Luk 14

1E diyakindi o Mâ‐a diyakidi a kěkě o ndabo ya Farisi pâkâ eněne ka ja pěmbě o buhwa bo‘ Iyâjâ, ba ka běmběkě Mâ. 2Hilakěte, moto n‘ uhuhu a diyakidi na mehiyo mea jemi ja njambě a didi o boho boaju. 3Ka Jisus a yavwana, ka Mâ‐a vâ na bayokwidi ba Elekanako na Farisi, na, E te hohonganěngo na o yongě o Iyâjâ? 4Bâ te dâ. Ka Mâ‐a nângâ mâ, ka Mâ‐a yongě mâ, ka Mâ‐a huludě mâ. 5Ka Mâ‐a yavwana bâ, na, Nj‘ a jadi inyěni o didi a běkě ba nyati ’aju tombe buru ’aju ea kwa o mbela, a hungane o hoduwa eâ o buhwa boa Iyâjâ? 6Bu yâlâke o yavwana pě Mâ belombo těkabe.

7Ka Mâ‐a kaniya ba ndakudwě ukanakâdi, o Mâ‐a yěněki bâ‐ba pânâkâ bediya beněně; ka Mâ‐a vâ na bâ, na, 8Oningě oa ndudwě na moto o isango ja diba, o diyake o ediya ea hěhiyěngo; ipě moto ua betiyango wa na nâvě a ma ndudwěndi na mâ; 9na a ma ndiya inyěni na mâ a viya ka vâ na nâvě, na, Věkě momo těkaně iboko; vâkâna oa ’la n‘ ihâni ka nângâ ediya ea hubiyango. 10Nd‘ oningě oa ndudwě, ka diyake o ediya ea hubiyango; na ovaně nd‘ o a ndakiyě âvě a ka viyě na mâ a vâ na nâvě, na, Mbweyi ’amě, batakiya okaně: vâkâna o pahiyendi idilwě o pwanja ea ba di na nâvě o ija. 11Ikabojana a betakidě nyol‘ ’aju mětě, a ka hubudwěndi; na a hubakindě nyol‘ ’aju mětě, a ka betudwěndi.

12Jâ ndi jaju ja vâ tepě na a ndakiyi Mâ, na, Oningě o haka beja bea joba meolo tombe bea kolo, o ndakiye mboi jâvě, tombe bana ba nyângwě, tombe majawě mâvě, tombe na ba bakakě na nâvě baněně; o banga ba ndiya tepě âvě, nâ nâvě oa pahiya yâbu. 13Nd‘ oningě oa had‘ isango, ndakiya mekuge, na byěmě, bebokě, na pâgu: 14Vâkâna o vambudwěndi ibâtâ; ’kabojana bâ ba ’bě na ngudi ea timbě âvě yâbu; nd‘ o ka timbwi yâbu o ipumbuwa ja bayamu.

15O moto n‘ uhuhu a diyakidi na Ju o beja a yokidi belombo těkabe, ka mâ‐a vâ na Ju, na, Ibâtâ na a ka jě pěmbě o ipangiya ja Anyambě. 16Ka Mâ‐a vâ na ju, na, Moto n‘ uhuhu a hakiděndi isango iněně na kolo, ka mâ‐a ndidě baitě: 17o ’gombe e‘ isango na kolo ka mâ‐a loma uhayi muaju ka vâ na ba ndakudwě, na, Vakani; ’kabojana belombo beěhěpi bea bi kokango. 18Běhěpi timbango udumbu ’mbâkâ ba ka yalakě iha ja ponda. Ua bohoboho na ju, na, Mbi ndi hambango epěhi ea ’hiki, e na mala na mbi kěkě ka yěně eâ: mba hâhâliděnd‘ âvě papwakidě ’mba. 19K‘ upakwě a vâ, na, Mbi ndi hambango jomu ja nyati, mb‘ ’alandi ka yějiyě jâ: mba hâhâliděnd‘ âvě papwakidě ’mba. 20K‘ upâkwě a vâ, na, Mbi ndi bango mwajo, ovaně nd‘ umba‐mba yâle o viya. 21K‘ uhayi tě mâ‐a timba, ka levidě upangiyi muaju belombo těkabe. Ka a duwě ndabo a linguwa ka mâ‐a vâ n‘ uhayi muaju, na, Kěkě wâwâ o mehěngě na o njea ja mboka, na nâvě oa vana okava mekuge, na byěmě, na bebokě, na pâgu. 22K‘ uhayi mâ‐a vâ, na, Upangiyi, e hamindi ka ’vě o ma sombiyě, ndi loboko lo ngitewě. 23K‘ upangiyi a vâ n‘ uhayi, na, Kěkě o njea iněně na mani, o ka pinyilakidě bâ na ba vake, ndabo ’amě e londe. 24Ikabojana mbi langwakiyand‘ âvě, na, Bamo tě ba ma ta ndudwě baně ba veke pě isango jamě n‘ umbâka.

25Bebimba beněne be kěkindi na Ju: ka Mâ‐a ’luwa, ka Mâ‐a vâ na bâ, na, 26Oningě moto a vaka o ’Mba‐mbi jadi, a bine hangwě, na nyangwě, na mwad‘ aju, na bana baju, na bana ba nyangwě, na maluku, e, na eměnâ ’aju mětě tepě, a yâlě o diya eyokwed‘ ’amě. 27A ka měndě a bape krâs ’aju, na mâ‐a vitě ’Mba, a yâlě o diya eyokwed‘ ’amě. 28Ikabojana nja a didi inyěni o jadi ovaně, a didi a běkě a pangaka ilonga ja ndabo eněně, a ta o diya diya, na mâ‐a ka langaka nyanga e ka weyě, ipě a te twě‐twě na o madě eâ? 29O banga a bě mâ ijanga yalěngo, a diye pě na ngudi e hânjâbâkidě eâ, na ba ka hilě běhěpi ba ka yalakě o věhě mâ, 30na, Momo těkaně a yalakiděnd‘ ilonga, nd‘ à diyaka na ngudi e hânjâbâkidě. 31Tombe ba upolo u kěkě ka yana eduka na upolo upâkwě, mâ‐a taka diya diyango, a ka langanakě n‘ ipě bâ na jomu jaju ja tâjeni ba ka yâlěte o lata na a vakě o mâ‐a jadi na mabo ma tâjen mabale. 32E diye nonaně, vâkâna a lomakandi metodu, me latakě jonga, o upâkwě a ngite na masěyi maitě. 33Yâ nyanga tě te ’a a didi inyěni o jadi ovaně uěhěpi a ka měndě a dike ibeaju be janidi beěhěpi, a yâle o diya eyokwed‘ ’amě. 34Vianga a bwamu: nd‘ oningě vianga via nyangě uju muaju, vi ka pahiya lě pě ulělě na ově? 35Via lukaka pě na ba he, tombe na ba behu; ndi bato ba uhwaki viâ. A di na matâ ma yokakě, a yokake.

Currently Selected:

Luk 14: BNG1895

Highlight

Copy