Luk 12

1O egombe těeně, o bato baitě ba latanakiyedi lataniyango ba diye na tango, ba pitanaka na bwinge, a ka yalakě o vâ na beyokwedi beaju na bohoboho, na, Kelevakani na ilanda ja Farisi, i jadi inoka. 2Ikabojana o ’bě na ’lombo e di vihamango, e ka měndě e saliye; tombe kutamango, e ka měndě e yowaně. 3Ovaně nd‘ o eanyu e kalakidi n‘ ivitit‘ e ka yokaně o bwě; n‘ ibeanyu be kalakidi o matâ o lolika be ka hamanudwěndi o menyuwa. 4Mbi vâki n‘ inyěni mboi jamě, na, O bangakeni ba weyakě nyolo, yeně pa ba diye pě na eabu e di ba haka. 5Ndi Mbi ka keleviděndi inyěni uanyu a ka hangě: Bangaki Mâ ni, a didi a běkě weyango na Mâ na ngudi e uhwakě o hěl; e, Mbi vâki n‘ inyěni, na, Bangaki Mâ ni. 6Těmbělěmbě itano ja hambakwě fathing ibale? na ea pâkâ ea behaliye o Anyambě a jadi. 7Ndi na howe janyu ja molo jěhěpi i nd‘ o tango. O bangakeni: o kebakěndini těmbělembě iitě. 8Mbi vâkâ tepě n‘ inyěni, na, Uěhěpi a ka měmiyě ’Mba o boho boa bato, mâ tepě ua Mwana moto a ka měmiyě o boho boa enjěl ja Anyambě: 9nd‘ a ka hâhiyě ’Mba o boho boa bato a ka hâhudwi tepě o boho boa enjěl ja Anyambě. 10Na a ka kalě ndaga o pělě ’a Mwana moto, e ka ’yidwi mâ: nd‘ a ka kilě Ilina Iyam‘ a iyidwě. 11O bâ‐ba ka pâdě inyěni o sinegâg, na o bapangiyi, na o ngudi i jadi, o nakakeni nyanga ’nyu e ka yavwaně, tombe eanyu e ka vâyě: 12ikabojana Ilina Iyam‘ i ka yokuděte inyěni nyang‘ ’anyu e lukakě o vâ o iwěla tědině.

13Ka moto n‘ uhuhu ua njamba a vâ na Ju, na, Uyokwidi, kalaka na mwan‘ ina, na a kabake n‘ umba ekuha. 14Ka Ma‐a vâ na ju, na, Momo, nj‘ a pangaki ’Mba uyěkidi n‘ ukabi muanyu? 15Ka Mâ‐a vâ na bâ, na, Kelevakani, n‘ inyěni o ka bandamakiděni itângina: ’kabojana eměnâ ea moto e ’bě o belombo beitě ibeaju be pigakě. 16Ka Mâ‐a kaniya bâ ukanakâdi, na, He ea enami na ehuhu e lângâkindi beitě: 17ka mâ‐a pikiliya n‘ ulema, na, Mbi hake lě na, ’kabojana mbi ’be n‘ iboko via kotidě bebuma beamě? 18Ka mâ‐a vâ, na, Mbi hake kakana: mbi bulwakiděndi kundu jamě, n‘ umbamba longa iněně; omě nd‘ umba‐mbi ka kotidě bebuma beamě na ngumb‘ ’amě eěhěpi. 19N‘ umba‐mba vâ n‘ ilina jamě, na, Ilina, o kotudwěngo ngumba eitě ea mepuma meitě; yâjâkâ, jaka, mâtâkâ, peyaka. 20Nd‘ Anyambě a vâki na ju, na, O ndi etiketike, ilina jâvě i vahakwěnd‘ âvě o bulu těkabo: vâkâna ibeâvě be kuhidi beně be lě bea nja? 21Eâ nyanga tě te ’a a kuhakě hika ’aju mětě, a diye enami o pělě ’a Anyambě.

22Ka Mâ‐a vâ na beyokwedi beaju, na, Ovaně nd‘ Umba‐mbi vâkě n‘ inyěni, na, O nakakeni eměnâ ’anyu sasě, ibeanyu be ka jě; tombe na bea nyolo janyu, n‘ ibeanyu be ka bâtě. 23Eměnâ e wa na beja, na nyolo wa na ibâtâ. 24Hilakěteni byungu, ’kabojana bea liyaka na beâ bea benjaka; be ’bě na kundu na ndabo; nd‘ Anyambě a jakiděte beâ: o ’běni bwamu wa na lonâni? 25Nj‘ a didi inyěni o jadi a didi a badaka ekulu bwaba ka hamba ’nâ o utě muaju na bonakaka? 26Oningě o diyeni na ngudi e hakě elombo e di yěviyěngo, e lě nd‘ eanyu e nakakě bepâkwě? 27Hilakěteni ka manga ma tombwakě: ma haka ehavu, na mâ‐ma vihaka; ndi mbi vâki n‘ inyěni, na, pě lě Sâlâmân n‘ ivenda jaju jěhěpi a bâtâkâ ka manga těkama. 28Ndi pě lě Anyambě a bâtidě lě behavu, be jadi o buhwa o ’hiki, vakě bea bě o diyâ; a bâtidě inyěni wa? O ndini n‘ ikamidě ihâlě. 29O vahakeni eanyu e ka jě, tombe eanyu e ka mâtě, o diyake tepě ni na melema mea penda. 30Ikabojana betomba bea he be vahakandi belombo těkabe beěhěpi: ndi Hângw‘ ’anyu a te yowěngo na o ndi na mala ma belombo těkabe. 31Ndi vahakani o bohoboho ipangiya ja Anyambě; vâkâna belombo těkabe beěhěpi be ka badudwěndi inyěni. 32Mwanga uhâlě, o bangakeni; ’kabojana Hângw‘ ’anyu a tândângo o vě inyěni ipangiya. 33Hambakiděni ibeanyu be janidi, věkěni mekuge; kenjakěni o pěl‘ ’anyu belandi be ha dunaka, hika oba e ha makiya, o mwibi u ha bakamaka, o nyělělě e ha ’bě na ngudi o jongolidě. 34Ikabojana o hik‘ ’anyu e jadi, te ulema muanyu u ka diya tepě. 35Behena beanyu be diyake tingwěngo, na litwa lanyu lo yodakani. 36N‘ inyěni mětě ka bato ba vengakě upangiyi muabu, o mâ‐a ka pâyě oviya diba; ovaně nd‘ o mâ‐a ka bě a pângě a tinakidě, ba dubwakiya mâ o mbenjě pâkâ. 37Ibâtâ na bahayi těbaně, ba upangiyi a ka kâbidě ba pepwaka o mâ‐a ka timbě: Mbi langwakiyandi inyěni pâkwěpâkwě, na, a ka tingandi utumba, na mâ‐a diyidě bâ o beja, na mâ‐a viya ka haya bâ. 38Oningě na a ka payě elahe ’a bebale, tombe elahe ’a belalo, na mâ‐a kâbidě bâ nonaně, ibâtâ na bahayi těbaně. 39Ndi yowakěni ekae, na, a duwě ndabo a jaka a yowakě iwěla ja mwibi i ka pâyě, te a ka pepuwandi, a huludě ndabo ’aju e tubakwě. 40Diyaka tepěni kokěngo: ’kabojana Mwana moto a vakandi iwěla janyu i ha pikilakiyani.

41Jâ ndi ja Pitě ja vâ na Ju, na, Upangiyi, hwě te ibâvě ba kanakiyě ukanakâdi těkamu, ipě na běhěpi? 42K‘ Upangiyi a vâ, na, Nja jadi yongo ea bokeli na vunya e‘ upangiyi muaju u ka tědě mâ upepuwi mua ndabo, a kabakě beja o hongodi ’aju? 43Ibâtâ n‘ uhayi těmuně, e‘ upangiyi muaju o mâ‐a ka pâyě a ka kâbidi mâ a haka nonaně. 44Pâkwěpâkwě Mbi langwakiyandi inyěni, na, a ka tědě mâ upangiyi mua ibeaju be janidi li beěhěpi. 45Nd‘ oningě uhayi těmuně mâ‐a vâ n‘ ulema muaju, na, Upangiyi muamě u diliděndi ipâ jaju; aka yalakě o boma bahayi ba bamo na ba bajo, a jaka, a mâtâkâ, a peyaka, 46Upangiyi mu‘ uhayi těmuně a ka pândi o buhwa boaju bo ha umbwakiyi mâ, iwěla jaju i ha bandamakidě, a ka leni mâ kya, na mâ‐a vě mâ ngabo ’aju na ba ha kamakidě. 47Uhayi tě u yowakidě upango mua upangiyi muaju, a kenjě, a haye ipangidi viaju, a ka bomwi metilako meitě. 48Nd‘ a ha yowakidě, a ’la ka ha belombo twětwě na mbomako, a ka bomwi mehâlě. Ikabojana a věkwě beitě, a ka uwi beitě; ua bato a bweyakidě beitě, mâ tepě uabu a uwakě wa.

49Mbi pwi ka huludě veya o he; ndi Mbi pangaka lě nde, oningě via kaluwa? 50Ndi Mbi na baptisma eamě e ka baptaiswě; Mbi ka naka lě pě ndi e t‘ o maya! 51O yebakiyandini na Mbi viyi ka vě jonga o he? Mbi languwendi ’nyěni, na, Nyawě; 52te kabo ipěhě: oviya ’gombe těkae batano o ndabo pâkâ ba ka pěhěndi, balalo pěhěngo na babale, babale pěhěngo na balalo. 53Hangwě a ka pěhi na mwa momo, mwa momo na hangwě; nyangwě na mwa mwajo, na mwa mwajo na nyangwě; nyangwě ’a momo n‘ ubâmbi, n‘ ubâmbi na nyangwě ’a momo.

54Ka Mâ‐a vâ tepě na bato, na, O běkěteni o yěningěni evindi e pumakě o pělě ’a manga, elěngiaha inyěni mâ, na, Unyěngě u vakandi; na eâ e diyaka tepě nonaně. 55N‘ upupě mua diko u vungaka, inyěni, na, Yomu e ka diyandi; na eâ e hamaka. 56Menoki! o yowuděndini iyebiya ja boho boa oba na he; nd‘ e lě nd‘ eanyu e ha yebakiya egombe těkae? 57E, nd‘ e lě nd‘ eanyu e ha yěkěkidě inyěni mětě e di hohonganěngo. 58Oningě o kěkě na ndoba ’vě na ’la o uyěkidi u didi, hunganaka o huludě mâ nyol‘ ’âvě, o njea; banga a dula ’vě o uyěkidi u jadi, n‘ uyěkidi mâ‐a vě âvě ubweyani muaju na a uhwa ’vě o ndabo ’a meboka. 59Mbi langwakiyand‘ âvě, na, oa pume omě, kabo oa vě vipupuhu via madikanido.

Currently Selected:

Luk 12: BNG1895

Highlight

Copy