka vaha mua nyangango, kabo a t‘ a duwa muâ? 5O mâ‐a duwi muâ, a kahakidi muâ o iběkě jaju, a peyaka. 6O mâ‐a pâkě o ndabo, vâkâna a ndakiyandi ba mboi jaju na ba bakakě na ju, na mâ‐a vâ na bâ, na, Peyaki n‘ umba; ’kabojana mbi duwendi udâmbě muamě u ma nyanga. 7Mbi langwakiyandi inyěni, na, eâ nyanga tě te ea mbya e ka diyandi oba o pělě ’a mot‘ ube umbâkâ, a ulwaka, wa na o pělě ’a mabo ma bato bayam‘ ibuwa na bato ibuwa, ba ha ibě na mala m‘ iluwa.

8Tombe nja mwajo ě a didi a běkě mâ jomu ja fula ja hika etano, na mâ‐a nyangě fula pâkâ, nd‘ a yode vitwa, na mâ‐a vyâ ndabo, a ka vahaka na bokeli kabo a ta o duwa eâ? 9A duwingě eâ, vâkâna a ndakiyandi mboi jaju na ba bakakě na ju, na, Peyaki n‘ umba; ’kabojana mbi duwendi fula tě eamě e nyangakidě. 10Mbi langwakiyandi inyěni, na, eâ nyanga tě te ea mbya e nd‘ o pwanja ea enjěl ja Anyambě o mot‘ ube umbâkâ a ’luwakě.

11Ka Mâ‐a vâ, na, Momo n‘ uhuhu a diyakindi bana babale: 12Ka uabu ua nděmbě a vâ na hangwě, na, Paia, věkě ’mba mběi ea jumba i ka kwě umbi jadi. Ka mâ‐a kabaniya bâ nyanga ’aju e diyanakidi. 13Hwi i diye iitě ka ua nděmbě a yolě beěhěpi ta, ka mâ‐a ha ’kendâ o ehe ’a yaviděngo, ka mâ‐a jongolidě jumba jaju ovoně n‘ idiyedi vi‘ ujolongo. 14Nd‘ o mâ‐a běkidi a makiděte jěhěpi, ka nja eněně ea kwa o ehe těně; ka mâ‐a yalě o nyama. 15Ka mâ‐a ’la ka lata na umbâkâ ua badiyi ba ehe těně; ka mâ‐a loma mâ o mwanga muaju ka jedě ngweya. 16A ka yombwaka na te a londiděndi ihuhu jaju na bepape bea ngweya be ma jaka: au diyaka na moto a věki mâ. 17O mâ‐a pâdi ipikiliya jaju mětě, ka mâ‐a vâ, na, Paia a lě bahayi ba bokâlâkwě baningě ba di na pěmbě wa na e kokakě bâ, nd‘ umba kabo bowaka na nja! 18Mbi těměkěndi na ’la o Paia a jadi, n‘ umba‐mba vâ na ju, na, Paia, mbi hango bobe o pělě ’a Hěvěn, 19na o boho boâvě, mbi ’bě pě weyango na mbi tubakwě na mwan‘ ’âvě: pangaka ’mba uhayi muâvě mua bokâlâkwě umbâkâ. 20Ka mâ‐a těmě, na pâ o hangwě a jadi. Nd‘ o hangwě a yěni mâ, a ngite yaviděngo, ka mâ‐a yěniyě mâ ngěbě, ka mâ‐a vala umbila, ka mâ‐a hikamiya ibâlu jaju, ka mâ‐a pyâpyâ mâ. 21Ka ua mwana a vâ na ju, na, Paia, mbi hango bobe o pělě ’a Hěvěn, na o boho boâvě, mbi ’bě pě weyango na mbi tubakwě na mwan‘ ’âvě. 22Ndi hangwě a vâki na bahayi baju, na, Pumakěni ibâtâ iyamu mětě, oa bâtidi mâ ni; oa vami mâ ni mbonga o upenjo muaju, na makogo o matambi maju: 23n‘ inyěni oa vanani etumbě ea nyati evângu, oa weyani; ho ka jakani, ho ka peyakani: 24ikabojana mwa t‘ uamě ekaně a diyakindi wango, a pumbuwendi; a diyakindi nyangango, a duwaniyendi. Ba ka yalakě o peya. 25Ndi mwan‘ ’aju u‘ utodu a diyakind‘ o mwanga: o mâ‐a pâdi a bakamakate na ndabo, a ka yokaka mabeka na lembo. 26Ka mâ‐a ndiya uhayi umbâkâ, ka mâ‐a batě mâ, na, belombo těkabe be lě na? 27Ka mâ‐a languwa mâ, na, Mwana nyângwě a pândi; ka hângwě a weyidě etumbě ea nyati evângu, ’kabojana a pahiyete mâ upeha. 28Ka mâ‐a linguwa, au bâbâkâ o ngiya: ovaně nd‘ o hangwě a pumakidi, ka mâ‐a hâhâlidě mâ. 29Ka mâ‐a yavwana ka mâ‐a vâ na hangwě, na, Hilakěte, mepuma tě imeamě me hayed‘ âvě meitě ekame, mbi ’bě na egombe eamě e pulidě elekanako ’âvě; nd‘ o ’bě ’mba věngo na ba mwana mbodi, nana mbi peyaka na mboi jamě: 30ndi ipâ ja mwa tě uâvě ekaně ja pâ, a kwiyidě jumba jâvě na bevove, o weyidi mâ etumbě ea nyati evângu. 31Ka mâ‐a vâ na ju, na, Mwan‘ ’amě, o diyakate n‘ umba egombe eěhěpi, n‘ ibeamě be janidi beěhěpi be nd‘ ibeâvě. 32E lukakite na ho peyaka, na hwě ho ka yěněkě mbya: ’kabojana mwa tě oa nyângwě ekaně a diyakindi a wa, nd‘ a pumbuwendi; a diyakindi nyangango, a duwaniyendi.

Currently Selected:

Luk 15: BNG1895

Highlight

Copy