Luke 10

Jesus ehaunalia kipuhiku ma lua nakama

1Kena imuli, Jesus ekini kipuhiku ma lua nakama, kena ihaunalia nakama la kai koꞌolua iloko namakaꞌina imua aia. 2Kena iko Jesus ime aꞌe nakama la, “Ila aꞌe. Nalaꞌau la huhui, ia nakama meio nohaꞌi la emoisi. Kena ainoa aꞌe Kealiꞌi kela ehamakua huaka la ihaunalia komaꞌi nakama iheheaꞌu iloko paupaꞌu aia. 3Okou io, ia lolosi. Anau ehaunalia okou poi nipunua {sipisipi} nonoho ma napoi leikama. 4Okou iseko nipunaꞌeke moni, ia ma niꞌeke, ia seko nakapuae hoi. Okou sekuu kahi nokakala ma alakama i keala.

5“Keualoko okou meikaꞌa iloko hale, okou eme aꞌe, ‘Noho laoi okou.’ 6Poi hekama kehale la enoho laoi, kena okou meikonaꞌi kama la ikauhano kenoho laoi. Ia poi nakama kehale la senoho laoi, kena okou meselavaa kekonaꞌi nakama na. 7Ia okou inoho iloko hale kehale hokahi oia. Okou isehahaele huli nahale. Ai naꞌai ia unu nia nakama la meau aku okou. Maikinimea nakama heheaꞌu ekau keko nasui lakou.

8“Keualoko okou meo iloko kemakaꞌina, kena nakama kemakaꞌina la eko okou, okou iꞌai niꞌai pehe nakama la meau aku. 9Konaꞌi nakama lavea la, kena ime aꞌe nakama la hakoa, ‘Vahonei Keakua ukapili ihamakua okou.’

10“Ia poi okou eo iloko kemakaꞌina, ia nakama kemakaꞌina la seko okou, kena okou uo valoko naala na, kena me aꞌe nakama la pela, 11‘Makou mekahi nakaꞌele kemakaꞌina nei kela emau navae makou, imakino okou pela okou esala. Okou imakino hoi pela Keakua ukapili ihamakua okou, ia okou sehihai kama la.’

12“Anau eme aku okou pela, i keaho kehakonukonu, kehalono lihu nakama iloko Sodom mesekae kehalono lihu nakama kemakaꞌina okou ekaꞌa la.

Jesus ehamakaꞌu aꞌe nakama sehakina

(Mat 11.20-24)

13“Okou nakama Chorazin mehalono lihu. Ia okou nakama Bethsaida mehalono lihu hoi. Anau ehuli aku okou namahi Keakua. Ia poi anau ehuli aꞌe namahi Keakua pela hoi iloko namakaꞌina Tyre laua ma Sidon, nakama la amekiꞌe ikaha ma nahaisala lakou. Nakama la ameleleu napamalo aupuu, kena inoho i keꞌina nalehu.*f7* 14Kena i keaho kehakonukonu, kehalono lihu okou la melaꞌa iluna ma kehalono lihu nakama i Tyre laua ma Sidon. 15Okou nakama i Capernaum ehakaꞌoko pela Keakua mesau okou ialuna nokae kevaelani? Ia seai. Emeia kama la melaku iho okou ilalo i keꞌina keahi.

16“Ame hekama ehalono okou, kama na ehalono anau hoi. Ia ame hekama sehihai okou, kama na sehihai anau hoi. Kena kama na sehihai kekama kela ehaunalia iho anau.”

Satan ukeiho

17Kena kipuhiku ma lua nakama kela Jesus nihaunalia la evaꞌai mai muli. Nakama la uhihia haeꞌo, kena ime aꞌe, “Kealiꞌi, keualoko makou ekapa kemale aꞌoe, nakipua saꞌino la ehalono mai makou.”

18Ko Jesus ime aꞌe nakama la, “Anau eꞌike Satan ukeiho poi heꞌemo ikaha ma kevaelani. 19Anau eau aku okou namahi ikakaꞌa naꞌaka ia ma naheunu. Ia anau eau aku namahi iluna Satan hoi. Ia kena sehimea memea okou ihalono lihu. 20Ia okou sekau kehihia pela nakipua saꞌino la ehalono okou. Emeia okou ikau kehihia pela namale okou emau i kelauniu kela emoe i kevaelani la.”

Jesus eloku aꞌe Kamana

(Mat 11.25-27; 13.16-17)

21Keualoko la, Jesus ehihia i namahi Keanana Kapu, kena ime aꞌe, “Anau ehamaha i aꞌoe Kamana, Kealiꞌi kevaelani ia ma kemaalama nei. Maikinimea aꞌoe ehuu namenei ikaha ma nakama kela ehakaꞌoko pela lakou ailoa, ia ehaꞌali aꞌe namenei i nakama sehimea ailoa.*f8* Hamaoni Kamana, aꞌoe ehuli aꞌe namenei ikaukali hea aꞌoe hihai.”

22Kena Jesus eme aꞌe keonohenua la, “Kamana anau la ehoꞌi mai namea hakoa. Sehikama eailoa kekama Keakua, kela Kamana soia eailoa. Ia kekama Keakua soia eailoa Kamana aia la. Ia kekama Keakua la elavaa kehuli aꞌe Kamana aia la i nakama aia ekini la.”

23Kena iko Jesus ime aꞌe nakama kaukali aia la solakou, “Okou ehakapu lia Keakua, maikinimea okou eꞌike hamaoni. 24Anau eme aku okou, komaꞌi nakama hakae nakakala Keakua, ia ma nakuꞌu imua la hihai iꞌike hea okou eꞌike la. Ia nakama la seꞌike namea la. Nakama la ehihai ilono nakakala okou elono la. Ia nakama la selono nakakala la.”

Kekama Samaria kaualeꞌa

25Kena iko kekama epolopolo nakuaa imasiꞌe iluna ihahani Jesus, kena ime aꞌe, “Rabai, anau meiko keola eola kahi pehe?”

26Kena Jesus eme aꞌe kama la, “Hakaꞌoko aꞌoe nakuaa la eme pehe?”

27Ko kama hamakua la ime aꞌe, “Laoi Kealiꞌi koAkua ma nahakumanava okou, ma naola okou, ma namahi okou, ia ma nahakaꞌoko okou. Ia hoi, Aꞌoe ilaoi alakama ihau poi aꞌoe elaoi soꞌoe.”

28Kena Jesus eme aꞌe kama la, “Hakaꞌoko kela aꞌoe eme mai na ekonu. Aꞌoe ikaukali nakipukipu nei, kena aꞌoe meiko keola eola kahi la.”

29Ia kama polopolo nakuaa la hihai keonohenua la ihakaꞌoko pela aia iailoa laoi. Ia kena kama la evasili aꞌe Jesus, “Oai kekama anau meilaoi na?”

30Kena Jesus uhapili kevasili kama la, “Kela hekama na{Jiu} amaka i Jerusalem nohaele i Jericho. Kulana kanaka la nihaele valoko keala, nakama ailalao uo mai nokaohi kama la, kena iko naheaꞌu kama la. Kena nakama la ekaa kanaka la nokapili imake, kena ikiaꞌi kama la nomoe kevahi keala.

31“Keualoko la, hemaakua na{Jiu} ehaele iho valoko keala la. Ia kama la uꞌike kanaka la emoe kevahi keala la, kena ikaa kelaa vahi keala la nohaele. 32Kena hekama heheaꞌu hale loku ehamai hoi. Ia kulana kama la uꞌike kanaka la, kama la ukaa kelaa vahi keala la nohaele hoi.

33“Ia kena hekama Samaria ehaele valoko keala la hoi, nokae keꞌina kanaka la emoe. Ia keualoko kama Samaria la uꞌike kanaka la emoe kevahi keala la, kama la ualoha haeꞌo. 34Kena iko kama la ihaele aꞌe nonini {malaseni}*f9* iluna naꞌina emoku, kena iamusi naꞌina la kelo hala, kena isaisai napamalo, kena isau kama la nohamoe iluna ke{donki} aia. Kena kama Samaria la uhakaꞌi ke{donki} aia la i kehale kapili aꞌe, kena ime aꞌe kama hamakua kehale la ilolosi kanaka la.

35“Kela aho, ko kekama Samaria la iau aꞌe sasileni nosui aꞌe kama hamakua hale la, kena ime aꞌe, ‘Lolosi kama nei. Poi aꞌoe nimoni elano kama nei, kena anau mesui muli aku keualoko anau mevaꞌai mai muli.’ ”

36Kena iko Jesus ime aꞌe kama epolopolo nakuaa la, “Hakaꞌoko aꞌoe eme pehe? Kama hee iloko koukolu nakama la elaoi kekama kela ekaia nakama ailalao la?”

37Ko kama polopolo nakuaa ime aꞌe, “Kama kela elaoi hamaoni kanaka la.”

Ko Jesus ime aꞌe kama la, “Aꞌoe haele. Laoi alakama pela hoi.”

Mary laua ma Martha

38Keualoko Jesus ma nakama kaukali aia la nio, nakama la ekaꞌa iloko kemakaꞌina, kena kehine kemakaꞌina la emale ma Martha eko Jesus ikaꞌa iloko hale aia la. 39Ia kaina aia la emale ma Mary.

Mary enoho kevahi Jesus nohalono nakakala kama la. 40Ia Martha uapikia lo, maikinimea aia ekanakana komaꞌi haeꞌo naꞌai, kena ime aꞌe, “Kealiꞌi, aꞌoe sehakekele pela kaina anau la ukiaꞌi anau ikanakana namenei hakoa sonau? Me aku kama la ikonaꞌi anau.”

41Ia Jesus eme aꞌe, “Martha, aꞌoe ehakekele namea hakoa aꞌoe epena la. 42Ia aꞌoe isehakekele namea komaꞌi. Hakekele kemea hokahi oia. Mary ehakaꞌoko kemenei,*f10* ia sehikama melavaa kepui kama na.”

Currently Selected:

Luke 10: ojv

Highlight

Copy