Luke 21

Kehoꞌi kaukuaha hine haaloha

(Mrk 12.41-44)

1Keualoko la Jesus uꞌike nakama haimoni epono namoni lakou iloko kepapa hale kapu. 2Ia Jesus uꞌike kaukuaha hine haaloha epono sasileni aia iloko kepapa la hoi. 3Kena iko Jesus ime aꞌe, “Anau eme aku kehamaoni. Kehoꞌi kehine haaloha la elaꞌa iluna nahoꞌi nakama la hakoa. 4Maikinimea nakama la eau aꞌe namoni lakou ekoe. Ia kehine haaloha la epono namoni haoki aia, sehimoni ekaꞌoko ikonaꞌi aia iola.”

Keseu hale kapu

(Mat 24.1-2; Mrk 13.1-2)

5Nakama kaukali Jesus la ekakala aꞌe nakipukipu hale kapu la; pela nahaku la elahi, ia nahoꞌi kela keonohenua eau aꞌe ma Keakua la ekaualeꞌa. 6Ko Jesus ime aꞌe, “Okou eꞌike namea kaualeꞌa nei. Imuli, nahaku nei hakoa meimaoha ilalo. Selavaa hehaku emau iluna alahaku.”

Nahalono lihu meikae mai

(Mat 24.3-14; Mrk 13.3-13)

7Ko nakama kaukali la ivasili aꞌe Jesus, “Rabai. Name nei hakoa meihuli mai vahohee? Makou meiꞌike nahaꞌaku pehe imakino makou pela name nei mehuli mai?”

8Ko Jesus ime aꞌe, “Lolosi hamakonu, iselavaa hekama kehailavaꞌa okou. Komaꞌi nakama meio aku i kemale anau, kena ime aku pela lakou niMesaea. Ia nakama la meme aku hoi pela kehaoki kemaalama nei ukae mai. Ia okou isekaukali nakama la. 9Keualoko okou elono nakaua ia ma nahakaukau, okou isemakaꞌu. Namea nei meiapihi aku imua kehaoki kemaalama nei, ia namea nei sehuli aku kehaoki kemaalama nei la.”

10Kena iko Jesus ime aꞌe nakama la, “Naonohenua meivuhu ma alaonohenua. Kenoholana meivuhu ma kelaa noholana. 11Komaꞌi nahenua meilulu hia kelulu henua haimahi. Ia keone la mekae aꞌe nahenua la, kena naonohenua meimake kehiꞌai ia ma namahana. Namea hamakaꞌu ma nahaꞌaku elahi meihuli mai i kevaelani.

12“Ia imua namea nei hakoa ehuli mai, keonohenua la meikaohi okou, nomeme haeꞌo kia okou. Nakama la meihakonu okou iloko nahale loku lakou, kena ipono okou iloko kelokapu. Nakama la meihakaꞌi okou imua nakuꞌu ia ma nakama hamakua {kaumani}, maikinimea okou ekapa kemale anau. 13Vahola, okou meikakala aꞌe nakama la nakipukipu anau. 14Ia okou isehakekele hea okou meime aꞌe la. 15Okou meme aꞌe nakama la nakakala makonu kela anau meau aku i okou. Ia nakama haihai manava okou la meselavaa kehakauꞌaa ma okou.

16“Ia vahola, namaakua okou, nakaina okou, nahaleaina okou, ia ma nasoa okou la meihakaꞌi okou i nakama haihai manava okou la. Kena nakama la meikaa alakama okou nomake. 17Nakama hakoa meililoko okou, maikinimea okou ekapa kemale anau. 18Ia sehimesala mekae aku okou. 19Poi okou ehakina i anau nokae kehaoki, okou meiko keola hamaoni.

Keualoko kehalono lihu

(Mat 24.15-21; Mrk 13.14-19)

20“Keualoko okou eꞌike nakama enoho pouli la ekuu hakiꞌe kemakaꞌina Jerusalem novuhu kaua, kena okou meimakino pela kemakaꞌina la meiseua. 21Keualoko la, nakama Judea mehulo i namouna iloko nomuni. Keonohenua iloko Jerusalem mehulo ikaha hoi. Ia nakama kapili aꞌe Jerusalem mesehulo iloko kemakaꞌina la. 22Nakakala kelauniu kapu ehaꞌali mai pela nahalono lihu la meikae mai. 23Nahine haikama ia ma nahine eisi nakamaliꞌi sasapai la mehalono lihu haeꞌo.

“Vahola, nakama enoho pouli la meliloko nakama henua nei, kena nakama la meihalono lihu haeꞌo. 24Nakama enoho pouli la meikalo keonohenua nei napenisi, kena meihakaꞌi alakama keꞌina nei nopono i nahenua lakou emao, kena meiseu kemakaꞌina Jerusalem. Kena nakama enoho pouli la mehananiu saika loloa.

{Kama ekipu kama} meihamai

(Mat 24.29-35; Mrk 13.24-31)

25“Nahaꞌaku meihuli mai i kelaa, i kemalama ialuna, ia ma nahekuu. Naonohenua kemaalama nei mekipuaina i kehua peau kemoana. 26Keakua meilulu kevaelani iseo konu namela naala lakou. Ia kena naonohenua la meioho nomakaꞌu i namahi kela Keakua ehuli mai i kemaalama nei. 27Vahola, naonohenua meiꞌike {kama ekipu kama} ehamai iluna napuleulehu eꞌiva la i namahi hananiu. 28Keualoko namea nei ehuli aku, okou isekipuaina. Okou meꞌike kekama mekonaꞌi okou la uhamai.”

29Kena Jesus eme aꞌe kakala hulihuli nei. “Ila aꞌe kelaꞌau ke{fig} la, ia ma nalaꞌau la hakoa. 30Keualoko nalaumea lakou la esomo, okou umakino pela keualoko haaua ukapili. 31Kulana okou eꞌike nahaꞌaku nei hakoa ehuli mai, okou umakino pela Keakua ukapili ihamai nohamakua kenoholana aia.

32“Anau eme aku kehamaoni. Kulana namenei hakoa meapihi aku, alakama kaukama nei meoiola. 33Kevaelani ialuna ma kemaalama nei meio nooki, ia nakakala anau selavaa keoki.

Kanakana kahi kehamai Kealiꞌi

34“Okou ilolosi hamakonu. Aoki okou meapikia nakahao okou. Alakama okou eunu kahi namevale, ia alakama okou ekipuaina haeꞌo naola lakou. Kena keaho hakonukonu la meikae aku okou 35poi kaiꞌi. Keaho la meikili nakama naꞌina hakoa iloko kemaalama nei. 36Okou iala kahi. Ia ainoa kahi aꞌe Keakua pela okou isao ikaha ma namea saꞌino kela meiapihi mai la. Pela okou meisenapa kekuu imua {kama ekipu kama}.”

37Keaho ma keaho, Jesus eaoaꞌo iloko hale kapu. Keualoko keiahi, kama la uhaele nomoe kepo iluna kemouna emale ma na{Oliv}. 38Ia kahaka, keonohenua la hakoa eo i hale kapu la nohalono kama la.

Currently Selected:

Luke 21: ojv

Highlight

Copy