Luke 22
22
Nakama hamakua na{Jiu} hihai ikaa Jesus imake
(Mat 26.1-5; Mrk 14.1-2; Jhn 11.45-53)
1Keꞌai nahalaoa ekapu la emale ma kePasova. Keualoko keꞌai la ukapili, 2kena namaakua hamakua, lakou ma nakama polopolo nakuaa la usesee keala ma ikaa Jesus imake. Ia nakama la emakaꞌu keonohenua la.
Judas ehaꞌali aꞌe Jesus i nakama hamakua
(Mat 26.14-16; Mrk 14.10-11)
3Vahola, Satan ukau iloko Judas, emale ma Iscariot, hekama iloko sanahulu ma lua nakama kaukali Jesus la. 4Kena iko Judas ihaele nokakala aꞌe namaakua hamakua lakou ma napulepule kela elolosi hale kapu la. Imakino lakou keala hee aia mehaꞌali aꞌe Jesus i nakama la. 5Nakama la uhihia haeꞌo, kena ihakonu noau aꞌe namoni ia Judas. 6Judas hihai hoi, kena ikokoꞌa semuu poi Jesus senoho ma keonohenua la, kena uhaꞌali aꞌe Jesus i nakama hamakua la.
Keꞌai kePasova
(Mat 26.17-25; Mrk 14.12-21; Jhn 13.21-30)
7Keaho keꞌai halaoa ekapu la, nakama keonohenua la ekaa napunua {sipisipi} lakou la iꞌai. 8Ko Jesus ihaunalia Peter laua ma John, kena ime aꞌe, “Kaꞌa nokanakana mai keꞌai kePasova la iꞌai kakou.”
9Ko koꞌolua la ivasili aꞌe, “Keꞌina hee aꞌoe hihai maua ikanakana keꞌai la?”
Ko Jesus ime aꞌe koꞌolua la, 10“Halono. Keualoko olua ekaꞌa iloko kemakaꞌina la, olua meikili kekama kela eamo kelo vai kea. Kaukali kama na ikae kehale kama na meulu la. 11Kena ume aku kama hamakua hale na, ‘KeRabai eme aku ma, kehe kepuikana aia meiꞌai keꞌai kePasova ma nakama kaukali aia la?’ 12Kena kama na meihuli aku puikana elahi iluna la uoki kekanakana. Ia kena olua kanakana mai kakou meiꞌai na.”
13Koꞌolua la ukaꞌa noꞌike name la ehau poi Jesus nime aꞌe laua. Kena iko koꞌolua la ikanakana keꞌai kePasova la.
Keꞌai haoki Kealiꞌi
(Mat 26.26-30; Mrk 14.22-26; 1Co 11.23-25)
14Keualoko la, Jesus ma nakama heheaꞌu aia la enoho noꞌai. 15Ko Jesus ime aꞌe nakama la, “Imua kela anau meihalono lihu, anau hihai iꞌai keꞌai kePasova nei ma okou. 16Anau meseꞌai keꞌai nei hoi, hakali keualoko Keakua meihuli aku kehamaoni keꞌai nei iloko kenoholana aia la.”
17Kena Jesus eko ke{kapu} la noloku aꞌe Keakua, kena ime aꞌe, “Ko ke{kapu} nei, okou hakoa uunu. 18Anau eme aku okou, anau meseunu ke{uaen} halaoi, hakali keualoko Keakua mehamakua kenoholana aia la.”
19Kena Jesus eko halaoa, kena ihamaha i Keakua. Kena ikohi halaoa la, novavae aꞌe i nakama la, kena ime aꞌe, “Kenei o kaukinokama, kela anau ehoꞌi aku ma okou. Okou iꞌai keꞌai nei nomanaku mai anau.” 20Kena imuli keꞌai, Jesus eko ke{kapu} noloku aꞌe Keakua pela hoi, kena ime aꞌe, “Ke{kapu} nei o kaukoko kela ehuli aꞌe kehamaoni nakakala eivi Keakua vahonei. Kekoko anau meꞌo iho ikonaꞌi okou.”
Oai kekama mehakauꞌaa ma Jesus
21Kena Jesus eme aꞌe, “Hekama okou meihaꞌali aꞌe anau i nakama eliloko anau la. Kama la enoho kevahi anau. 22{Kama ekipu kama} meihalono lihu, ehau poi Keakua nihamoe mai. Ia kekama kela meihaꞌali aꞌe {kama ekipu kama} i nakama la mehalono lihu haeꞌo.”
23Kena iko nakama kaukali la ivasili solakou, “Oai kekama kakou meihaꞌali aꞌe Jesus i nakama la?”
Kipukipu nakama hananiu
(Mat 20.25-26; Mrk 10.42-43)
24Kena nakama kaukali la uꞌamaka nohakaukau solakou oai kekama lakou meihananiu. 25Ko Jesus ime aꞌe nakama la, “Nakuꞌu nakama enoho pouli la ehakanaka naonohenua lakou. Ia naonohenua la ekapa nakama hananiu lakou la ma ‘Kama Aimalie.’
26“Ia okou isehakanaka pela. Kama hananiu okou la memea poi kekama moulalo, ia kama hamakua okou la meheheaꞌu ikonaꞌi alakama. 27Kama hee ehananiu, kama kela enoho noꞌai, ma kekama kela au aꞌe naꞌai la? Okou emakino pela kekama kela enoho noꞌai la ehananiu. Ia anau eheheaꞌu ikonaꞌi okou.
28“Niaina alakama umeme haeꞌo kia anau, okou usekiaꞌi anau. 29Kena anau meikini okou ilolosi nanoholana okou, ehau poi Kamana anau ekini anau ilolosi kenoholana anau. 30Ia kena okou meiꞌai ia meiunu manau iloko kenoholana anau la. Vahola, okou meinoho i nanoholana okou la, ihakonukonu sehui ma lua naꞌaha Israel.
Nakama kaukali meikiaꞌi Jesus
(Mat 26.31-35; Mrk 14.27-31; Jhn 13.36-38)
31“Simon. Satan eainoa aꞌe Keakua pela aia melavaa kehaꞌikeꞌike okou hakoa, ehau poi hekama ehilihili nahua na{uit} ikaha ma napenu la. 32Ia anau eainoa aꞌe Keakua ikonaꞌi aꞌoe, pela aꞌoe mesekiaꞌi kehakina aꞌoe. Ia keualoko aꞌoe vaꞌai mai muli nokaukali anau, aꞌoe ihapulupulu aꞌe nakaina aꞌoe la.”
33Kena iko Peter ime aꞌe Jesus, “Kealiꞌi. Anau eaunahie kehaele maꞌoe ipono iloko kelokapu, kena imake maꞌoe hoi.”
34Ia Jesus eme aꞌe, “Peter. Anau eme aku aꞌoe. Kepo nei, aꞌoe meiꞌole koukolu naualoko pela aꞌoe semakino i anau, kena kemoa kane la mekani.”
Nakama kevuhu
35Kena iko Jesus ime aꞌe nakama kaukali aia la, “Keualoko anau nihaunalia okou ikaꞌa, okou sehimoni, okou sehimuliopu, ia okou sehikapuae. Ea, okou nimea pela hihai?” Ko nakama la ime aꞌe, “Seai.”
36Ko Jesus ime aꞌe nakama la, “Ia vahonei okou ekaꞌa ma namoni ia ma namuliopu okou. Ia poi okou sehipenisi, okou iau aku naauꞌahu okou na, nosui penisi. 37Nakakala kelauniu kapu nei ehuli mai nohamaoni, ‘Keonohenua la ekakala ma kama la esuꞌui ma nakama haisala.’ Kakala nei ehuli aku kehaoki keola anau.”
38Ko nakama kaukali la ime aꞌe, “Kealiꞌi. Ila mai. Kenei sapenisi.” Ko kama la ime aꞌe, “Kena ukau.”
Jesus eloku iloko Gethsemane
(Mat 26.36-46; Mrk 14.32-42)
39Kena Jesus uhaele ikaha ma Jerusalem nokae kemouna esomo na{Oliv}, ehau poi aia nihaele imua la. Ia nakama kaukali aia la ekaꞌa vamuli aia. 40Keualoko nakama la ekae kemouna la, Jesus eme aꞌe nakama la, “Loku aꞌe Keakua pela okou mesekaoleole hia namea sala.”
41Kena Jesus ehaele ikaha nokoukuli ilalo noloku aꞌe Keakua ma, 42“Kamana. Poi aꞌoe hihai, ko kehalono lihu nei ikaha manau. Ia pena kaukali hea aꞌoe hihai, ia seai hea anau hihai.” 43Kena ke{enselo} kevaelani ukuu aꞌe nokonaꞌi kama la. 44Keualoko la, Jesus ehalono lihu haeꞌo, kena iloku hapulu. Ia keahoka aia usapusapu valuna kaꞌele, ehau poi kekoko eꞌo iho.
45Jesus uoki keloku, kena imasiꞌe iluna novaꞌai muli noꞌike nakama kaukali aia la emoe, maikinimea nakama la ealoha haeꞌo. 46Ko Jesus ime aꞌe nakama la, “Aiea okou emoe naea? Noho iluna noloku aꞌe Keakua pela okou mesekaoleole hia namea esala.”
Keonohenua ekaohi Jesus
(Mat 26.47-56; Mrk 14.43-50; Jhn 18.3-11)
47Kulana Jesus oikakala, keonohenua ukae aꞌe. Judas, hekama iloko sehui ma lua nakama kaukali kama la, ehakaꞌi aꞌe keonohenua la. Judas uhaele aꞌe ia Jesus ilavaa aia kevaisoni kama la. 48Ko Jesus ime aꞌe kama la, “Judas, aꞌoe evaisoni {kama ekipu kama} ihaꞌali aꞌe kama la i keonohenua la?”
49Nakama kaukali Jesus la uꞌike hea uapihi aꞌe la, kena ime aꞌe, “Kealiꞌi. Makou ivuhu ma napenisi makou?” 50Ia kekama hokahi nakama la navuhu avale ma penisi aia, nokuu pakalina laua kama heheaꞌu pohoulu hamakua namaakua la nosopo.
51Ko Jesus ime aꞌe, “Kiaꞌi.” Kena kama la uko pakalina kama heheaꞌu la nohamau aꞌe.
52Namaakua hamakua, ia ma napulepule kela lolosi hale kapu, lakou ma nakama hamakua na{Jiu} la usuꞌui ma keonohenua la nokaohi Jesus. Ko Jesus ime aꞌe nakama la, “Okou eo mai ma napulamoa ia ma nasiꞌa nokaohi anau. Okou ehakaꞌoko pela anau hekama ekahao sala? 53Keaho ma keaho anau enoho ma okou iloko hale kapu. Ia vahola okou sekaohi anau. Ia vahonei, okou esuꞌui ma namahi kepouli la nohamakua.”
Jesus imua nakama hananiu
(Mat 26.57-58,69-75; Mrk 14.53-54,66-72; Jhn 18.12-18,25-27)
54Kena kama la ukaohi Jesus nohakaꞌi kama la iloko hale kehale pohoulu hamakua namaakua la. Peter ekaukali vamuli, ia sehaele hakapili aꞌe Jesus. 55Nakama kehale la uhaula keahi imaka hale, kena inoho hakiꞌe keahi la. Kena Peter enoho ma nakama la hoi. 56Vahola, kaupu heheaꞌu la uꞌike Peter enoho kevahi keahi. Kama la ukoꞌa papu aꞌe namaisu Peter, kena ime aꞌe, “Kama nei ekakaꞌa ma kama la.”
57Kena iko Peter iꞌole pela, “Anau semakino kama na.”
58Kena kelaa kama uꞌike Peter, kena ime aꞌe, “Ame penaa. Aꞌoe hekama nakama la.” Ia Peter eme aꞌe, “Seai anau.”
59Kamasaika oia, kelaa kama hoi ekonaꞌi aꞌe, “Hamaoni la. Kama nei ekakaꞌa ma kama la. Kena hekama Galilee.”
60Ko Peter ime aꞌe, “Anau semakino hea aꞌoe eme mai na.” Ia saika kama la oikakala, kemoa kane la ukani. 61Kena ko Kealiꞌi ipehi noꞌili aꞌe a Peter. Kena Peter umanaku nakakala kela Kealiꞌi nime aꞌe i aia, “Imua kemoa kane ekani kepo nei, aꞌoe meiꞌole koukolu naualoko pela aꞌoe semakino anau.” 62Kena iko Peter ihaele kani ikaha.
Keonohenua ekakala hamemea Jesus
(Mat 26.67-68; Mrk 14.65)
63Kena napulepule kela elolosi Jesus la elili kia kama la, kena ikakala hamemea kama la. 64Kena nakama la esaisai pamalo namaisu Jesus, kena ipaku namaisu aia, kena ime aꞌe, “Haꞌali mai, oai kekama evuhu aꞌoe?” 65Kena ikakala haio aꞌe kama la pela hoi.
Jesus imua nakama hananiu
(Mat 26.59-66; Mrk 14.55-64; Jhn 18.19-24)
66Keualoko kahaka, nakama hamakua la eꞌuku hakoa lakou ma namaakua hamakua ia ma nakama polopolo nakuaa la. Nakama la ehakaꞌi Jesus ikuu imua lakou, 67kena ime aꞌe, “Poi aꞌoe o keMesaea, me mai makou.”
Ia Jesus eme aꞌe nakama la, “Poi anau eme aku pela anau keMesaea, okou mesehakina anau. 68Ia poi anau evasili aku okou, okou mesesui mai. 69Ia {kama ekipu kama} meinoho i kevahi laua Keakua i namahi aia.”
70Ko nakama la hakoa ime aꞌe, “Kena aꞌoe kekama Keakua?” Ko Jesus ime aꞌe nakama la, “Kena okou me mai na.”
71Ko nakama la ime aꞌe, “Kakou sehihai ilono alakakala hoi. Kakou sokakou elono kama nei ehaꞌali mai kesala aia.”
Currently Selected:
Luke 22: ojv
Highlight
Share
Copy
Want to have your highlights saved across all your devices? Sign up or sign in
© 1999, Wycliffe Bible Translators, Inc. All rights reserved.
