Behadi 8

1Sâl a diyakite iwedo jaju kamiděngo. O yâ egombe těně ndi ya ikando e diyakidi o Jěrusalěm, e hakudwě njuke eněně; ka bâ běhěpi ba pajangana indendandenda via Judia na Sameria, dikango kabo metodu. 2Ka bato bayamu ba bapě Stivěn ka tonga mâ, ka bâ‐ba eya mâ mbembe eněně. 3Ndi Sâl a jongolakiděndi ikando, a ngakiya ndabo jěhěpi a ngwanga taka bamo na bajo, ka vamakě bâ o ndabo ya meboka.

4Ovaně nd‘ o ba hamanakidi, ba kěkidi ba kěkě ba pakwaka ndaga. 5Ka Filip a vala o mboka ya Sameria, ka mâ‐a kaliya bâ Kraist. 6Ka bato ba yokolidě belombo bea Filip be kalakidi njamba, ba yokaka ba yěněkě megoma meaju me ma haka. 7Ikabojana malina mabe, ma ma běkěndi yamango na mâ ma věngěmě na baitě ba ma diyaka na mâ, na ba ma yandakudwě na ngadi, na byěmě, be yongaka. 8Mboka těně e diyakindi ya bě na mbya ’něně.

9Nd‘ o diyaki na momo ’mbâkâ, dina na Saimân, a takidi o sâkâ o mboka těně a yabaka bato ba Sameria, na a běndi uaju moto uněně. 10Mâ nd‘ uabu ua běhěpi a ma yokakiya na nděmbě na batodu, na, Momo těkaně a ngudi ya Anyambě eněně. 11Ba ma dilaki mâ ’kabojana a vula a yabaka bâ na isâkâ. 12Nd‘ o bâ‐ba kamakidě nyanga ya Filip e kalakidi o pělě y‘ ipangiya ja Anyambě na dina ja Jisus Kraist, ka bâ‐ba baptaiswě, na bajo na bamo. 13Ka mâ mětě Saimân a kamidě tepě: o mâ‐a baptaisudwě a ka diyaka na Filip, a ka mamaka o mâ‐a yěněkidi megoma na ndembo i hamakidi.

14Ndi o metodu me diyakidi o Jěrusalěm me yokakidi, nana ba Sameria ba pahiyendi ndaga ja Anyambě, ka bâ‐ba loma Pitě na Jân o bâ‐ba jadi: 15O bâ‐ba bědi wě, ka bâ‐ba kaliya bâ na ba pahakiye Ilina Iyamu: 16(Ikabojana i diyakite i to puga bâ na moto n‘ umbâkâ: ba diyakite kabo baptaiswěngo na dina i Upangiyi Jisus.) 17Ka bâ‐ba kahidě bâ makadu, ka bâ‐ba pahiya Ilina Iyamu. 18O Saimân a yěni na ikahidě ja makadu mea metodu, ndi pâkidě Ilina Iyamu, ka mâ‐a vě bâ dâlě, 19Na, Věkě tepi ’mbani ngudi těkaně, ovaně nd‘ umba‐mbi ka běyě mbi kahiděngě moto makadu, na mâ‐a pahiya Ilina Iyamu. 20Ndi Pitě a vâki na ju, na, dâlě ’vě e hinakiyete na nâvě, jambojana o pikiliyango na bova boa Anyambě bo ndi bo hambakwě na dâlě. 21O ’bě na mběi tombe ikabo o itato těkadi: ’kabojana ulema muâvě u ’bě hohonganěngo o mihâ ma Anyambě. 22Yěněkě ngěbě o nyanga ya bobe tě iboâvě bo hadi ekabo, wa kaliya Anyambě ipě a ka iyidě ipikiliya ja ulema muâvě. 23Ikabojana mbi hilidi na o ngite o njongi ’a jodi, na meboka mea bobe. 24Jâ ndi ja Saimân ja vâ, na, Kalakiyi ’mba ni Upangiyi, ovaně nd‘ o belombo tě ibeanyu bea kala be ka diyě be pâye o ’mba‐mbi jadi.

25O bâ‐ba bi langango na bâ tepě ndaga ja Anyambě pakuwango, ka bâ‐ba timba o Jěrusalěm, ba kěkě ba pakwaka sango eyam‘ o mamboka ma Sameria maitě.

26Ka enjěl ya Anyambě ya kala na Filip na, Těměkě, kěkě o pěl‘ ’a diko o njeya e vakiye oviya Jěrusalěm na pâ o Gesa, e di nginga. 27Ka mâ‐a těmě ka mâ‐a vala: a hilěte momo ua Ithiopia, utonga mua ngudi eněně o ivenda ja Kandase ya kweno ya ba Ithiopia, a ma pangakiya ungumba muaju muěhěpi, a viya o Jěrusalěm ka kaliya, 28A timbaka, o ndabo ’a belape diyango, a langaka Isea ya usâki. 29Ka Ilina ja Anyambě ja vâ na Filip, na, Bengakiya, wa bakama na ndabo tě ya belape ekaně. 30Ka Filip a ’la ovoně umbila, o mâ‐a yoki mâ‐a langaka Isea ya usâki, ka mâ‐a vâ na ju, na, O bweyakiděte nyanga ’vě e langakě? 31Ka mâ‐a vâ, na, Mbi ka bweyidě lě na, moto a tumbwane ’mba? Ka mâ‐a vaha na Filip a betake ka diya na ju. 32Iboko via ilěndwě iviaju vi diyakidi a langaka nd‘ ekavi,

A tumbwanakudwěndi ka udâmbě u kěkě ka weyuwě, emukumuku bwěsě na mwana udâmbě a didi o boho boa ba kěngěkě Mâ, nonaně tepě o mâ‐a ha dubwakidi udumbu muaju;

33O ihubiya jaju ka yěkě ’aju ya nângânwě Mâ; nja ka pěhě mbamba jaju? Ikabojana eměnâ ’aju e věngudwěndi o he.

34Ka utonga mâ‐a vâ na Filip, na Mba hâhâliděnd‘ avě, nja ua usâki a kalakiya belombo těkabe? mâ mětě, ipě mot‘ upâkwě? 35Jâ ndi ja Filip ja dubuwa udumbu muaju, ka mâ‐a yalě o ilěndwě tě ka mâ‐a kaliya mâ Jisus. 36O bâ‐ba validi ekěndâ ka bâ‐ba pâ o miba na mahuhu; ka utonga mâ‐a vâ, na, Yěněkěte, miba nd‘ ekama; e lě pě nde e himbakidě ’mba na mbi baptaisakwě? 37Ka Filip a vâ, na, Oningě na o te kamiděngo n‘ ulema muâvě muěhěpi, na nâvě wa baptaiswě. Ka mâ‐a vâ, na, Mbi kamiděngo na Jisus Kraist a Mwana Anyambě. 38Ka mâ‐a sombiya na ndabo ’a belape e těměke de; ka Filip n‘ utonga běhě ba huba o miba; ka mâ‐a baptaisa mâ. 39O bâ‐ba jabuwedi o miba, ka Ilina ja Upangiyi ja nângâ Filip, utonga u yěně pě mâ: ka mâ‐a ’la ekěndâ a kěkě a peyaka. 40Ndi Filip a duwanakiyendi o Asotus: a tombaka ka mâ‐a kaliya o mamboka měhěpi, kwanga nala o mâ‐a pâkidi o Sěsaria.

Currently Selected:

Behadi 8: BNG1895

Highlight

Copy